Damdawi lianpen

Damdawi lianpen

“Tuhun teh mite in hih leitung sihna a piangsak bulpi mahmah pen zong mawhna ci nuam nawn lo uh-a natna ci ta uh hi. Tua ahih manin mite in Syavuan Syamah zatui zaha bek kisam sak uh a, mawhna pan kisikna thu mangmat sawm nawn lo uh hi.”

Mawhna thamanh in sihna (Rom. 6:23) ahih manin mi khempeuh kisi hi. Ei’ hun hong tung nai lo hi bek hi. Mawhna i cih pen i mawh phetin a kisi hi pah sam lo hi. Tua ahih manin “Kua mawhzaw cih Pasian in thei lel inteh” i kicihte khawng hong piang ahi hi.

Tu le tu tawmin a thuak pah loh hangh a thuak niteh baih lo ding hi” i kicih khawng mawhna thamanh sihna thu om limlim ahihna a gengen ihi hi. Khat le khat kimawhsak tuan ding ahih loh hangin i mawhna thamanh tek khatvei ni ciangh a kisih pih tek ding ahi hi.

Hih leitungah leitung mite in upmawh lohpi Pasian theih loh kal khat-in kituah sia gawp ahih manin nat le sat le sihna hong lut hi, lawmlawm mahmah ci-a Pasian ngawh theih hi lo hi. Eimau’ uttawm thu tawh mawhna bawlin sihna a piangsak Pasian’ Thukham i palsat tek hang hizaw hi.

Natna satna sihna leitungah hong tung gawp ahih manin Pasian huhna kisam ciang bek kihi lo zaw-a, natna sihna a piangsak i mawhna pan Pasian’ hehpihna lianpi tak a kisam tek ihi zaw hi. Banghang hiam cihleh natna satna khempeuh pen Pasian in a phal mawhna daan ahi hi.

Lungdamnathu: Ahi zongin i Topa Jesuh tawh i kipawl manin Pasian’ hong piakkhong pen nuntak tawntungna ahi hi. Damna bukim taktak pen Mawhna pan kisik-a Jesuh Khrih Tanpa le Topa a sanna sungah omzaw hi. Pumpi cilesa a cinat ciangin Syavuan Syamah i kisapna a tuam hi-a ahi zongin tua nangawn kisikna le thungetna mah tawh kop hamtang ding pen i damdawi lianpen ahi hi. Evan. Suangh Dal