Ganhingte i lawm ~ TD Khen

Ganhingte i lawm ~ TD Khen

“Innsa gamsa leh a bokvak ganhing khempeuh amau’ nam ciatin Pasian in piang sak hi. Pasian in tua pen hoih hi, ci in mu hi.”(Pian 1:25). Gentehna in: Thah ding, mat ding, nekding hileh, ‘hoih hi’ kici lodinga, “limci, limtuak” kici zaw kha ding hi. “Hoih hi” cih pen, “paak hoih, meel hoih, lawm hoih, puan hoih” cih danin kitam’lawh zaw ciphot ni!

A diakdiakin ganhingte pen mihingte’ cimphawng ding, kikholhpih dingin a piansak hi masa hi. A kikkik ciang bel ei’ ngaihsut dandan ci ni ei guai…!

1988 panin Mizogam ah gamsate ittheihna, Khanlawhna piang hi. 1992-94 in YMA (Young Mizo Association) tawh pang khawmin, E & F (Enviroment & Forest Department) a piang khia hi.

1. Sangau Bethel a neihna gam sung uh ah nungak Partei a cih pen tutsa in a thunget laitakin vasa a puang philhphelh khat hong pai in, amah’n zong la in a angah a tawi hi. Koih kikin lau hetlo in a paikhia hiathiat hi. A tungah vasa dang hong lengin a lutungah a tuang hi. A dinsa in thu a nget leuleu ciangin, a khutme-te kizut hialhial a, a thunget man ciangin a etleh, zulei khat in a mei tawh a khut a na zapzap a mu hi.

2. Sangau Bethel sung mahin Pi Biakchhungi zong, a hun dangte ah tangtel khat nangawn a kihta pha mahmah khat pen a lutung san ah thu a nget khitteh gul khat a om a mu hi. A lau sawn om lo in a ki en lile lel uh hi.

3. Lawngtlai Bethel ah zong nupi thum thungen pen sakhi khat in a gei vuah na en niloh cih a thunget man uh ciangin a mu uh hi.

4. Lawngtlai Bethel sung mah, Saiha khuapi gei-a Maubawk Middle school siapipa(Head master) Bose Hlychho zong a thunget laitakin, sahang khat in a gei ah na en niloh cih a thunget man ciangin a mu hi.

5. Tonsim(Champhai)khua gei, Tuipi khua pisal khat zong a thunget laitakin gul khat in a khe na vialin, a thunget man ciangin kiphelkhia kikin paikhia a ci hi.

6. Manipur Lamka khuapi-a teng, Lalsangzuala in a lawmpa tawh gul khat a that uh hi. Tua khit phetin a khut taklam tuak a zaw hi. Lungkham uh a hihmanin, tua maa-a a Camp (camping) neihna uh, RV (Khamtheih guihtheihte kikepna, thungetna mun) ah va pai uh hi. Thungen makaite in, “Pasian’ mite in gamsate zong susia loding a kicici hilo hiam? Pai unla Pasian’ tungah mawhmai na va ngen un” a ci uh hi. Thungetna munah pai in mawhmaina va ngen a, a nihin a dam sa in a ciah ziau uh hi.

7. Lunglei District sungah, “Gamsate’ Paradis” ci-in E.L.Bethel huang khat a nei uh hi. Tua mun pen E.L Bethel Publication Board in a vaan uh hi. Khatvei tua huang sungah Baibek(vasa) kikap lum khat a mu uh hi. E.L. Bethel board in zong K.Hawla, Sailo kiangah tua Baibek phawkna mualsuang phut dingin a sawl hi.

Tua mualsuang tungah E.L. Bethel speaker Evan. K. Lalhmingliana’ laphuah gelhin, Baibek mualsuang nih a phut uh hi. E.L. Bethel speakerpa a sih ciangin zong tua Baibek mualsuangte gel kikalah a mualsuang ding, 10 Jan 2012 in a phut uh hi. Hih mualsuang pen Synod min tawh Rev.Lalzuithanga, Synod Executive Secretary makai-in hun thupi tak zang uh a, khitui tampi tawh mualsuang thumte a u’m khawm uh hi.

“Gamsate leh a tenna gam uh i kep keileh khangthakte’ hamsiatna i thuak ding hi” E&F WILDLIFE WING. “A kipiangsak nate in Pasian’ tate a kilang ding lamenin, lawppha-in a ngak uh hi.” Rom 8:19. Tdkhen