Gensiat siam mi kisam den hi ~ Hau Za Cin

Gensiat siam mi kisam den hi ~ Hau Za Cin

Gensiat siam mi tampi om khollo hi. Gensia ut pongpong bel mi tam lel hi. Gensiatna gen ngam khempeuh gensiat siam hetlo leuleu hi. Gensiat ding a thei den a om mah bangin gensiat ding a thei kikeuhlo mi zong om leuleu hi. Gensiatna bekbek a nuntakpih hih ding lah hoih kei e, gensiat ding zong a mu ngeilo limlim mi hih ding zong hoih tuan kei e. Gensiat ding a om ciang a gen ngamte hangsan bek hilo in a pil hi a, gensiat ding thei napi, gensia leh hoihna piang ding hinapi gensia ngamlote lah a dawilok leh a sem ngamlo hi zel e.

A taktakin bel thu khat peuh ah gensiat ding a siam mahmah mi, phat ding ahih leh zong phatna ding a hoih mahmah a thei mi kisam den hi. Tua bang mite mipil hi a, miciim hi in, zahtakhuai a, ettehhuai in tampi neihhuai hi. Tua bang mi tampi neih ding kisam hi hang. Amau nasep ‘ne-da-lo’ hi (neulo, thuneulo hi).

Vai khat peuhpeuh a tangtunna dingin a mukhol (dreamer) a om kul a, a semkhia ngam (realist) a om kul a, a gensia ngam (critic) zong a om kul hamtang hi. A mukhol mi in ngaihsutna seksol nono leh nuihzakhuai pipi hong genkhia in a piangtheilo ding leh a om ngei nailo vive ahi nuam diak hi. A ngaihsutna te hi bialbual tawh kibangin a kipatna ding, a lai ding, a tawpna ding cih zong gen theihloh tawh kibang hi.

A semkhia dingte in tua bang ngaihsutna lamdang nono kawm lak pan koi teng hoih, koi teng kizang thei ding, koi teng pan kipan ding cih tengkhia siam a, sepna zong kipan pah hi. A gensia siamte in a mangmatpa mangmat pan a leh gen hihetlo in ngaihsutna tuam leh a lehlam pan a etna khawng tawh nawkgawp in phu gawp a, lawhcing hileh bangci ding, lawhsam hileh bangci ding cih bangin ciik tak in dong sensen hi. Tua in mangmanpa (dreamer) pen a ngaihsutna khuak sa sak semsem hi. Ahi zongin tua khuak sa sitset kawm pan a hoihzaw ngaihsutna thak a lamdang nono hong pusuak hi.

Gensiat siamte in lungsim a ngaihsut ziau pen sepkhiat a hih tuan kei leh a khiatna omlo hi ci uh hi. Vantung pan suk et bangin mite ngaihsutna khempeuh muhsak thei uh a, a neng a tawng in sit gawp pah hi. A ngaihsunte adingin zakdah huai, luvaih huai, heh huai in gimhuai sak mahmah taleh a hoihzaw ding ngaihsutna lam ah tonpih in a hoih leh hoihlo ding buhtang leh buhvai bangin khaihsiangsak hi. A kideihlo pen leh a phun hat penin a kingaihsun gensiat siampen in a kisam pen a hoih a piangsak ngaihsutna na hikik zel hi.

Gensiat na sawm leh hih thute limtak ngaihsun masa in:

1. Mite in hih bangte kisam takpi hiam? cih dong hamtang in. Piangthei ding, hithei ding cih a ngaihsun a mangmat khat in a upmawh pen bingphut gawp dingin kithawi pah thei hi. A sem siamte in zong sem peuh leng piang ding hi ciin ngaihsun kician mello in kipan buatbuat thei hi. Ahi zongin a gensia siam mi in hih bang ngaihsutna pen bangci sep leng bangteng kisam ding, bangteng sia ding, bangteng hoih ding, bang teng piang ding, piang takpi hileh mite in a kisap uh a hu takpi diam, a mawknapi leh sum leh pai leh tha leh ngal mawk beina a suak ding hiam ciin ngaihsun detdet in a ngaihsutna te deu hetlo in hangsan takin pulak khia ngam hi.

Hoih mahmah ding hita leh a sem dingte in a deihtakpi ding hiam. A zeek dingte in a zeek nuam takpi ding hiam. Thugen ding hileh a gen dingte in a gen nuam takpi ding hiam ciin a ngaihsutsak ding hi. Thuhoih mahmah tampi a hoihna hang bek tawh gen khit kisam tuanlo hi. Van hoih khempeuh zong kisam lo thei hi.

2. A zang dingte in a kisam takpi uh hiam? cih zong ngaihsut ding ahi hi. Thu khat kigen ding hileh a za dingte in a phattuampih ding hiam? A za dingte in a za nuam takpi ding hiam? A thei dingtein a thei nuamtakpi ding hiam cihte a kipulak ma in ciktak in ngaihsut masak khit ding ahi hi. Van bawlna ah hi in, thu leh la ah hi in, nasepna khat peuh ah hitaleh a zang ding, a zeekte deihna zong thupi a thuneu koihsak theih hilo hi. Tua manin gensiat siamte in limtakin a ngaihsut sak khit ciangin a genkhiat uh pen a tamzaw ah phatuam mahmah hi.

Tua ahih manin a phunphun, a gengen, a lehpanpan, mite a kan-kuat den cihte pen a hoihna tampi tak mah om hi. A thukimpih khinlote ngaihsutzia ding hong musak in, muhna thak, ngaihsutdan thak hong lak hi. Thuneu in ngaihsut ding hilo a, hehna in zong neih ding hilo hi. Hong engbawlna, hong enkona leh hong bawlsiatna zong hikhinlo hi; a hoihzaw ding ngaihsutna leh nasepziate a piangsak ding thu leh la zong hithei hi. Tua manin gensiat a siam mahmah mi koi mun peuh ah kisam den hi.

Mite gennop loh teng mite pulak noploh teng, mite zumpih leh mite gen ngamloh teng hong phuangkhia, suakta taka hong kikumsak thei gensiatna gen siamte bang nakpi takin thupi in pahtakhuai hi. Tua ahih manin ut in ut takei lecin hun sim in tua bang ngaihsutna nam tuamtuam na neihding leh gensiat dan ding na theih, na ngaihsut a kul hun om hamtang ding hi.

Tua bang hun ciangin – a phatuam diam, a kizang thei diam, a meetpih diam, a piangsak takpi diam, a hoihlam in a piang diam a sia lam in a piangzaw diam cihte khinkhai dimdiam in kidek hetlo, kidaam hetlo in genkhia, pulak, phuangzak ngam lel in. A nek hak mahmah hangin zatui kha bangin damna ding hithei a, a khum mahmah hangin sihna ding gutui zong hithei hi. Tua manin a hoihzaw ding a lamlak thei gensiatna a zangthei leh a gensia ngam, a gensia siam mi tampi Zomi bek hilo leitung mite in tampi i kisam hi.

Zomi te diakdiak in i kisin, i limzat semsem ding leh i zatngam semsem ding kisam hi. A puksak leh a kaisuk lam hilo in a lamto leh a phongto, a laamsang lama gensia ngam mi kisam deuhdeuh hi hang. Minam khangto dingte in gal tawh a kipelh ding hilo a, a galte a zawh ding ahi hi. Tua bang gal zawhna dingin hih bang mite kisam pha diak hi. Hau Za Cin