Zogam Diary ~ Pu Thangboi
October 12 – 28, 2018 sung Zogam Salphate’ mual bawl ding in kazin sung ka muhkhak ka tuahkhak thu pawlkhat hong hawmsawn ing.
Mual Bawl Nopna
1998 kum a kipan sisan tawh kiciam in Zogam Zolei a ding hunbit nasem ding a kipiakhia, tua hunlai a Zomi khangno, pawlkhat na om hi. Amau leh amau Zoheisa Unit kici uh hi. Kawlgam sung a omom tawh na kisem zolo ding cih ngaihsutna tawh India na pai uh a ZRO/ZRA tawh na kizom uh hi. Tua apaito khangno tampi lak pan in 2015 kum in mi 2 in hong mualliam san uh hi. Tua nihte lak ah khat pen ka pianpih ngiat ka upipen ahi Thang Len Pian (a) Heavy Piang ahi hi. Akhatpen Pu Danny Mang Khan Khup ahi hi.
Amaute gel pen asih kuan uh ciang un inn khat sap khawm uh a tua inn khat sung pan in anih un akivui ngiat uh ahi hi. Tua inn sung ah amau tegel leh aseppih uh ahi Pu Sian Muan Mang te innkuan tengkhawm uh hi. Tua hang a asihlai uh hita leh a mual uh akibawl ciang in hita leh Pu Sian Muan Mang in inntek buangkuapi asem ahi hi. Ka U Heavy Piang in June 16, 2015 ni in hong nusia a, Pu Danny in June 23, 2015 ni in hong nusia hi. Nipi kal khat bek kihal uh ahih man un atonkhawm phial uh ahi hi.
US Pan Gelna
Atung a hang teng tawh ka U’ mual kabawl ciang in Pu Danny’ a tawh bawlkhawm pah ding cih pen ka ngaih sutsut sa ahi hi. Ahi zong in ih neih ih lam in hong cin lo deuh ahih man in, pumpi sung ah sisan lum aluan lai siah Zogam Zolei ading in kigingsa in om ding a Laisiangtho leh Thautang nam ngiat a akiciampih uh ahi Zoheisa Unit te ka kuppih hi. 2018 kum June – September kikal US kazin sung in Pu Paa Pau (Portland), Pu Thomas Thang Lian Piang leh Pu Gin Pian Khup (Nashville), leh Pu Steven Suan Mang (Maryland) te ka kuppih hi. Hih vai lawmdangte tawh zong kikup kul ahih man in Pu Thomas Thang Lian Piang in coordinator (palai) hong sepsakna ding in ka cial uh hi. Ama’n zong nakpi tak in hahkat tak in hong vaihawm hi. Mualsuang a lai gelh ding pen Pu Gin Pian Khup (a) Pu Zo Khup in hong gel ding in ka ki thukum uh ahi hi.
Gelkholh Loh
Lamka ah mualsuang bawl ding in ka kithawi laitak in Tedim pan Pu Gin Pian Khup’ pianna a Pa ahi Pu Kam Pum in hong nusia hi. Tua zawh phet in Singapore pan in Pu Thomas Thang Lian Piang’ nau nu in cikziathuai tak in hong nusia leuleu hi. Tua bang teng tawh amaute contact theih in hong om nawnlo a ka lung hong neuman mahmah hi. “Bangbang hi leh gelsa himawk aih teh apiang thei bang in bawl veve ning” ci’n ka kuankhia hi.
Kawlpi 12 – 15, October
Kawlpi ah ni 4 sung ka taam a Pu Danny’ sanggamte ka kan hi. Pu Nung Sian Tuang’ huhna tawh a u Sayama Bonny Neam Kho Ciang tawh 14 ni ka kimu thei uh hi. Thunung thuma omkha leh cihna tawh Pu Danny’ mual bawl khuan hong piakna ding leh amau’ lam pan pek khat zong piak kullo ahih lam kagen ciang in ama’n zong lungdam tak in Pu Danny’ han leh mual bawl khuan hong pia hi. Lai mahmah tawh gelh in suai ka kaisak hi.
Tedim 15 – 16, October
Tedim ah 15 ni zan kataam hi. Ciimnuai hotel katung hi. Nitak an neding in kapai ciang in Tedim na khangto ahih lam kaphawk hi. Mawtaw hoih nono tampi tawh ka kituak hi. Zan ciang in zong mawtaw leh saikel gingging hi. Boarding (Bawda) a om sangnaupangte’ laisim kaza ziahziah a nuntak gimnam kasa hi. Mi pawlkhat in ka la deih mahmah khat ahi “Near The Cross” cih la pen a mangla in awkim tawh hongsa ziahziah uh a kalung hong leng tiaituai peuhmah hi.
Tonzang 16 – 18, October
Tonzang ah ka Pu Thang Lam Pau te’ inn ah 16 leh 17 ni zan ka taam hi. Hun ka ngah ciang in khua nuailam a lamzikpi kisial thak pen leh khua khung lam a tualpi thakte khawng kava en kawikawi hi. Mawngmual pan leh Tuitum lam pan zong kava gel et a, kaneu lai vasa beng khawng a kavakvak lai a ka sunmangte leh 1999 kum India ah LST sang ka kahcil kum a antang lianga ka thungetnate hong tang tungtungta ahih lam kaphawk a ka lungdam peuhmah hi. 1999 kum Secunderabad a Bharat Bible College ah ka kahlai in 1999 kum kumthak pen kum 1000 zalom kilaih ding ahih man in leitungbup in buaipih mahmah hi.
Y2K vai zong om hi. Kei zong ka ngaihsun a “Khang khat a kum tullom kilaih khat tuah khak ding hamsa mahmah aih teh bangci dawn ding?” ci’n ka ngaihsun hi. “Ni 3 angtan thungetna tawh dawn ning ei” ci’n ka khentat hi. Tua ni 3 sung ka thungetnate tu’n ih gam ih lei ah hong tangtung hiaihiai ta ahih man in ka lungdam mahmah hi.Tonzang khawng ah gas khawng tawh an kihuan ziahziah ta ka muh ciang in ka tha dimtuam mahmah hi.
Cikha 18- 19, October
Tonzang ah Kawlpi – Cikha bus ngak a zan 2 taam kahi hi. Tutna ngah nuam ka hih man in Kawlpi – Cikha ai tutna kalei a Ks. 15,000/ kapia hi. Khadawmi te hi. Tedim pan in zong Cin Lian Khai kei tawh kithuah ding in hong tuangto hi. Bus hong tunma in khuasung kavak leh Cikha pan a hong paisuk Thawnpi tawh ka kimu uh a Thawnpi in ama’ mawtaw ah hong tuang in acih ciang in lungdam tak in kasang pah hi. Bus sap tawm beek hong khiatkik khak uh leh ci’n gate ah kava gen leh hong khiat tuanlo uh a, ken lah hauh pahna ding hisamlo aih teh ci’n kangen taaltaal sekei hi. Thawnpi in sun an hong vak ban ah a mawtaw hoih mahmah tawh Cikha dong hong pua lai ahih man in tawldam mahmah hi. Cikha zong na khangto mahmah a khuasung ah kultal khawng na kizut sitset hi. Nidang ciang in khuapi suak mahmah ding ahih lam ka mu hi. A mun zong hoih mahmah hi.
Lamka 19 – 25, October
Sak lam khualzin pen nidang bang nawnlo in ki suakta hetlo hi. ID card ih neih kei leh kipai thei nawnlo hi. ZRO makaite’ thusiamna tawh 19 ni Behiang ah ZRO Defence Director pa leh ka inntekpa Pu Sian Muan Mang te’n hong dawn uh hi. Lampi ah buaina omlo in nuamtak in Lamka ka tung uh hi. Pu Thang Lian Pau’ inn ah hong tungsak uh ahih man in tawldam mahmah hi.
Imphal 20 – 22, October
Lamka ah Pu Go Hau (Zomi music kungpu) in hong delh phei a, Imphal ah hong zui in acih ciang in kazui pah hi. Ama’ inn ah nuamtak in tung in pawlpite tawh zong hunnuam kangah thei hi. Akpi tuilai khat hong gawh ahih man in mitkhu bawk thiutheu zo hi.
Khasiat Huai
India lam pang ih tun teh lampite na hoihlo zawta mawk hi. 2015 kum kapai lai sang in zong na hoihlo zawlai hi. Lamka khuasung mahmah ah lampite phok zihziah hi. Lamka kual bek atuaci hiam kacih leh Imphal lam zong na hoih tuanlo hi. Nidang sang in nakpi tak in lampite hoihlo zaw hi. Behiang leh Lamka kikal ah 2015 kum leh tukum kikal a kilam thak innthak kamu kei hi. Innte lui thei mahmah ta a hoih mahmah ih cih ding tam hetlo hi.
Zu Kiduh Mahmah
Ka paipaina ah bel zu aki nak nek mahmah lam ka mu gige hi. Khangnote bang anumei apasal in nekhawm zihziah mai uh hi. Singat leh Lamka kikal a luikawm khat ah mi tu ngeingai hi. “Huate bang hih uh ahia?” kacih leh “Khuasung ah zunek kikham aih ciang a gamgi ah ane uh hi” ci hi. Saljang leh Ngawi Phai khua kikal ahi hi.
Mualsuang Honna
Atung a ih gensa mah bang in US lamte dahna kahna hang tawh ki contact zolo ahih man in Mualsuang tung a laigelh ding ahithei bang in kagel maita vua, hun kinei hetlo ahih man in ka vaikhak mengmeng uh hi. Amau zong lungnuam tuanlo ban ah Pu Thomas Thang Lian Piang’ hanciamna tawh Pu Nang Khan Suan (Canada), Pu Gin Pian Khup (USA), Pu Steven Thang Suan Mang (USA), leh Pu Thomas Thang Lian Piang (USA) te’n mual bawlna ding in $150 ta tawh hong pahpih uh hi. Inntek Pu Sian Muan Mang in zong tampi bei hi.
October 25 ni zingsang nai 8:00 in New Lamka, YPA hanmual ah Zogam Salphate’ mualsuang honna hoihtak phatak in ih nei thei hi. Amau’ kivuina mun lian mah ah mualsuang abawl ih hi hi. Zogam Zomi a ding a kipiakhia uh ahih man in beh leh phung tawh ki vaihawm lo hi. Hun kilaihlaih ahih man in nidang teh aguh atangte uh ih it ih thupitsak semsem hun khawng hong tun mel zong kithei lo hi. Tua bang hun atun leh tu a ih nasep pen amun ciaptehna hong suak ding hi.
Innlam Zuatna
25 ni mual bawl khit phet in innlam ka zuankik uh hi. Cikha, Tonzang, Kawlpite ah zan khat ta taam suk in 29 Zangkong cidam ludam in katung hi. Hong buaipih hong tawlpih hong huh hong panpih khempeuh tung ah lungdam mahmah ing. Note’ Itna Sung Ah, Mung Laan Thang (Zangkong)
Comment piaknop aomleh...