Eima’ Van Ciatciat Puaksiamna – Nipi Thupuak

Eima’ Van Ciatciat Puaksiamna – Nipi Thupuak

Zomite ataangpi-in I’ van banghiam, hih keima’ puakding van bangteng ahihiam cih akitheihloh man-in ei’ van lopi kipua khazeel-a, gik salua-in kituuk khathei zeel hihang. Thamlo-in, mi’ vanteng pua-in, ei’ van taktak-pen kipua khalo-zeel ahihman-in kithulimlohna-in hong toknawi zeel-hi cih keimah mimal’ muhna ahihi.

Na’ van na-theih hamtangding kisam-hi. Seeng-tawh puak namte, bawm-tawh puak namte, thawl-tawh puak namte, thungkuah-tawh puak namte – anam theih kuul-hi. Gentehna-in, phelkhai-tawh khaiding tui-pen seeng ahkl bawm-tawh kipualeh aki sunsuk tuungmah-in bua-in beisiang pahding-a, seeng ahkl bawm tawmbang nel bek dinghi.

Mite’ van, mite’ vaai leh ei’ van, ei’ vaai theihcianna leh humsiamna-in zatsiamna hongguan dinghi. Leitung Khatna Gamte-ah Privacy and Confidentiality (veeltheihpak: http://www.lawhandbook.org.au/handbook/ch19s01s04.php) akici Aituamvaai leh Humsiamna naakpi-in kithupi sak-in, kizatsin-hi. Aituamvaai kuppihna-in ahuam (ciangtan khat nei-a huamna) nei-a, ciangtan neihna huamsung vaaite Aituamvaai hipah-hi.

Athu pan-in, nang leh na’ zii/pasal kaal-a na’ kikupding, vaaihawmding, sepding bawlding vaaite-in nang leh na’ zii/pasal bek huampah-a, no’ innkuan sung-a vaaihawmna leh vaaite inzong no’ innkuan sungciang ahuam ahihi. Aituamvaai-pen ahuamna kigii khunna-ah Zomite kisiamlo phadeuh-hi. Taangpi’ mitmuh-a akithei thute ahilo, lawm it khat tung-ah akigen thu khenkhat-pen tua lawm itpa/nu-in midang tung-ah gending leh iimding kigii om-a, theihtheihna-tawh kigii khunding ahihi. Kigii khunna (setting boundary)-ah Zomite kitualniam mahmah laai-a, akuul khollo ataangpi (public) mahmah thu-khawng iimbawl khikhee bilbel-in, a-aituam (private) mahmah thute-khawng genthaang zawsop bilbel thei-mahmah hihang. Tualniamna I-gen ciang-in tualsaanna manawh thei-a, gualbaan piicinna ngah theih nading deihna hipah ahihlam theihtheihna mahmahzong khuapimi-lungpuak neihna hipah-a, minam akoko-a sehna-in akiasuklam muhna ahihi.

Nupa aituamvaai, innkuan aituamvaai, lawmta, pawlpi, kipawlna, minam aituamvaai cihbang-in om diimdiam-a, minam aituamvaai-pen nupa kaal-ah akizat ciang-in buaina apian-theih baan-ah meetna limlim a-omloh mahbang-in pawlpi aituamvaai-ah nupa kaal aituamvaai, innkuan aituamvaai-peuh hong kigolh ciang-in meetna omlo genloh tua pawlpi’ buaina bulpi-khawng honghi theiden-hi. Pawlpi aituamvaai-in pawlpi pualam akaan/akhenleh buaina maaingat cihna hi-a, kipawlna aituamvaai-in kipawlna pualam akaan/akhenleh buaina maaingat cihna ahihi. Tua mahbang teek-in, nupa kaal aituamvaai-in nupa kaal akaan/akhenleh tua nupate’ kizopna namtui nawnlo cihna ahihi.

Minamvaai ahihkeileh minam buppi huamna nasepna leh silbawlna ahihlimlimleh aituamvaai’ kigii-in minam buppi huam-a, namdangte huamlo-hi. Minam buppi huam-a vaai akihawm khatpeuh-pen taangpi-mi aniampen leh asaangpen, ahaipen leh apilpen, azawngpen leh ahaupen akuamahpeuh-tawh kinahvawh, kipaaikaan, kizom cihna ahihi. Minam buppi sung-a mimal kimciat-tawh akisai cih nungsang-in minam buppi sung-a mimal kimciat’ ading-a saantheih tanzil (acceptable level)-tawh vaai akihawm kuul cihna ahihi. Ama’ thuthu, kei’ thuthu cihte-tawh akilehbulh mapanzia zat leh zuih kuul-hi.

Zomi minam minsel kipawlna, vaaihawmna, mapanna mun tuamtuam-ah om-a, tua kipawlna kimciat-in amau’ huamna kigii’ huamsung neiciat uhhi – aneilote-in kigii kiciantak-a khung meengmeengding cihna ahihi. Lakpakding-in, kei’ omna Australia-a Zomi Association Australia. Inc -in Australia-a Zomi mimal kim (Melbourne bek hilo-in State tuamtuam-a makaaite-tawh kamkum ciatciat-a akiphut ahihlam amangngilh kha I-omleh phawkthak pahni) huam-a, Australia pualam-a Zomite huam lo-hi. Tua ahihmahbang-in ZAA-in Australia-ah Bawhlung Kidemna bawl henla, “Zomi World Cup or Global Zomi Soccer Tournament,…” ci-zenzenleh ama’ van pua-kha lo-in, mundang phualdangte’ van akimawk suat hi-a, tuipi gaal khat-a haakkol puakding-pen angawng sau mahmah kuulding, sa-ngawngsau’ a sang-a sauzawk kuulding-hi. Khaap khat sang-a sauzaw mihing ngawng-lah muhhak ngeelding ahihteh huihlak-a haakkol-lah kipua-thei saamlo ding-a….

Kipawlna ciat-in ama’ huamna nei diimdiam-a, ama’ huamna kheng-a mapanna aneihleh atuam-in External Affairs akici Pualam Vaaisaipawl aneih kuul-a, kipawlna’ thukhun huamsung-ah mapang-a akalsuan kuul-hi. Tualo-in I’ vanpuak taktak-penbang kipua khalo-in midangte’ vanteng apua bang-a I-kiseh, I-kiguan takciang-in pankhopna sang-in kiphuutkhaakna leh kitukalhna-in minam hong sunim thei zawsop den-hi.

Aituamvaai huamna I-gensa mahbang-in minam buppi huam-a mapanna ahihnaakleh taangpi (public) vaai hita ahihman-in, mipi mimal kim-tawh kisai-a, mimal kim’ muhna, saanna laakkhop kuul cihna ahihi. “Amau’ vaaihawm ahihteh amau’ thuthu hilel, no-tawh kisaikei,..” ci-a, huamtuam anei veve nuamding I-hihleh “minam” min vawhloh pahding thumaan ahihi. Gentehna-in, “Global Zomi Idol” ci-a tusungteng comment akipia zihziah-pen taangpi (public)-tawh kisai ahihziak-a Zomi mimal kimciat-in amau’ muhna ciatciat asuntheih, apulaaktheih ahihi. Global kivawh laailaai ahihman-in Zomi-tawh kisai thamlo-in, leitung buppi-a Zomi khempeuh-tawh akisai ahihi. Mimal muhna thusung khat-pen zahpihna, neumuhna-tawh “thukhente (nobel judge ci uhcin)’ thuthu, amau’ thukhenna amaanpen,….” ci-a mite-in “piicing si-e, thupi si-e,…” acihding lametna-hiam, thukhente’ meeltheih ahihziak-hiam, ahihkeileh thukhente amaaivil-a kinei-hiam, agum-a kinei-hiam tuabang laigelh sanggam nihlehthum I-neihpen vaaihawmna khat’ huamna atello hizaw-hi.

Tua-tawh akisuun mah-in, mapanna leh vaaihawmna’ huamna mipi-in atello-hiam ahihkeileh vaaihawm makaaite-in atello-hiam, Zosuan Tuailaai vaai-zong comment tampi kimu-a, sepkhopding alim ateel kimulo zaw-in ki-elding aguui agah kimu zawsop-hi. “Zosuan Tuailaai” cih ciang-in “Zomi khangno” khempeuh huam cihna hi-a, ‘khempeuh’ huam napi-in vaaihawm makaaite-in “huamlo” ahihleh taangpi (public) vaaisaizia theilo-uh, cihna ahihi. Kuppihnate tungtawn-in, ZCD leh USDP ki-el seemseem nadingbang hongsuak liang-a, aziak-pen hih vaaihawmna’ huamna-in athulu-tawh minam buppi huam napi-in sepsuahna-ah huam zolo, ahihkeileh athulu-in ahuam hang-in vaaihawm makaaite-in amau’ sung-a huamtuamna kigii akhung khiinkhian ahihmeel kitheilo-a, tuateng ziak-in taangpi’ lungsim thusunna akithuap ziazua ahihi. ZCD mahzong, political party khat ahihlel saam hang-in, minam minsel, minam buppi huam ding-a I-lungdeih ahihtawh kizuui-in taangpi (public)-tawh vaaipuak khopna ding-a lungdeih thusung a-om ciang-in, “Ko policy nei-ung,…..” ci-a “Ei” munding-a taangpi’ deihna-ah “Ko” akiguan zeelleh “No” akicihding thumaan ahihi.

Atung-a tusung akipaksak (popular) deuh thute’ tungtawn-a Zomi laigelhthei zawdeuhte’ muhna leh saanna leh pulaakna tungtawn-a zunglotkhiatna hi-a, minam buppi huam I’ hihleh sepsuahna ahzong minam buppi huamding, minam buppi ahuamlo, policy, constitution atuam-a nei, huamtuam nei I-hihleh minam buppi ahuam bang-a taangkoko kuullo-pah, tua pawlmi ahilote inzong comment piaktaaklo pahlel ahihteh comment pialo pahlel, kitotna, kiseelna, ki-elna leh maai kinopmawhna kiamtuam pahding cihthu ahihi.

Kipawlna, mapanna khatpeuhpeuh-ah “ahuamna tungtawn-a thukhun” neihding kuul-a, ahuamna leh thukhun telcian mahmah-a sepsuah siamding naakpi-a akisam ahihi. U Khup (Evan. Langh Do Khup)-in agen ngei, “Pulpit tungkhawng pan-a azii khawng hong phatphat mi-pen,…..” acih mahbang-in nupa kaal aituamvaai’ huamna theih kuul-a, kipawlna’ huamna teltheih/theihtel kisam-in, tua-tawh kituak-a sepsuah (practice) theih/siam nading naakpi-in minam sung-ah kisam-hi. Kipawlna sung-ah nangma’ nupa kaalthu nahong bulphuhleh upa dangte-tawh na-tonkhawm theikei ding-a, nangma’ nupa kaal-ah kipawlna thugui na-puakluut gawpleh na’ nupa kaal-uh nuam ngeilo dinghi.

Tua mahbang-in Zomi buppi huam kipawlna leh vaaihawmna khatpeuh-ah na’ beh na’ phung, na’ pawlpi vaaite nong’ golh tuultuulleh upa dangte-tawh na-tonkhawm theikei dinghi, ahizong-in upa dangteng-tawh boungkhat, kithuahkhawm mahmah khat nahih lehbel minam ahuam hilo cihna ahihi. Alangkhat-ah, kipawlna khat bawl-in, ama’ huamna pualam-tawh akipaaikaan denkeei mi-pen upa dangte-tawh tonkhawm theilo dinghi. Tua hi-a, minam buppi huam daan-a kipawlna bawl kiamkuam zeel-a, naaihuai sungbekmah huamzeel, thukhun huamna neu atuam-tawh kipawlna bawl-a minam ahuam bang-a taangko khiazeel cihte anihtuak-in akhial ahihi. Kei’ muhna-a akhial bek hilo-in universal truth akici vaannuai thumaan ahihi.

Zomi dinmun-pen pilna siamna leh kivakna’ sang-in neihna, liatna leh kizuakzawhna cihte tawphah-a nei-a kipawlna akiphut piandaan vive hi-a, Ciimnuai Khua-ah Sabeng Kipawlna-pen thau zangno ameek ngeilo khat-in hong makaih, vompi ngaltang tampi aman mite zawn vetlo, zasak vetlo, cihbang dinmun hi-a, pawlkhatte-in “vaaihawm siamna bek kisam, sakaap siam sese kuulkei,..” ci uhhi. Sabeng siamlo khat-in, sataang hawl nading, sasuak nading zing/zawi, sa’ omnop deuhna phual, satat-hun, cbt bangmah thilo pi-in vaaihawm siam ngeingei loding-a, sa tampi aman mite’ tung pan-in lamlahna leh thulahna (instruction & advice) alaak nopkei sawnsawnleh tua kipawlna limlim akhial ahihi. Zomite tuabang pian vive ki-hihi; pawlleh boung hauteng, lukhuneelkaai daan anei zawdeuhteng, kizuakna pawlpi alian zawdeuhteng cihdaante-mah makaai upa ding-in minam kipawlna nangawn-ah hongki puakluut ciang-in kipawlna’ huamna atheizong om milmello, makaaite’ cihbangbang amangte mipil, akhangtoding mi cihdaan nangawn-in kipantah-in khuaknimna-tawh kikalsuan-hi. Tua ziak-in, mipi mimal kimciat-in amau’ vanciat puakding sang-in amau’ meeltheih kinaaipih makaai upate humna, gupna, pum panpihna penglam gaalkaap nasep lam-ah van kisuan-uh ahihman-in anaaihuai ameeltheih makaai upate phatphatna, pumgupna ciang-tawh ahun-uh bei toto lel-in, khangto kisa mahmahlaai dinmun-ah minam buppi dektak kibilhcip khinta-hi.

“Makaai upate’ thuthu mangding” hongci na’ makaai upate-in amau’ makaai upate’ thuthu manglo-uh ahihman-a nangma’ makaai asuak-zong kikha mawhlo dinghi. Biakna lambang enpak lehang; makaai upate’ thuthu mangding ci-a honghilh siate-in banghang-in amau’ makaai upate’ thu manglo-in inntuan-in pawltuam phut-uh ahihiam cihding ahihi. Ahite mangding, ahilote mangloding, amaante saangding, akhialte nolhding: Pasian’ deih hizaw lo-hiam?

Nangmah leh keimah mimal-in tuni-in I’ lungngaih ding-a thupipen-in, na’ van, ka’ van banghiam cih I-theihding, ei’ van lopi kisuansuan loding, ei’ van nangawn pua zolopi-in “thupi” hong kicihding ciangkhawng lunggulh-a mi’ minzaak zawdeuh upa makaaite pumgupna van thupilo tuamtuamte kisuansuan loding, pasal I-hihleh I’ zii beek-in I’ thu hongmang siamhiam cih kisittel-a mi’ ziite thuhilh sawme loding, zii I’ hihleh I’ pasal nangawn zahtaakbawl zolopi-a, mi’ palsal-peuh mi’ minzaak ahihziak-a va’ zahtaak gawp sawmse loding, I’ nulehpa’ thu manglo pi-a, nulehpa’ thumang ding-a mite thuhilh sawmse loding, I’ tate thuhilh zolopi-a mi’ tate thuhilh sawmse loding, akhumpen, apiicingpen, akilawmpen kampaute I’ zii I’ ta, I’ nulehpate’ tung-ah zatsin masa photding, Pasian akihta ding-a mite I’ thuhilhhilh ma-in eimah-in Pasian kihta masa photding: hihte’ sang-a aikzaw van zonzon kuullo-in hongpai niloh laaiding ahihman-in eima’ van eimah-in I’ puaksiam masakding athupipen leh akisampen ahihi.

Thawhkiik Ni Thupuak ahihman-in Pasian’ thu-tawh khum lehang: Minamvaai hitaleh biaknavaai hitaleh makaai upa dinmun I-hih naaknaakleh Pasian Kihta mihing (misi hilo) I-hih hamtang nading naakpi-a kisin phat mahmah kuul dinghi.

Pasian akihta pasal-in ama’ pumpi a-it bangteek-in azii it ding-a, atate khual-in pantah dinghi. Azii atate mi’ lak-ah phatphat lozaw ding-a, ama’ baangkua sung-ah alumlitlit kizopna-tawh kizom zawdinghi. Azii-in zahtaak-in muang ding-a, atate-in suang dinghi. -Azii’ lutang hiding-a, atate bukna kulhpi hidinghi. Azii-pen thagum-tawh uk ngeilo ding-a, itna-tawh huaiden ahihman-in kam-tawh gen tangtang lohsa-in azii-in amit-heek ahoihkhomkhat theisiam ahihman-in kinialna leh kihawmthawhna tawm dinghi.

Pasian akihta Zii-in apasal zahtaak-in athu mang ding-a, bangkua sung-ah hitaleh mite’ lak-ah hitaleh zahtaakbawl siam-in thudot-in nei ahihman-in atate inzong anu-uh a-it mahbang-in apa-uh zahtaak-in athu mang dinghi. Apasal’ thu mi’ lak-ah nial ngeilo ding-a, maaipuam leulau khawng-in mi’ lak-ah apasal paupih ngeilo dinghi. Apasal ama’ lutang ahihna thei-in Pasian’ zom-ah koihsiam ding-a, mipi’ minzaak mi’ pasal khawngte’ pahtaakding lunggulh ngeilo dinghi. Apasal’ tung-ah citak-in muanhuai ding-a, atate-pen aneem dikdek, alumlitlit itna-tawh kom-in huai tawntung dinghi.

Pasian akihta Tate-in nulehpa zahtaak uh-a, mite’ minzaak mi’ nulehpate’ sang-in ama’ nulehpate muangzaw-in suangzaw uhhi. A’ nulehpa’ maaipha zong uh-a, nulehpa’ mit-heek ensiam uhhi. Nulehpa zahtaak-uh ahihman-in nulehpa’ phalna, awina leh lungkimpihna lunggulh theiden uh-a, mite’ phatding sang-in nulehpa’ lungdam nading lunggulh zaw-in, mi’ lak-ah nulehpa’ mit-heek leh kampaute hehna-tawh dawnggiap ngeilo uhhi. Nulehpa kheem ngamlo uh-a, nulehpa’ muhlohkaal nangawn inzong nulehpa’ deihloh kampau ngamlo-in gamta ngamlo uhhi. Nulehpa zahtaak-in thumang-uh ahihman-in alawmte nangawn-inzong zahtaakpih uh-a, thaangbawl ngamlo uhhi.

Pasian akihta mi peuhmah-in zuauthu mudah-in thumaan it uh-a, akhialhna mang-in akibawlphat-theih mahbang-in mi’ khialhna-zong humcippih lozaw-in pulaak ngam-in hilhzaw uhhi. Mi pumphat-a anlim kamkhat aneekding sang-in mi’ khialhna lak-in thuhilh-a an ngolhding kizozaw uhhi. Thugui neilo-tawh mipi lungdam sakgawp-a citpiak tampi angahding sang-in thumaan gending teel zawden uhhi. Thumaan gen nuamsa uh-a, zuau gending kihta uhhi. Sepkhialh nei-a mipi-in atheihnopleh akhialhna-uh mipi’ maai-ah pulaak ngam uhhi. Zuauthei mi-in itlo uh-a, Pasian’ mite-in it uhhi. Pasian’ mite-in zuaugen ngamlo uh-a, zuaugen mite tawsawn lo-in pelh uhhi.

Leitung bei dong-in leitungmi milipphung (majority)-pen Pasian’ langpang ahihkeileh Satan’ mite ahi ngiat ding-in Pasian-in AD 30-33 sungteng genkholkhol mawk-a, Pasian’ mite-pen miliphiang (minority) hidending ahihziak-in thapiakna kampaupau mawk-hi. “ZEISU’ ziak-in leitung-in hong nialding, leitung-tawh kipawl loding, leitung-in hong langbawlding, leitung-in hong mudahding….” ci-in genkholhna kicing dimdem-hi. Leitung acihpen thumaan kalsuanna-tawh kalsuan lo-a, sumlehpaai, minlehza, neihlehlam-tawh kalsuanna agen hi-a, biakna nangawn khalam (spiritual) hi nawnlo-in thuneihna lamsang kiukna suak tahi. Leitung kipawlna khempeuh-ah acitak athumaan mite-in damdam-in mun ngahlo seemseem ding-a, hauhna leh liatna-tawh thunei mite-in mun hong luah toto-in, Topa’ Ni ciangdong Satan’ mite-in leitung hong ukding ahihi. Satan’ mite’ khialhna apulaak Pasian’ mite kithusim loding-a, tui lak-a kampau-zong bang zoloding genkholhna kicing-hi. Ngaihsut phat mahmahding-pen “leitung 2/3 Christian hi-a, Satan’ mite-in leitung uk cihbang omthei dinghiam” cih nop-huai mahmah-a, ahizong-in tua Christian akicite keekkeekmah Satan’ mite hihtuak mawk-hi. Gentehna-in, IS te’ gamtat bangpen CIA’ geelna ahihmeel kitheilo ci-a muangmawh tampi om-hi. I’ omna gamliante athu-in Christian minpua hi demdam saam taleh Mason biakna-mi bulpite’ ukna vive khawngzong nana hithei lel-hi. Masonic upna-pen taanglaai Pasian’ Gaalpa pan-a akipan akizomtoto biakna thuukmahmah leh guikip mahmah khat ahihi. Hih leitung mah-a anungta himawk I-hih man-in I’ van I-theihding akisam ahihi.

Mimal kimciat-in apuak ding-a akilawm van-pen “Pasian Kihtaakna” ahihi.

Zomi Pasian’ Thupha!

Zokhai

Hih anuai-ah, Leitung gamhaatpen thuneite-in Pasian-tawh akilangdo-a mapangpang ahihlam-uh kitheilo uh-a, akitheihloh-uh hang mah-in Pasian’ langpang-uh ahihi.