Pentecost Pawipi Ni ~ Fr. Raphael Khuppi

Pentecost Pawipi Ni ~ Fr. Raphael Khuppi

Sawltakte tangthu sungah Khasiangtho pen Huih lim tawh hitaleh, lei tawh kibang meikuang lim tawh hitaleh na kigenteh hi. Bang lim banglim tawh ih genteh zongin, theih huai thu leh ciapteh ding thu in tua Khasiangtho in Vangletna nei hi cih thu ahihi. Tua vangletna pen Nungzuipi te aki khel sak vangletna hi a, pau namkim gentheihna leh pau namkim theihtheihna ahi a masa pen leh alian pen kikhelna zong ahihi.

Pasian Khasiangtho tawh kisai pen Jews minam te upna leh laigelhna te ah thuciam lui hun kum tampi lai pek in kimu thei khin hi. Tuni a kisim Salaan la kidawnna ah, “Na Khasiangtho hong sawl lecin leitung in a thak asuak kik ding hi” ci hi. Piancil Laisiangtho sungah zong leitung apiang sak pen Pasian’ Huu or “kha’ ahih lam hong thei sak hi. Jews minam te in ahih leh tua akipiang sak leitung pen athak suak kik ding cih lametna nei uh hi.

Kha Siangtho hong kumsuk ni pen Jew minam te pawipi “SHAVUAT” ni hi a, Greek kam in Pentecost kici in, Paska pawi zawh ni sawmnga ni ahihi. Tua pawipi pen Pasian in Moses tungah “Torah” or “Thukham” apiak ni in zong kiciam teh thei hi. Tua pawini in Pasian in mipite zuih dingin thukham Suangpekpi nih tungah a “Huu” guangin, tua thukham na nunta sak hi. Christian hun Pentecost ah ahileh Khasiangtho amaute lungtang sungah khahkhia in nungta sak hi.

Etkak theih dingin, Theophany” akici Pasian’ kilahkhiatna pen Sinai mual tungah hitaleh Pentecost pawini Nungzuite kikhopna inn ah hitaleh kimu thei hi. Tua munthupi nih tuak ah, Meikuang kimu thei a, – khat pen sawlbawk kuang hi-in, khat pen Nungzuite tungah akhawl lei tawh kibang meikuang ahihi. Torah cih kammal pen “Hilh” cihna zong hi a, Khasiangtho zong pen a “Hilh” dingin hong pai ahihi. SHAVUAT pen Judaism akici Judah biakna apiankhiat ni or asuahni ahi mah bangin, Pentecost zong pen Christian te suah ni ahihi.

Tuni Misiangtho Paulu in zong Khasiangtho thu limtak in hong kuppih hi. Khasiangtho omlo hileh kua mah in Jesu Topa um theilo ding hi cihi. Tothum Pasian khat ii pianzia zong Paul in hong mu sak hi. Khasiangtho pen thupha nam tuamtuam te luankhiatna, Christu mintawh eiten pawlpi ading nasep tuamtuam ih neih zia, leh tua nasep khempeuh Pasian minthanna dinga ih sepzia te Paul in hong hilh hi. Eite khempeuh Christu sungah Pumpi khat bang ihhih leh Khasiangtho pen eite nuntakna ding leh khut le khe te a kisam sisan a puak “Sihuipi” ahihi.

Tua ahih manin, Pentecost pawini pen ei ading in Pawlpi suahni mawkmawk bek hilo in, Pawlpi sunga om thuzui khempeuh te Tothum Pasian khat sungah pumkhat ih hihna leh tua Tothum te in Pasian cih minkhat bek tawh a kalsuan zia te zong ih phawk ding ni ahihi. Pumpi khat bek tawh kizom vive ih hih zahkhat in, khat le khat kideidanna, ki nenniamna, ki zawngkhalsakna te om lo a, pumpi ading a thupitna akikim ih neih lam ih phawk den ding zong ahihi. Hih thu hangin Paul in a thu khupna ah “Eite Jews ihi a, Greek ihi zong, sila ihi a, silalo ihi zong pumpi khat sungah tuisawpna sang ih hihi” ci hi.

Tua ahih manin, ih kinial thei zel den ahi, – thuzui nautang “laity” te sang Pasian nasem phunggyi, sister, brother te’n Pasian maipha mu zaw… Numeite sang Pasal te manpha zaw…mizawng te sang mihau te’n vaang nei zaw – cih banga kinenniamna te beisak ding hun hita hi. Hih te in Christian lungsim picing hilo hi. Khasiangtho in eite khempeuh Pumpi khat sungah hong gawmkhawm in, eiten zong eitan ciat nasep ih sem hi. Khut ii nasep a sem ih om a, khe ii nasep a sem ih om hi. Mit nasep a sem ih om mah bangin, lungtang nasep a sem zong ih om hi. Ei sepna ciat Pumpi ahi, Christu leh Pawlpi adingin thupi in manpha hi. Raphel Khuppi Ref: Homily of Bishop Ron Stephens