Ei a kidem I hi maw, kidemna mannailo pi

Ei a kidem I hi maw, kidemna mannailo pi

Ka Pu Thangno pen a inn sungah kigualzo sak simtham. Khatvei ka Pu Khamte inn ah vahawh, ka Pu Kham in “Thangno nang a neu penpen bang hang tuaci ngam na hiam” ci-in na tai, thu na hilh leh kisel toto uh na ngap leh ei gel kilai leng aive cih ciang tungto hiau. Pu Thangno in “a cih leh Pa Kham, khe I zang thei diam” ci ta (a mah bel kungfu khawng sin ngei ahih manin kimuang mahmah). Pu Kham pen a heh lah suak, a nuih lah za, nak nuih zak lua mahmah ahih manin nuihna tawh amau gel kilai ding vai tua ni a bei hiphot, kilai ding kimlai ciamnuih tawh khawl bawl uh hi.

Ka gennop bel, ‘ei a kidem hive hang’…’kidemna man nailo pi’ cih tawh I kidem laitak ut bangin kiko, ki-el, kigen sia ziahziah thei lua hi. Tua pen Democracy gim nam a ciam I hi a, freedom of speech ahi hi. Tua ahih leh Politics vai-ah KHE: mimal vai, Personal vai a kizang thei dia? a ci nuam ka hihi. I mimal vaite koih khia photin Politics vai mah tawh I kalsuan takpi ding deih huai kasa mahmah hi.

Kidem hun hi a, kidemna man nailo ahih teh ut bangbangin I kiko gawp hang (ekkha nam zenin) kidemna man ciang, kidem hun a bei ciang tua kikonate, kielnate, kidemnate khempeuh na mangngilh zo takpi mah diam, kidemna hiven cih tawh I nusia ziau thei mah ding hiam?

Tulai taka Party tuam” lamah a hanciam mahmah mi tampi takte (a vekpi hilo) pen ZCD deihlo hilo, a mi kideihlo hi cih thu tam kasa peuhmah a, tuate sungah pawl khat pen ZCD te’n Tutna hong luah ma pek ZNC hunlai pek pan a langpan khin mi honkhat om mawk hi. Tua pen mimal vai hi a, Party vai hi hetlo hi cih mipi in kithei lua lel hi.

A min a puam uh bel gen nuam sam lo I hih manin, “Na Lenuai Cikpi ka ci deh” cihnop hun tam mahmah hi). Mi pawl khatin a ma personal vai, mimal vai peuh I minam sung leh politic sungah hong lutpih uh na hi gige leltak hi. Amau mimal vai hangin Party tuam ciat pan kidem niloh ding hahkat khia mahmah lai ding I hih manin I mailam ding uh dah huai kasa hi.

Pawl khat pen ZCD hong kah ciang MPte muan zawhlohna tawh kihei khia zong honpi khat mah om leuleu hi. Hih zong mimal vai hi a, Party muanlohna hilo hi. Ami muanglo uh ahih manin ahi thei dingin kangaihsun a a mi kikhek khia leh Party ah hong ciah kik ding uh muhsa ahi hi. Pawl dang khat leuleu pen ZCD hun sungin Lampi, Lei, Building tuamtuam bawl ding Contract deih in a ngah khakloh ciang ZCD langpan vilvel pawl om leuleu hi.

A dang honpi khat lah ZOMI cih bang omkei a ci tawh ZOMI deihvetlo, ZOMI kici limlim phuk ding, khultum ding a ngaihsun, ZOMI beisiang sak nuam leh I minam nangawn a bei zong phamawh a salo tampi tak omlai zen hi. I minam a bei zong bang phamawh a ci vet hileng bel Zogamah zong omkul kasa hetkei bilbel hi. Kawl lak, Senlak, namdang lakah omleng Khamtung gamsang zong nuntak zonna baihzaw leh namdang kitum zo baih zaw ding hiven. Gam leh nam itlo pi a I gamah nuntakna haksa pi tak a teng keikai pen gentheih huai lua hi, van man tamlai, a nuamzaw mun tampi om lel hiven.

Hamphatna lamen, lamet bang sa lo zong om zel hi. Zomi dinpi tentan ZCD taisan nadingin cihtham kasa kei hi. Malaysia tawn a gamdang paite leh tulai tak Malaysia a omlai a tamzaw tham in suplawh ding a om leh zong sum ngam in Zomi bek kideih hi. Kawlmi gen nai vet kei ni ei, Chin sungah Zomite in satanh omlo, hamphatna ngah lo uh hi. UN ngah zolo (kipia lo). Mi gamdang lengleng taleh eimite a leng ding om ngeilo hi. Eimi min tawh a leng namdang khawng zong omlai tazen hi. CRC kitam (kisia) ACR leh ZAM piangkhawm a hun kinai mahmah hi.

ZAM hong pian ciang CRC leh ACR kipawlin khaktan sawm uh a lawhcing lo hi. Hong haza khia mahmah uh hi. Nidangin Zomite kinawlkhin mahleh ZAM hong kip tak ciang CRC leh ACR a va zuan eimite na Welcome pha mahmah bilbel uh a maipha pia bekthamlo tutna zong na limpiak peuhmah se uh hi. ZAM leh a nung zui Zomite in haksatna, ki deidanna leh supna tampi phukha uh hi. Zomi min tawh maimialna thuak ding, suplawh ding, haksatna thuak ding kihta lo uh hi. Kum 10 bang tua danin hong din zawh ciangin UNHCR in Community Hoih pen minphatna pahtawina pia ta uh hi.

Ka gennop bel Chin sungah I satanh omlo hi. Ki deidanna pen “kua pat hiam aw, Akpi pat” hiam aw ka ci nuam hi. I minam sung a Kumpi nasem U lian masate hang hiam, “Nahtang to lawk ka nek man hiam, Manta khal gah ka nek man hiam” ka ci nuam phial ta hi. Mi lian masate hang ahih kei leh zong a maute’n (Chin) hong haza ngiat uh a lungsim hoihloh man uh hi ding hi. Zomi min tawh supna leh thuak ding ahi zong kithuak khin hi. Chin na va kicih duakduak hangin hong pakta lo ding uh hi.

Kawl bawng bangin hong zang pak ding bek uh ahi hi. No na ut mahmah uh zong na Tate uh utnawn lo hi. Zomi hih manin hamphatna ngahloh lawh ding ahi zong phamawh kasa tuan kei hi. Minam khat hibang zelzul a kithutuak hetlo pen thupha a omlo ding mah zong hilel hi. Kua in hong bumhai khin hi zawzen hiam ka ci hi.

Tua I gen muhdan kibang lo, sanzia pomzia kibang lo khempeuh kipawl khawm a ZCD lang khatah lampi om khempeuh zangin langpan uh hiphot hi. Ahi thei ding mah hi, I gam (Tedim, Tonzang) ah ZCD a zo Party hi a, a dang khempeuh opposition vive hong suak hi. NLD tawh gambupah Galkap Kumpi langpang nasem khawm uh ahih hang, ei lamah den a I gen mimal vai khempeuh hangin NLD nangawn opposition lam hong lehsuah kik ta hi.

Hih teng khempeuh pen Party vai hilo a mimal vai vive hi. Mimal vai teng paikhia hileng Politic laigil taktak Percentage % tam hetlo ding tawh kibang hi. (Mimal vai teng mah hiven politic a ci zong om veve mah in teh, gthn: namdang khat leh na veng pa/na khuapih pa kitawng pen na veng pa/na khuapih pa gumlo in namdang khat na va gup pen zong mimal vai cileng politic mah hizel ding a maw! I veng I pam, I minam it ding ahi hi. Minam itlo, gam leh lei itzo taktak lo khawng sum leh vang deih manin MP ut khawng hong omlua lel ding hi, tuate adingin a buai I hihloh ding kisam mahmah ding hi). Politic I cih taktak pen mimal khat bek, mi pawl tamlo khat bek phattuam nading hilo, minam bup, gam bup khangtoh nading na sepna , thu vaihawmna ahi hi.

A kidem hive hang cih tawh hih mimal vai khempeuh zangin ki ko, ki do, ki-el, ki gal ngeingai a I omleh kidemna man ciang, na kammal zatte uh na mangngilh zo mah ding uh hiam, telcing MPte panpihin na buaikik zo ding uh hiam. Kidemna man nailo pi utbangin ki gensiat ding mah hi I cih leh zong mimal vai lua teng omkei leh kilemna, mawh kimaisakna haksa lo zawdeuh ding hi.

ZCD Party in gualzawhna a ngahma ZNC hunlai pek pan alang pan khinte khawng mimal vailua ding kisa a, a neulai vua kitotna khawng peuh a mangngilh zolo uh hikha lel ding cileng maw. Hih kidem hun sungah I kidem ding pen mimal vai hi vetlo hi. Gambup, minam bup khantoh nading vai Politic ahi hi cih I phawk gige ding uh kilamen hang ei. Kei mimal muhna hibek a dikgai hi, man gai hi ka cikei a Nang muhna tawh zong kibang khinlo kha ding hi kithei siam ni. Kap Lian