Mun lamdang pipi a pianna mun Bermuda Triangle

Mun lamdang pipi a pianna mun Bermuda Triangle

Hih thu tawh kisai i kikup ma-in triangle pen kiu thum nei nam khat peuhpeuh genna hi cih tel masak ding kisam hi. Bermuda Triangle pen “Devil’s Triangle” zong kici a, kiu thum (triangle) kawm tuah a, North Atlantic Ocean nitumna lam-ah om hi. Hih mun tengah galdona vangleng leh teembaw tampi mang in, a mang zia kithei zo lo hi. Bermuda Triangle kiim pen North leh South America, Europe leh Caribbean tuikulhte pan teembaw in lampi dingin nak zat mahmah hi.

US Navy ten Bermuda Triangle pen om lo a, US Board on Geographic Names in zong hih mu nom lo hi a ci-in a nial hangun hih kiim-ah vanleng leh teembaw tampi mang khin ahih manin nial ding dan hamsa mahmah hi.

BERMUDA TRIANGLE LIATNA:

1964 in Vincent Gaddis in na lamdang tuamtuam tuanna magazine a bawl “Argosy” kici a gelhna ah Bermuda Triangle in kizopna kiu (vertices/vertex) thum – Miami (Florida peninsula/tui in a kimkot leitang), San Juan (Puerto Rico) leh Atlantic tuikulh laizanga om Bermuda tawh kizom sung teng hi ci-in na gen hi. Tua khit nunga lai-at ten Vincent Gaddis’ genna bang zui loin Bermuda Triangle gamgi leh a kiu in a uap phakna ciang pen 1,300,000 to 3,900,000 km2 (500,000 to 1,510,000 sq mi) in gol hi ci uh hi. Tua khit nungin hih kiu thum nei Bermuda sunga tuahsiatna a piang bang tawh kituakin lai gelh tuamtuam ten Bermuda Triangle a zai dan a tuam tekin gen uh hi. US Board on Geographical Names in hih mun pen om lo hi ci-in nial a, US government agencies gamlimte ah tuangsak lo hi.

BERMUDA TRIANGLE HONG KIPAT KHIATNA/KIPAT CILNA : (ORIGINS)

Bermuda kiim-a pai peuhpeuh lamdang takin mang ziauziau hi cih September 17, 1950 in Edward Van Winkle Jones in “The Miami Herald (Associated Press)’’ sunga a laipaih (article) ah hong tuangsak hi. Tua khit kum nih khit nungin George X.Sand in US Navy ten training a neih lai un vanleng leh teembaw a hunkhop lamdang takin a mangna thu tawh kisai FATE magazine sunga, “Sea Mystery at Our Back Door” kici laipaih a hong gelh a, tuate sungah Fligh 19 vanleng, US Navy Frumman TBM Avenger torpedo bombers nga a mangna thu hong suaksak hi.

George X. Sand’ laipaih gelhna ah hih vanleng leh teembawte a mangna kiu thum pen tu-in Bermuda Triangle ci-a kiciamteh sunga mang ahi hi. Flight 19 vangleng a mangna thu April 1962 in “American Legion” magazine ah hong tuangsak leuleu a, a vangleng mang ma-in Flight 19 hawlpa Allan W. Eckert in, “Tu-in tupi kang sungah a leng lut dingin i kithawi a, na khempeuh a man khat beek om nawn lo hi. Ka omna uh koi lai hiam cih ka tel kei uh a, tuipi dum hi…Eh! Kang hi,” ci-in gen hi ci hi.

Tua banah hih vanleng mangna thu a Navy board of inquiry ulian ten Flight 19 pen Mars (planet/Mars leitung) ah lengin mang hi ci uh hi ci-in George X.Sand in gen beh hi. February 1964 in “Argosy” ah hih kiu thum sunga thu lamdang piang kigelhte a um lote tel zawk semna dingin Vincent Gaddis in laipaih dang khat “The Deadly Bermuda Triangle” kici hong at pha kik a, Flight 19 leh a mang dangte pen Bermuda Triangle kiim sung mah-a mang hi ci-in gen a, tua khit 1964 in a laipaih a sauzaw in “Invisible Horizons” kici suaksak kik hi.

Vincent Gaddis’ nasepna leh a upna a zuipihte lak-ah John Wallace Spencer (Limbo of the Lost, 1969, reprinted on 1973); Charles Berlitz (The Bermuda Triangle, 1974); Richard Winer (The Devil’s Triangle, 1974) leh mi tampi kihel uh a, Allan W. Eckert in a gelh bangin Bermuda Triangle sunga na lamdang tampi piang hi ci-in gelh tek uh hi.

BERMUDA TRIANGLE OM HI CIH UPNA NIALTE’ GENNA :

1975 kum-a “The Bermuda Triangle Mystery: Solved” kici laibu gelh Lawrence David Kusche in Bermuda Triangle sunga na lamdang piangte tawh kisai gelh Gaddis leh mi dang tuamtuam ten a thu gen uh uang gen lua zawzen uh a, up zawh ding hilo ahih manin man lo hi ci hi. Kusche in research a bawlna-ah Berlitz’ thuciamtehte leh a gente tampi tak tuahsiatna tuakte, tuahsiatna-a kihelte genna kitukalh hi ci hi. Kusche in a genna ah leitung bup teembaw neu – Yatch kicite tawh khualzinmi Donald Crowhurst pen lamdang takin mang cih pen thuman tawh kituak lo a, Berlitz in datsi pua teembaw khat ni thum sungin Atlantic teembaw khawlna ah a man’na thu a gen pen man lo a, a man’na pen Pacific Ocean hi zaw hi ci-in Kusche in Berlitz laigelhte nial hi.

Tua banah Kusche in Bermuda Triangle sunga teembaw leh vanleng mangin a gente’ genna thute tampi mun dangah a mang hi zaw a, khuasiat man a mang hi cih thute tuangsak ngei lo uh hi ci hi. Kusche in Bermuda Triangle sunga teembaw leh vangleng mangte pen tuipi (ocean) danga mangte tawh teh in tawm mahmah a, khuasiat luat manin a mangtang uh hi lel dinga, 1973 in mi tampi in Daytona Beach, Florida panin vanleng a len’ khiat a muh hangun a mangna thu local newspaperte ah kituangsak lo hi ci hi.

Tua ahih manin laigelh tuamtuam in hih Bermuda Triangle pen ngaihsutna man lo zangin a uang lua bangin mun lamdang hi ci-in gelh uh hi ci hi. 2003 in zong World Wide Fund for Nature in leitunga teembaw taina dingin mun lauhuai pen 10 a ciamtehna sungah Bermuda Triangle tuangsak lo hi. UK Channel 4 television program The Bermuda Triangle (1992) kici adingin John Simmons in a bawl, Geofilms panin Equinox series sunga kisuaksakna ah John Simmons kiangah marine insurance market Lloyd’s of London ten a dotna bawl uh a, John Simmons in Bermuda Triangle kiim-a teembaw pai tampi mah suak ta in, mang lo uh hi ci-in dawng hi.

Teembaw tam a pai zah leh vanleng tam a len zah tawh et in hih kiim-ah a mang tam lo hi ci-in gen beh hi. United States Coast Guard ten zong John Simmons genna thukimpih uh a, 1972 in SS V A Fogg teembaw Bermuda Triangle ah puakkham in, tum in, a tuang teng leh teembaw mang hi ci-in Bermuda Triangle thu tawh kisai laigelh ten a gen hangun hih teembaw tuahsiatna tuak a site’ luang leh teembaw themte man kizaih in, kikem hi ci uh a, a teembaw hawlpa cofee dawn in a hai a let lai maan kizaih a, Bermuda Triangle kiimah tuahsiatna tuak lo uh a, Texas tuipi pangah tuahsiatna tuak zaw uh hi ci-in gen uh hi.

June 27, 1976 in NOVA/Horizon episode “The Case of the Bermuda Triangle” kici ah hih Bermuda Triangle tawh kisai Science siam ten dawnna a piak ding uh kisam lo a, hih munah tuahsiatna a om bangin mun dangah zong piang kawikawi a, teembaw taite leh vanleng lengte a ngeina bangin pai in, a leng tam mahmah veve hi ci hi. Bermuda Triangle sunga na lamdang piangte a um lo research bawlte (Sceptical researchers), Ernest Taves leh Barry Singer cihte pawlin thu lamdang khat peuhpeuh Bermuda Triangle tawh kibang pianin laibu leh thupaih leh magazine a kibawl ciangin meet mahmah napi lai gelh ten thuman lo tampi kikhelsakin sumbuk ah kinak khot mahmah a, laibu tuamtuam, TV specials leh media tuamtuam in zong hih Bermuda Triangle kiim-a thupiangte nakpi takin gum uh hi ci-in gen hi.

Ahih hangin Bermuda Triangle pen na lamdang leh a pianzia tuam ngiat (real phenomenon) hi ci-a um ten hih kiim pen mun lamdang mah hi ci-in teci uh hih bangin pangin gum uh hi:

PARANORMAL EXPLANATIONS:

Bermuda Triangle tawh kisai thugelh ten na lamdang khat (phenomenon/paranormal), gthna: power (vangliatna) ahih kei leh sikha pen kimu thei lo a, science siamna tawh na lamdang khempeuh kigen tel thei lo a, tua mah bangin leitunga thupiang tampi pen mihingte pilna tawh tel zawh ding hilo hi ci-in gen uh hi. Atlantis continent pen a mang hi ci-in upmawh thu/phuahtawm thu (mythical) bangin kingaihsun Atlantis tangthu pen Bahamas gam-a om Bamini khua-a Bamini lampi ah suangin hong po khia a, hih pen pawl khatin Bermuda Triangle in huam kha hi ci uh hi.

Edgar Cayce in Atlantis pen mang a kicih hangin 1968 in hong dawk khia kik ding ci-in na genkhol hi. Mi tampi in Bimini Road pen Atlantis hi a, kulhbaang, lampi ahih kei leh a pianzia (structure) tuampi in hong om ding hi cih upna na len kip uh hi. Pawl khat leuleu in beelkuang leng i cihte (UFOs) zong na lamdang mah hi a, Bermuda Triangle sunga thupiang a tel zawh loh mah bangin UFOs (Unidentified Flying Objects) pen kuamah in tel zo lo hi ci uh hi.

UFOs tawh kisai a piandangzia Hollywood movie bawlsiam Steven Spielberg in science fiction film “Close Encounters of the Third Kind’’ kici bawl a, hih film sungah Flight 19 sunga tuangte leh a hawlte (a kigawmin mi 19) pen gamdang mi/gammi a hilo “aliens” I cih ten a pimang danin a upmawh thu bawl hi. Na lamdang tawh kisai tangthu tuamtuam a gelh Charles Berlitz in Bermuda Triangle sunga vanleng leh teembaw mangte pen a mangzia uh ngaihsutna/lungsim-a tuatna (theories) tuamtuam – Natural explanations leh Compass variations cihte tawh na gen tel hi.

Compass variation zangin Berlitz in a genna ah Bermuda Triangle sunga na lamdang piangte leh na mangte pen Bermuda Triangle in a lamdang mahmah hupna “local magnetic anomalies” kici a om man hi ding hi ci hi. Magnetic (compass) north leh geographic north kici pen mun pawl khatah mun neuno khat sungah kibang linlian in om a, tua sungah hupna nei om hi. Hih bang mun pen 2000 in US sunga om Wisconsin panin Gulf of Mexico kikal ah gitang (line) sungah om ahih manin Bermuda sungah zong hih bang om hi ding hi ci hi.

Gulf Stream kici pen tuihat mahmahna lui hi a, hih tui pen tuipi dangte kibang lo a, thermohaline circulation kici Gulf of Mexico panin om a, Straits of Florida, North Atlantic dong luangsuk in hih kikal sungah thermohaline circulation kici om ahih manin tui tunga na (object) laam thei nam khat peuhpeuh laam in, tuipi tunga bawh vanleng neute leh gunkuang engine (set) kisiate laam thei a, a tui hanta (velocity) pen 2.5 metres per second (5.6 mi/h) hi a, hih lui (river) pen tuipi (ocean) sunga om ahi hi.

Na lamdang um zo lo ten bel hih banga vanleng leh teembaw mangte pen ulian ten a kicianin a kan khiat zawh loh man leh a hawlte hihkhialna (human errors) hanga thupiang hi ci uh hi. January 1, 1958 in sumbawl mihau Harvey Conovar in zong Florida ah huihpi a nung lai takin a teembaw (yatch) hawl teitei a, a ngawngkhauh luat man leh a thumang loh (stubbornness) manin a teembaw tawh a mang tawh kibang lel hi ci uh hi.

Tua loin 1502 kumi Spainte teembaw Francisco de Bobadilla zong huihpi hat mahmah (hurricane) in a nawk manin a si hi zaw a, Bermuda Triangle sungah a tai man hilo hi ci uh hi. May 14, 2986 in thakhat thu-in huih vot mahmah 32 km/h (20 mph) panin 97–145 km/h (60–90 mph) kikal a hat in “The Pride of Baltimore” a nawk manin tum a, tua bang mahin huih vot in 2010 in Brazil tuipi gei/luipang (coast) ah Corcordia teembaw a nawk manin tum hi ci-in na lamdang hangin teembaw khawng pen a mang hi tuan lo a, huihpi leh huihvot in a nawk ciangin a mang hi lel hi ci-in Bermuda Triangle sunga na lamdang piang um zo lo uh hi.

METHANE CLATHRATE:

Bermuda Triangle sunga teembaw leh vanleng khawng a mang ziauziau mawk pen natural gas namkhat ahi methane clathtrate/methane hydrates kici a om man hi ci uh hi. Australia gam-a Laboratory experiments a kibawlna panin methane hydrate phuan (bubbles) nangawnin tui gikna/sahna/tamna (density) kiamsak thei a, teembaw tumsak zo hi cih mu khia uh hi. Hih banga methane hydrate phuanin Gulf Stream tuipi nangawn nih in khen zo ding hi ci uh hi.

Bermuda Triangle ah methaneeruptions (meimual buannawi/”mud volcanoes” zong a kici) piang thei zelzel ahih manin hih bang a pian’ laitakin teembaw a tai ciangin tum lianlian hi dingin misiam ten ummawh uh hi. USGS in laibu khat a khetkhiatna ah tuinuai-a om hydrates pen leitung mun tuamtuamah om kawikawi a, US leitaw-nisuahna lam-a om Blake Ridge tuipi pang kiim-ah zong om a, ahih hangin Bermuda Triangle sungah a beisa kum 15,000 sungin Bermuda Triangle in gas hydrate khahkhia lo ding hi ci-in ummawh uh hi.

BERMUDA TRIANGLE SUNGA NA LAMDANG PIANGTE:

1.Ellen Austin: 1881 in New York zuan dingin Ellen Austin kici teembaw kisia leh kuamah zat mel nawm loh (derelict ship) khat kiangah hong tai kha hi. Tua teembaw kisia kiang a tun in tua teembaw kisia mang ziau a, tua khit hong kilang kik a, tua khit a sawt loin mang kik leuleu hi. Hih thu tawh kisai London khuapi-a Lloyd ten a kan ciangin 1854 in Meta kici teembaw khat kibawl a, 1880 in Meta min pen Ellen Austin ci-in kilaih hi cih ciamtehna mu uh hi. Tua teembaw sunga tuang teng zong mang uh hi.

2.USS Cyclops: (AC-4): US Navyte’ khangthu adingin gal kidona lo buanga si dingin USS Cyclops tuahsiatna hanga misi tam pen a, US Navy mi 309 March 4, 1914 in Barbados nusia in manganese ore pua I a tai a, mang hi. USS Cyclops tawh kibang pian mah a kibawl teembaw nih – Proteus leh Nereus zong Kidopi Nihna hun lai-in metallic ore pua mah mang kik hi. US Navy ten bel Bermuda Triangle a nawk man-a tum mang hilo-in a van puak a gik luat manin a tum hi zaw ding hi ci uh hi.

3.CARROLL A. DEERING: Carroll A. Deering teembaw pen radio leh TV signal tawh kithuah in 1919 in kibawl a, Cape Hatteras kianga om Diamond Shoals, North Carolina ah January 31, 1921 in kinutsiatsan hi. Thu lengsawm 9rumours) kigen danin Carol A. Deering pen zuu namkhat Rum zuak ding a kikham lai-in tai a, tuipi sunga suamhat (pirates) ten na suam uh hi kici hi. Hih teembaw mang hun lianin SS Hewitt teembaw zong mang hi. Bermuda Triangle nawkin mang hi cih um lo ten tua khitin teembaw khat zong Carrol A. Deering taina lampi zui-in va taisak kik uh a, Carroll A. Deering pen SS Hwitt in a nawk manin mang hi ci a, Carroll A.Deering sunga tuang teng zong mang khawm hi ci uh hi.

4.FLIGHT 19: Flight 19 pen training nadingin a kizang vanleng hi a, TBM Avenger torpedo bombers nga tawh kipawl in training a neih lai-un December 5, 1945 in Atlantic tuipi tungah mang ziau uh hi. Hih vanglengte pen tai 141 (miles) leng dinga leng khia hi uh a, tai 73 nisuahna lam-a om Fort Lauderdale phual-a bawh dinga leng hi napi uh a vek un mang uh hi. Hih thu tawh kisai US Navy ten kanna nei uh a, a tui bei-in a vek un kia hi dinga, a omna uh kimu zo lo hi ci uh hi. Hih vanglengte zong dingin vanleng dang khat leh mi 13 tuanna
PBM Mariner a va kuan hangin a suanga tuang teng zong mang kik uh hi. . US Navy ten a zong dingte a kuan khiatun khuasia lua ahih manin PBM Mariner puakkham ding hi ci kik leuleu uh hi.

5.STAR TIGER AND STAR ARIEL: BSAA Star Tiger pen Azores panin Bermuda zuan dingin leng khia a, January 30, 1948 in mang hi. G-AGRE Star Ariel pen Bermuda panin Kingston, Jamaica manawh dingin leng khia a, January 17, 1949 in mang hi. US Navy ten hih vanlengte hat len’ lua uh ahih manin a hawlte hih khialna hangin tuahsia hi ding hi ci uh hi. A vanleng khat pen Bermuda Triangle sung a leng lut lian a kipanin a hawlte tawh bangmah thu kiza thei nawn lo hi.

6. DOUGLAS DC-3: Airborne Transport DC-3 (DST), number 16002 pen 1948 kumin kibawl a, San Juan Puerto Rico panin Miami zuan dingin leng khia a, December 28, 1948 in mang hi. A vanleng leh a sunga tuang mi 32te mang uh a, Civil Aeronautics Board ten a kan hangin a mangna hang ding a thu kithei zo lo uh hi.

7. KC-135 STRATOTANKERS: US Air Forcete vanleng KC-135 Stratotanker aircraft kici vangleng nih Atlantic ah mang hi. US Air Force ten hih thu kan uh a, kiphukha uh hi ci uh hi. Ahih hangin Bermuda Triangle thu tawh kisai thu tampi a gelh Winer, Berlitz leh Gaddis in hih vanlengte a taikha uh hilo-in a kiatna mun uh tuam tek a, tuipi tung 160 miles (260 km) kigamla in kia uh hi ci uh hi. US Air Force ten vanleng them zong kimu a, a kitaihkha mah uh hi a cih hangun Kusche in lim takin research a bawlna panin US Air Force ten vanleng them kimu hi a cihte uh pen teembaw kisia sunga om tuipaan leh singthem hi cih mu khia hi.

8. CONNEMARA IV: Sept. 26, 1955 in Atlantic leitaw lam-a om Bermuda ah teembaw (yatch) khat a tai lai-in huihpi hat mahmah (hurricane) in nawkin mang hi.
Berlitz leh Winer in hih thupiangte tangthu in a gelhna uh-ah September 14-18 kikal in Bermuda ah Hurricane kici huihpi nunga, tua-in tuihual khauh mahmah piangsak ahih manin hih teembaw mang hi ci-in gen a, Bermuda Triangle thu tawh kisai a gelh kikna ah tuangsak kik leuleu in, Hurricane huihpi nung hi cih pen Barbados khua-a teng J.E. Challenor in hong laikhakna panin hong gen hi ci-in kitel takin gen beh hi.

BERMUDA TRIANGLE PHAWKNA DINGA KIBAWLTE:

• Sea World amusement park, Gold Coast (Australia) ah tuanna (ride) ding kibawl a, a min dingin Bermuda Triangle kici hi.

• La phuahsiam Isao Tomita in Bermuda Triangle kiim panin a zak thute tawh kisai album khat bawl a, a min dingin “Bermuda Triangle” ci hi.

• Fleetwood Mac in 1981 in “Heroes are Hard To Find” kici album bawl a, tua sungah “Bermuda Triangle” kici la dawng khat kihelsak hi.

• Lasaksiam leh la gelhsiam Barry Manilow in Barry kici album 1981 in bawl a, la dawng khat “Bermuda Triangle” kici kihelsak hi.

• Bermuda Triangle tawh kisai film masa pen 1975 TV movie “Satan’s Triangle” kibawl a, tua khit nungin “The Bermuda Triangle” (1978), “The Triangle” (2001) leh TV miniseries “The Triangle” (2005) kici kibawl hi.

• In Search of… season 1 episode 4 (1977) pen Bermuda Triangle phawkna dingin a kibawl ahi hi.

• 1977 in Airport ’77 kici tuahsiatna film in kibawl a, hih vanleng pen Bermuda Triangle ah a mangna phawkna dinga kibawl ahi hi.

• 1977 Steven Spielberg in science fiction film “Close Encounters of the Third Kind” bawl a, Flight 19 vanleng hawlte dawksak loin Sonoran Sehnel Gam (Desert) panin leng khiasak a, Bermuda Triangle ah mangin Gobi Desert ah kimu kik in bawl hi.

BERMUDA TRIANGLE SUNGAH VALENG TUAHSIATNA TUAK LEH MANGTE:

· 1945: December 5, 1945 IN Flight 19 (TBF Avengers bombers 5) leh a sunga tuang mi 14 mang uh a, tua ni mahin Flight 19 zong dinga kuan mi 13 tuanna PBM Mariner BuNo 59225 mang kik leuleu hi.

· 1947: July 3, 1947 in Bermuda Triangle Legend in B-29 Superfortress vanleng Bermuda mang hi ci hi. Hih thu tawh kisai kanna a nei Lawrence Kunsche in B-29 pen mang loin a mang pen Douglas C-54 hi zaw a, Florida tuipi nawlah huihpi in mut mang hi ci hi.

· November 16, 1949 in B-29 vanleng Atlantic mangin a suanga tuang mi nih zong mang a, a kizon’ leh Bermuda panin tai 385 gamla ah vanleng hawlte gel kimu kik hi.

· January 30, 1948 vanleng nasem (crew) 6 leh mi 25te tuanna Avro Tudor G-AHNP Star Tiger Santa Maria Airport, Azores panin leng khia a, Kindley Field, Bermuda ah mang hi.

· December 28, 1948 crew member 3 leh mi 36 tuanna Douglas DC-3 NC16002 vanleng San Juan, Puerto Rico panin lengkhia a, Miami ah mang hi.

· January 17, 1949 in crew member 7 leh mi 13 tuanna Avro Tudor G-AGRE Star Ariel Kindley Field,Bermuda panin leng khia a, Kingston Airport, Jamaica ah mang hi.

· January 8, 1962 in USAF KB-50 51-0465 Atlantic panin leng khia a, US East Coast leh Azores kikal ah mang hi.

· June 9, 1965 in 440th Troop Carrier Wing galkapte tuanna USAF C-119 Flying Boxcar Florida leh Grand Turk Island kikal ah mang hi. Vanleng hawl ten a tawpna dingin Crooked Island leilu lam, Bahamas (Grand Turk Island panin tai 177) ah a kizoppihte uh hopih uh hi. A kizon’ leh July 18, 1965 Gold Rock Cay, Acklins Island ah vanleng them bek kimu hi.

· December 6, 1965 in vanleng hawlpa leh mi khat tuanna Private ERCoupe F01 kici Ft. Lauderdale panin leng khia a, Grand Bahamas Island ah mang hi.

BERMUDA TRIANGLE SUNG TUIPI LAKAH TEEMBAW TUAHSIATNA TUAKTE:

• 1800: USS Pickering teembaw Guadeloupe panin Delaware manawh dingin tai a, a sunga tuang mi 90 tawh mang hi. (Huihpi “gale” a kicite hangin mang hi dingin ummawh uh hi).

• 1814: USS Wasp in Caribbean a tun dong thu kizasak thei a, tua khit a sawt loin a sunga tuang mi 140 tawh mang hi. (Huihpi “storm” a kicite hang hi dingin ki-ummawh hi).

• 1824: 1824 in USS Wild Cat Cuba panin Tompkins Island zuan dingin tai a, a suanga tuang mi 14 tawh mang hi.

• 1840: 1840 in Rosalie teembaw Bermuda ah mang a, a suanga lasa thei vasa eng (yellow) bel kimu kik hi.

• 1918: March 4 1918 in USS Cyclops teembaw sunga a mi 306 tuanna Barbados , Maryland zuan dinga tai Bermuda ah mang hi.

• 1921: January 31, 1921 in Carroll A. Deering teembaw, Captain W. B. Wormell in a makaih a, Diamond Shoals, Cape Hatteras kiang (North Carolina) ah kinusia in, a sunga tuang teng mang hi.

• 1925: 1 December, 1925 in SS Cotopaxi teembaw in Charleston, South Carolina nusia in ni nih sunga tun’na ding Havana, Cuba zuan a, radio panin cimawhna zaksakna (distress call) a ngah khit nungin mang hi.

• 1941: Nov. 23, 1941 in US Navy Seal mi 58 tuanna USS Proteus (AC-9) St. Thomas , Virgin Islands panin bauxite tampi pua in tai khia a, Bermuda ah mang hi. Tua khit in USS Proteus tawh kibang teembaw dang, mi 61 tuanna USS Nereus (AC-10) Dec. 10, 1941 in bauxite pua in St. Thomas panin ding khia leuleu a, mang kik hi. Research bawlsiam Rear Admiral George van Deurs in hih teembawte pen a lui luat manin a kisia hi ding hi ci pong leuleu uh hi.

• 1963:Feb. 2, 1963 in mi 39 tuanna SS Marine Queen teembaw sulphur ton 15, 260 pua in Beaumont, Texas panin ding khia a, Feb. ni 4 dong thu a kisaksak theih hangun a ni guk ni-in mang hi. US Coast Guard ten bel hih teembaw pen bit lo a, tuipi ah tai dingin muanhuai lo hi ci leuleu uh hi. Final report in a genna ah hih teembaw pen lim takin kibawl lo hi ci uh hi.

• 2015: Sept. 20, 2015 in SS El Faro in Bermuda Tiangle sunga om Bahamas ah mang a, a zong ten nasia takin zong uh a, tuipi nuai feet 15,000 ah mu kik uh hi.

BERMUDA TRIANGLE SUNGA LEI LAM PANIN TUAHSIATNA TUATE:

• 1969: Great Isaac Lighthouse (Bimini, Bahamas) leh a cingte nih mang a, kimu kik lo hi. A mang hun lai takin hurricance kici huihpi nung hi kici hi.

-Wikipedia panin kong teisawn ahi hi. Thang Khan Lian