Ei Zomi te ngeina a phunpi teng ~ Pa Cin Lian Khai

I. Leitung ah mihing khat in nuntak khat sungin pai khat bek hun kinei a, i zi neihni le i pasal neihni pen i hun thupipen ni ahi hi. A diakdiak-in numei mothak khat in miphung sungah suan le khak, gui le nam a zomtosak ding nu ahihna phawk-a a kithupi muh ding kisam mahmah hi. Tua ahih manin mothak hi ding a, nu hito-in pi hito-in pisawn dong ahi dingin lungsim hong neihtheihleh tusawn mu nu hong hi dinga, Pasian thupha sang nu cihna ahi hi. Tua bang lungsim a neite’n nung le ma gawmtuah siam-a a beh a phungte in mohoih nuhoih pihoih nei ung ei, ci-in ki-angtanpih mahmah uh hi. Tua bang a piantheih nadingin eimau nu le pa, le sanggam pasalte in a khangno hun lai-in thuhoih nono i hilhsiam ding kisam mahmah hi.

II. Innluahza Zo Ngeina
1) Pa khatsuan unau pasal lak pan a upenpa in innluah za ngah a, nu le pa kemin vaka a nauzaw tate in papi ci uh hi. Nauzawte pen a minno tawh paneu ci-in kisam khawm bek hi.

2) Nauzaw inntuante in a upipa kiangah innpi sa a gawh ni ciang bekin inntuanza ngah pan uh a, a upa in innmun logam khenin uum le bel, le vokno akno tawh inntuanin ulenau ding panmun gualhsak pah hi.

3) Tua zawh teh i sunghte sa kigawh leuleu-a nau zong hong cinsak leh nau cinsa tawh kigawhkhawm pah hi.

4) Tua ban ah i pa’ sanggam numeite lak pan a upen nu, nipi kici-in a nauzawte a minno tawh ni ci-in kisamkhawm bek hi. Tua mah bangin gangpi le gangneu zong ompah hi. Tua ban ah pasal khat in i sanggam numei peuhmah sa i gawhkim matengin pasal kitang zo nailo hi.

III. I Pu I Pate Ki-it Zia

1) Pu le pate in kumsimin ulenau ki-itna zulesa na kumkhawm den uh hi. Kumsimin daihal ni pawi Sialsawm, Lawm annek, Khuado cihte na neiden uh hi.

2) Khangluite’n paunak khat na nei uh a, ”pasal pu khangkua a mang lo” a na cihna tungtawnin i nu lam, i pute’ inn ah kumsimin cidam ludam nading le daupai mavan nadingin thupha dawhna tuukzu kholh cih na nei hamtang uh hi. Tua ahih manin mi le Pasian kikal ah palai dingin nu le pa, pi le pu bek Pasian in na koih hi.

IV. Khangluite Kammal Zatzia

1) Nopna munte ah kimuak cih kammal na zang uh a, sihna le dahna munte ah ki-uap cih kammal na zang sese uh hi. Tua ciangin sihna nopna zunun sa-aihnate ah baangkua, tuitaak, pupi, thusa, sasem cih bangin panmun gualin sahawmna na nei uh a, a bul a liang cih bangin kihawm bek a, gamsung sasehhawm danin kihawm ngei lo hi.

2) Nopna le dahna munte ah zanhah ni zan cih na nei uh a, hak hamtang ding cihna hi loin a gualnuam zoteng hakin a zanhak zo lote ihmu lel dinga, khuavak dong kiciahsan loin ki-uap kimuak ding cihna ahi hi.

V. Zongeina Ah Numei Le Pasal

1) Nopna sa matna hunte ah pasalte bek hanla sa-in thaulawn uh a, sihna le dahna munte ah zong pasalte bek mah in minsialin thaulawn uh hi. Numeite in nopna dahna munte ah kapin tamlo thei bek uh a, laphuak nuamte la kiphuaksak thei hi.

2) Nopna dahna lamgui-a lamna sung bek ah numeite lam thei bek a, mipi lamguina laizangah numeite kitang lamsak lo hi. Tua mah bangin numei in khuangtum ngeilo a, daak zong tum ngei loin phiit zong kimutsak lo hi.

VI. Pu Le Pate Kidemna Namte
Sialkop sialtang go-in na tong uh a, sa ai-in gal ai-in gal khem cihte na nei uh a, daak le khuang tumin pasal thahat kidemna-in daak lamin sialphei tatin lum sui-in namsau kan na kidem uh hi.

VII.Sihgui Zawh Handal Ni-in Pu Khakna Kibawl Hi
Innsung khat ah i nu sihni ciangin i pute tawh khang kizopna kipelhpian pah ahih manin pasal pu khangkua-a mang lo a kicihna tungtawnin i pute thupha i kipiaksak khit ciangin a si nu, a si pa i a vanneng khatpeuh melmuh ci-in i pute kipia hi. I pute lungkimtakin kiciahsak ahih manin tua pen “Pu khak” kici hi.

VIII.Pu Le Pate Kikhualzia

1) Meipum ci-in gan a kigawh uh ciang le kheli nei vok khawng a gawh ding uh ciangin u le nau lo tawh go mawk ngam hetlo uh hi. Tua mah bangin inntha, lotha, a lelh uh ciang le a ci a lu uh a nat uh ciangun na kihuhpah lian uh a, singtan, khautan a lak uh ciangun ma na pangkhawm pah liailiai uhin thupi na khual thei mahmah uh hi.

2) Khangluite’n zola, zawlla, latung, laphei, sihla, galla, sala le tonla cihte na nei uh hi. Sa a aih uh ciangin maugua kibawl phit na mut uh hi. Galkhem cih na nei uh a pasal nih pen nupa kineihin a lawmpa bel a maitang belmang kizut sese hi.

IX. Khangluite Paunak Pawlkhat

• 1) Pu le lamphung kineh zo lo – i pute kidem thei lo
• 2) Deeklam tuktum zong gal – i muan pente zong i gal hi thei
• 3) Mihing le papo – kisi pak thei
• 4) Gallu kihta gallu tuak – i buksawmna mun ah a
  siazaw kan kituak thei
• 5) Sakhi a pi san, a no san – nu le pate kisun hamtang
• 6) Hawmsem nungta, ne-bum si – a cinghte hau semsem,
  a cilte zawng semsem
• 7) Zawlthu kalah sialthawl – na zekaikai leh thusia khat lut pak thei
• 8) Na kellu phum kidawk ding – na thu imsim hong kithei ding
• 9) Na suakluka uh kibalkham – na kithutuakna uh kitamsak
• 10) Meima lo ah tho tu lo – paubang lo phamawh cihna
• 11) Zuau in a khap tawn – zuau thu gente kithei veve
• 12) Nupa kithutuak khuakhat in zolo – kipumkhatna thupitzia
• 13) Khuakhat kithutuak – tawm taleng a tampi khuakua in zo lo kilemlote’n hong zo zo lo
• 14) Bui a phak kuana khawl – tangtun kuana dinkhawlte
• 15) Nu le pa thumang a nahlawhpeek – a daupai-in a ma vang pah
• 16) Akta mang kuan kitutu – mancip giimnam
• 17) Ngalvang in a tat nading – i gamtat zia ding saupi gelkhoh
  kuam kua khual huai
• 18) Simbeng zong kim citciat – kipawlkhopna khatpeuh ah tangzang kiguang makai tangzang kiguan kul
• 19) Sialtat zawh nung, sial daikai – Apian zawh teh, khua nung thei
• 20) Ki-uitui – Ki-itbawl tuam deuh hun sung
• 21) Ki-angvan – Kideihsak, kihu, kipanpih
• 22) Laikhun – Lupna
• 23) Khunlan – Lupna
• 24) Lia le tang – Nungak le tangval
• 25) Puvun pivun – Pu le pi
• 26) Tun le zua – Nu le pa
• 27) Ciin le tuai – U le nau
• 28) Angkawi – Zi
• 29) Kiang – I pasal
• 30) Vontawi – Tanu tapa
• 31) Sawn – Tute
• 32) Mamo – Monu
• 33) Zaitha – Thatang
• 34) Cinthu – Thu
• 35) Tongdam – Kampau
• 36) Na lel cinthu – Na gen thute
• 37) Lak mai – Maitang
• 38) Luankhi – Khitui
• 39) Banzaal – Khut
• 40) Pheiphung – Khe
• 41) Na siangah – Na kiangah
• 42) Heina – Paina peuh
• 43) Tuang lam – Lampi
• 44) Saumang – Inn
• 45) Lang lam – Neih le lam
• 46) Lii bang kicing – Kisap om lo
• 47) Vailo – Lo
• 48) Laal – I galte
• 49) Sangsa – Gamsate
• 50) Zinleng – Dawi
• 51) Sianmang – Pasian
• 52) Tangbang dam – Cidam
• 53) Omlai vei – Dammawh
• 54) Naubang kap – Kap
• 55) Mimbang thum – Thumthum
• 56) Hui bang mau – Khasiatna hau
• 57) Lawkbang tau – Tautau
• 58) Suumbang bia – Biakpiakna
• 59) Vaimang siamsil – Lai
• 60) Khaubang ciah – Ciahlam
• 61) Hawm teel – Micingte’ nun sawt
• 62) Iplah – Pammaihsa
• 63) Mimphung – Pianna behte lam
• 64) Pal bang nang – Thuak tentan
• 65) Sumkuang in a lii khuat – Numei in a ma khuat
• 66) Pu le lamphung kineh zo lo – I pute kizo zo lo
• 67) Kisial – Thei khiasak
• 68) Kawlciang – Thau
• 69) Lamsai – Lamgui
• 70) Namtem – Temta
• 71) Kawl hei – Hei
• 72) Tu kawl – Tu
• 73) Sunglawh – Annek
• 74) Khing an – An
• 75) Ningzu – Zu
• 76) Aisa – Sa
• 77) Sumlu – Lutang
• 78) Besam – Sam
• 79) Thul guah – Guah
• 80) Phialva – Vasa
• 81) A bual – Ak
• 82) Thangvan – Vantung
• 83) Simlei – Leitung
• 84) Khawi le vulh – Ih khawi gannote
• 85) Zal mang – Zanmang
• 86) Khangthei lo – Khanglo
• 87) Tung sunni – Ni
• 88) Sul khapi – Khapi
• 89) Alsi – Aksi
• 90) Zingdamsol no – Solpi
• 91) Laukha – Kha Siangtho
• 92) Zinleng – Dawi
• 93) Pham – Si
• 94) Gua bang hing – Nungta
• 95) Thel nah – Laidal
• 96) Nuh sawl – Singteh
• 97) Tulsing – Singkung
• 98) Khimzing – Khuamial
• 99) Phalvak – Khuavak
• 100) Muikhua zin – Khuamui tung
• 101) Silh puan – Puan
• 102) Ten nik – Nik
• 103) Dam tui – Tui
• 104) Lumsuang – Suangtum
• 105) Vaivut – Vut
• 106) Sian sung – Innsung
• 107) Kankong – Kongpi
• 108) Vaimang – Kumpi
• 109) Lunmang – Mihaute
• 110) Sanggah – Tagah
• 111) Meigong – Nupa langsam
• 112) Laizom – Sung suahpih
• 113) Pahtang – Innkaa
• 114) Sumtual – Inntual
• 115) Sesum – Dangka, sum
• 116) Vangkhua – Khua
• 117) Tangbang phong – Thotosak
• 118) Albang tah – Nekngaih, nesak
• 119) Albang dah – Dahna hunte
• 120) Nun bang nuam – Nopsak hunte
• 121) Kizo – Kilungdampih
• 122) Kimuak – Nopnate kinuampih
• 123) Ki-uap – Dahna hunte ah kitutpih
• 124) Awh khi – Khi
• 125) Tau buh – Khut a tau bulhte
• 126) Tai khua val – Khua vakta
• 127) Senlai – I neu lai
• 128) Lobang tul – Lui suahta
• 129) Tum bang guai – Teek kuanta
• 130) Paak bang kitawi – Kipahtawi
• 131) Mu bang ngai – Kingai
• 132) Vabang pil – Pilsan Teitang
• 133) Zu bang mawl – Hai kisa
• 134) Ci bang teel – Deih teel
• 135) Gia bang zun – Kizem, kipuahpha
• 136) Maimit – Mittang
• 137) Gial bang kia – Khitui malte kia
• 138) El ho – Zahpih ho
• 139) Kulsin – Hankhuk
• 140) Vabang laam – Laam
• 141) Ngabang leng – I lenlai hunte
• 142) Siangkawm – Tanaute kiang hawh
• 143) Zing zin – Khualzin
• 144) Ciampeel – Thuzuau
• 145) Cilgil – Citak
• 146) Mabang hial – Zawhbawl
• 147) Zulhzau – Gamtat gina lote
• 148) Mit tuuk – Sawm gige, thangah
• 149) Bantan – Sattan
• 150) Ne bum si – A huaihamte nek tom

La tawm hong suut ning

1. (a) Pupa gamsat, Zogam minthang, momnote kilbang khan nading,
ZYA-te’n mabang hong pat, Tin Jubilee tuang hong tungta e.

(b) Tin Jubilee tuang hong tungta phual vano bang tan kitehpih,
Zovontawi te’n, lambang paak in giabang zuun ni e.

2. (a) Kuate’n laizom a ngai lo diam tong kum lo tul sing zong kikawi e.

(b) Tong kum lo tulsing zong kikawi a nahzing nuai-ah sial lo zong nem sial lo zong nem e.

3. (a) Phamsa ningtui nong tulh sangin i damlai ningtui kitulh ni e

(b) I damlai ningtui kitulh in, i lawmlai giaduang kizuun ni e.

4. (a) Zota vuntawi u le ka nau sakamkei bang ka gialpihsa teng siingdang anglai zal ding phal sing e.

(b) A lawm lo singtan hong lel leh Myone Pyine Bahu ban ah
UNO zum dong va lel vang e.

Zongeinate thu hoih la hoih paunak hoih nono tampitak om a, ahi zongin ke’n hizah tawh Zomi khangnote tha hong pia ing. Ka lungdam.

Pa Cin Lian Khai
Tungzang Taih, Kalaymyo

ZYA Magazine