Ei Christian te

Ei Christian te

Note tungah a hong kihilhsa bangin ama sungah zungthuk kha un la, ama deihna bangin nungta-in, na upna uh ah khauh semsemin, lungdam takin om un.( Colosa 2:7)

Christiante in Pasian’ deihna bangin I om theih nading in Colosa 2:7 sunga thute I zuih kul ding hi. I pianthak ciangin a man pah hi nai zenzen lo a, a kipan pan ahi hi. I pianthak ciangin I nuntakna taktak a kipan hipan zaw hi.

Christiante “Sanginn/Skul” tawh I kibat kul hi: Ei Christiante pen a sin den dingte I hi hi. Sang a kah den dingte zong I hi hi. “Note hong kihilh bangin” ci hi. Kihilhna a omna sang I bat kul cihna hipah hi. Pawlkhatte in Kha Siangtho nei khin I hih manin kihilhhilh kul nawnlo ci thei mawk uh hi. Kihilhna, sinna om loin bangmah kithei lo ding hi. Khris mahmah leh Khris’ thu I theih nading in I sin kul den ding hi. I kihilh kul ding hi. Khris a thei tektekte I hih nading in sin den ding hi hang.

Christiante in “singkung” tawh I kibat kul hi: Singkung in lei ah zung kha hi. “Ama’ sungah zungkha in” ci hi. Khris sungah zung a kha dingte I hi hi. A kip dingte zong I hi hi. Khris sungah zung I khak bek ciangin I kip dinga, Khris gahte I gah thei pan ding hi.

Christiante in “inn” tawh I kibat kul hi: Inn a kilam ciangin khuam khat bek peuh tawh piang lo hi. Sikkang dal khat bek peuh tawh kicing lo hi. Siktukilh zong kisam hi. Singpek zong kisam hi. A tungkhuh ding zong kisam hi. Sual zong kisam hi. Kawm zong kiam hi. Tampi a kigawm ciang bek in inn kilam thei pan hi. A thupizaw, a thupi lozaw om loin amau’ mun tek ah thupi tek hi. Ei Christiante zong tuabang ding I hi hi. A kilam khawm dingte I hi hi. A kithek tuah dingte I hi hi. A kinang khawm dingte zong I hi hi.

Christiante in “gun” tawh I kibat kul hi: Mun khat ah kicing/vung mawk loin, I luan khiat kul ding hi. Lungdamna thu tawh kidim let tawntung un ci hi. Tua hi a lungdamna thu I luankhiat sak kul ding hi. Lungdamna thu I genkhiat kul ding hi.

Tua ahih manin, ei Christiante in a sin den ding, zung a kha ding, inn tawh a kibang ding leh gun a bang dingin Pasian in hong deih a, tua bang zo ciat dingin Pasian in mimal kim thupha hong pia ta hen. Amen.

Fellowship News