Nasep (Work) – Mawkna in na hunte bei sak ken!
Khatvei India makai pipa Gandhi pen naupang khat in Pu na min bang a? ci-in a dot leh Gandhi in ka min pen “Nasempa” ci hi. “My name is worker”, ci-in dawng hi. Nasep tawh kisai-in Lai Siangtho in hih bangin na gen hi. “Mi khat peuh in nasep a sep nop kei leh, an ne sak kei un,” ci-in ong hilh hi. If anyone is not willing to work, let him not eat. Nasep tawh kisai in nam nih om hi. Pawlkhatte pen bawng bangin a nung panin ciang tawh kihawl leh bek sem thei pan hi. Kawlgam mite tuadan kitam hi. Tua dante pen nasepna mun bekah na sem thei uh a, tua zong deih bang lo lai thei hi. Nasem thei lote nasem theite’ sila suak hi. Nasem nuam lote nasem nuamte’ nasem suak thei hi. Lai Siangtho’ gen nasep pen losing phuk khawng va tang hahkat keei ding cihna sangin, pumpi bup mahmah manlah sak thei tawntung ding cihna hi. Kizen ding cihna lam hizaw hi (not busy at work, but busybodies). A beisa kum tampi sung Kawlgam mite pen muhna hoih le thumaan thutak tawh nasem thei lo dingin hong kipantah ahih manin muhna hoih le thumaan thutak tawh na ih sem thei kei uh hi. Ih sem nuam kei uh hi. Muhna hoih le thumaan thutak tawh sep pen Lai Siangtho’ gen nasep ahi hi. Nasem cih ciangin, nasepna mun bek ah a buai hi loin, ih pumpi ih khut ih khe a manlah sak zo tawntung thei, a zang siam tawntung thei ih hih ding hizaw hi. Kawlte’ paunak ah kha tan sung nangawn in mui pei ding ci hi. A hun om lai-in thasan-in hanciam ding, ci uh hi. Nasem lote’n antang beisak leitang gik sak ci lai uh hi. Lai Siangtho in ni tanlai in hah kat in sem un, ci hi. Khua mial hun ong tung ding hi. Nasem lote an na pia kei un, ci lai hi (2 Thess. 3: 10). Na sem ci a, sep vanglak teh an nek hun, khawl hun cihte mangngilh lianga sep pen thadah nasep, ngawngtol nasep hi a, pumpi adingin hoih lo hi.
Amasa-in, nasep loh a hoih lohna tawm gen ni. Mihingte pen nasem loin om hithiat pen ki-ut tek pian hi. Kawlgam mite’n thai-sa “tutsa a nungta thei ta” kici ta zen hi hang. Lai Siangtho in tutsa-a nungta thei-ta na hih manin nasem nawn lo ding, thai-sa thei ta, cihthu na hilh lo hi. Nasep ih cih a tuam hi a, maa tunta cih a tuam hi. Maa ih tut ciangin na sem ngiat nawn lo ding cihna hi lo hi. Mihingte in nasem nuam loin, mawk omom uh a, mawkna in a hunte uh beibei sak uh a, lungsim vangik, lungsim vanpuak khangkhang gige hi. Nasep tawh kisai-ah, na sem lo a hun mawk beibei sakna, hun awng tam neih luatna pen sik-kekseu tawh kibang hi. Temta zong kizang kei leh kekseu hi. Kizangzang leh hiam semsem hi. Hun-awng in nasep sangin pumpi lungsim pen manlang takin gimsak sia sak baih zaw hi. Hun-awng in mihingte ii ih vang neihna zong kiam saka, gamtat luhek daan phengphi sak baih mahmah hi. Leitungah zawnna ngauna a tamzaw pen hun-awng tam sak luatna hang ahi hi. Hun-awng tawh kidim detkeeina pen hoihlohna, thumaanlohna le zulhzau zuauphuak phengphitnate hong phulkhiatna kulh kuapi tawh a kibang ahi hi. Nasem lo a, hun-awng piakna pen mi’tu mi’ta te le nang’tu nang’tate kideidan nadingin na zat a hih khak leh nang’tu nang’tate in na utut a na suk sawl na to sawl mi’tu mi’tate hong demzo lo zaw ding uh hi.
Khatvei ka veeng uah miang (draining system) bawl dingin, masala pawi nasemte nasem nuam lo hontang khatin en ngeingai uh a, “tua cih zaw leh hih cih zaw leh” ci-in kikum kinial ngeingai uh a, kitot lawh dek zua-en uh hi. Kalaymyo ah a semte’ sep a kitot lawh, a kisel lawh mi tam mahmah a, nasem taktak tawm mahmah in a kisem na tawm mahmah lai hi. Sep sangin a kisem buaipih kitam mahmah lai ahih manin kikhang to lo hi. Khaileh, khantoh nading nasem dih ni. Mi sep en bek kei ni. Va sem ni, va kihuh ni uh!!!
Nasep hoihna tawh kisai ah mihingte pen nasem dingin Pasian ong pian sak ahih mah bangin hanciam a na ih sep ding ahi hi. Tua bangin ih hanciamna ah hamsatna a phu kha lo ki-om lo hi. Tua bangin hamsatna ih tuah ciangin tua hamsatna pen bangmah dang tawh kipel thei lo a, nasep tawh kizo thei hi. Gentehna in leiba thangba khat na neih leh na lohzawh nadingin thi thuh kei in, che thuh kei in. Phe kap kei in. vankham sem kei in. Nasem lecin tua zia in na leiba a maanin hong loh zo sak zaw dinghi. Gualzo lawhcing ih cihte zong amasa lamin tamvei pi tak mah ana thuakthuak a na sumsum ngeite uh hi. Hanciam hanciam in na a sep uh ciangin hong lawhcing pan uh ahi hi. Na manpha peuhmah pen sepna tawh a piang bek ahi hi. Sep loh tawh ih ngah lamdawt hauhnate pen kho tuan lo a, pheisam siam leh Dahpa khuang hauhna tawh kibang hi. Pheisam siam pen pheisam in ne kik a, Dahpa khuang tawh hauhna in dahpa kuang tawh huhna dawh ding bek musak ahih manin thadahna tawh kidim sak hi.
Lai Siangtho sungah thadahte an na pia kei un ci hi. Thadahte an piak loh ding a thu tuam hi a, mizawngte an piak ding a thu tuam hi leuleu hi. Leitung ah first world/class countries, kici gamkhatna ahi, USA le nitumna gamte pen nasem lote an a kipiak lohna gam hi takpi mawk hi. Banghang hiam cih leh kumpi in a gammite nasep guan hi. Nasep ding tampi tak nei uh hi. Kawlgam ah nasem lote nasep neih loh hang hi a, kumpi in nasep hong guan zo lo uh hi. Tua ahih manin gamkhangtote’ kiangah nasem dingin a pai ih hi uh hi. Nasep ding a om sak zo lo kumpi gam hangin na sem nuam gammite pen huh ding mah hi a, ahi zongin nasep ding kipia na pi in nasem nuam lote pen huh tak lo, an piak tak lo mah ahi hi. A zawn mahmah hangin nasem mi ahih leh kihuh dinga, kipiak beh ding hi. Ahi zongin a zawn mahmahna ahang pen a nasep nop loh man ahih leh nih vei thumvei khit ah an kimawk piak nawn lo ding hi.
Nasep tawh kisai ah nasem thei nai lo khangnote nu le pa, syate upate le taltakte in hanthawn a tha piak ding kisam mahmah leuleu hi. Khatvei teenchia Mathimatic pilna pupi ahi Albert Einstein pen galkap sungthauh pilna a uk mahmah khat hi a, a sangkahna ah tua utna in lai hai sak hi. A diakin ganaan Mathimatic siam ngiat lo hi. Bangzah ta-in teenchia hai hiam cih leh teenchia hun ciangin sangkah loin kibu sim pahpah ci hi. Ni khat a Pa neu in, sungthauh na ut leh ganaan Mathimatics pilna na neih kei leh kisuak thei lo hi a cih ciangin, tua utna in hanciam sak a, tuni in Albert Eisntein pen Leitung bup teenchia Mathimatics syapipa hong suak ta zen hi. A kihtat teenchia Match pen pelh bawl loin a va talsik zawk tak ciangin teenchia pupi ong suak hi. A hamsa thu khat pel lehang kizo zo lo a, hanciamna tawh va talsik lehang kizo kik zo hi. Albert Einstein pen kum zalom 20 hun sungin German Scientist mipil pi khat ong suak a, 1921 kumin Physics tawh Noble Prize ngah hi. Hanciamna, hahkatna, nasepna ngiat le utna pen khangnote kisam hi hang. Mawkna in na hunte bei sak ken. Na hunte pammaih sa lo na hiam? Sanggam aw na ut khat na suak zo ding hi. Nasem in. Nasep tawh kitalsik in. Nasep tawh kilai in na zo ding hi. Keep yourself busy.
Evan. Suang Dal
Comment piaknop aomleh...