“Depression” lungkiat natna ~ Tual Zam Tuang

“Depression” lungkiat natna ~ Tual Zam Tuang

NGIMNA
Hih lai nasim khitciang depression na ngah le ngahloh kithei ding, na kizoppih te depression a ngah aomleh panpih thei ding. (Ka ngimna a tangtun keileh bel sorry peuh mah ei 🙂

PATNA

Depression in zakzak sa kammal leh i thuak khak zelzel natna khat ahi hi. I pumpi tungah mun dangdangte damlohna a om ciangin a ki theih nading etna leh tehna van om hi, gtn: cisa teh nading thermometer om, si khum tehna ding glucometer om. A hi zongin lungsim na leh a teh nading van omlo hi. Ki en thei ziauziaulo hi.

Lungsim natna cihciangin lungsim sunga ngaihsut theihna damlo cihna hi. Khuak natna hilo hi. WHO in lungsim cidamna tawh kisai guideline bawla mhGAP (Mental Health Gap Action Programme) ci’n min na vawh uh hi.

Tua sungah lungsim natna nam 11 in khen uh hi. Tua te sungpanin namkhat ahi depression thu tawmkha en dih ni. Depression in naupang, khangno, khangham, numei, pasal akua mapeuh in a kingah thei natna khat hi.

Depression pen nam tuamtuam in kikhena a khendan zong a tuamtuam in om hi. A telnop-a kikhen dan khat en ding hihang.

Nam thum in kikhen hi.

• 1. Mild Depression (Suuksia lualo)
• 2. Moderate Depression (Suuksia pian)
• 3. Severe Depression (Suuksia mahmah)

Hih teng khatkhat in en suk lai ni.

1. Mild Depression a ngah te in

• thabei, ihmumu, anduhlo
• thazaw, bangmah ngaihsun zolo
• lungkia, lunggulh neilo,
• lung himawhden, khasia pahpah, heh pahpah
• khamtheih guihtheih nidang sangin zangh nuam zaw cihbang danin om thei uh hi.

Mild Depression dam theihna dingin

• lifestyle hoih nei zo ding
• exercise bawl zelzel ding
• ihmut hun ciangtan ding
• pumpi ading akisam an ne ding. A kisamlo te khiam ding, gtn: guihtheih khamtheih.
• ukk khatpeuh sep ding kisam hi, gtn: bawhlungsuih en, laisim, khualzin…

Hih a tunga te hoih tak in zuizo leh zatui kisamlo-in damkik thei hi.

2. Moderate Depression a ngah te in

• thabei, ihmumu, ankam limlo,
• lung himawhden, khasia pahpah, heh pahpah
• a hang omlo-a ci le sa na, golh gawp,
• a beisa huna nop a sak te tun nopsa nawnlo, lunglut nawnlo,
• a sep ngeina ahi zum nasep, inn nasep cih te sem zonawnlo
• a mah le a mah kimuang zonawnlo
• sih ding ngaihsun kha zel

Moderate Depression dam theihna ding

(a) Ngaihsut khat na

• a innkuanpih, kiim le paam te huhna kisam hi.
• a innkuanpih te in psychoeducation theih ding kisam hi.
• ni danga a gualzawhna, nop a sakna te genpih kik ding,
• ihmut hun, thawh hun geel sak ding,
• a thugente ngaihsak ding,
• kipawlna tuamtuam te ah ki helpih ding, gtn: pawlpi, khuasung kipawlna,
• a ma muang zawh dinga om ding (a mah le a mah a ki suamlup nop hun ciang hong kou ngam ding)

(b) Ngaihsut nih na

• khen khat leuleu ciangin innkuan sung ki lemlohna hangin depression ngah zong om thei hi.
• innkuan sung ki bawlsiatna, ki simmawhna, ki deidanna a tuamtuam hang zong hi thei hi.
• tua bang hun ciangin a innkuanpih te psychoeducation piak kula a lem tuankei leh kumpi thukhun (Law) tawh kizui in physhin kul thei ding hi.

(c) Ngaihsut thumna

• a diak in kum tawmlai-a depression ngah te ading ngaihsutna hi.
• a mah mah in zatui or guihtheih khamtheih limzatlua hiam cih kan huai hi. A zangh ahihleh ki deekzawhna ding a mah le a mah in hanciam kul ding hi. Panpih kul ding hi.
• a nu le pa in zu dawndawn, zatui zangh, ki tawngtawng, lungsim natna nei uh hiam cih zong kan huai hi. Hibang a hih khak leh khuasung thunei te tawh kikumin thu vaihawm huai hi.
• khangual lakah ki simmawhna, ki nawlkhinna, sang inn sungah ki zawhthawhna cihdan zong om thei hi. Hibang hun ciangin sang sya te tungah huhna ngenin bangci physhin ding cih kikup huai hi.
• lungsim cidamna lam a siam syavuan (psychiatrist) te tawh kilak huai hi.

3. Severe Depression ngah te

• bangmah lunglut nawnlo
• a mah le a mah kimuang zonawnlo
• a mah le a mah ki mawhsak, ki maisak zolo
• nungta nuam nawnlo
• a mah le a mah ki suamlum nuam pahpah cih bang hi thei hi.

Severe Depression dam na ding

• Moderate Depression sunga ngaihsutna khat, ngaihsutna nih, ngaihsutna thum te bangmahin zui ding.
• lungsim cidamna lam a siam syavuan te tawh kilak huai hi.

TAWPNA

Depression ngahna dinga thapia pawlkhat en leng

• guizui thei
• pumpi kilamzia kikhelna gtn: menopause…
• pumpi damlohna, natna gil neihna, gtn: TB, AIDS, Cancer…
• lungsim gimluatna
• thu vallua-a ngaihsutna
• neutung pana lunggimna
• it le ngaih te a sihna, kikhenna
• neih le lamh supgawpna,
• khemna tuakkhatna…

A hang tampitak omlai in cei. Tual Zam Tuang (References: mhGAP version 2 (WHO), healthline.com, Prof Dr. Tin Oo)