Malaysia sungah laibu lo tawh nasem teng ki ciahsak ding

Malaysia sungah laibu lo tawh nasem teng ki ciahsak ding

Malaysia Home Minister ahi Datuk Hamidi in a genna ah Malaysiagam sunga laibu lo tawh nasem teng amau gam ciat ah ki ciahsak dinga, amau tangin singno suanna mun, innlamna mun leh vanbawlna setzungte ah nasem dingin gam panin laibu tawh nasem ngiat ding mi 1.5 Million kiim Malaysia ah ki lutsak ding hi ci hi.

Bangladesh mite ih sap ma in Malaysia gam sunga laibu lo tawh nasem teng khempeuh gamgii ah ih nilkhiat phot kul ding a, nilkhiat na asem dingin RELA, Police leh Agencies tuamtuamte in ma hong pang khawm liailiai ding uh hi ci hi.

Hih ngimna a lawhcin theihna dingin gam tuamtuamte Embassies tawh zong thu kikupna kinei khin hi. Bangladesh kumpi tawh zong July 17 khit lam ciangin Dhaka khuapi ah thukimna lai kibawl dinga, kum thum sungin Malaysia gam mun tuamtuamte ah nasem a kicingin kikoih zo ding hi.

Ahi zongin Bangladesh panin Malaysia ah nasem ding a hong pai peuhmah nasep kisinkhol sak phot ding hi cih thu Press Conference ah pulaak khia hi. Tua banah gam khempeuhin amau gamsung ciatah laibu lo tawh nasemte leh om theih hun sung khengval a om laite deihlo hi cibeh lai hi. Source : www.bernama.com

ZAM Thupuak