Galpi khatna le nihna thu ~ Job Cinpi

Galpi khatna le nihna thu ~ Job Cinpi

Gal thu a kigen simin, thu dang ka phawkma-in galpi khatna le galpi nihna mah phawk masa den ing a ci pawlkhat tu hun dongin om lai uh hi. Hitakpi mah hi. A beisa hun sungin 1914 pan kipan kum sawmnga sungin mihing khangtangthu sungah a man thei nawn lo zahkop dingin thu nih na piang hi. Tua thu nihte in galpi khatna le galpi nihna ahi hi.

Mi pawlkhat in gal thu thei nuam uh ahi manin, bang hun lai-in bang thu pianga, tua hun sungin bang thulamdang piang ahiam ci-in kantel uh hi. Pawlkhatte in ahi leh thei nuam napi, a kantel ding dan thei lo ahi manin, a theih nop thu thei kha loin hun sawtpi om uh hi.

Pawlkhatte leuleu in, gal thu a kici thei nuam lo, za nuam loin gal kidona video movies-te na ngawn ngen ngam lo, mu nuam lo thei uh hi. Bang hang ahi zongin gal thu i kin-a, i kin kei zongin a beisa hun khat lai-in a nasia mahmah gal kidona nih om hi, cih mikim phial in thei kim dingin ka lamen hi.

Galpi khatna sungah a si a mang le a liam a bai mi bang zah om a, galpi nihna sungah bang zah om a hiam?

1914 July 28 ni a kipan 1918 November 11 ni dong, kum li sung gal kidona omin tua pen galpi khatna ahi hi. Galpi khatna sungah gam sawmthun le guk kihel a, tua gam sawmthum le guk sungah mi 1,000,000,000 ( Million tulkhat) teng uh hi. Galdo mibuppi 70,000,000 (Million sawmsagih) in galdo uh hi.

Gal kidona nasia mahmah ahi manin, galkapte bek in, sihna manna le liam la bai thuak loin molh le hiam a tawi lo mipi tampitak in sihna le liam le bai thuaklawh uh hi. Galpi khatna sungah mi 30,000,000 in a nuntakna uh suplawh in sihna thuak uh a, a lam a bai mi 200,000,000 ( million zanih ) bang om hi, ci-in tangthu ah kiciamteh hi.

Gal kidona tawh kisai-in galkapmangpite le gam makaipite in thu tampitak gen uh hi. Laibu tampi kibawl-in thu tampi kigen hi. Leitungah gal a ven theih nading, gal kidona a tawm semsem theih nadingin gam khat le gam khat kilemna bawl kawi kawi uh hi.

Biakna makaite a kipan lasiamteminthangte dongin gal a ven theih nading, gal kidona a om nawn loh nading amau munsan ciat panin hanciam mahmah ciat uh hi. Galpi khatna a bei zawh, 1925 kum-in, leitungbup kipawlna pan, bang hanga gal piang a hiam ci-in gal a piangsak thubulpite kankhia dingin kikaikhawm uh hi. Gal a piangsak thubulpi li mukhia uh hi.

(Unicode နိုင်ငံရေး၊ စီးပွားရေး၊ လူမှုရေး၊ လူတို့၏ ဗီဇများ ကြောင့် ) (Zawgyi နိုင္ငံေရး၊ စီးပြားေရး၊ လူမႈေရး၊ လူတို႔၏ ဗီဇမ်ား ေၾကာင့္ ) ci uh hi. Hih thu bulpi lite thu neu nam 250 tawh a neng a tawngin telgen kik uh hi, ci hi.

Tua bangin mihingte lam pan kihanciam hi mah leh 1936 September 3 ni tak ciang gal khat hong kipan leuleu hi. Tua gal pen galpi thumna kici-in, tua gal sungah gam sawmguk le gam khat khat kihel hi. Gam sawmguk le khat sungah mi 1,700,000,000 ( Milloin tul le zasagih ) om uh hi.

Galdo mi 110,000,000 ( million za le sawmkhat in galdo uh hi. Misi 50,000,000 in sihlawh uh a, a liam a bai mi 300,000,000 om hi ci-in kiciamteh hi. Galpi khatna le galpi nihna i etkak tak ciang, mun le gam sau a huam zia i etkak tak ciangin galpi khatna pen leitung galpi (world war ) cih tham lo hi, ci uh hi.

Bang bang ahi zongin galpi khatna le nihna hun sunga a bei nuntakna le a liam a baite i ettak ciangin galpi thumna ah bang zahtakin lipkhaphuai mawk ding a hiam cih kigenkhol thei hi. Galvan cingte lungsim maan lohna hiam, gamuk kumpite lungsim kep zawh lohna hiam khat in, leitung le a sunga om mihingte nuntakna vut le vai a suak thei hih khang hun sungah mihingte in a beisa hunte sangin thu tampi ngaihsut zawk ding kisam dingin ka um hi.

Stephen Hawking in, “Mihingte in lungsim kiukzawhna i neih manin, galpi thumna a piang nai lo hi zaw hi,” ci hi. Hitakpi hi. Bang hang hiam cih leh khangthak galvante in, khua khat cih bek hi loin gampi khat vut le vai a suaksak thei ding galvan kinei ciat ta ahi manin, khutmedawn khat in mihing nuntakna tampi a susia thei hih khang hun sungah, lungmuan om lo ahi manin, nang le kei in, hong uk kumpite le gam makaite ading Pasian kiangah thu i ngetsak zelzel ding kisam lo diang ahiam ci-in thunget ding kong zawh nuam hi.

Galpi nihna thu ciaptehna laibu sungpan kong gelh kik ahi manin, kicinlohnate ngaihdambawm ah na khiatsak unla, hoih le pha nasak leh na Zomipihte ading na hawmsawn in. Lungdam, Job, Cinpi (Zomi laisim nuamte)