Good Friday lungngaih ~ Rev. Zam Khat Kham

Good Friday lungngaih ~ Rev. Zam Khat Kham

Jerusalem khua pua Calvary zong a kici Golgotha mual tungah i Topa a kikhaina singlamteh ding viuveu hi. Amah guak hi lo-in a ziat a vei ah misuam guta nih zong amah tawh kikhai khawm uh hi. Amah guak kikhailum lo a, mi dang nih tawh kikhai khawm ahih teh a “nuamtuam” zaw deuh ding hiam? Khattang sawl bang heii lo zaw deuh i ci thei diam?

Singlamteh i cih khuam kiphut tungah a baan ding a pheilama sing kikhen ahi hi. I Topa tua sianglamteh tungah kikhailuma, tua mun ah Pasian’ itna (God’s love) leh Pasian’ thutanna (God’s justice) kituah lian hi kici thei hi. Singlamteh i et ciangin tawikhaina tawh zong kibanga tua lai ah leitung mi khempeuh tawi kikhai-in Pasian’ mai ah lek zo lo uh hi. Bang hang hiam cih leh mi khempeuh a mawh uh a Pasian’ minthanna a ban zo kei uh hi (For all have sinned and fall short of the glory of God) (Romans 3:23). Pasian’ maipha a ngah zo om lo hi, Pasian tawi khaina ah a lek zo om lo hi.

Tua lai mah ah, i Topa in a khutte zaakin kikhai-a leitung buppi ama’ kiangah a ciah kik dingin hong sam tawh kibang hi. Hong sam takpi hi. Lim kisuai khat ah Topa’ singlamteh lim kisuai a, a gei ah lai kigelhin, “Bangzahin hong it na hi hiam, Topa?” ci-a ka dot leh, “Hih zah” ci-in a khut nihin zaakin a lu kun sukin a si hi, kici citciata bun ka sa mahmah hi. I Topa singlamteh tungah kikhai hi.

I Topa’ ziat leh vei ah misuam guta nih kikhai hi. Ha gawisa-in miteng phuisamin vantung leh leitung kikal huih lakah kikhai uh hi. Hanghang uh hi. Awngawng uh hi. Hamsia kam sia vive pau uh hi. A dak khawng uh khawngkhawng uh hi. A tawpna ah tuate’ lak pan khat in i Topa’ lam ah hong kiheii-in, “Na kumpi gam sung na tun ciangin kei hong phawk in” ci thei ta hi.

I Topa a sih ma-a a zak kam khum nunung pen ahi hi. Biakna makaite’ tung pan hi lo hi. A it a nungzuipa’ tung pan hi lo hi. A singlamteh phunga ding a nu’ tung pan zong hi lo hi. Misuam guta khat’ tung pan ahi hi.

I Topa’ kam panin, “Thu tak kong genin, tuni-in kei tawh paradise ah na om ding hi” cih kammal a zak ciangin tua misuam gutapa’ adingin singlamteh tunga a thuak gimna panin a van zang lian hi. I Topa’ ang sung tung lian hi.

I Topa’ gei a misuam gutapa’ thu bangmah i thei kei hi. Bangzah taktak gu khin hiam? Mihing bangzah that khin hiam? Bangzah taktakin tatsia ahi hiam? Kua’ a gu hiam? Koi ah gu hiam? Bang hangin tua bangin gamta ahi hiam? Guta buluh, misuam (thief, robber) khat hi cih ciang bek i thei hi. Tua bangin tatsia ahih manin a nu’ khitui luangsak ngel ding hi cih ciang kingaihsun thei hi. A pa’ lam-etna khempeuh hawmsak hi cih ciang kingaihsun thei hi.

Thu dang khat zong i thei lai hi. Mihonte tawh kopkhawmin i Topa na zahko hi cih i thei hi. Matthew in hih bangin gen hi:

Siampi liante, thukhamhilh siate le makaite in zong tuamah bangin a zahko uh hi. Amaute in, “Amah in midangte hon zo napi amah le amah a kihonkhia zo kei hi. Israelte Kumpipa ahih takpi leh singlamteh tung panin tu in hong kumkhia hen. Tua hi leh amah i um ding hi. Amah in Pasian muang in, ‘Pasian Tapa ka hi hi,’ ci ahih manin Pasian in a hotkhiat nop leh tu in honkhia tahen,” a ci uh hi. Amah tawh a kikhaikhawm misuamte in zong tuamah bangin a zahko uh hi” (Matthew 27:41-44 ZSV).

Tua mahbangin i Topa tawh a kikhai khawm guta misuamte (a tam genna hi a, a nihun) i Topa zahpihin mukpiksan, lupeisan uh hi.

Dotna: Tua misuam gutapa in bang a cih leh a lungsim khel lianin Zei a up a muanna a kamin pulak hi ding hiam?

A dawnna: Peter in a gal pek pana a muh a zakte tua misuam gutapa in a nai panin mu-in za hi. Peter in: “‘Amah in mawhna bawl lo a, ama kam sungah zong khemna a kimu kei hi,’ Amaute in amah a zahko uh ciangin thukkik lo a, a thuak laitakin a tawng thuk kei hi. Tua sangsikin tangtaka thukhenpa tungah amah le amah a ki-ap zaw hi” (1 Peter‬ ‭2:22-23‬ ‭ZIV‬‬).

A paang kibenga a kicilphih laitakin i Topa in thukkik lo hi. Ling lukhu kikhusaka a kisimmawh laitakin thukkik lo hi. Caesar’ thukhen zum sanga sang zaw vantung thukhen zum ah a thu ko lel hi. Pasian in tua mite’ mawhna a thuhkik nadingin thungen lo-a Pasian in tua mite’ mawhna a maisak nadingin thu na ngen zaw hi. Amah a bawlsia mite’ ading bekin thuumsaka ama’ adingin thuum lo hi.

Tua misuampa in tua bang mi a khan sungin tuak ngei nai lo hi. I Topa a et ciangin muhdahna mal khat zong mu lo, zahpihna them khat zong mu lo-in thukhenna zong mu lo-a maisakna bek mu hi. I Topa’ kam pan amah a bawlsia mite’ ading a thuumsakna kammal a zak ciangin i Topa’ lam ah kiheii-in a neih sunsun upna tawh thu a nget theih bangin ngen hi. “Na kumpi gam sung na tun ciangin kei hong phawk in (remember me when you come into your kingdom) ci-in ngen hi.

Thei lian hi. A si dinga sing tunga kikhai Pasian tawh a kikhai khawm ahih lam phawk thei hi.

Tua misuam gutapa in theology tampi thei lo ngel kha ding hi. Ahih hangin Zeisu pen Kumpi hi a, kumpi gam nei hi cih thei hi. Ama’ kumpi gam hih leitung ahih lohna zong thei hi. Tua kumpipa in a mawhna maisakin kilawm lopi mahin a kumpi gam sungah lutpih thei ding hi ci-in um hi.

Tua mah zong lah kicing lel hi.

Topa tawh a kimuh lian ciangin a khantawn a tatsiatna khempeuh kisiangsak lian hi. A mawhna kimaisak hi. A tatkhialhna kisiikkik nawn lo hi.

Hi thei ding hiam? na ci kha ding hi. Mihonpite’ simmawh kosiatna tuazaha a gamlum lakah, singlamteh tunga a kikhaina bangzahin na mahmah ta leh, Zeisu in a Pa’ sawl nasep mah sem veve hi. A sih kuan nangawin natna satna tuazaha a thuakna kawmkal ah, vantung hauhna, mawhmaisakna mah na tangko lailai hi.

Thungetna:

Topa aw, singlamteh tunga tua misuam gutapa bangin upna mit tawh nangmah hong en theisak in. Nangma’ mittang sunga tua pa in a muh mawkmaisakna ka muh theih nadingin hong hehpih in.

Kei zong tampi ka gu khin zo hi. Mi ka gensiat khak ciangin mite’ vaang leh min hoih min pha a guksak ka hi hi. Tua bangin kei’ vang zong ka beisak hi. Ka heh ciangin ka aw sang kha thei a, kilemna a om loh nadingin nopna a gu mah ka hi hi. Mawhna leh ngaihsutna a ninte ka lungsim sungah ka ngaihsut ciangin, mi dangte’ manphatna a guksak ka hi a, nangma’ it luat mite keima’ huaihamna-in ka zang hi.

Mi khat a khasiat nadingin ka kampau ka gamtat ciangin, tua mi’ manphatna a sut a gu ka hi a, ka piak kik theih ngei loh ding zahin ama’ tung pan a guksak ka hi hi. Thumaan gen napi-in itna tawh ka gen loh ciangin, nangma’ gam tawh kinai lo zaw-in nangma’ gam tawh a kigamla semsem dingin mi khat a notkhiakhia ka suak hi. Kei, gutapa, hong phawk in. Hong mangngilh kei in, Topa Kumpipa aw.

Ka nuntakna kimanna nei lo-in ka zanga na mai ah guaktangin ka ding hi. Puan hong guan in. Ka kha gilkialin ka lungsim hawm hi, an hong vak kham in. Mawhmaina lunggulhin na mai ah dangkeu-in ka ding hi, ka muk kei phinphian tungah na lainatna a malmalin hong tak in. Na gam sung kong tun ciangin nuihmai-a nong dawn theih nadingin nuntakna maan hong neisak in. Kei zong, nang tawh paradise ah ka om ni ding ka ngaklah hi, Topa aw. Amen. Rev. Zam Khat Kham