Halloween – Mang Khuado (October 31)

Halloween – Mang Khuado (October 31)

Kumsim October 31 ni pen Halloween ahi hi. Halloween cih kammal pen “Hallowed Evening” pan a ong piang hi a, kum sim October 31 ni nitak in tua pawi bawl uh hi.

“Samhain” kici Celtic khuado pawi ahi hi. Hih pawi pen anthak lakkhit lungdamna leh kumkik an hoihna ding a dawi thoihna pawi ahi hi.

Hih hun in mihing omna, mihing khua leh dawikhua kikal a dal kawmpi khat om a, hih hun in dawikhua pan dawite mihing khua ah ong paina ding tua kidalna kawmpekpi pen pa mahmah in, dawite in tua kawmpek phulet in mihing khua ah ong pai a ante ong neksak thei, kumkik ante ong suksiatsak thei uh hi… ci a upna pan tua dawite lungkimsakna ding a a thoih hun uh, a Khuado pawi uh ahi hi.

Hih pawipen damdam in ong minthang semsem a, tu in leitungbup phial in a khiatna leh ahang thei seselo lel napi gualnop pawi khat in kibawl ta hi. Hih hun in a tuamtuam in kizem bialbual, sikha khawng kineih, kilauphawn cihbang in gualnop hunpi khat in kizang hi.

Tukum Singapore ah zong tuapawi pen nasiatak bawlsawm uh a, tua pawibawlna mun ah lutman ding in S$60, S$70 pan S$232 ciang bang in zuak uh hi. Mi tampi in sumbawlna, metlawhna hun in zang uh hi.

Mang Khuado leh Zomite’ Khuado ong pian’khiatna upna bulpi kinai, kihual mahmah hi.

Mikangte’n a khuado uh leitung zelsak uh a, leitungbup ngeina bangkhat suah dekdekta uh hi. Zomite’n ee? I Khuado pawipi angtang tak in humcip lai ding maw? Namdangte nangawn tawh zangkhawm ding? Pau Khat Suan