Dawi in mi that nawnlo ~ Lian Tuang

Dawi in mi that nawnlo ~ Lian Tuang

Kumpi nasep ka kipat cil Tamu ka om lai in, ka lungsim ah ka ut penpen in Inn (Tedim) ciah ding bekbek ahi hi.

Zan khat zan nih tam ding bekin inn ka ciah tantan hun tam mahmah hi.

Meibung awi in nu le pa, u le naute tawh zankim zankhang dong thucin thutang gengen ciakciak pen nuam ka sa lua mahmah hi.

1. Khat vei ka pa kiangah Inn khanglam khin kideih lo, luang in sawng thei (kisi thei) a cih pen a hi mah ding hiam cih ka dong hi.

2. Ka pa ong gen na ah, ni dang hun lai in hih thu pen a kikihta mahmah thu ahi hi. Inn a khinte zong si pah lianlian takpi hi. Ahi zongin tu hun ah bel tua bang taktak om dingin lamen nawn kei ing ong ci hi.

3. Bang hangin maw ka cih leh nidang hun lai in mi khempeuh in nat le sat a thu a la pianzia zui in huan khangah dawi kithoih zel hi. Huan sunga tua dawi thoihna phual pen kuamah in ki simmawh ngam lo hi. Tua mun ah dawite om hi ci in kikihta mahmah hi.

4. Ahi zongin mi pawlkhatte in tua dawi thoihna mun tel lo hiam thusimlo hiam kihta lo hiam thudangin (innlam, huankho,,,) cih bangin zang thei uh hi. Tua bangin dawite mun a kizat sak ciangin a dawite heh uh a inntekte bawlsia thei hi cih upna kinei ahi hi.

5. Ahi zongin Pu Pau Cin Hau hun a kipan in dawi thoihna sangin dawi hawlkhiatna kizangzaw ta hi.

6. Tua ban ah Tapidaw upna ong tun ciangin lawki ngeina khempeuh a kinusia ahi hi.

7. Ataktak in inn tawkhinna akl inn khanglamah behlapna hoih lo hi cih thuciin pen dawi thoihna bulphuhna pan a hong piangkhia thuciin na hi gige hi.

Tu hun ciangin dawi kithoih nawnlo ahih manin hih thuciin zong a kul nawnlo dingin a ngaihsun hi ing ci in ama ngaihsutna ong gen diudeu hi.

Hih thu pen eimi sungah tu ni dongin a kibuaipih mahmah thu khat ahih manin ka pa ong genzia pen diksa in ka lungkim mahmah hi. Lian Tuang