Galkidona akhawl nadingin Kachin, Myikyina khuasung ah mi 5000 in lungphona nei

Galkidona akhawl nadingin Kachin, Myikyina khuasung ah mi 5000 in lungphona nei

Myanmar, Kachin State ii khuapi ahi Myitkyina City sungah Monday ni in mipi 5000 bangin lungphona neikhawm uh cih Irrawaddy pan kiza hi. Kumpi galkap Tatmadaw te’n kidona akhawlphotding lunggulhna leh Tanai khuasung ah a awkcipte apusuahtheih nading uh lunggulhna tawh mipi te’n lungphona anei uh ahihi.

Hih Myitkyina khuasung lungphona ah Civil Society Organization leh Religious Organization tuamtuam pan Members te, khuasung upate kihel uhhi.

Kumpi galkap “Tatmadaw” leh KIA (Kachin Independence Army) tepen abeisa January 22 ni akipan kilimkap mahmah uh a, Sumprabum Township sungaom gamsungah mi 750 bang galtaikhia uhhi.

Tuaban ah galkido phadiakna ahi Tanai Township, Nam Gun ahzong mi 2000 bang awkcip uhhi.

Local Emergency Relief Committee for the Displaced te genkhiatna ah abeisa January 26 ni in vanlam leh leilam panin thaupitawh kikapna hangin khuasungmi 3 in sihlawh uh a, adangzong mi 5 te nakliam mahmah uh cihi. Tanai Township sungah a awkcip tezong khuahun avot mahmah laitak hisawnsawn in, galtai in cimawh mahmah uhhi.

Tuabang in Tanai Township sungah a awkcip khuasung mipi te asuahtaktheih nading, gal kikapna akhawlphot nading lunggulhna tawh kipawlna tuamtuam leh khuasung mipite’n Myitkyina khuasung Manau Park ah kituahkhawm in, Local Government Office tuamtuam ah lungphona anei kawikawi uh ahihi.

Emergency Relief Committee for the Displaced panin uliankhat ahi U Zau Jat in agenna ah hih lungphona ngimna pen Kachin State muntuamtuam aom te’n galkidona sungah a awkcip te ahuhtheih, apanpihtheih nading leh tuate lungmuang takin aomna innlum lolum azuat kiktheih nadingin lunggulhna hi ci’n genkhia hi.

Tulaitak Tanai Township sungah a awkcip tepen Catholic Church, Kachin Baptist Convention leh Local Relief Worker pawlkhatbek in huhna piathei uh a, khuasungmi a awkcip tampi om ahih manin, kicingzonai mahmahlo hi.

More: Aung San Suu Kyi Kachin State sung aom galtai te kiangah hawh

Tua ahih manin Local Emergency Relief Committee te’n NLD Government in huhna apiadingte phalna apiakding leh Tatmadaw inzong Relief Workers te akhakcip lohdingin ngetna ngei uhhi. Kumpi galkapte ahi Tatmadaw te’n vanpanin Aerial Bomb khiatsukmawk ahih manun khuasungmi tampitak in thuaklawh uh a, tuabangin Tatmadaw ii gamtatna pen kimawhsak mahmah hi. Sawltak #zomidaily