Ansai khatah kihhuai takin kuangsawp laitak Video kizaihkha in Social Media ah kithehzak

Ansai khatah kihhuai takin kuangsawp laitak Video kizaihkha in Social Media ah kithehzak

Ansai pawlkhat tepen amailam ah asiangtho mahmahtawh akibat hangin innnunglam anhuanbuk khawngah kihhuai mahmahthei hi. Atamzaw in anlimlim nekdingbek ki ngaihsun khathei a, anhuanbuk ah bangci kihuan, ankuang te bangci kisawp cihpen kilunglut khollozaw hi.

Tulaitak Malaysia gamsung ah ansaikhat kihhuai takin agamtatna Video Clip khat kikhahkhia hi. Tua ansai pen Bangsar vengsung aom Raj’s Banana Leaf kici Indian Restaurant khat ahihi.

Video sungah innnunglam aom kuangsawp te’n lampigei tuikivung khattawh akuangte uh asawp ziahziah laitak kimuthei hi.

Hihvai pen atakpi himawk a, Raj’s Banana Leaf thunei te’nzong Facebook tungtawn in mipi tungah thuumna neikikkhin uhhi. Tuabangin kuangsawp agamta tepen nasemthak te hi a, abeisa in hihbang omngeilo hi, mailam ahzong omloding hi. Sianthona cidamna lamsang tawh kisai in abeisa inzong Health Inspection aomsim in bangmah nawngkaina neilo hi ung ci’n pulakkhia hi.

Tuaban ah mipitung thuumna in Raj’s Banana Leaf te’n hongtungding May 31 nitaklam 7:30pm panin 9:30pm dong amawkna in Bangsar Outlet aom Raj’s Banana Leaf Restaurant ah an kavakding uhhi ci’n pulakkhia uhhi.

Video: Raj’s Banana Leaf restaurant has issued an apology after a video showing its staff washing dishes in a puddle of murky water made rounds on social media. In a post on Facebook, Raj’s Banana Leaf claimed the dishes were washed by newly recruited staff members at its Bangsar outlet

Ahi zongin hihvai tawh kisai in Netizens tampitak in Raj’s Banana Leaf te mawhsak mahmah uhhi. Management siamlohman in, hihbang mindaina aom ciangin nasemthak “new staff” te ngawhbawlziau pen diklo hi. Tuaban ah Malaysian mipi te amawkna anvakziau tawh kithoihziau kingahlo hi, akihhuai ngiat hi uhteh cihbang atuamtuam in Comment kipia zihziah hi.

Hihbangin kihhuai takin agamtatna uhhangin Kuala Lumpur City Hall te’nzong zingciang Wednesday (May 30) ni in Raj’s Banana Leaf, Bangsar Outlet ah sitcianna neiding uh kici hi. Tuaban ah Kuala Lumpur mayor Tan Sri Mhd Amin Nordin Abdul Aziz inzong hih Restaurant pen zingciang khakcipding thupia cih kiza hi.

More: Sumzondan atuamtuam: Hotpot ansai ah sungten guaktawh Waitress semsak

City Counsil te’n thukhun tawh kituak in asemhiam cih etcianna aneihkhit masiah ki hongkik saknawnloding cih kiza hi. Kawlsai, Zosai te nasepzia, anhuanzia tezong Video azaih simsim na omzelzel henla, ki puahphatna in hong neithei le uh lunggulhhuai hi. Sawltak #zomidaily