Corona natna ~ Dr. Howard Mang

Corona natna ~ Dr. Howard Mang

Covid-19 lungnote flu khuasik natna lungnote sangin gol zaw in, asang ah tam len lo-in, aniam lam ah tam om zaw uh hi. Hih natna lungnote natna lungno dangte bangin nuntakna neilo uh hi. A pumpi sunglam asa protein (RNA) hi in, avun pen sathau (Lipid) ahi hi. A neuna 400-500 micro hi in, lungo etna electron microscope bek tawh kimu thei hi. Hih natna lungnote in micidam khat vun pailet in lut zolo uh hi. Mit sung, naksung, gawlsung ah alut khit ciangun a nuntak zia uh kikhel in gitloh ding kipan uh hi.

A pumpi uh khuasa, tuikhu leh a omna mun uh tawh kizui in amau leh amau mah mah zong kisia thei uh hi. Hih lungnote avun uh apa sathau ahih manin avun uh kisia leh a pumpi uh zong kisia hi. Tua ahih manin satpiang leh lungno thahnazate in zong zo uh hi. Sik sabuaite tungah nai 12 nungta thei in, puan tungah nai 9 nungta thei a, khut tungah minit 10 nungta thei uh hi. Ki sukkhakna panin natna kilawh thei pen hi. Khut sawpzel ding alcohol lungno thahnate tawh siansuah zel ding hoih hi.

Hih lungnote in khuasa deih lo-in, khuavot deih zaw uh hi. Tua ahih manin hih a kilawh thei natna aom sungin anvot tuivotte sangin, anlum tuilum nek ding dawn ding hoih zaw hi. Puantung a om lungnote nisa ah kipho leh si thei hi. Citui lum tawh kam kikhuah leh gawlsung a om lungnote si thei hi. Avun uh sathau ahih mahbangin khuasa in tuisuak sak thei a, asatna degree 25 celcius tungsiah tuisa khutsawpna, puan sawpnate in that thei hi.

Alcohol lungno thahna 65% in zong lungnote avun uh tuisuaksak thei hi. Lungno thahna bleach, tui azah 5 tawh a kihelte leh chlorine lungno thahnate in zong sisak thei hi. Hih lungnote adang nun takna anei bacteria natna lungnote bangin penicillin, tetracycline cih bang anti biotic lungo thahna zatui in zolo hi.

Puan tung abang lungnote sinkhiat ding hoihlo hi. Banghang hiam cihleh tua lungnote huihlakah lengin nai 3 sung bang om thei uh ahih manin kidik kha thei hi. Hih lungnote aom theih nadingin avot, anom leh amial kisam ahih manin, khuavak sung akeuna leh asatna ah lungno te omzolo uh hi. UV light mantameel meitaangte in hih lungnote pumpi siasak thei hi.

Ahi zongin UV lightte pen mite tutna, khawlna, lupna khante a zatding hilo hi. Inn sungah huih siangtho alut a pusuak tawm leh lungnote in nuamsa ahih manin, huihlut huih pusuak ventilation atamna leh khuasatna ah lungnote om zolo uh hi.

Hih natna in flu khuasik natnate mah bangin lutangna, cisa, khuh, awmciak, cilak salak nasak ahih manin, zato kilah ding leh inn a tawlngak ding thupi hi. Natna neite gei ah naom khak leh pi 6 kihal in om in. Annek ma leh annek khit sialin nakhut sil in. Inn tawhtangte, konghon kong khakna, TV honna, phone, nai, computer leh sabuaite siangtho sakin. Tuibuk zatsialin khutsil ding thupi hi. Natna lungno buk theihna ahi khutcinte siangthosak in ahih theih leh sausak loh ding hoih zaw hi. Dang keusak lo-in tuilum dawn zel ding zong hoih hi. Dr. Howard Mang