Quality or Quantity (Ta tamneih leh tawmneih thu)

Quality or Quantity (Ta tamneih leh tawmneih thu)

Puansilh ahih kei leh vanzat khat peuhpeuh a hoih te pen a Quality hoihtak ei kici hi. Hoih in hoihta kei leh amal tamte pen Quantity kici hi. Kei gennop bel ta tamneih leh tawmneih thu hi. Ta pen 1-3 bang nei a Pasian thu tawh hoihtak pantah in pilna sangpi sinsak ding maw or 10 val bang nei dingin pattah zawh mel neilo a lamdung avak kizang thei mello Quantity tamsak lel ding cih ngaihsut huai kasa hi. Tuhun pen pilna khang mahmah in ta zong ei deih hunhun a lak theih hilel ta hi.

Tu laitak ei Zomi te gam 3 na pai dingin lamkal ah ih dinkhawl laitak hi in tua kawm mahin kipi kiteng in parcel kikhak in ngimna nei mello in ta neinei mawk ih hih manin kei ommuan in kalung na himawh gige hi. Mai lamah ih vak zawhloh dingpi a neih nuam salel a mawk neihneih ih hitam maw na cici ing.

Ahang pen ngimna ngaihsut kholhna neilo in kiten nak leh ta neihpah loh phamawh bangin ngaihsun in nausuah ding teh sum neilo in UN khawng ah huhna ih nget pen zum huai mahmah hi. UN (IAD) officer ten banggen hiam cih leh nanau suah ding pen tu a natheih pat hilo in kha 9 sung bang kigin hun ding nei hi teh ci-in ahi mah ahi hi. Nau ih neihsawm leh zong ih nupa a sumkhol phot a sum neihnai kei leh zong nau halna zatui zang akicingneih teh neih theih luat hilel hi.

Nam dang ten angen zongin Zomi te peuhmah in ei nausuahna ding lawmlawm huhna ngenlo a ei ta ei sum mah tawh ih neih zawh nang hanciamin UN huhna tawh nauneih sawmnawn kei ni. IAD officer pawl khatte ong kona tel leng huhna nget pen zum huai lua mahmah hi. Mangpau ih theih loh man a paipai ih hi a mihai bang a ong kiko teh ken no tang in nasa mahmah ing.

Mikang te bangin bel amau pattah zawh ngapzah 1-3 a tamzaw in nei uh a pilna sinsakzo gai ahih manin ahai vak aphei vah tawmzaw pah uh hi. Pantahzo cihna hi. Ei Zomi te in birth control nau halna limzat nailo ih hih man nu leh pa khitui a luangsak khangno khamtheih zang kitam mahmahta in mi a ong piankhit teh ei ta mah hi-in siata leh kipai theilo hi. US vatung lai le cin hoihtak na pattah zawh kei a zongeina nahilh zawh kei leh kum 18 a cinkhit uh teh numei pasal in inn ong tuansan mangin nang taneih si in ong lehvak khollo zong omkha thei ding dinmun a tung ding hita ih hih manin pilvang tak a thungen a nupa a thunget khop ki kupkhop cihte thupi mahmah hi. Ta mawk-neihneih in a gol a thu ong manloh teh nangta hi ei nang hilh o ih kicih sangin ih neihma a Quality or Quantity ngaih sut kholh ding thupi mahmah hi.

Child psychologist te genna ah naupang khat leh khat kum 3 peuh mah kihal leh hoihpen hi ci uh hi. Ahang pen hoihtak kem khoi in cidam cihna hi. Anu zong agil awng manlo liang a kumsik a neihdet keei zong a cidamna in zolo thei hi ci uh hi.

Zomi tuailai lia leh taang te aw pilvang takin zi/pasal/ta ong nei unla living together khawng Zomi te ading hilo aih man zangkei tapeuh ni maw’ Mi gam milei ah ka Zomi pihte khutdawhngen leh khamtheih zang kamuh teh nasa lua in Zolia & Zotaang te aw ei khangah nam dangte ih batzawhna dingin QUALITY or QUANTITY ong khensiam mahmah un maw. Khangthak Zomi mipil a kigen te nakan lecin tatam nei na omlo ding uh hi.

Sia Kamtawng
New Life 4U Ministry (N4M)