USA gam, Oregon State, Portland khuapi a teng Pa Peter Kham Lian Zam, Kum 44 (Phiamphu beh) in abeisa July 28, 2016 ni nitaklam nai 5:00pm kimpawlin Motor tuahsiatna hangin dipkuathuai leh lipkhaphuai takin mual ong liamsanta cihthu izakmanin Zomi Innkuan USA kipawlna in nakpitakin kidahpih, ki lainatpih hi.
Pa Peter Kham Lian Zam pen Zogam, Tedim uksung, Tuithang khua ateng Pa Pau Sawm Thang leh Nu Huai Ngaih Don ten tapasal 5 leh tanumei 2 aneihna sungpanin a upen 3na hi-in nuntakkhuasakna, sumzon paaizonna anuamzawding lunggulhna tawh abeisa 2008 kum in USA gam ongtung ahihi. a it mahmah a zi nu Nian Ngaih Mang in 2009 kumin nausuahgimna tawh ong nusia in tuakum mahin a tate 3 a pa omna USA ongtung uhhi. Tuabangtengtawh om toto in November 2015 kumciangin ama angkawi dingleh a tano 3 te nu a hidingin lia Nian Ngaih Mang tawh Zongeina zui-in pumkhatsuahna ong neithei uhhi. Lungleng khuangai a innkuan kimding ngaklah mahmah kawmkalah hicibanga lametloh laitaka ong nusiatvat mawkpen I laitangna in I khasiatpih ciat mahmah hi.
Pa Peter Lianpi te innkuanpen Portland khuapi bulphuh Zomite kipawlkhopna Zomi Innkuan Portland ah pawlmi kiciankhat leh USA gambup Zomite sihnavaiah luangkiphamnadinga kiphuankhia ZIUSA Genvai kipawlnaah Active member khat ongsuahna uhtawh kizui-in ZIUSA Genvai thukhun ombangin Pa Peter Lianpi pen Zomi Innkuan USA kipawlna in USD 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi. Hih akipiakkhiat luangphamna sumtepen USA gamsung muntuamtuampana ZIUSA Genvai thukhunpom pawlmi 7,200 valtekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.
I sanggampa Peter Lianpi tawh a nunungpen hunzatkhopding pen ongtungding August 5, 2016 (Friday) ni-in St. Joseph The Worker Catholic Church 2310 SE 148th Ave, Portland, OR 97236 ah zingsang nai 10:00am ~ 10:30am kikal Luangetna, visiting/Viewing hun hiding 10:30am ~ 12:30pm hunsungteng Catholic pawlpi ngeinazui-in Rev. Fr. John Deng Cin Khup in hanthotna, biakpiakna vaikhempeuh ong makaihdinga tuakhitciangin Gethsemani Catholic Cemetery 11666 SE Stevens Rd, Happy Valley, OR 97086 ah daitansakna/Vuina kineidinghi.
Isanggampa Peter Lianpi ongnusiatna hanga adah akap, alunglengkhuangai pianna nulehpa sanggam laizomteng leh khuapihtuipih tanaumeltheih akuamapeuh adiakin a nusiat a itmahmah azi Nu Nian Ngaih Mang leh a tanoteng 3 tungah Meigong tagahte a nusia ngeilo, a maute pasal/Pa dinmun ah a pangden ibiak Vanglian Pasian khasiangtho in aluang khituite ong nulsakhenla lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.
Dahpihna lianpitawh
Executive Committee
Zomi Innkuan USA, Inc.
August 02, 2016
Comment piaknop aomleh...