Tedim khuasung ah Kawlte mi 5 in ansai khat suangtawh denggawp

Tedim khuasung ah Kawlte mi 5 in ansai khat suangtawh denggawp

Ka tuahkhak thu ~ Kap Thawn Mung :: Zan nitak aa, ka inn kongbiang ah ka tuah khak thu tawh kisai in, hong lung hi mawh pih leh, hong vaan pih, hong buai pih a kua mapeuh te khempeuh tung ah ka lungdam mah mah hi.

Athu ala tawh kisai in, zan nitak in kasai ah Zato innthak lam na aa a sem, Pakkuko khuami Kawlte mi 5 in ann hong ne uh aa, nitak nai 9:00 kiim teh sum hong piak uh ciang in, hong khiam un ci in hong ngen uh hi. Ki khiam zo kei cih ka dawn kik na tawh ki zui in, hong heh uh a, hong phin uh hi. Hong gen hak tek tek uh aa, kam ka ki nial uh hi. A vek un hong vuak huan sawm uh teh palai hong sepsak ding in, sanggam te khat ka ko hi.

Phone ka ki ho laitak un, hong phin beh uh aa, Tedim khua khuk sung ah, palik, hausa cih aa ki pan ka lau uh khat beek om kei hong ci lai uh hi. Tua kawmkal in, sai mai ah na pusuak uh a, hong phin hong to in, hong tawng ziah ziah uh hi. Tua kawmkal in, ka sai uh suang tawh hong deng ngek ngek uh hi. Tua laitak in, hong huh hong panpih ding kua mah pen kiim leh paam ah om lo hi.

Tua laitak in, den aa ka phone sap ka sanggam pa hong tung in, thu dam in ki ho ding acih leh a vek un, bawh huan in hong vuak cip sak gawp uh hi. Akhe, a khut, a bil, a mit leh a biang te ah si luang in, bawk gawp pah hi. Tua khit ciang in, ka gal vua hong pai phei cycle thum a gal muh uh teh a lawmte a huh ding hong pai ei ci in, to tai mang uh hi.

Sanggam pa liamma teng zatui ka nuh sak khit uh teh, amah kha in, zan ih mut ding ka ki thawi uh hi. Tua hun laitak pen zan 11:45 PM kiim hi ta hi. Tua lian leh kasai kong khak uh hong ki tuan in, ka inntung leh ka annbuuk uh suang tawh hong deng ziah ziah in, hong sim kik suk leu leu uh hi. Ko zong dah lua, lua lua leh thang pai lua in, phone tawh Lawibual Hausapa ka ko uh hi. Hausapa in Palik te na ko un hong cih na tawh ki zui in, ka ko pah aa, Myoma Hausa Pa Peter Thawng leh Palik tavuan nei te hong tung pah uh hi. Hong sim’ te na tai mang khin uh a hih ciang in, a giah buuk vuah va buluh to in, thong ah hong khum sak pah uh hi.

Tuni in Palik zum ah hong sap na tungtawn in ka vapai uh aa, no bang dan deih hong ci ahih man un, upadi ngeina om bang in, hong sep sak un ci in, lai ka na phah pah uh hi. Hih mun ah ih hehna, ih thangpaih nate ih gen nawn kei phot ding hi.

Athu leh ala pen tua ciang hi phot hi. Mailam hong koi ci pai ding cih bel tungsiah thunei te hong sap, hong gel dan dan ci phot hang.

Ei gam, ei inntual zang lawm lawm ah hih bang thu ka tuah khak na tawh ki zui in, ka ngaih sut teh na kasa mah mah aa, ka khasia mah mah hi. Kei bek thuak hi ci in. ka ki ngaih sun nawn kei aa, ih mipi bup hong ki sim mawh na hi ci in, ka ngaih sut teh ka dip ngek na mah mah hi.

Mailam ah eite ki pum khat in, ki thutuak tak aa, nasep khop, geel khop ding te zong hong hong thupi tek tek ta ei ci in, ka phawk san san hi. Na vekpi tungah ka lungdam hi. Kap Thawn Mung/ Tedim Times