Malaysia gamsung ah migilo te’n aphu konglading uh cileuleu :: Tusungteng Malaysia gamsung ah palik te’n migilo te amat khiat zelzel uh ihzakzaksa hi a, tuatawh kisai in mat athuak migilo te makai lamte lungkimlo uh cih The Star News in genkhia hi. Tuahang in migilo lamte’n Video tawh kumpi thunei te tungah zaksakna nei uh a, ka mi te uh nongmatsaksak manun no tungah zong thukkikna, aphu kong lading uhhi ci’n genkhiamawk uhhi.
Royal Malaysia Police ahih keileh atom in PDRM akici Malaysia palik te in IS migilo te ii vou na hangin nungkik loding hi cih pulakkhia uhhi. Malaysia gamsung ah migilo te hong limbet mahmah uh a, abanban in hongmat khiat taktak uhciang in, migilo makai lamte’n tuabang in kami te uh nongmat saksak uhhang in kanasepna uh beiloding a, a mihing mahmah inzong katam semse zawding uhhi cih Video tawh Malay pau in suahkhia uhhi.
Malaysia kumpi thuneite leh palik te’nzong tuabang in mipi alung himawh sakding Video akhahkhia pen kua hipeuhmah dinghiam cih alimkan mahmah laitak uh ahihi.
Tuabang in video hong khahkhiat uh pen migilo te sep ngei ziakhat hi a, amau nasepna te a tangko khiatnopman uhleh mipi te sungah launa leh patauhna akizelhding adeihman uhzong ahihi. Tua ahih manin hih mawhnadann tawh kituak in gawtna kipiading hi ci’n thuneite’n genkhia uhhi.
Thukhun tawh aki gamta ahih mahbang in hih bangin mipi te tona abawl te pen thukhun tawh kituak in thu kikhending cihzong kumpi thunei te’n zanni in genkhia hi.
Bukit Aman Special Branch Counter-Terrorism Division akici migilo te abeng ngiat te ii makaipipa Datuk Ayob Khan Mydin Pitchay in agenkhiatna ah mipi te lungmuanna pen hong tobawl uh hi a, ahi zongin keileh kapawl te’n migilo te gamtatna pen aki encik gige ahihi cih pulakkhia hi.
Tuaban ah tuciangciang hih migilo tetawh akipawl, aki sawhkha mi 157 te ki mankhinta hi ci’nzong genkhiatbeh hi.
Malaysia gampen galgim hongnam semsem tawh kibang hi. IS migilo te leh Malaysia kumpi thunei te aki limzon mahmah laitak un, Selayang vengsung ah zong Rohingya te leh gammi adiak in Kala te nabuai mahmah uhhi. Innteek Kala te’n Kawlgammi limlim ahih leh kamuhnana uhah ka dawtlumding uhhi ci’n genkhia cihkhawngzong kizaza ahih manin, Malaysia gamsung aom Zomi khempeuh ih kidop mahmah nading in deihsakna leh itna lianpi tawh ZAM zumpi panin ki hilhsawn kawikawi ding kong zasak uh hi.
Source : The Star News cf. Zomi Daily
DHS Interview paizia (Azom)
Thu hong kidot dan kibanglo ding
DHS interview ah, a beisa aa ih gensa dotnate simloh pen thu hong dotdan khat leh khat a kibat theihna ding omlo hi. Banghang hiam cih leh, gam pan ih taiina a hang, ih taiikhiat zia leh, ih phukkhak thute aa kipan, Malaysia ah nuntak zia, kimat-kihen tuah leh tuahlo vaite a kibang omlo ihih man kici theiding hi.
Tua ahih manin, DHS interview dingin bangci kigin’ ding ka hiam cih pen khat leh khat kidot ding hitheilo hi.
Cihnopna-ah, RSC (RSC kicita) in DHS aa ding a lungkim huai, kisam asak bang un thu hong dotsa hi aa, DHS panin tua RSC aa ih gensa, a ciaptehna laidal lian mah DHS officer in amai-ah a laidal phahsa-in thu hong dong ahi hi. Tua hi aa, DHS lutding teh, ih thuteng khatvei enkik khol le’ng bek kingah aa, a thakin kiging kikkik cih omthei ngiatlo ding hi.
Thu hong dotzah kibanglo ding
Kei bang, na gam pan nong taiina ahang ci aa hong dot ciangin, a kicing simsimin genpha kik ding ka kithawi leh, “A hang genziau-in, RSC panin na gensate hiah ciamteh khin hi ungh.” hong cikik ziau hi.
Khatvei ih gensa ommah bangin, USA pan officer te DHS (Malaysia) ah a lomlom in na hong sem uh aa, group khat a ciah khitteh a dangkhat cihdan ahih manin, khat leh khat ii dotnop zia leh dot hamtang thu a bulpi teng a kibat ding hang, officer khatciat tung thu tampi kinga veve ki cithei hi.
Innkuan tawh a lutkhawm veve khat leh khat a dotna kibanglo maithei hi; Khat leh khat hun a beizah kikimlo maithei hi. Tangval, ahih kei leh nungak khat aa lut veve khat leh khat a dotna leh a dotzia kibanglo maithei hi; A hun sauna zah kikimlo maithei hi. A dot hun zong kibanglo hi.
Kei hong sau dot gawp in teh, ahih kei leh kei tawmno khat hong dong lel in teh cihte pawl aa kigin’ khak ding hilo zaw in, RSC lai aa ih gensa thute bangbangin hong dotna bangbang ih gentheih kikding thupi hiziau gige hi.
RSC mahmah na thupi masa hi, cih phawkthak ni.
Lung himawh lua ke’n, kiging khinta hi teh! Kha tampi na ngak gam thumna pen na tungta ding hi.
DHS phidingte deihsakna tawh Zomi khat i DHS interview na pan hopsawnna bek hi.
Zomi Cup 2016 Group khenna
January 25 ni sunin kimawl ding makai khempeuh tawh ZAM hall ah Zomi Cup 2016 ading Group khenna kinei hi. Group anuai abang hi.
- Group A
- Tuipi
- Tuithang
- Gawngmual
- Saizang
- Tuidil
- Limkhai
- Group B
- Laaitui
- Darkhai
- Kapteel
- Laibung
- Heilei
- Tuimang
- Group C
- Singunau
- Darkhai (O)
- Anlangh
- Voklaak
- Phaiza
- Pangsak
- Group D
- Haupi
- Bukphil
- Darkhai (N)
- Buan
- Limkhai Bung
- Vangteh
- Tungzang
University of Nottingham Malaysia Campus in April a kipan sangnaupang lak kipan ding
University of Nottingham Malaysia Campus ah Refugee naupangte in deidan omlo in gammite sin teng mah sin ding uh a, Certificate zong a kibang ngah ding uh hi.
Sangkahna ding mun :
Jalan Broga, 43500 Semenyih,
Selangor Darul Ehsan, Malaysia.
Sangnaupangte lakah Foundation studies a kici “Taster Course” a sin nuam a om leh Form na fill-up sak un [email protected] February 2016 ma limlim hong khak kik pah un. Tution Fee piak kullo ding hi. Ahi zongin na ciah na kuanna, na vanzat leh neekledawn ah sum bei ding ahih manin khasim RM500 a bei dingin kigingkhol in.
- Sangkah ding naupangte:
- Kum 17-24 kikaal hi ding,
- Manglai mangkam siam ding,
- SPM/IGCSE tawh sang mansa khat hi ding.
- Kum khat sunga kisin ding teng:
- Foundation in Arts and Education
- Foundation in Business and Management
- Foundation in Engineering
- Foundation in Science
Theih beh nop a aom leh hih tawh kidong thei:
www.nottingham.edu.my
Lunglut napi in sum lamah haksatna na neih leh atung a email ah hong zasak un, hong huh ding mi hong kizonsak ding hi.
Form nong khak kik ciangin:
1. Attachment khempeuhSINGLEemail tawh hong khak in, Multiple emails pen kisanglo hi.
2. Form na phihma in Website sungah Programs teng hoihtak en phot inla, khel themthum kik a om lo dingin na khentatsa teng hong gelh suk in.
3. A ziakai te bangbang ahizongin kisang zo lo ding hi.
Siauh dingdan a theilote ZAM zum panin ki huh thei hi.
ZCF-Canaan ah Bible Camp ah Sapna
ZCF-Canaan Biakinn ah Sen kumthak (8-9 Feb. 2016) sung Bible Camp om ding ahih manin piangthak nailote leh piangthak nungtolh kikkikte, kha muang taktak theilote, ka sungah Khazih nungta cih tecipang thei nailote khempeuh khangnote bek hilo in, khanghamte zong nong kihelna dingun kong sam uh hi.
Speaker : Evan. Finney Seia, Malaysia
Kipatding Ni : 7 Feb. 2016 Sunday 5pm
Vanpuak ding teng : Laisiangtho, Note book leh ballpen
Anletui limpen tawh kivak ding a, mi (50) ciang bek kisang dinghi.
Lungdamkohna
⦁ Manna Zomi Christian Church (MZCC) in Thupuak bawlna ding RM50 hong pia ahih manin ki lungdam mahmah hi.
⦁ Do Khaw Thang (Kapteel) in Thupuak bawlna ding RM100 hong pia ahih manin ki lungdam mahmah hi.
⦁ Malaysia Zomi Pawlpi masa pen Zomi Christian Fellowship (Canaan) in Bible Camp bawl ding vai suahsak man ding RM20 hong pia uh hi.
Note :: PDF tawh na simnop leh
Hih link >>> PDF File tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh Zomi Daily website tungpan kongsuaksak zelzel uhhi.
Zokhai says
Kician sinsen mahmah-ei. ZAM tanute leh Pu Joseph Mangseen! Pasian-in hong ompih den tahen!