Vantung leitung Zogamnuam
Mihingmasate thumanhlohna gah, mawhcilna tawh a kizomto mawhnate’ henkol pan-in, suahtaakna Edenthak a kingah nading’ a kisam thukhat-lampikhat bek om cih pen Christian upna bulpi a hihi. Tua thu-in, mihingte thumanglo, ginahetlo, mawhnei mahmah tale zong, a tapa khatbek a piakdong in, a itvauvau itna pen tel leh sang in, upding a hi ziau hi. Tua suahtaakna Edenthak ah, “Ken kong it bang in, note khat leh khat na ki-it un”cih thukham khat bek a om ngeu hi.
Hoih leh hoilhloh thu hilo in, ki-it kizopna tungtawng in, maipha kipiakna pen gum ih ci hi. Matlehhen a tuakkhat, a kingen liausum, a kipiaksakna tawh lakkhiatna pen tankhia ih ci uh hi. Gupkhiatna leh tatkhiatna kibang lianlo a hih hang hamphatna a kibang suahtaakna veve a hihi. Tua suahtaakna ngah nading in, a ngahdingte sepna omlo aa, midang sepsakna a hihi.
A nung ah a suakta te lungdamh theihtheihna dungzui-in, kilak kik ciat hi. Thunung thuma, taangthu thupiang ngaihsun val’val’ selo-in, laamsai in lungdamh na, suahni sihni thawkkiikni cihbang ciamteh selo in, tatkhiatma hunlui tung ah a kinga ki makaihna, phunlo puamlo daaitak in suahtaakna hong pia pa tawh tukhawm khawlkhawm hithiat in, eitaang’ a thuak gimnate lungngaihna tawh itna lak, lungdamkohna cihbang a tuamtuam in, a omtek hi.
Bangbang hi-leh, itna pan hong luang khia gupna hang in, a kibuakhia a tapa sisan tawh a kitankhia nuntaakna thu a um peuh mah in, vantung leitung lungnopna tawh kidim gamnuam ah a teeng a hi uh hi. Banghanghiam cih leh, Pa itna bek hilo-in, a tapa inzong a nuntaakna a piakdong in a pa thu a manna mun hi aa, kithutuakna leh kilemna a omna mun a hihi. Hih thu a um, teelna a ngah, Zomite omna peuh, vantung leitung Zogamnuam a hi pah hi.
Tua hileh teelsa tatsa te-in, leitung Zogamnuam a tuam in, lunggulh kul lai ding maw leh?
Leitung mite ih hih man-in, leitungthu tawh, gamnuam ngahna ding a hanciamte lam pan a ki-et kik ciang in, a tung aa lampi khat bek om nawnlo in, lampi tuamtuam ki om sak hi. Khual-ul kaaina ciang bek ninawnlo-in, sisan naisan zong a luanna zong a om hi. Leitung mite hanciamna pan a gahkhia thuhoih thupha a ommah bang in, thusia lasia inzong tuamcip thei hi. Kamgen tawh gualzawhna a ngahsawm leh, hiamtawina tawh a ngahsawm namnih a om hi.
Zogamnuam a pianna ding in, Zomite zong lampikim zui in, ki hanciam toto hi. Tua kawmkal ah, Kawlkumpite kikhelhun-buainate in zong a kaalhelh zeelzeel hi. Mipicing lungsim pua in, kam kikupna , kam tawh ki genthei ding (dialogue and non-violence) lam-etna tawh mipi te kikalsuan masa phot zeel hi. Tudong mah tuazawi a tawn mimal leh kipawlna ki omlai hi. Tua lak ah ZCD party zong a kihel hi.
NLD party zong non-violence kimakaihna himah leh, NLD makaihna CRPH leh NUG in self- defence minvawh in, hiamtawina tha a piakloh, a pomloh phamawh dinmun a tungphialta uh hi. Theihhuai khat ah, tutung Kawlgam buaina pan a phulkhia hiamtawi kipawlna tuamtuamte pen NUG khutnuai pan a piangtawm a hikei hi. A hizong NUG in,mualtungmi hiamtawisa te tawh khut kilen in nasepkhopding a piangsakzo naikei uh hi. A hang tampi om ding aa, Zomi makai te’n zong pa lungsim nei aa, a mipihte bit ding leh lungnopding a deihsak takpi uhleh tua a hang te’ theihhuai kanhuai thu a hihi.
Kawlgam vai a sakhi tuinek in ki pan leh, kamsiatna tawh gam-Suahtaakna pen kawlmite sungmah political party leh mimal kilangdona kikawmkal pan a piangkhia a hihi. Tua kilangdona hang-in zong, General Aung San a kisuam lum hi aa, a kipatna hoih hetlo mawk hi. Party a khiatna in a tuamtek cihna a hih mah bang cidamlo innsung leh gamsung ah om in a kizatciang in, thu kitoknuaisak semsem hi. Potical Party pen, gamnuam gamkhosa mihing khat leh khat ki zahtaak ki thusimna gamte in a khantoh semsem nading un, a siksan uh kalsuanna khat a hihi. A deihna bulpi in, gammite huai khial,enkhial cihbang a omlohna ding a hi pen hi.
Tua hi aa, Zogamnuam taangthu hoih tawh a phutnuam takpi te in, political party hun tawh kalsuan hun a hi kei aa, National movement bulphuh ding a hihi. Haaikeh a langbai sung ah tuidim theilo ding aa, pheituam tawkeekpi leh zip kailopi-in, mimai ah ih dinnop hang in, hong kinuihsan lel ding hi. A sawtlo in tua a langbaai haaite kimeek cip in, pheituam ki-awh ginggeng nagawn zong hong kikaih keeksak lai ding aa, zumhuai toto ding a hihi. A sanggam a elna in, midang khat tawh a sanggam suamding kipan khat mihing-lungsim nei a hi kei hi. Bangbang a hizong, a sanggam a gum veuveu, ka sisan a ci-van’van’ zolo khat in, Zogamnuam satzo hetlo ding a hihi.
Thulianpi khat a kivaihawm ciang in, a vangkhauh a hih manin, a langpang omden hi. Tua a langpang te pen midang hilo-in, innsung thuthei khatmah a na hi zeel hi. Judas zong a muanhuai nungzuipi sung panin zong, a sumkem uh ahi lai hi. Galone U Saw zong Aung San tawh ki midang hetlo hi.
Zogamnuam phut na ding a langpang tantan nuam, hizobang hileh Zomi a beisak (genocide) nuam phialmawk pen, Zomite tawh ki nahvawh a ki naihuai, sanggam meltheih, mipil leh mitei, mimuanhuai akicite mah a na himawk uh hi. Pawlkhat in, a sep uh a thei kha kei uh hi. “Father, forgive them because they know not what they do”, cih kammal pen tuma 2022 laipek in kiza khinzo hi aa, tuciang dong kizaza lai tawh kibang hi.
Vantung leitung a bawlpa aw, nong piaksa Zogamnuam a bit, a kho nading in, Good Friday nii aa a kibuakhia na Tapa sisan lo-ngal, a dang sisan luangsak nawn kei in, ci-in kong thum uh hi. Nantal’suan
Comment piaknop aomleh...