Dimno’ Nu laikhak – 15
Laikhak gelh dingin ka kithawi zel a, buai na tuamtuam tawh hong kipelh toto ahih manin tutung kong laikhak tawm hong zekai kha pian ei! Ka gelhgelh sa among ka tut loh sawm bang om khin liang ei! Bangbang ahizongin i omna tek ah Pasian in hong kem a, cidam ludam in i masuan kalsuan to thei i hih manin Pasian kiang ah lungdam na i ko hi.
Tunung in i lawm Thangkok te nupa kikal buaina omin, tun kikhen nong cih thu kazak ciangin ka lungnuam lo-in Thangkok zong Phone tawh na na hopih ingh. A thu ka kankan ciangin a tawptawp na ah hi ciang dong a tun na uh pen nupa ki-it lua hang mah na hihi. Ciangboih in a Uthangkok ngai lua liangin mun khat peuh pai in ciah hak na khat, zekai na khat peuh nei leh,
Na zawllui te tawh kimu sim maw?
Kua kiang lam bang na hia? ci-in inn a tun sim in phin den dan hi. A bulpi in bel midang tawh muang mawh den dan aive!
Pasal gina khat, numei picing khat i hih naknak leh zawllui neilo ki om sam lo ding hiven. Nupa pumkhat suah khit ciangin hun bei sa a, zawllui te khawng tawh ki cihcih ding pen hi nawn lo hi. Ahi zongin Thangkok zong lawmnu upmawh dingin om ahih na meel zong lah thei sam khang in mataw!
Dimno’ nu aw, itna zong sihna zah mah in khauh ahi maw!
Itna in hong ki gawm sak in, itna mah in nupa kal, innsung bangkua, pawlpi sung na ngawng hong khenkham zo ahi lam thei gige leng ut ingh. Tukum in Cinpi College kum khat na akah hi ta mah a, Thangkok te nupa hong kigawm kik thei leh hoih ding hiven maw! Hih cibangin hong kikhen suak takpi leh naupang te alawm agual mai ah maimial lua ding uh hive mataw!
Kazak ngei tangthu khat hong gen leng:-
Hun khat lai-in nupa kiteng cil khat meeltheih tanau tengin ansai thupi sim pian khat ah nitak an hong nek pih uh hi. Tua mun ah a lawm limsuiah siam pawl khat, Cartoon sia te, laigelh siam te leh editors pawl khat zong hong pai uh hi. Tua Limsuaih siam te lak ah performer khat zong hong kihel thei hi. Hun hong sawt to pianpian, nek ding dawn ding zu leh sa teng hong nek khit, hong dawn khit tek uh ciangin hong gamlum biaibuai in, ciaknuam hong sa mahmah uh hi.
Tua laitak in laigelh siamte lak pan khat in performer pa’n ama mai a akoih bung sung panin leibeel khat leh ngawng a awh khi khat hong lakhia a,
“Hih leibeel pen performer pa i a Pu un ama khut tektek tawh a bawl hi a, khi zong tua bangmah in abawl hi.”
“Leibeel pen tu-in kum (100) val khin ta hi” ci-in gen in mihon lak ah hong vak pih hi.
Mipi te’n zong tua leibeel pen khat khit khat in hong vel keei uh a, khat leh khat a ki gal lot nop na uh tawh bang tawh hong om uh hi. Performer pa zong tua dan in apu khang apa khang pan a lam uh van te a ki thang hih sak gawp amuh ciangin heh lua kisa in amai bang hong san veva liang hi.
Tua laitak in limsuaih siam pa in performer pa kiang ah “ tu-in nang hun hi ding a, hun khempeuh nang hong zeek to in” hong ci hi. Performer pa zong limsuaih siam pa tawi a leibeel hong sutkhia vat in tha khat thu in lei hong den na in hong kitam zan hi.
Alawm agual teng in lamdang sa-in performer pa lam hong nga ngeingai uh a, thebet khiat bangin agamlum uh hong dai lian hi. Performer pa zong mipi lam hong nga in,
“Tu nitak Monu leh mopa te adingin kong lah ( performance ) in tu a hi.”
“Kapu in abawl hih leibeel pen tu-in kum (100) val khin ta hi. Ahi zongin tu-in tua kum (100) a pha khin ka leibeel uh pen na muh bang un ka hehna hangin kitam zan khin ta hi. Kum tul, kum za apha khin a, ni khat ni nih bek apha pan leibeel khat ahi zongin themcik hehna hangin leideen na leng a kisia ziau, abei mang thei, amai mang thei na ahi hi.”
“Tua bangmah in a kum a kha in ki ngai in, tua khit ciangin kiteng in, inn mun lo-gam tampi i neih khit ciang na ngawn in bangmah ahi lo, na thel no khat, kammal khat peuh hangin heh le hang den a leibeel bangmah in innkuan sung kitam in nupa kikhen na dong apiang theih thu ahi hi. Ni khat ni nih apha pan innkuan zong tua bangmah in piang thei veve hi.”
“Khut a bawl mah tawh akibang leibeel bangin nih geel lungtuak in na lam uh innkuan pen a kum akha hong pai khit ciang bangmah ahi tham lo, kiim leh paam pan khat peuh hazat na tawh hong suttuah na hang ahi a, hehna thelno khat peuh hang ahi zongin leibeel bangin innkuan sukham kei un. Pilvang tak in keem cing un”
“Hih in tuni no nupa adingin kong piak lungdam na letphuaih hi” hong ci hi.
Dimno’ nu aw, i kiim i paam ah mi tampi tak in hehna thelno khat peuh, kiim leh paam pan khat peuh hazat na, khat peuh suttuah na hang in kum tampi tak alam sa uh innkuan pen leibeel bangin sukham in satzan ziauziau mawk uh a, tu-in bangzah tak bang ki tam khin in, mailam ah bangzah tak aki sattam lai zen tam maw!
E’n i leibeel hoih tak keem cing in kitam sak kei ni maw, Dimno’ nu!
Hong it tawntung,
Dimno’ Pa
19 Aug 2012
Comment piaknop aomleh...