Gamgi vai in China leh India langnih galkapte ki galging uh

Gamgi vai in China leh India langnih galkapte ki galging uh

India gam huam sung hi ding a kingaihsun China tawh gamgi Himalaya kim Ladakh kici mun tengah China galkapte a tul a tul in kinawn uh a, galkap mawtaw leh galvan tampi tawh gamtang uh ahih manin India lungkim het lo hi. Tua thu hangin India in zong galkap battalions bangzah hiam khat gamgi lamah puak pah lian hi.

A beisa May 5 ni leh 9 ni-in zong China galkapte gamgi kan a thuk a lut phei luat manun kikaptuahna om ngei khin a, lang nih kigawm galkap 100 val in liamna ngah uh hi. President Trump in tuni a pulakna ah a kisam bangin lang nih lem tuah dingin USA a baihsa in om hi, ci hi. Hih mualsang gam kimnaih India huam sungah 1962 kumin China galkapte mah na lut ngei uh a, kikaptuahna hangin sisan tampi na luang ngei khin hi.

Hih gamgi vai tawh kisai-in China gamah India palai lah ahi ngei tulaitak Delhi khuapi bulphuh Institute of Chinese Studies and Director a sem Ashok K Kantha in a genna ah, “Tulaitak a China galkapte gamtatna pen a gamtatna ngei uh sangin India gam neh lamah thukpi hong lut phei uh hi,” ci hi. Kantha in a genbehna ah, “China gamtatzia pen gamgi cing galkapte galvil ngeina zah sangin a zah tampi-in hong kikhin uh ahih manin India zong gamgi vai ah pilvang a khua a phawk kisam hi. A thu in bel India hi ta leh China in zong kitelkhialhna a pian ding kuamah ut lo hi,” ci hi.

India in hih kim teng Line of Actual Control (LAC) kici munah lampi zikin kiallap vanlengtual khawng bawl ahih manin China in zong tua khawng paulamin a thuhkikna kawmin tutung galkap a tul a sim hong kuansak hi kha dingin ki-ummawh hi. Zanni-in India Prime Minister Narendra Modi in gampua tawh nawngkai theihna thu pawlkhat bangci maituah ding, cih thu bulphuhin a thudotpite leh galkap mangte tawh kamkupna neihpih hi.

More: India, Ranchi khuasung ah innkuan mi 7 aki khailumsa in kimukhia

(China gam pen tulaitakin South China Sea gamgi vai ah Brunei, Indonesia, Malaysia, Philippines, Taiwan leh Vietnam te tawh a kikamtam laitak hi a, tua thu hangin USA tawh zong kingik zel uh hi. Corona virus vai, Hong Kong vai leh biakna simmawhbawl, human rights palsat, cih thute hangin China pen langpang a hauh laitak hi-in amah limlim zong leitungah tunai teng hong kilalsak veve pian, cih ding ahi hi). Source: The Guardian/ The Tedim Post