Covid-19 tawh siding maw, hingding ~ Pau Thawng

Covid-19 tawh siding maw, hingding ~ Pau Thawng

Tulaitak aa leitung buppi hong siasak Covid-19 pen lauhuai kihtak huai mahmah cih ciang bek hilo in kei mimal mahmah in zong ka kihta ka lau aa lamdang ka sa mahmah hi.

Hih natna pen thupi kasakna khat in bang hiam cih leh a lungno thahatna, hihtheihna cihte himasalo zaw in a hong pian khiatna leh a ki muhcilna gamthupi gamkhangto khinte pan a hih manin thupi kasa zaw hi.

Hih natna pen gam khangto nailo (Kawlgam dan) te ah a piang a kimu masa hi leh a lungno ki sit kikan khollo dingin ka ummawh hi. Bang hang hiam cih leh hih zah aa leitung patauh mahmah na ngawn a lungno sitna Kawlgam ah mun khatbek ah omlai hi. 2017-2018(a kum cian lianlo) kum kim lam in Tedim gam ah naupang cisa nat tam mahmah in sangkah naupangte a khan bupbup phialin cina ahih manin kumpi sang pawl khat bang khak uhhi.

Tua natna a lungno bang hiam cih hoihtak sittelna a ki neihlam ka za nai kei aa hun khatteh daikik hi. Ka cihnopna ah tu aa Covid-19 zong ei kiang khawng pan a piang/ akipanhi zenzen leh a lungno ki sittel mah ding hiam? Hi zah in leitung bup ki linglawng mah ding hiam?

Bangci khentel ding

Hih Covid-19 natna pen a kilat zia a kigen ciangin cisa ding khuhding ci-in ki gen hi. Tua a hih len Tedim gam ah kum sim tu bang hun aa natgual aa i neih(i ngeina seh) cisa bukkhuhte tawh ki koici khentel theih ding hiam? Hih natgual ngeina aa i sehte pen lungnoza(antibiotic) khawngtawh damzo hi. Gam khangto khinsate in zatui zatang a zat uh teh lungnoza(antibiotic) tamzat nawnlo uh ci hi.

Kawlgam a diak in Tedim gam khawng pen lungnoza zatui zatang aki zangh ngekngek(lutangna pak nangawn lungno za a ki ne) a hi hi. Covid-19 natna cisa bukkhuh koi hi aa natgual ngeina a ineih cisa bukkhuh te a koizaw a hi hiam? Tu laitak natna na neih leh hong kibawl ding sangin bang lungno nei cih hong ki kin zaw ding hi. Tua ahih manin natna khatpeuh naneihloh nadingin kidawm kikem in.

Kilak zaw dingmaw kibawl zawding

Ni danga natgual ngeina aa kiseh bukkhuh cisa cihte tulaitakin nei in zato kilak hi leng Covid-19 upmawhna tawh ni 14 sung pello hong ki khumcip ding ahihi. Bang lungno bang lungno a hi zong nacisa in bukkhuh vei aa zato natun leh hong ki khumcip dinga hong ki lipkhap mahmah ding ahihi. Tua a hih manin (1)natna pulaak ding hoih zaw maw? (2)Ei theih tawp ki bawl ding hoih zaw? cih mipi lungsim sung ah hih nam 2 aki lai laitak ahihi.

Gam danga omte zong Kawlgam ah ciah aa ni 14 sung ki khumcip zawding maw? I omna gam ah a hithei banga ki kem zaw ding cih tawh a buai uh ahihi. Hih hun sungah natna khat peuhpeuh nangahloh ding a thupi ahihi. Tua ahih manin natna nangahloh nadingin kidawm kikem in.

Lungmanna

Covid-19 i cihcih Tedim gam ah ni danga natgual ngeina aa ki nei ngei cisa bukkhuh i cihte lungno min hi ding maw? A tuam tuak hi ding hiam? A tuam tuak a hihmah leh ni danga natgual nautanga i ngaihsut cisa bukkhuhte lungno min bang hi ding hiam? cih tawh lungmanna hong om leuleu hi.

Hih natna pen bangbang leh a pianna/a kimuhcilna gam thupi a hihmanin natna thupi hongsuak hi. Ei mun eigam sung khawng aa piang masa hi leh ki pa tau sese lo in a ki sisi lel diam?

Bang cih khong ding

Hih natna kidalna zatui pen mikim tungah om aa a natna lungno a hih leh Pasian bawlsa huihlak, tuisung, khuavak/khuazing, khua hunt leh nitangte sungah omlo in mawhna tawh kidim mihing pumpi tung leh mihingte bawltawm van lehna tung bek ah om hi. Tua ahih manin natna na ngahloh nadingin kidawm kikem in.

A tawpna ah ka phawk thukhat om aa mihing bawltawm van lehnate tung kingalo in Pasian bawlsate bek mitsuan aa mihing khat leh khat kizopnate nusia phot in Pasian tawh i ki zopna thupit sakding a hihi. Pau Thawng