Gambup tawh kilehbulh Tedim khuahun ~ Lian Tuang

Gambup tawh kilehbulh Tedim khuahun ~ Lian Tuang

Global warming kici leitung vannuai khuahun lum semsemna thu pen a kiza mun mahmah kammal khat ahi hi. Khuahunte nidang bang nawnlo hi. Singkung lopa bek hi loin nuntakna nei mihing ganhingte nangawn khuahun hangin kisih lawh in kisiat lawh semsem ta hi ci in Dr Myint Zaw in gen hi.

Ahuampi in khuahunte a ngei bangin loin luangkheng den pahpah hi. A lum ciangin lumlua, a vot ciangin votlua cih bang dan ahi hi. Leitung huamin a kigen ciang Myanma gam zong khuahun kikhelna a thuak phadiak pawlin kiciam teh hi ci in U Win Myo Thu in gen hi.

Khuahun kikhelna apiangsak thu tampi a om hangin a kikhelzia a kipatna pen nam khat hi pi pen in kigen hi. Tua in guahtui luanzia manlohna ahi hi.

Guahtui kiam in a zuk sunsun ciangin bua gawp mang ahih manin hawk tui hat in luitui guntuite khang ziauziau hi. Luidung gundung le mual le guamte nawkgawp ngiengei thei hi. Leitang a len a khui ding singkung lopa tawm ahih manin min cim pahpah hi ci in Dr Tun Lwin in gen hi.

Myanma gambup guahtui luazia pen 1961-1980 kum in 2405.9 mm hi a, 1981-2010 kum ciangin 2221.4 mm ahih manin kum sawm nih sungin 184.5 mm kiam hi ci in Myanma Climate Report 2017 ah kiciamteh hi.

Dr Tun Lwin in Guahtui tawm tektek ahih manin khuahun kikhel tektek hi. Khal ciangin khuahun sa lua a, phalbi ciangin votlua hi. Nidang lai in kha 4 sung guahzu a tu in kha 3 sung khawng bek zu ta hi ci hi.

Ahi zongin Tedim khua lian bekin I et ciangin guahtui kiam loin khang zawsop hi.

Tedim khua hunlam kumpi thuneite ciaptehna ah Tedim guahtui luanzia pen 1999-2008 kum in 57.91” hi in 2009-2018 kum in 61.92” ahi hi. Kum 10 sungin 4”val deuh khang hi. 2016-17-18 kumte ciangin hoih to semsem a, 2018 kum in 77.17” tungto hi. 2010 kum khit lam ciangin guahtui hoih semsem zaw hi cih ahi hi.

Gambup huamin guahtui kiamin khuahun siat lam a manawh laitakin Tedim khuapi huam teng guahtui khangin khuahun hoih lam manawh na hi gige hi. Hih thu pen bang hang hi ding hiam.

Singkung in vantunga om guahtuite hup hi, a kicih mah bangin Lawibual a Pa Pau ( Pa Suan Pau ) lo mun tungtengah meipi bawk litliat in tua lai panin guah zuk ding ong kipan hi. Guahtuite sawi dingdeng sa in pa Pau lo sungah leng suk hi ci in Bishop Filex in gen zelzel hi.

Tu laitakin singkung po mitmet in a nim dildial ahi Lawibual sangpi nuai a pa Pau lo mun pen tuma kum 2000 lai ciangciang khawngin lingmin lo in ka pai theih zelna hi a, singkung a lian po nawn loin, mehlei dai um na ding ciangciang bek om hi. Mualte kolh in lei keu mahmah hi.

Ahi zongin Pa Pau in hoih tak puah in a zun ciangin singkung ong nim kik in khuahuan nangawn a hoih sak leitang mun ong suak kik hi. Nidangin a kang dekdek khin sa Lamzang khuakhunga Luipi tui pen tu in tui tam semsem a tuk tawh khal tawh kang nawlo hi ci in Lamzang khuate in gen hi.

Singhalh lo sung leh a kim a om luite tu in tui phul kik ta a, Zulei, sakhi, ngal, vasa tuamtuam le gamsa tuamtuamte in tua gamlak bel ta hi ci in tua kim a om te in gen hi.

Myanma gambup leitung bup guahtui kiamin khuahun siat lam a manawh laitakin Lawibual sangpi nuai a singhalh lo lianpi le khuakima singhalh lo tuamtuamte hangin Tedim khuapi ah guahtui hoih semsem zaw ahihna a gen nuam I hi hi.

Amah it in hoih tak a kem khempeuhte singkung in an le tui pia in hoih takin kemkik takpi ahih manin akua maciat in singkung suan in ,it in puah in zun toto lai ni ci in kizawn nuam hang. Lian Tuang