George Washington Tangthu ~ Timothy Naulak

George Washington Tangthu ~ Timothy Naulak

George Washington pen United Stated of American(U.S.A) gam kumpi sem masa pen ( The first President of USA, 1732-1799 AD) leh Britain te kiang pan in American gam suahtak na angahsak pa ahihi.Laisin nalam sangkhol lo leh galkap lamnasep zong kiva khawllo , politic lambangphadiak uk lawmlawm khawllo hi.Ahihhang angiim na, ahansan na leh amah leh amah akiuk zawh mahmah man in makai thupi leh milawhcing mahmah khat leh mi minthang te lak ah kihel zo khat ahihi.

Washington pen American masapen( first American) cih den uhhi.U.S.A gam din pa ci theihangh. George Washington pen kum 1731 February,11 ni in Virginia gamsung aa om Westmore ah ongpiang khiahi.(Westmore pen Wakefield ci in kikhel khin hi). George Washington te inn ih pupi uh pa John Washington pen 1657 kumin England gampan in Virginia ahpem hi. American gam ah apem khitzawh in zong innkuan thupi azahtak huai khat, inn leh lo gamnei khat hiin, gam zaipitak nei in sum zuak sumlei namunkhat zong phuan in, van bawlna dan khawngzong nei in haumahmah hi.

Washington ih pa Augustine Washington in azi masa tawh ta li nei in, azi nih naMary Ball tawh ta guk neihi. Tua ata aguk sunglak pan in Washington pen a upen ahihi. Augustine in gamza pi tak nei in bawngkhawi in, zanah ciin nalo zongzaipi taknei hi. George Washington inzong ahun tampi tak huan nasep naah zang denhi. Sangkah laisin sangpipi sin nading hun neiman lo in, lo nasep lam uk inzong siam mahmah aa tenchia(mathematics) leh thukan cian (survey) ahih leh bel siam khia lua mahmah hi. George kum 11 ahih lai in apa Augustine ongsi in, a u Lawrence nungzui pen mai hi. Lawrence in Virginia state sung ah gamnei mihau mahmah khat Fairfax inn kuan sung mi khat zi in la hi. Lord Fairfax pen England pan in Virgina ah ongtai (pem)tak ciang in Washington tawh ongkimeltheih mahmah uh aa, Fairfax in zong deihsak in, alaisim inn(library) pen Washington in metpih mahmah in, natam tak sinkhiat(theihkhiat)pih lawhhi.

1748 kum in Lord Fairfax in aneihsa gam acre million bangzahhiam khat aa zai acingakem dingin Asst. Surveyor dingin George Washington cial hi. A maikum takcing in Surveyor dingin cial leuleu hi. 1751kum in a u Lawrence zui in West Indies aa Barbados mun ah pai in, hih lai mun ah Washington in zawngnat na vei in, amai zong maam zol zonawn lo in omhi. Akhualzin khit zawhdeuh ciangin a u Lawrence zong ongsi hi. Lawrence in aneihsa agam pen George akem ding in leh agam pen a tanu pia hi. Lawrence ii ta nuzong ongsi ahih man in George inzong agam khempeuh ongnei ta in, gamneipa mihau khat ongsuak tahi.

Washington in lo khawhleh thaiciin uk mahmah in akhantoh theih nadingin zong lamtuamtuam tawh hanciam mahmahhi. Agam sungteng enen in gam hoih namun amuh te pen lo ding in hoih dinghi cih theihi. Hih gam ah lo neih nagam, kumpi gam ahau mahmah ongpiantheih nading in en in ngaihsun keei den hi. Mount Vernon aa agam zaimahmah pen midang etteh theihding in lim zepmahmah hi. England pan in khaicii hoih leh lo azat ding van vaikhak den hi. Hih khaicii te ciing in sin na(test) khawngzawng bawlden hi. A gam aending in Sal(slaves) zanih val khawng sawl in, mipil misiam bangzah hiam khawng zong nasem in cial hi. Zu bawl na munzong phuan in,tuu mul pan in tuu mulpuan(wool) bawlna nei hi, za nah ciin namun zaipi khat zong neihi.(Nidang lai sawtnai lo khat in Virginia Cigarettes tampi tak India gam ongtung in Mizogam sung ah zong kizel mahmah hi. MSD).

Washington in ami sawltak nasem te pen tentan(training) hoihtak pia in sum alut leh apusuak hoih tak in ciamteh sitset hi. Tentan (training) hoih tak apiak nasung ah khatpen hih ahihi: ” Pil na khempeuh lak ah, maat (penny)khatzong zanglo aa ihkhawl na in maat(penny) khat ih thalawh ahihi.” cih hi. Kum 1750 kipan lam akipan in Britain leh France in Ohio zanggam kituh in kido uhhi. Kum 1753 tak ciangin Virginia Governor Robert Dinwiddie in George Washington pen France pawl tawhkimu ding in sawl hi.France pawl in ana dawn na uh thupen lungkim huai lo salua ahih man in Washington pawl in zong galkap bangzahhiam khat sawl in, hih tungintangthei tak mel lo uhhi.

Kum 1755 tak ciang in British kumpi in Gen. Edward Bradock pawl gal kap tampitak gam muding in sawlhi. Hih atung in Washington pen galkap makai tavuan pialo in ahih hang galkap ulian te ngaihsut pia leh gam sung lam hilh dingin paisak hi. British galkap pawl in French pawl kulhpi Fort Dequese atun ma in, French pawl in naleh do vat mawk hi. Washington te pawl bel ahih leh buai thei khiamahmah uhhi. Ahih hang in hih tungin Washington hansan na thu thangmahmahhi. Tuahang in Governor in Virginia galkap makai Colonel za ahkahsak hi. Kum guk sung British pawl nuai ah asepsung in kido lianpipi om lo in, misiat nadingzong omtuak lohi. Kum 1758 tak ciang in acidam na hoih loh man in galkap nasep khawlsan ta hi. Hih hunpa kipan kum17 sung Mount Vernon ah ama gam keem in ahunzang hi. Kum 1759 in meigong mihau mahmah khat Martha Dandridge tawhkiteng hi.Martha pen alawm ngaihmasak pen hi lo in, nihvei bang tak hih ma in angaihte tawh kikhen khin ci’ ci uhhi.Martha tawh nupa kilungtuak mahmah hi in, ta ahih leh nei lo citciat hi. Martha ii ta neihsa teng pen ata neih sun uh ahi hi.

George Washington in khanglam ah gamlei in thaiciin na ding tuilam khawngbawlding angaihsut laitak hun in, British kumpi in Appalachian mual khen lam aa om Red Indian pawl ten na muh ah luttheih lo nading thusuahkhia uhhi. Washington in bel thupi ngaihsut sak loin Ohio zanggam lam ah gam lomun leiding in misawl hi. Ohio leh Palomac kikal tuilam pi ding agel laitak in Quebec Act (Quebec thukhun) bawluhhi. Hih thukhun in American gam sungaa tengte ading in Ohio leh Missisipi gam sung ah lutding phallo hi. Hihthu khun pen Washington leh gamnei midang te ading in huathuai mawhloding hi. Tuakhitciang in Stamp Act, Tea Act te ong suak hi. Hih thukhun in American gamsung aa tengte pen lamtuamtuam tawh gakcip in siah tampitak piak ongkisam ta hi. Tuapen deihlo in British kumpi langpang in tapawng lianmahmah ongpiangkhia hi.

Kum 1774 september kha in gambup kikhoppi (continental congress) masapen kisam hi. Hih laimun ah George Washington zong Virginia palai(sawltak) lak ah khat inkihel hi. Hih khawmpi pen Philadelish kibawl in kal sagihsung khawmpi kinei in British kumpi tung ah lungkimloh na nasia mahmah hi.Tapawng kipan hipen mai hi. Kum 1774 – 1775 khuadam hun(phalbi)hunsung in Washington in Conatinental Association leh tualsung committee te huhding in galkap phuanhi. Akisap leh British galkap tawh kido ding in kithawi uhhi. Continental Congress anihvei na pen Kum 1775 May, 10 ni in tu uh aa, khawmpi aneih laitak in Boston kiang ah kido na pianghi. British galkap pawl New England ah ateng mi 14000 kiim ding man uhhi. British Parliament in Massachusetts state pen tapawng hang in gambuai in genkhia uhhi. Philadelphia kikhoppi ah Washington pen agalkap puan tawh kikhop na ah kah(kihel)hi. British pawl doding in akiginkholh thu zong gen hi. June kha ong tung ta in, Congress in Continental Army phuan in, Boston kiim ah tapawng pawl zong hih pawlah lut pahuhhi. Jun ni 15 ni in Washington pen General za kipia in lungkimtak in galkap makai mangpi (Commander – in- Chief) dingin tel uhhi.

Washington pen pasal thasang, melhoih, maibeem,kha guh kual khat ahihi. Amit kua thuk lua ahihman in maingap huai mel puakhawllohi. A mahleh amah kiuk zo, muan huai mi ahih man in midang zong amahleh amah akiuk zawh ding alamen ahanthawn khatahihi. Washington limsuaisiam min thang pa Gilbert Stuart in “A omdan enleng amah leh amah akiuk zo loding tawhkibang, nam mawl, gamlak aa piang hi leh bel aluahuai pen pawl hi in teh ” ci hi. Tuabek hilo ciamnuih zong bawlthei lo hisawnsawn lai. Washington pen, Alexander the Great, Robert Clive te bang in General galkap mangpi ding in apiang dingin kilanglohi. Galdo danding agel na tepen alawhcin loh hun omthei zel hi. Tuaban ah amakai pih te hatloh na leh Congress in hoih tak in thuakhen theih loh man in haksat na tuak denkeei uhhi. British do in aomlai tak hun in galkap ten thaman (stipend) mumel lo in, galvan neimel lo in,an leh asilh aten ding zong nei mel louhhi.Washington in “Sakol anding bangbek nekding nei den ungh.”Cih hi.Hih bangkawm kal mah ah kiut dan nasia tak in lenkip in, agalkap ten amah athupibawl azahtak aetsan luat man in haksat na tuamtuam phuzotuam uh aa, agam leh aminam aadingin tangtakin dingthei uhhi.

Washington pen American galkap makai mangpi asep cil lamin congress member atam zaw insuahtakding(independent) ngaihsun khollo uhhi. Hih hunlai pawlkhawng mah in British Prime Minister Lord North in American pawl tapawng adaih theih nading in galkap tha hatmahmah lutsak ding ingel hi. Britain Kumpi George III in American pawl pen kumpi langpang tapawngin genkhia in, Washington pen minam langbawl in pulak khia in khauhtak in dan piak ding zong thupia hi. Washington in British pawl do zawhnading in suahtakna(Independent) kisam ci in khentatna bawl hi. Kum 1775 August kha pan kipan September kha ciang Canada ah agam mu in, Canada gamsung aa teng tekiang ah akipawl theihnading in khembawlhi. Gunkuang (tembaw) galkap phuan in, tembaw agol mahmah guk tak bawlsak in, hih tembaw pi te pen Boston tembaw khawlna mun ah British tembaw onglut ding te akhaktan adal nading in sawlhi. Tuaban ah American tembaw khawlna mun ah, French tembaw onglut theih nading in gelnazong nei hi.

American gam aa om state tuamtuam te in Independent deihna lungsim aneih theih nading in gam sung mun tuamtuam ah sizungzi( campaign) nei kawikawi( bawlkawikawi) in, Connecticut te, New Hampshire te, Rhode Island te, Massachusetts te, Virginia te, Pennsylvania leh New York te in suahtak na(Independent) deih nalungsim ongnei thei ta uh hi.Tua ahih man in Kum 1776 July,4 ni in Congress in suahtak na(Independent) tangkokhia ta uhhi. Kum guk sung tak American leh British kido in, hih hunsung in haksat na kawmkal pan sungah galkap makai mangpi za lenpaisuak suak hi. Nasep lawhcin hun zongnei in, lawhcinloh hun zong om nei hi. French galkap in huh in, British galkap makai mangpi Lord Cornwallis leh apawl te pen Yorktown ah khakcip mawkuhhi. Kum 1781,October 19 ni in Lord Cornwallis leh galkap 7000 kiim ding Washington khutsung ah ongkipia hi.

Britain gam ah kumpi thak ong ding ta in, American gam sungah British galkap tampitak inomlai mahtase leh kilem nading leh galdaihnading ongzongnuam ta uh aa, British pawl in American ong nusia ta uhhi. Kido hunsung in American general mi li Philip Schuyler , Henry Knox, Nathanael, Green,Henry Lee te in Washington tawh ki lemlo vatvat thei hih tuak hi. General Horatio Gates tawh bel akikal thu tawmkhang kihal deuh ahih hang in kimuh khial kihuat ciang dawngbel omtuak lo hi. (Kum 1976 , Washington asih zawh kum 76, United State kumpi in Washington pen aksi(bawk) guk nei general za pia hi. Adeihna pen U.S.A General khempeuh lak ah amah bang aa zalian omnawn loding aa zaliat nasangpen apiak uhhihi.)

Kidona ongman ta in,gam sungzong galongdai ong lungmuanhuai ta hi. Ahih hang tualsung thukhen satding thu buai tuamtuam tammahmahhi.State pawlkhat pen amauleh amau thuki khen in kituah namun congress lah hat mello hi.Gam thukhunpi (constitution) lah nei theinai lo in, kum nga sungpen bangloteng tawh bei himai hi. Kum 1787 May kha sungin Gam thukhunpi bawlpawl pen Philadelphia ah tukhawm thei ta uhhi. Washington pen Philadelphia palai (sawltak) hi in, ih khawmpi ah makaipi (president)ding in sehuhhi. Hih gam thukhunpi thak pen zatding in akhentat zawh uh, kum 1789 April,30 ni in George Washington pen President masa pen dingin New York khawpi ah lungkim tak in telcing onghi ta hi.Congress in uap bilbel in gamthupi tak ongpiangkhia ahihi.

George Washington bang in American kumpi(president) hih ding midang kuamah om lohi. Kum 1792 in anih vein a kumpi sem dingin telcing hikik hi. Athumvei na takdingciang in kumpi(president) asepsawm nawnloh nathu tangkokhia hi.Hihpen anung hunongpai zel hun ah zat tohtohong hi ta hi. Kum 1796 September, 17 ni in kikhen na ding thugen in Mipi kiang ah U.S.A kipumkhat na hoihtak in kemcing ding in thuvaikhak hi. Gam dangte cih dan etteh lualawmlawm lo ding in leh gam thukhun zui aa kemcing ding cih thuvaikhak na bawl hi. American gam pen Europe gam tetawh kisap nakibang lo in, banghunbang hun aa kithukhat theih neih ahi zong, muh dah neih ahizong in kisamlo pi in kido na suak thei vat ahihman in kidopding cih thuzong vaikhak hi.

Hih mithupi pa pen kum 1796 in Mount Vernon aa a inn thupitak ah tawlnga hithiat ta hi. Ahih hang kum 1799 in USA leh France kido dingdinmun ah ongom vat hi.Agam leh aminam in akisap nahang in adinkhiat loh ongpha mawh ta mawkhi. Thu leh la om dan ongkan cian khit ciang in France pawl in kido lo in kilemding ut na thu, American pawlzong kido sang in kilem ding ut hi cih ongmu khia hi. Kumpi John Adams pen kido dingaut pawlmakai pi pa Hamilton pawl akho ding in ngaihsutna pia hi. Tua ciang kido dingongkipelh ta hi. Washington in adam sung hun pen manphatak in zangthei hi kici thei dinghi. Sumzuak sumlei na ah, kido na ah,kumpi nasep na te ah lawhcing mahmah gai mawk hi. Leitungbup mithupi telak ah zong alangpha makai minthang thupi khat ahihi. Timothy Naulak

US PRESIDENTS

• 1. George Washington
• 2. John Adams
• 3. Thomas Jefferson
• 4. James Madison
• 5. James Monroe
• 6. John Quincy Adams
• 7. Andrew Jackson
• 8. Martin Van Buren
• 9. William Henry Harrison
• 10. John Tyler
• 11. James K. Polk
• 12. Zachary Taylor
• 13. Millard Fillmore
• 14. Franklin Pierce
• 15. James Buchanan
• 16. Abraham Lincoln
• 17. Andrew Johnson
• 18. Ulysses S. Grant
• 19. Rutherford B. Hayes
• 20. James Garfield
• 21. Chester A. Arthur
• 22. Grover Cleveland
• 23. Benjamin Harrison
• 24. Grover Cleveland
• 25. William McKinley
• 26. Theodore Roosevelt
• 27. William Howard Taft
• 28. Woodrow Wilson
• 29. Warren G. Harding
• 30. Calvin Coolidge
• 31. Herbert Hoover
• 32. Franklin D. Roosevelt
• 33. Harry S. Truman
• 34. Dwight D. Eisenhower
• 35. John F. Kennedy
• 36. Lyndon B. Johnson
• 37. Richard M. Nixon
• 38. Gerald R. Ford
• 39. James Carter
• 40. Ronald Reagan
• 41. George H. W. Bush
• 42. William J. Clinton
• 43. George W. Bush
• 44. Barack Obama