Gam leh Nam it siam ve ni ~ Pau Tun Thang

Gam leh Nam it siam ve ni ~ Pau Tun Thang

Pasian in nam thupisa hi ding hi.Bang hang hiam cih leh mihing ngeina khat lungsimah gam leh nam veina lungsim om sak hi. Kawlgam vai gam zin a inn lam zuat ciangin, eima’ teenna gam i tun ciang ki khamuang hi. Pasian in nam tuam tuam hong bawl hi.Pau tuam tuam tawh ama’ min phat ding deihna ahi hi.Tua ahihmanin gam leh nam it ding pen khristianna tawh zong kituak hi. Eima’ gam leh nam ciat it ding pen khristian te adingin mawh puakna khat ahi hi.Nam lian zaw ten amau nam it uh hi. Nam i it semsem theih nangin namdang ten amau’ nam a itzia uh ngaihsunkawmin tha la thak dih ni.

Israel te’ gam leh nam it dan etteh huai mah mah hi.Israel te pen amau nam khat leh khat kigum vilvel uh hi.Israel gam sunga teengte zah mahin gam pua a teeng Israel mite Israel kumpi in thudon hi.Gam sung leh gam pua -a teeng Israel nam te kithuza den uh hi.A mipihte uh midangte’ simmawh ding leh bawlsiat ding phal vetlo uh hi.Khualzin gamvakna ah mite’ mat leh bawlsiat a thuak khat peuh a om ciang kumpi in sun leh zan ci lo in Cabinet Meeting nei pah uh hi.

A hotkhiatzia ding kikum pah tang tang uh hi.Tua ahihmanin mipi ten zong kumpi muang in it mah mah uh hi.Nikum(2011) in Israel mi 1 Palestine te mat a suahtak theih nangin Israel ten a galmat uh Palestine mi 1000 khahkhia ngam uh hi.1 leh 1000 kikhek hi mawk uh ahihmanin Israel ten a mipih pa uh it mah mah cihna hi.Zomite zong Israel namte mah bangin 1990s kiim pawl pan leitung mun tuam tuamah ki peem hi.

Tuhun ciang leitung mun tuam tuam ah Zomite teeng ta hi.I omna ciat ah i hihna(Identity) mansuah loh ding thupi hi.Nam i mansak loh nangin gam leh nam itna lungsim diktak i neih tek ding kitangsam hi.Ngeina, pau leh haam leh kivaipuakzia tuam tuam te i omna mun ciatah zattoh zel ding cih phawk ni. Khualzin gamvakna munah Zomi leh zomi haksatna a tuak khat peuh kihuh ding hi hang. Zomi leh Zomi pen sih donga kigup ngam ding thupi hi.Tua hi leh namdang ten hong zahtak ding uh hi.Nahoih a thei khat peuh i om ciang namdangte theih ma in kihilh meng meng ding.Namdangte lakah thusim a nei thei nam hih ding thupi hi.

Israel nam makai Moses pen a gam leh nam itna khauhpai diak hi. Khatvei khuasung a vaak leh Israel mikhat tawh Egypt mikhat na kilaai uh hi.Moses in a va muh ciangin, a tanau laina zong ahi peuhmah lo, a mipih ahih man bekin gum a, Egypt mipa that ziau hi. Israel miten bawltawm milim a biak uh ciangin Pasian heh a, Israel mi khempeuh thah sawm hi. Tuaciangin Moses in Pasian kiangah, ”Ka mite’ khialhna maisak inla, keima’ min nuntakna laibu sung pan phiat zaw mai in” ci liang hi.

A mite’ adingin ama’ nuntakna khaam in Pasian’ kiangah thuumsak ngiat hi.Pasian in zong a thuumna mah bangin Israel mite thatlo hi (Exodus 32:32).Tudongin Moses pen makai thupi khat in kiciamteh hi.Makai kisinsakna munte ah ama’ tangthu Khristian ahi lote nangawn in sin uh hi.Zomi kipawlna tuam tuam makai ten Moses etteh huai hi.Zogam/zomi Moses ding ki tangsam mah mah hi.Nam it makai ten ama’ meetna ding bek ngaihsun lo ding hi.Nam adinga phattuam nang ahih naak leh sumh ngam zaw ding hi.

May ni 14,1948 in David Ben Gurion’ makaihna tawh Israel te gamkhat in hong dingzo uh hi.Prime Minister dingin David Ben Gurion leh Science lama Nobel Prize ngah mipil Albert Einstein kikhiat niloh uh hi.A tawpna ah David Ben Gurion tung mah tu ahihmanin tawlkhat sung Prime Minister hong sem hi.Amau’ pen a gim leh tawl ding kituh uh a, hihna (Panmun) kikhiat zaw uh hi.Etteh tak hi, gam leh nam it takpi mawk uh hi.

Tua ahihmanin namdang ten zong zahtak uh hi.Ei Zomi te zong kipawlna tuam tuam ah a gim leh tawl ding kituh zaw a, panmun iki khiat siam ding hoih hi.Mun khen khatah hihna deih luat manin buaina om thei hi.Biakna lam ah hihna deih luat manin saptuam(Denomination) tampi pian lawh hi.Hih pen kithu tuahlohna nam khat hi mawk hi.Pawlpi tampi a kikhen sangin pawlpi khatah mi tampi kipawlkhawp theih hoihzaw hi.A thupi pen eima paua Pasian biak ding hizaw hi. Gam leh nam a it mi khatin panmun bangmah nei kei mahleh, a hih theihzah in mapang hi.

John F.Kennedy(1917-1963) in American President dinga kiciamna a neih ni (20.1.1961) in ,” I gam in kei adingin bang hong sepsak ding hiam cih ngaihsun kei unla, i gam adingin ke’n bang sem thei ding ka hi hiam cih ngaihsun zaw un” ci hi.US President, Reagen(1911-2004) in a vote campaign laiin,”I gam puahna dingin kumpi’ sum(Budget) a kicin zawh kei leh, keima’ mimal sum tawh behlap ding hi’ng” cih gen hi.

Ngahna ding lam gen hetlo in piakkhiatna ding lam bek gen zaw hi.Hih pen gam leh nam itna dik tak ahi hi.Hihte lungsim pen etteh huai mah mah hi.I khawsung,saptuam sung leh nam sungah hidan lungsim pua tampi om leeng hoih ding hi. Sum leh paai tawh a kikhem thei nam makai om thei hi. Mun tuam tuamah i om phial zongin i zogam adingin na kisem thei hi.Tuhun ciang kizopna baih tek tek ta hi.I gam leh nam mah vei masa ni.

A lawhcing, a pil leh siam i om ciangin mi’ gam sangin eigam mah puah in zuun ding hi hang.Mihing’ manphatna pen sawtpi nuntak bek hi loin, sawt nungta kei mahleh gam leh nam ading nahoih tampi sep hizaw hi.Gam leh nam ading mi manpha, contribution tampi a neite a sih nung ciang nangawn un a min uh dai tuan lo hi.Tuabang mi ahi thei dingin mimal khat ciat in pan la tek ni.

Kawl(Burmese) te zong gam leh nam it mah mah uh hi.A ngaihsutna uh kikhelsak ding haksa mah mah hi.Mangkang missionary te Kawl lakah kum 7 vilvel a om khit ciang un kawlmi khat ngahzo pan bek uh hi. Nidanga sum a sihsak zelna hang uh pawlkhat ten a gen dan un; Kawlgam sungah Sen(Chinese) te Kawlte sang a hauhzawk ding a lau man uh ahi hi.Gam leh nam itna nam khat mah hi veve mawk hi.Namdangte tung -et nuam tuan lo uh hi.

Amau nam ngeina kizep kipuahnate zumpih lo in mun khempeuh ah zang uh hi.India-a ka laisinna munah kum simin Kawlte Short Term Training in hong pai zel uh hi.Tua Kawl ten Puanten(Kawlniik) mah teng dingdiangin Thanakha mah hong kinuh phikphiak uh hi.Namdangte’ lakah hong kilawm khollo sim hi.Ahizongin a ngeina uh zumpih lo ahih man un thupi hi.Ei zomi ten zong i zopuan leh a tuam tuam te zumpih mai loa namdang lakah i pholaak ding thupi hi.

Japanese te zong gam leh nam it mah mahin kiciamteh hi.A hih theih lai siah namdang tawh kiteen ding utlo uh hi.Bang hang hiam cih leh nam a kepbit nop man uh ahi hi.Namdang tawh kihel (Mixed) luat ding pen deih khollo uh hi.A nungakte uh namdang tangval tawh gamtang khialin gaai phial mahle uh nauphiat(Abort) zaw uh hi.Tua ahihmanin Japan gamah Abortion Rate zong sang hi.

Tua bang dana -a kikep vilvel man un Japanese te khat leh khat a meel uh kibang diak hi.Eimite bel Zomi hi napi vai meel suun a vom ming meng khong muh ding om ta hi.Negro meel suun a sam kil thilthel nangawn om ta zen hi.Eimi pasal namdang zi neite gamkeek dinga i ngaihsut hangin nam mansuah hong hi zaw uh hi.India gam bangah eimi Officer om sunte a zite uh Lusei khawng peuh hi mawk hi.A zite’ pau khawng zui zawsop uh ahih manin a tute’ hunah eipau thei nawn lo in Lusei suak ta uh hi.Pasal khat numei suak tawh kibang ahihmanin ngaihsun thei leng zumhuai mah mah hi.

Vai(Kala)te zong amau’ hihna- a khahsuah nuam vetlo nam ahi uh hi.A nam ngeina uh leh a biakna uh Hindu kip takin kizom hi. Jesu’ nungzui Thomas nangawn in a upna uh khelsak zolo hi.Bang hang hiam cih leh Jesu nungzui Thomas India gam hong lut mahleh India gamah Hindu hi zah takin tam veve hi.Nidanglai bang in namdang peuhmah zong lawng(Touch) nuam lo zen uh hi.Vaigam khuasungah mi khat peuh va vua lehang vai dang ten huh lian uh hi.

Hindu numeite etteh huai mah mahna khat bang hiam cih leh namdang pasal nei nuam vetlo mawk uh hi. India gam pen leitung bupa mihing tam pen nihna ahi hi.Hih gamah mipi za ah sawm giat val bang Hindu ahi uh hi.A tamna zah tawh kituakin Hindu numei namdang pasal nei tawm mah mah hi.Hindu numeite pen a pasalte adingin citak mah mah uh hi.A pasalte adingin kipumpiak ngiat hi mai uh hi.A pasalte uh galdona munah a sih ciangin amau meikuang sungah na lut ngam liang uh hi.

A pasalte uh a sih ciangin a zite a hing lai mah tawh kihal khawm hi.Khristian zong ahi lo Hindu numei te hizahin kikemzo uh ahih leh Khristian ahi Zomi numeite adingin ngaihsut huai hi.Pasian in thu-umlo mite tawh kiteen ding phal lo hi.(Deuteronomy 7:3).Zomi’ sul pan Abdul, Prakash, Mohammad etc. khawng hong pian ding pen kilawm samlo hi.Ngaihsun thei le ucin Mizoram leh Manipur khawnga Vai Tribal zi anei ten amau’ gamah zipi nei khin uh hi.A sumbawlna uh a lamzan zaw na dinga north east numeite zi a nei pak uh hi lel hi.A nu leh pa te un eilam numei mo deih tuanlo uh hi.

Zosuan sungah Luseite zong gam leh nam it kici thei hi.Mizoram state a pian theih nangin kum tampi India kumpi kiangah na ngen uh hi.Hih hun sungin haksatna tampi thuak uh hi.Ahizongin tuate thuak ngam mawk uh ahih manin a kilawm leh kituak bangin thaman ngah uh hi.Namdangte mah bangin amau zong mun tuam tuam Manipur, Kawlgam cih khawngah kikhenthang uh hi.Ahizongin a omna mun ciat uah amau’ ngeina pau leh ham akipan a tuam tuam te khahsuah lo in limtakin kemcing uh hi.

Tuma lam in Mizoram Paite Tribe Council(PTC) ten Autonomous District Council (ADC) ngen uh hi.Mizoram kumpi aiawh ten, “ Tua dana olno taka kingah thei hi kei, Hmar ten zong a kap khiat uh hi” ci in na dawng hi.Diksa mah mah ing, unau Hmar ten Sinlung Hills Development Council (SHDC)a ngahna dingun nakpi takin kiphin uh hi.Ei zong Luseite India kumpi kianga akiphin zah uleh Hmarte Mizo kumpi kianga akiphin zah un kiphin ngam leeng miten hong thudon zaw deuh ding uh hi.Tuhun ciang Memorandum va piak lel tawh bangmah ki ngah nawnlo ding hi.I taten na khatpeuh hong nget ciangun kipia pah sam lo hi.Kap zena hong kiphin uciangin ki thudon pan a, leisak in kipia pan hi.

Pasianin namkim gamgi hong khunsak hi.Tua gamgi pen adang hi loin ngeina(Culture) hi pah hi.Nidangin Sen(Chinese) te Kulh tawh na ki um cih uh hi.I nam a man loh nangin lungsimah gamgi kham siam kuul hi.Namdang lak pan ei leh ei ki tuam ngaihsutna lungsim vom kuul hi.Hih ka gen ciang namdang lakah ki bual lo ding ka cihna hi zen zen lo hi.Namdang lakah pilna siamna sina kibual luat ding ahi hi.

Ahizongin namdang lakah zong eima’ identity man suah loh ding hoih hi.Eimi ten namdangte thupi ngaihsut lua in pau dang khat i siam ciang eipau sangin hahzat zaw thei hi hang.Mi khenkhat in gam leh nam vei luat pen lungsimneu huaisa uh hi. Mawk hai thukhual zong i nam man nading lel ahi.Min tuam tuam Mizo, Kuki, Chin te hong kizuak kawi kawi ding hi.Min thak CHIKIM, Khulmi etc. zong hong piang mai thei lai hi.Ahizongin tuate thudon vetlo ding hi hang. Bang hang hiam cih leh zomi kici khinta i hih manin. Zomi kici in adangte i paih ngam kei leh i zomi nampi khang thei lo ding hi.

Mizo ten a thu in, “Mizo vek kan ni(Mizo vive hi hang)” hong ci ding uh hi.Ahizongin eima’ hihna mansuah zena Lusei pau i va zuih kei leh Mizo diktak in hong sim thei tuanlo ding uh hi.Mizo II aihkeh Zo hnahthlak khawng kihi zo bek ding hi.Kuki leh Chin lah i min ahi lo mite’ hong sapna bek hi.Tuabanah deih lo a i nusiatsa khat hong hi ta hi.Gam i keek ma in Zomi a kici teng i kipzawk nang ngaihsun phot ni.Unau Ralte te bang a thukhual luat man un a pau uh mansuah ta uh hi, pilvan huai mah mah hi.

Nam it khatin a minsiat nading phal ngeilo ding hi.Paunakin,”Sakhi in a tat nang kuamkua khual” a cih mah bangin kiim leh kiang banah mailam hun khual kuul hi.Gentehna in kawlgam miten Mizogamah mawhna bawlin kawlgamah na taimang uciang ko a gam ngakte adingin nuam vetlo hi.Eima’ mimal life enjoy ut luatna hangin midang ten hong neu muh thei uh hi cih zong phawk huai.Numei pawlkhat namdang lak khawngah, “Kei’ nuntakna ka thu hi(It’s my life)” ci in kizuak uh hi.Tuate’ hangin adangte nangawn mi’n mu niam thei hi.I nuntakna ei a’ hi loin Pasian a’ hi zaw hi.

Mind your own business. It’s my life, I can do anything with it cih zong se kei mah.We should mind our own business, but if your business somehow affects others, then they have the right to interfere in your business hi zel hi. Kei life ahi cih liu liau pen hoih khin lo hi.Bang hang hiam cih leh mihingte pen khat leh khat a kitangsam sawn dimdiam ‘social animal’ ihi hi.Mi pawlkhat in amau’ meet na ding ahih naak leh nam minsiat sak ding phamawh salo uh hi. Hih bang mite nam it tak tak kici thei lo hi.Mi khat hangin adangte zong hong ki mukhial thei cih phawk ni.

I nam i it leh zo ngeina te a man loh nanga kepcin ding i mawhpuakna hi.Khanglui hun lai pek pana i zat zo ngeina te khahsuah loa zat toh zel ding ahi hi.Hong sawt sem sem leh manpha tek tek zaw ding hi.Nam khenkhat in a ngeina te uh a thupizia hong phawk uh ciang a ngeina te uh a thei nawn meel lo hi ta uh hi.Tua bang dinmun a i din ma in i zo ngeina te kepcin huai hi.Inn sung dongta gualhzia te akipan, inntuan sagawh, pu zukholh, nau anntawi etc. te zomi i hihna namdangte’ neih kim loh ngeina ahi hi.

Nau min phuahzia leh inntuan inn luah zia zong ngeina kician nei i hih manin tuate mah zang di hi hang.Zo ngeina zatna in Zomi i hihna hong bukim sak hi.Nepali(Gorkha) te Mizoramah hong lut zawh uh kumza phial pha ta hi.Lusei pau bang amau’ pau zahin zang siam tham ta uh hi.Ahizongin amau pau leh ham leh ngeina te limtakin zui lai uh hi.Mizorama zomi te Lusei lakah hong teen uciangin a tute khangah a tamzaw in eipau mangngilh ta uh hi.Tu in zong eipau a Pasian bia nuam lo Lusei pau a zang tampi om hi.Hihte khawng pen ngaihsun thei le uh a zumhuai hi zaw hi.

Nam i it leh mailam hun ding zong khual kuul hi.I omna ciatah i khantoh theih nangin a kitangsam tampi om ding hi.Tuate laka khat pen gam ahi hi.India gamah eima’ gam cih theih ding ADC ciang beek i neih kei leh mi kipha zolo ding hi.Tua bang a pian theih nanga kitangsam khat hangsanna ahi hi.Meidawina tawh bangmah tan ki tungzolo ding hi.Kithutuah leh pankhawm siam zong kitangsam mah mah ding hi.India gam zomite politics pen MLA ciang bek hi mawk hi.Mangte’ paunak in, “Pai loh sang zekai hoihzaw(Better late than never)” a cih mah bangin, zekai sim mah le hang mainawt zel ni.

Kawlgam Chin State zong eima’ khutsung a suah sem sem theih nang i ngaihsut kuul hi.Eimi ten politics kithudon lo lua ahihmanin mi kipha zo lo hi.Gam neih pen nam khantoh nang a kitangsam masa pen ahi hi.I nam khantoh nanga kitangsam dang khat pen sumdawnna (Business) lam ahi hi.Gam nei kei mah lehang sumdawnna ei’ khut sungah om mawk leh a gam nei ten hong zahtak ding uh hi. India gam Shillong khua bang a gam nei Khasite sangin Bengali ten Business lamah ukzo zaw uh hi.

Zomi te Millionare bek tham lo in Billionaire tampi om mawk le hang mi’n hong zahtak mah mah ding uh hi.Pilna(Education) zong nam khantoh nang in a kitangsam khat hi.British Prime Minister Tony Blair in, “ British gam khantoh na dinga kitangsam masa thumte hong ki dong leh; Education, Education, Education ci in ka dawng ding hi” cih gen hi.Pilna thupi ngaihsut uh ahih manin leitung gam tampi a thunuaiah koih in ukzo uh hi.A vaihawmna gam uh za lua ahih manin ‘ nitum ngei lo kumpi gam’ kici liang hi.

Leitung gam khangtote en leeng literacy percentage ah sang thei mah mah uh hi.I khantoh theih nangin pilna hahkat huai hi.Hi thei leh eima’ teenna gam banah gamdang degree khat beek va lak beh zo lai leeng hoih ding hi.Tuhun MNCs hunah gam khat bekah na khempeuh kicing zo lo hi.Gam kician i neih nai loh hangin ulian(Officer) tampi om leeng i thu pai ding hi.Leitung hun hong kikhel zel mahleh pilna manphatna kiamlo dinga manpha tek tek zaw ding hi.

I nam a man loh nang leh a khantoh sem sem na dinga kitangsam pi pen Pasian nambat khatna ah koih ding ahi hi.Laisiangtho in, “Pasian’ gam leh dikna zong masa un, tua hi leh tua nate kheempeuh hong kipia thuah ding hi(Mathew 6:33)” ci hi.I mimal, saptuam leh nam sungah Pasian i thupi sak pen ding kitangsam hi.Pasian nambat khatna ah a koih nam leh gam te khangto uh hi.Ahizongin Pasian a phawk lo gam leh nam khangto thei lo hi.Korea gam ngaihsun dih ni; South Korea leh North Korea pen a ki gamgi ahi hi.

Ahizongin North Korea ten Pasian phawk lo uh hi.Tua manin a gam uh khangto thei lo hi.South Korea ten pen Pasian nambat khatna ah koih uh ahihmanin a gam uh khangto hi.I nam a manthan loh ding i deih leh Pasian nasep ding ahi hi. “Pasian nasem lo gam leh nam mangthang ding” ci in la kisa hi.Pasian’ na a naak sep Missionary tampi a khah khia USA gam bang gam khangto pen hong suak ta hi.Ei zong i nam a man loh nangin Pasian nasem a, missionary tampi i khahkhiat kuul hi.Hih pen Pasian sawlpina ahi hi. (Mathai 28:19)

Gam leh Nam it i cih ciang zopuan silhna ciang bek hi lo hi.Nam khantohna dingin sup le baai, gim leh tawl thuak ngamna hi zaw hi.Tua banah nam min daisak khak lohna dinga ei leh ei kikep siamna te ahi hi.Vaphual lim pahtaakna ciang bek hi lo in vaphual lungsim puakna hi zaw hi.Minam min pau lap in pan mun deihna leh eima’ ang sung ding vaihawmna pen minam itna dik hi thei lo hi.Nam it ten gam leh nam makai te zahtakin a thu mangsiam ding hi.Nam pawi leh nithupite zatna bek nam itna kici thei lo hi.

Gam leh nam it tak tak te in a min hoih na dingin a hih theih zahin pan la ding hi.Gam leh Nam it tak tak ten ama’ hihna zumpih lo ding hi.A nam ngeina te zangin kemcing ding hi.Bek thamlo in mai lam hunah bangci khantoh ding cih ngaihsun ding hi.Mimal khat ciat ki ngaihsun pha in i gam leh nam veithak dih ni.Gam leh nam a it thei lote inn sungah phattuamna a piangsak lo tapa tawh kibang hi.Kam bek tawh itna pen itna kician hi lo hi.Gam leh nam it tak tak ten Pasian zahtakin Pasian thupisak masa pen ding hi. N.Pau Tun Thang