Kawlgam kikhelna leh khantohna Thupuak ~ CS Dal

Kawlgam kikhelna leh khantohna Thupuak ~ CS Dal

Kawlgam ki-ukzia hong kikhelna tawh kizui in, gamdang kumpi leh kipawlna tuamtuam te in Kawlgam thu le la te, suakta takin etcianna, ettelna te a beisa hunsung sang in nuamtak in hong bawl thei zaw ahih man in, Kawlgam sung thu zong leitung ah a thei mihong tamzaw ta hi.

A beisa a sawt nailo lai deuh in, Asia Development Bank (ADB) in Kawlgam kikhelna leh khantohzia ettelna thupuak, Outlook on Myanmar Economy, cih khat hong hawm khia uhhi. ADB te genna ah:

Tulaitak Kawlgam dinmun Gam khantohna etna ahi, Gross Domestic Product (GDP) pen 2010 kum in 4.9% pan 2011 kum in 5.5% in khangto hi ci in gen uhhi. Hih a khantohna pen a pha deuh in, gamdang mite in, hydropower, natural gas, leh datsi lamah investment a khantoh man hi ci in gen uhhi. A hi zong in lopan apiang mehteh mehgah, buhtang te pen khuahun siatna hang in, a khantoh zahding in khangto lo hi ci in genhi.

Gamdang mundang ah antang zuakna huhau in Kawlgam sum zong mannei zaw a, vanman khanna etna ahi (inflation) pen 2010 kum in 7.3% pan in 2011 kum in 4.2% in khiamsut hi. Thukhat ah April, 2011 kha akipan in managed floating exchange rate system hongzat man uh zong hi zaw kha thei ding hi. (MK818/$1) Natural gas zuakna zong 2010 kum sang in 15% bang khanzaw a, ahizong in leitung sumpiang suangmanpha zuakna pen 2011 kum in khiamsuk zaw hi ci hi.

Kawl kumpi in tulaitak in leibat buppi $11 billion kimnei a, tua zah lakpan alangpen leibat lohhun cingkhin hi. 2011 kum in leibat buppi pen GDP lakpan 5.5%pha hi ci hi. Gamdang mite in energy leh hydropower lam ah investment hong bawlna hang in, 2011 kum in sumlut $2.8billion kingah hi.

Kumpi bank in sumleitawi man amet piaksum (interest rates) pan 17% pan in 13% khiamsuk in, bank ah sum koih leng a summet (interests on deposits in banks) pan 12% pan in 8% ah kiamsak uhhi.

Kawlgam sumlut vekpi pen 2012 kum in 6.0% leh 2013 kum in 6.3% dingin ummawhna nei uh a, sum leiba pen 2012 kum in 5.5%GDP pan in 4.6%GDP ah kiamsuk ding in lamen uhhi. Ahi zong in vanman khanna (inflation) pen 2012 kum in 6.2% leh 2013 kum in 6.3% khangto dinghi.

Foreign Investment Law pen tukum July khasung in hongbawl khia zo ding in lametna kinei a, tua sung ah special economic zones ding in, Dawei, Thilawar leh Kyaukphyu khua te ah koihding in geel uhhi. Kawlgam sung ah vanlut apha deuh in, construction van te limlut mahmah laitak hi.

Gamdang investment te hong lut , sum leh pai, van tampi tak hong ki behlap ding ahih ziak van man, inn leh lo sap man te tampi tak in hong khangto thei ding hi. Hi tawh kituak in Kawlgam sung ah vanman hong khangawp lohnang kepna ding (macroeconomic stability) a om theiding pen masuan pi khat hi thei kha ding hi.

Kawlgam pen tutadih in ASEAN gamsung teng lakpan a zawng pen hi a, a hawmpi in mimal khat in kum sumlut (GDP per capita) pen $715 bek kingah hi. Gamzawng mah ahi, Bangladesh te GDP per capita $800 ngah a, Cambodia in $850 kimbang ngah uhhi. Tulai tak in Kawlgam mimal buppi lakpan 26% pen cimawh zawngkhal (under poverty line) in om hi ci hi.

Kawlgam khantoh nang sepding kisam laiteng Kawlgam in Thailand ahih kei leh Malaysia bangin a khantoh zawh na ding in, kum 30 bang kisam lai ding hi ci in, ADB vice-president Stephen Groff in gen hi. Banghanghiam cih leh Kawlgam ki-ukna system pen kizang thei lo, kisia cip hi ci hi.

Kawlgam khantohna ding pilna (education) lam nakpi tak in puahphat ding kisam hi, tutadih in kumpi te in education sector ah kumpi budget sung pan 3.74% bekzang uh a, hih budget sung pan in a tam zaw pen laihilhna ding sang in, siate khansum ding in kizang zaw a, a dang khantohna ding in kicing zolo hi. Budget tampi tak piak beh ding, sanginn hoih, facility a kicing zaw, sang laihilh siate a hoih zaw leh system hoihzaw neih ding zong kisam lai hi.

Lokhawlhna (agriculture) lam ah zong khantohna ding tampitak omlai hi. Lokhomi te lomun piak theih ding zong thukhun in hong bawl khin zo uhhi. Lokho mite tung ah sumleitawi piakzawh ding, ekleiza (fertilizers) a kicing in zatsak zawh ding, khaici hoih, khaici pha piak beh ding, lokhoh na ah kisam pilna, siamna (technology) zong a hi thei zahin khantoh ding kisam lai hi.

Tuaban ah lampi, lei, inn leh lo (infrastructure) te zong nasia tak in puahphat ding kisam lai hi. Motor lampi te a hoih zaw in puahphat, meileng lampi athak bawl ding leh, meileng te mahmah zong ahoih zaw zat zawh na ding investment bawl ding tampi kisam laiding hi. Gamkhan tohna ding transportation a hoih ding akisam mahmah khat ahihi. Tourism zong kumsim in hong khangto ding hi a, zato innpi te, zintung na hotels te zong nakpi in invest bawl ding kisam lai hi. Kawlgam ah gamdang mi ahawh (tourists) pen 2011 kum in 26% khangto in, mimal 300,000 kimpha ding in ciamteh uhhi.

Meizat (Electricity leh energy) lam zong tutadih in leitung ah a hoih lo pen gam hilai a, tulaitak in 26% bek in mei kingah in, gambup a huampi in nikhat in dakkal (2) sung bek mei (electricity) kingah uhhi. Gamdang mite leh private company te tung ah septheih na phalna te piakding kisam mahmah lai hi. Kawlgam pen natural energy resources hau mahmah khat a hih man in, khanto lai mahmah ding hi.

Gamdang mite kawlgam ah nuamtak in sum hong bawl theihna ding, Banking System hoih mahmah zong kisam hi. Tulaitak in credit card leh debit card te zattheihna ding, puahphatna nasia takin kibawl laitak hi a, credit leh debit cards bek tawh hilo in, financial system zong hoihtak in nasep theihnang, tampi tak puahphat ding kisam lai hi. Hi bang in septheihna, Central Bank zong suakta takin nasep theihna, thuneihna tampi zawk ding kisam laihi.

A thupi mahmah khat hi, Kawlgam ah kilemna kisam hi. Kilemna a om theihna ding kimuan leh zahtak na kisam hi. Kawlgam sung ah om minam tuamtuam te tung ah, suahtak na tampiak zawk ding kisam lai hi. Federal system tawh hoihtak in kalsuan takpi theih ding, mualtung mite in suaktatak in Kawlgam sung ah a mau ngeina leh dante, upna leh hihna te suakta takin septheih na, bawlna a neih theihsem nang kisam lai hi.

Atawpna ah galkap te a kipan, gam uk makai te leh mimal khempeuh in, thukhun (law) te zahtak in liangko kikim in sepna tek ah nuamtak in nuntak theih ding kisam hi. Thuneihna, laneihna, thatang hatna te zang nawn lo in, thukhun tawh ki uk, (Rule of Law) a om theih ding kisam kan lai hi. A lian zaw, aneu zaw omlo in, thukhun sung ah, liangko kim theihnang kisam hi.
CS Dal