Gam leh minam khantohna dingin a kisam thu laigil ~ Khup Lian Thang

Gam leh minam khantohna dingin a kisam thu laigil ~ Khup Lian Thang

India te makaipi leh leitung bup in mi thupi in a ciapteh ahi Mahatma Gandhi pen biakna upna lam ah Hindu upna a zui khat ahi hi. Ahih hangin Lai Siangtho (LST) a sim ciangin a diakin mualtung thu hilhnate a sim ciangin thupi sa lua ahih manin Christian biakna zui ding cih ngaihsutna tawh biakinn khat ah kikhawm dingin Calcutta khuapi aa om biakinn khat lam ah a va zuan hi.

A paina biakinn mai hong tunga, tua biakinn mai-aa lai ki suang amuh ciangin ki leh kik ving veng pah lian hi. Bang lai ki suang hiam cih leh, India Minampi te leh Mangkang te bek kikhawm thei ding hi, ci-in ki gelh hi. Tua hangin Mahatma Gandhi in “Christian a ki ci te hangin Christian ka suak kei hi” ci in, upna thu laigil taktak leh a gamtatna a ki tuaklo Christiante hangin Christian a suah nawnlohna thu na gen ngei hi.

Tu laitak in leitung tangthu lam ah mipil khat leh Hebrew University of Jerusalam ah Professor khat ahi Yuval Noah Harari in “Tu laitak hun pen, leitung ah mihing te a pianzawh khuahun a hoih penpen hun, leitung pianzawh nopna daihna tawh a ki dim penpen hun, suahtakna a om pen hun, gam khat leh gam khat a ki lem pen hun, mihing te’ manphatna leh mihing te’ hihna aki thupitsak pen hun ahi hi. Ahih hangin mihing te’ tangthu te khempeuh en kik hi leng, mihing te pen upmawh zawhloh zah dong dingin ki hai thei in, ki nungtolh kik thei zelzel ahihna zong phawk den veve kul hi” ci-in, a kisia leh a leh tai gawpmang thei mihing te’ pianzia te tungtawn in ki dopkholh ding na gen hi.

Christian Tangthu Ah

AD 30 khit lam aa kipan in Christian masate pen upna thu laigil bek mah bulphuh in na nungta uh hi. Tua hun laitak in Jews te’ upna, a thahat Roman te’ ukna leh et cikna nuai ah haksat bawlsiatna tampi na thuak uh hi. Suakta takin Pasian bia theilo uh in, a simtham in Pasian bia uh hi. A neih leh a lamteng ki hawm diamdiam in , a zawng a hau ki deidan lo in, a neih bangbang uh nekhawm dawnkhawm in nungta khawm uh hi.

Amau a bawlsia te tungah thukkik hetlo in Pasian’ khut sungah ap zaw uh aa, amau’ tungah a kitat siatna khempeuh pen itna tawh maisak zaw uh hi. Roman kumpi te in thu-um masate pen a gilkial mahmah humpi neelkai an dingin pia uh a, tua a cikzet huai bawlsiat nate pawi et in en lel uh hi. A hingtang in lam-mei dingin hall up bawlsiatna na thuak zen uh hi. Nung zuipi khempeuh phial zong bawlsiatna hangin a si vive uh a hi hi. Tua pen hun masa lai thu-um mite’ nuntak kalsuan zia a hi hi.

Hun nihna ahi AD 321 pawl pan in, Roman kumpi in thu-um te bawlsiat nawnloh dingin thu pia hi. Roman kumpi pa mah in a sawt lo in Roman gam khempeuh Christian gam suak khin sak mang hi. Kumpi thuneihna tawh a gambup biakna dingin Christian biakna tawh laih hi. Gam mite in upna laigil tawh, lungsim tawng panin a upna tawh a san uh hilo ahih manin hih hun sungin Christian upna pen a kizelh hangin hun masa lai dan in upna laigil taktak tawh a khangto Christian nuntakna na neilo uh hi. Biakna paulap in, upna kibat pih lo Muslim tawh ki do na lianpi kum 200 sung (AD 1095-1291) bang om hi. Tua pen Cursade ki ci a, tuni dongin a lipkhap huai mahmah tualthahna in ki ciapteh hi. Tua bangin ki thahna dingin a vaihawm leh thu a pia pen Christian makaipi te mah na hi hi.

Hun thumna ahi, AD 1517kum pawl ciangin Martin Luther’ makaihna tung tawnin Christian upna sungah kikhelna leh khanlawhna lianpi na tungin tua in Christian sungah kikhenna lianpi tungsak hi. Ahih hangin hih pen a hoihlam in kikhena ki ci thei hi. Hun sauvei pi sung mah upna sanna tawh thu laigil lam ah a paikik ding a bat hangin upna laigil tawh a kileh bulh sila te bawlsiatna, mihing veve ganhing bangin bawlna cihte na om toto veve hi.

Tua kawmkal lak pan in a it a vei taktak thu-um mite nasepna hangin leitung leimong dong ah Gupkhiatna thu na tangko zo uh a, leitung kiu li pan in mi tampi in suahtakna ngah hi. American Baptist Mission te in Zogam na ban to kha uh a, tua hangin tuni dongin Zogam pen Christian gam a suak ahi hi. Tua in Kawl biakna leh ngeina huzap hangin a mangthang thei ding Zomite, tuni dongin ngeina leh sisan ah, Kawlgam aa om mualtung mite lak pan in a siangtho mahmah lai minam khat asuahna pen Christian upna hang ahi hi. Hih hun sungin khanlawhna lianpi zong piang a, upna leh san dan a tuamtuam ki behlap in pawlpi zong tua dung zui in ki behlap toto hi.

Pope Fracis in 2ndAugust, 2018 in leitung ah thu lianpi khat na tangko hi. Tua in bang hiam cih leh, gitlohna khat peuh hangin kumpi te thukhun zui in sihna daan (death penalty) tawh mihing khat sih sakna pen Christian te upna tawh kituak lo hi. Mihing te in leitung a nuntak sungin mawhna khialhna ki bawl thei ngeina hi in, sihna daan piakna pen hoihlo hi ci hi. Bek thamlo in Catholic pawlpi ii thukhun sungah zong tua thu hel ding, khangthak te leh thu-zui mite tungah gen dingin vaihawm ta uh hi.

A tunga teng atom in en kik leng, Christian tangthu ah, upna bulpi ahi Pasian upna, a kizang LST zong a kibang ahi hi. Nungzui pite hun aa Christain te in ki niamkhiatna, itna leh thuakzawhna, mawh maisakna tawh na nungta uh hi. A lang khat ah Roman leh Europe gambup phial Christian a suak hun sungin Muslim kici biakna thak khat na kipan khia zo veve uh a, tua hun sung mahin Crusade kici, upna biakna bulphuh in tualthahna lianpi na om hi. A biak Pasian kilamdang lo, a thu bul let ki lamdang lo, LST zong aki bang mah ahi hi.

Ahih ahangin aki lamdang khat ahileh a mite, avaihawm mite ki lamdang ta uh a, Christian masate ii thu bullet te na len nawnlo uh in na paikhial ahihna ki mu thei hi. Tu laitak in ahih leh kumpi thukhun hangin thahna a piak te nangawn thahna daan (death penalty) piakna pen manlo in cih zah dong hita ahih manin AD 1095kum aa Crusade hun lai aa upzia sanzia tawh ki nak lamdang mahmah ahihna kimu thei hi. A thupi pen ah , tua Christian upna ii thu laigil taktak bang hiam, cih tel in tua mah kip let ding a thupi penpen ahi hi.

Gam Ki-ukna Lam

Leitung tangthu ah gam ki-ukna atuamtuam ahunhun in na om toto hi. BC hun lai leh AD 1800kum kim ciang dong pen in ahuampi in kumpi khat ii thuneihna tawh ki-ukna, innkuan or gam neite or a thahat penpente in thatang zangin ki ukna hi zaw hi. (BC 500 pawlin Greek gam Athen khuapi in Democracy ki-ukna zang, ahih hangin gam lianpi hilo in khua khat gam khat ki ukna hi zaw).

Kum zalom 18 lam ciangin Democracy ci in mipi thu neihna tawh ki-ukna, mipi te’ tel makaite makaihna tawh ki ukna pen ki pakta ciat hi. A khangto gam khempeuh, a diakin Europe gamte in tua ki ukna bulphuh in kalsuan uh a, innpi dawl tungnung leh nuai nung (Upper/Lower House) thu neihna tawh kalsuan uh hi. Kumpi aneih hangin a sep theihna ciangtan in, thu neihna nei taktak sak lo uh a, Mipite’ tel ahi tangmi te’ ki tuahna Innpi (parliament) in thunei sak zaw uh hi. Tua in khantohna tampi piangsak in, leitung khempeuh phial pen Europe gamte’ ukna sungah om phial uh hi. Tua hun laitak in leitung Democracy gamte ii pupi ahi America gam zong British te tung pan in suahtakna ngah in gam khat in ki panpan ta hi.

Ahih hangin Galpi khatna ahi zongin, galpi nihna a piangna ding a makai hi Germany makaipi Hitler cihte, Italy makaipi Mussolini cihte pen tua bangin mipite telna mah tawh kah in makai a sem uh na hi zel uh hi. 2017 leh 2018kum sungin Latin America pan in Venezuela makaite ahi zongin, Europe pan in Turkey makaipa in ahi zongin a thu neihna zangin ama dinmun sawtpi a sep theihna dingin a gambup thu khunpi nangawn laih ngam lel hi.

1990kum kim pawl pan in leitung democracy ki-ukna ah a et-teh tak pen ahi America gamvai makaite nangawn in a thu neihnate met dok in mimal pawlkhat leh mi pawlkhat te ii deihna lam ah pai in damdam in lampial ta ahihna zong mipilte in na gen uh hi. Ki telna tawh ki ukna ahih hangin Democray kalsuan zia taktak a nei khollo ahi Singapore gam leh gam pawlkhat zong pen, tua bangin suahtakna taktak aom loh hangin na lawhcing mahmah veve in a gam mite in zong mundang gamdang eng tuanlo uh hi.

Sen gam bang hileh BC hun lai pek panin kumpi te’ thuneihna tawh ki uk uh a, tua khit ciangin 1949kum pan in Communist ki ukzia tawh tuni dongin kip tak in na kalsuan uh hi. Tua ki-ukzia pen amau gam aa dingin a hoihpen hi ci-in um ngiat uh aa tuni ciang dong zong nawng-kaina om lo in ding zo uh hi. A lang khat ah amau tawh gamvai san zia ki bang a hi Russia te, Yugoslavia te pen a masa in a ki ukzia tawh matutna tampi a ngah hangin lamkal ah ki puk in 1989-1990kum pawl in a gam uh na ki tam kham veve uh hi.

America, Sen, Singapore leh galpihna hun Germany , Russia etc… en kak in khat vei lungngai kik dih in. Ki ukzia, ki makaihzia, mipite telna, a omsa lampi ah cihtak takin sepna cih bangin makaihzia te khat leh khat ki banglo hi. A thupi leh athu laigil ahi mipi te’ phattuamna ding, mipi aa ding bang sep sak ding cih veina deihsakna in a tawpna ah gualzawhna lampi dong na tun veve ahihna ki mu thei hi. Hih gamte’ makaite in a sep amaban ii thu laigil tel mahmah uh hi. Amau mun ciat ah hoihtak a kizat nak leh hoih tuak uh a, na deih zawkzawk ki ukzia khat peuhpeuh ah a thu laigil teltak in na kulsuan ding a thupi pen ahi hi.

Mipilte’ Muhna

Mihing te tangthu lam ah a siam mahmah Yoval Noah Harari in, leitung pen hun dangdang sangin nopna daihna tawh a kidim hun laitak ahi hi. Gal leh sa, mi gilo te’ thahna hangin a si sangin amah leh amah kithat in a si leh accident in a si leh a kumtam aa a tek sih tam zaw tham hi. Gilkial dangtaak nek ding neilo in a si sangin gilvah lua, antam ne lua leh neek le dawn kidop lohna hangin a kingah thei natna tuamtuam hangin a si pen ki tamzaw tham hi. Tua ahih manin tuhun leitung mite’ gal lianpen in ahih leh gam khat leh khat kidona hangin a piang thei ding sihna, mi gito te’ thahna hangin sihna, cihte hi nawnlo hi. Mihing te, amau mahmah pen amau aa dingin a lauhuai pen a gal hita hi, na ci hi.

Tua ahihman in thu-um mi a kici mi khempeuh, a diakin Kawlgam aa om minam leh gamte lak ah thu-um mi atampen ahi Zogam leh Zomi te in lung ngaih kik ding tampi om hi. Zomite in, Chrisian nuntakna ii thu laigil ahi itna thu, mawh ki maisakna thu, ki niamkhaitna thuakzawh hatna thu, cihte khahsuah ta uh hi. A kampau te, a lai at te, akammal zatte, a gamtatzia te uh pen thu-um lo te tawh ki lamdanna tawmzong a om lo dinmun ahi hi.

Zu ne zatep, zatui zangin ut bangbang in om in siatna tampi in Zomite tuamcip ta hi. Gam vai nasepna ,minam vai na sepna, sum leh paai bawlna, pawlpi biakna ki makaih kalsuan na khempeuh ah a ki et phat kik loh phamawh ta uh hi. A min bek in Christian hihna pan in, a thu laigil a thuthuk athu taktak tawh a kalsuan Zomi Christian te a hih ding thupi mahmah ta hi.

Democracy ci-in mipite’ deihtel makaite’ makaih ki ukna tawh a kalsuan ta gamkhat ahina ki zui in, tua Democracy ii a thuthuk leh a thu lai gil ahi mipi’ thu neihna, a tawmzawte ngaihsutna zong thupi simna cihte bulphuh in gam makaite in a kalsuanpih ding thupi hi. Tua bang danin makaite in a kalsuan pih kei zenzen leh pen, mipite’ deih tel makaite a neih hangun bangmah a khiatna nei tuanlo hi.

Bangteng kisapna om a, bangteng taktak ah a min bek hi in, athu taktak tawh ki kalsuan nailo cih pen makai upa khempeuh in itna, veina, lungduaina bulphuh in kikup ki gen kipanpih leh kalsuan loh phamawh ta hi. Tu laitak dinmun pen, tua bangin hihna hihlohna khat ki genleh a kizahtak zaw omlo, kam tung nun kituh in, bangmah lo tawh Zomite buai mahmah uh hi. Yoval Noah Harari cih dan hileh, Zomite gal pen mundang minam dang te hilo in, Zomite leh Zomite ki thu tuah lohna, ki makaih liailiai theih lohna mah hi kha ding hi. Zomite paunak ah zong, “Mi bawl in ih mang (bei) kei a, ei leh ei kibawl in ih mang (bei) hi” na ci hi.

Zomite in a tuah khaksa thu tampi om khin ahih manin, kikhial kik nawnlo dingin lauhuaina om nawnlo ding hi ci-in lungmuang in a om khak hetloh ding zong thupi hi. Leitung tangthu ah a kikhial a hoih hetlo thute mah ki khial kik kik in piang kik kik thei zel hi.

Zomite

Thu-upna ah ahi zongin gamvai nasepna ah ahi zongin, pawlpi kipawlna vai ah ahi zongin na sep na bawl na maban khat peuhpeuh ah ahi zongin, Yuval Noah Harari gen dan in, upmawh zawhloh zah dongin na hai hetloh na dingin kidawm siam in, angsung deihna kiphat sakna te paih khiat ding thupi hi. “Thu laigil taktak” tawh na minam na gam uh na kalsuan pih hun mahmah ta hi. Mahattama Gandhi gen mah bangin, na gamtatna na kampauna khempeuh ah “Thu laigil taktak” tawh a nungta na hihna kilang sak in la, na nasepna te tawh na gam leh na minam aa dingin na vei taktakna kilang sak inla, na lungduaina, na ki niamkhiatna leh itna na neihna te in Thu-um mi leh minam it taktak minam vei taktak na hihna kilang sak ta in. Lungdam, Khup Lian Thang

Reference:

• The Decline and Fall of the Roman Empire, Edward Gibbon
• Homo Deus, A brief History of Tomorrow, Yuval Noarh Harari