Khensatna mann anei Damiah bupa

Khensatna mann anei Damiah bupa

Kumpipa khat in azi ding nungak melhoih mahmah khat la hi.Hih thu hang in kumpipa nu leh pa alung nopsak lo hi.Tua ahih man in kumpipa kiang ah anu leh apa in banghang in nazi ding in la teitei na hi hiam ci in dong uhhi. Kumpipa in ahih leh Aman hong ngai mahmah ahih man in alungsim gamtat nate khel zo ning ci in dawng hi. Kumpipa nu leh pa te in ahih uh leh singkung akawi khat aliat khin ciang tangsak theiding na hi hiam ci in dawng hi.

Nikhat kumpipa leh azi gamlak ah hong vak uhhi. Lam et hetloh pi in Damaih bupa tawh hong kituak uh ahih man in hong kibuan uhhi. Kumpipa in hong zo ahih man in atawl hong mek in that lupding in hong sawm hi. Ahih hang in Damiah bupa in ahih thei zah in hong dal zel ahih man in that zo lo ahih man in kumpipa in azi kiang ah namsau hong pia in ci in ngen hi.

Azi in zong namsau la pah a abul Damaih bupa pia in ahiam nalam Kumpipa pia hi. Kumpipa in namsau ahiam na lam la in akhut tawh hong man pah ahih man in akhut hong sisan ziahziah hi. Asawtna ciang Damiah bupa in Kumpipa that lum theihi.

Kumpipa hong that thei khit ciang Damiah bupa in Kumpipa zi kiang ah “bang hang in namsau abul lam kei hong pia in kumpipi hong thatsak na hi hiam,” ci in dong hi.Kumpipa zi in bang cih dawng ding in na lam en hiam? Kumpipa zi in kumpipa sang in nang hong ngai zaw ka hih man hi ci in dawng hi. Damiah bupa in zong Kumpipa zi akhualzin na ah tonpih pah hi.

Ahih hang in Damiah bupa in Kumpipa zi ii asamzang khat na ngawng zong lawngsak lo hi.Lui khat kankul ahih man in Damiah bupa in kumpipa zi kiang ah Awle tam ahih man in ii vante puakawm in lui ken kantan masa ning ci hi. Damiah bupa in lui akan khit tak teh Kumpipa zi kiang ah ii nih in kiteeng leng kei sang hoihzaw pasal mu le teh kei hong thatsak ni teh ci in Damiah bupa in Kumpipa zi lui ngal ah nusia in paisan hi.

Hih atung a taangthu en leng, tulaai khuahun siatna ah ki omta ih hih man in ka zi/ka pasal sang in nang hong ngai zaw in hong kici leh hong ngai keeng ci in la, kei sang hoih zaw mu leh teh hong taisan ni teh ci in hopih nawn kei in. A lungsim agamtat khelzo lel ning e,cihna tawh zi ding pasal ding in la kei in. Zi ding pasal ding khat na nu na pa te hong awi loh lawmlawn khat pen ngaihsut phapha in.

Nu leh pa lam tawh kisai in enleng ih pu ih pa te in thu khun tuamtuam na nei uhhi.Mi zi mi ta hingsuan sak cih pen na deih hetlo uha, innkuan nuam zong omlo cihi. Mi zi mi ta tawh mawhna pen sih na zah dong tung bang in thupi sak uha, lawili lawi giat na kiliau sak uhhi.

Ih pu ih pa te in itna kip nei in nupa kikhen ding pen na deih hetlo uha, phualva bang uhhi.Tua ahih man in nupa kawmkal ah kikip mahmah a, nam dang te in hong ngaihna hang zong ihmel ihsa mi sang in ahoih zawh man hi hetlo in ih nupa thu ah ih cihtak man ahihi.Tua hi in Laisiangtho tawh ihpu ih pa te gamtat na kituak mahmah hi.

Laisiangtho ah en leng, sihna leh mi dang tawh amawh lo buang nupa te kua mah in khen kei hen cihi. Pasal khat in azi ma in numei dang atenpih leh numei tawh amawh hi a, akima numei atenpih pasal zong numei tawh amawh mah ahihi. (Matt.5:32;Luka 16:18) Cin Ngaih