Gamtat hoih, midang te noksak ih hihloh nading

Gamtat hoih, midang te noksak ih hihloh nading

1. Tangpi zatkhop ahi Taxi, Bank, vantang ekbuk zunbuk (public toilet), Bus cih te ah va tuhgawp loh ding thupi hi. Eisang in atungmasa angak masa ana omnak leh makhelhgawp ding hilo hi. Mizawh khitngak hithiat na pen gamtat hoih namkhat ahihi. Aphamawh mahmah (emergency) ahih leh hoihtak in nget ding hi aa, hoihtak in angen aom nak leh kuakua ahizong in theihsiam na om veve hi. Hibang aa kigual aa ngak akulna munte ah min sazian ala te ahi aa amun acingte ahizong ameltheih tanau om leh deihsak in amai aa omte sang in mun piabaih zaw cihte pen hoihhetlo hi.

2. Ih pumpi tungpan in apaikhia limlim te pen awlmawh lo aa om maimai ding hilo hi. Cil siaziauziau cih dan, Mawtaw tungpan in nin paaikhia ziau cihdan, mawtaw tungpan kunza tui siazuazua cihdan, tuibuk tui khawng tuahtuah na ah siaziau cihdan, tuahtuah na ah zunkha ziau cihdan te pawl zatvet lo ding hoih hi. Mawtaw hawl kawm aa kunza khai ih hihleh bung, saphuklai kaw cihdan in ih ciltui te kemin tuahtuah na ah siat ziauloh ding thupi hi. Ih ciltui te, tuibuk muamna tui cihte pen amaunte ading in akihhuailoh hang in midang ading in kihhuai lua mahmah hicih ih phawk ding thupi hi. Nin khawng mawkpaih lo in ninbawm ah ih paihtangtang ding kisam aa ih gamtat na in ih mizia hong kilangsak mahmah hi. Siantho na pen khantoh na khat ahihi.

3. Lui ah hiam, mual ah hiam picnik pai in ih hihleh zong ih sulnung hoihtak in ihsiantho sak kik ding thupi hi. Banghang hiamcih leh tuabang aa ih paina mun te ah tuibung hawm, zubung hawm, achuzibung hawm, sawklek hawng akipan ih zat na ninteng om nianua thei hi. Hibang hunciang in iplian pua in ih ninteng kaikhawm pah in paihtheih pahding thupi hi.

4. Tangpi zat mun leh mual te hoihtak in ih kepsiam aa thupit bawl ding kisam hi. Mipi zat lampi te ah ih inn vanzat te, mawtaw te midang ading in nawksak tak in akoih ki om thei aa kua mah in bangmah hong cih ngamloh pahsam hang in kuamah in kilawm hong kisa lo hi. Ih inn lam danin ihveng te ading in nawksak hiam cihte hoih tak in ki en aa midang ading in anawksak lo theithei aa ih omding kisam hi. Pasian thu gengen sang in gamtat na in lahkhiat ding thupi zaw hi. Laisiangtho Pasian thu gengen pong in midang haksat na apiangsak ih hih leh kipuahphat ding kisam hi.

5. Inn khawi gantawh kisai in khuano lamsang in khuapi lam ah hoihtak in kepcing ding kisam phadeuh zawlai hi. Adiak in Ui ki khawi nuam mahmah tek in ki it tek thei mahmah hi. Ih it ih ngaihzah in midang in ih Ui khawi hong it pih lo cih ihtel ding kisam hi. A zun leh ek cih te akipan ih vengte huangsung ah azun a ek ava kha zong om thei aa, midang ading in alauhhuai zong om thei hi. Nang ading in lauhhuai loh hang in midang ading in lauhuai thei hi cih phawk detding thupi hi. Gamdang bang ah Vok leh Ak zong midang ading in agimnamsia aza diam, midang ading in anawksak diam cih enkawm in hoihtak in khawi uhhi. Ih Ui khawi in khuasung ah adiakdiak in khuapi sung ah na vahpih laitak ahi aa, amah in ek athak leh hoih tak in ih siansak pahding kisam hi.

6. Ih paipai na ah tui puakdet ding hoih hi. Tui leiding aompak loh na mun cihte ah midang te tui puak hong dawnsak pak sin aw cihte hoih khol lo hi. Tu hunciang in natna tammahmah ta ahih man in ei leh ei aa ih kigin dending kisam hi. Hong ki nget nak leh piakloh cipding nuamsam lo aih man in ih dawn khit ciang in hong kih nahang in atuipuak zong dawnnawn lo mai thei ding hi. Tuhunciang in khuapi lambang phadeuh ah migilo, guta, mi thahkhawng cikzia lo, khamtheih zatuizang cihdan tammahmah ta ahih man in mi inn ah tuidawn ding ngen in lutngam huai maimai nawnlo hi. Ih meltheih tanau, ih telsinsen cihloh inn khawng ah kuamah ki lut ngam maimai nawnlo cih thei in ih paipai na ah tui thawl ih puakdet ding hoihpen hi. Tuisiangtho lo dawn khak ding zong lauhuai ahih man in ih inn ngiat pan in tuisiang puakding hoih pen hi.

7. Mawtaw, cycle ih hawlciang in zukham sa in hawl ahih keileh hatsak lua aa ih hawl ciang in ih nuntak na bek ading in lauhuai lam phawk lo aa midang te nuntak na zong alauhhuai lam phawk sak ding kisam hi. Ih nuntak na pammaih asa lo zong ih hi maithei aa, ahi zong in midang te ading in a Pa pen uh, a Nu pen uh zong na hithei hi. Ih Mawtaw hawl na ah hongtuang te pen mi te ading in ainnkuan suang ah a it angaih mahmah tek uh ahih lam ih phawksak ding kisam hi. Tua ahih man in mawtaw, cycle ih hawlciang in khamtheih guihtheih khamsa in ih hawlloh ding leh ih hatsak luat loh dingthupi hi.

8. Khuasung ah ahizong mi inn ah ahizong naupang tonpih lohphamawh hun om thei aa midang ading in nawngkai suakthei cih ih phawk ding zong kisam hi. Naupang thuhilh ngeilo hiamcihzah dong in mi innsung aa van leh na khoihsak supsup cihdan, taikawikawi cihdan te pawl kilawm hetlo hi. Damlo inn te ah ihpai ciang in hoihtak ih kepzawh ngap keiding leh naupang tonpih keihamtang leng hoihpen hi.Naupang cihpen adamnak uh leh phiaphia aom hithiat theilo hi mah leh mikiang ah ih pai ciang in mi phone, mi van khatpeuhpeuh khoihsupsup sak loh ding cihdan in hoihtak in kihilh thei hi. Tuabang aa tate hoihtak in thu hilhlo in ih koihdak leh mikiang ah hongzahla sak thei hi.

9. Mi huhtheih na tawhkisai in mi ii neihsa La, video cih te online pan in phalna lopi aa share sak ziau cihdan, amawk na bek aa ngahnuam cihdan hoih lo hi. Midang te neihsa La khui te, Video cihte, Laibu cihte leisak tangtang na tawh khat leh khat ih ki huhding kisam in zong kilawm hi. Na khatpeuhpeuh pen mawk ngahnopna lungsim ki nei khaden thei aa tua in lamhongpialsak thei in, aneupen tung ah cihtak zawhkei leh alian ah zong ih citak zodiam cih ih kidot ding kisam hi.

10. Atawp na ah lam ihpai ciang in minih kiho om khawm kikal ah pai citciat cihdan kilawm hetlo hi. Zum nasep na hita leh, mipi om khopna mun hi ta leh mi kiho dingkhawm kikal ah lutsese lo aa pelhtheih ding thupi hi. Tuaban ah midang TV etkimlai TV mai ah din deldal cihdan, stage mai ah miliah theihtheih in dingdeldal cih dan kilawm hetlo hi. Milak ah ih gamtat na in hong maizumsak thei ahih man in gamtat hoih aa gamtat ding kidop ding kisam hi. Saimon Timothy