Cope topa’ Nuntakzia tomgenna ~ Gin Hau Pum

Cope topa’ Nuntakzia tomgenna ~ Gin Hau Pum

Pasian in mihingte a mangthang dingin hong deih lo ahih manin Amah mah in mite hong zonna Piancil sung, Eden huan sung pan i mukhia thei hi. Tua hi-in Lai Siangtho lui sungah a mangthang ding mihingte Amah mah in a zon hun, Kamsangte zangh in a zon hun zong om hi. Lai Siangtho thak hun ciangin a Tapa Jesuh hong zangh hi. Zomite lakah 1910 kum ciangin a mangthang ding Zomite a zong dingin Cope topate nupa hong zangh hi. Tua Cope topa i cihcih pen Pasian zatzia leh Zomite hamphat zia, Pasian in eite adingin a tuam vilvel a hong puak ahihna tawmcik a nuai a thulunote tungtawn in ih ensuk ding hi.

1. Cope Topa Pianna:

Pasian thu, Zolai leh Zomite thangthu a kigen simin Cope topa thu kihel lo-in thuguipi cing thei mahmah lo hi. Banghang hiam cih leh Khamtung gam ah Pasian thu gen dingin 1899-1966 kikal sung America gam pen a hong pai innkuan sagih pha hi. Tuate in Carson, East, Cope, Woodin, Strait, Nelson leh Johnson-te innkuan hi-in tua innkuante sung panin 5-te in Haka phualpi pan nasem uh aa, Cope leh Nelson-te innkuan in ahih lehTedim phualpi pan hong sem uhhi. Rev. Dr. J.H Cope pen America gam Pennsylvania State, Philadelphia khuapi, Germantown veng ah teng uhhi.

A pa Joseph leh a nu Elizabeth Danford Cope sung panin November 21, 1882 ni-in suak hi. A nu pen India, Assam gam, Gawhati khua thuhilh mangpa’ tanu ahi hi. Kum 11 a phak ciangin Germantown Second Baptist Pawlpi sungah a min pia in tawpidaw suak hi. A nu leh a pa in zong sangsia semtek uh in tua khua mahah Nipi sang (Sunday school) sia sem uhhi. A ma minpi in Joseph Herbert Cope hi. Pasian thu khuavaak hong puakpa, Zolai hong phuatsakpa, Lai Siangtho hong teisakpa, Labu hong teisakpa, Sangukpipa leh Zomite nuntak khuasak zia hong lamsangpa, Mi thum nasep a sem, a gim theilo tawh a kibang ngilhmawh Sangmangpa ahi hi.

2. Pasian thu (Khuavak) Hong Puakpa Hi:

Cope topa pen Zogam hong paima, 1900 kum ciangin North East High School panin tan sawm hong ongkhia hi. B.Sc degree a ngah khit ciang in kum khat sung Utah gam Morman mite kiangah missionary sem hi. University a kah hun lai a kipanin khamangthang a vei khinsa hi aa, gammial nasep kum khat a sep khit ciangin Lai Siangtho sang hong kah hi. 1908 kum in B.D. degree ngah hi. 1908 kum mahin Northern Baptist kikhoppi Oklahoma khua ah tung aa, amah zong pawisim in pai hi. Gamdang thuhilh ding a puakpawl (Baptist Mission Society)te President pa Dr. Haggard in J.H. Cope kiang ah “Kawlgam khamtung (Chin Hills) ah na pai ding hi” a ci hi.

Cope in Chin Hills kicihna mun za ngei nailo ahih manin, “Koi mun hi peuhmah hiam? Gamlim sungah na zong dih in,” ci-in a lawmnu sikkhau sat hi. A lawmnu in zong “ka punote khat in Gamtawh kisai laibu (Gezetter) nei in tua sung hong en ning, tuakhit ciangin sikkhau hong sat ning” ci hi. Tua laibu a et ciangin “Kawlgam nitumnalam, gam mong khat, kuamah a ukzawhnai loh (Unadministrated) gam khat kici hi” ci- in a zing ciang sikkhau thuk kik hi. J.H. Cope leh a lawmnu Elizabeth Caldwell 1908 kum September kha ni 3 ni in hong kiteng uh hi. Zogam khuavak puak dingin September kha 30 ni-in Boston khua pan tembaw tuangin hong dingkhia pah uhhi.

Cope topa Kawlgam hong paiding ciangin a pawlpi (First Baptist Church, German Town, Philadelphia)-te kam vaikhakna hong nei hi. Tua a vaikhak kammal pen “Tu-in kei Pasian thu a za nailo Kawlgam saklam Zomite lakah khuavak puak dingin va pai ding hi’ng, Cidam in kong ciahkik ngeingei leh ka min hong khel un” ci hi. Missionary sem dingin hong kuankhia pah a December 21, 1908 ni-in Haka khua hong tung hi. Carson topa pen April kha sungin na si khin ahih manin Carson tonu leh Dr. East-te tawh tawlkhat sung Haka ah Pasian’ nasepna (Gupna thugenna) leh Zo pausinna hong nei hi.

Khamtung gam leitaw lam, Haka phualpi ah ah Dr.Hjalmar East in hong sem in, leilu lam Tedim ah Missionary phualthak sat dingin Cope-te innkuan hong dingkhia aa, November 1, 1910 ni-in Tedim hong tung uhhi. Tua Tedim hong tunni pen Tedim gam adingin khuavak tanni, Nisuahni, Suahtak ni cih ding himawk hi. Banghang hiam cih leh Pasian thu a thei nai lo, minam picing khat hih nading a kisam ahi Lai kineilo, khuamialpi lak a om nuntak khuasak zia bangmah a thei nailo Tedimte lakah nasep a kipat ni hipah hi. Hong tunni pan a kipan in pausinna leh gupna thu genna nei pah ngelhngelh hi. Pasian in thupha pia in a nini in Pasian thu-um kibehlap toto sak ahih manin 1913 kum ciangin Tedim gamah mi 91 tuiphum hi.

3. Zolai Hong Bawlsakpa Hi:

1885 kumin Mangkang kumpi in Kawlgam buppi a lakkhit, 1891 kum ciangin Zagam zong hong lato zo uhhi. Gam ukna phualpi pen Haka khua ah hong phut uhhi. Surgeon Major A.E. Newland in Haka khua ah nasem in om a Haka numei melhoih mahmah khat tenpih hi. Haka pau hong sinpah in “A Practical Handbook of the languge of the Lais as Spoken by the Kakas” cih laibu khat bawl in 1897 kum in hawmkhia hi. Mangkam leh Hakha pau Dictionary bu masa penpen hi ci-in kiciamteh hi. Sangmang A. Carson in “Biakna thu hilh theih nangin Lai hilh masak ding kisam” cih thu hong mupah in Yangon A.B.M phualpite thukimna tawh piangthaksa Kayin sia pawlkhat Zogam ah hong sam to in Zomite Kawllai tawh laihilh hong kipan uhhi.

1900 kum in Sia San Win in Haka khua sang naupang 7 tawh sang neu khat hong (Phuan) in sang masapen hipah hi. Rev. J.H. Cope in lailam siam (linguists) thum hong tonpih in Newland leh Carson-te maban hong zomto in Haka leh Matupi gam a zat ding “Lai”, Falam gam adingin “Laizo”, leh Tedim gam a zat ding “Tedim lai” hong bawlkhia hi.Tua bang in hong hanciamna sung panin 1913 kum ciangin Zolai Simbu khat hong bawlkhia zo hi. Khuakhal sangkhak sungin nitak sang (night Class) in sinsak zel hi. Ama bawlsa laigelhzia, lai ngeina (orthography) a kip nadingin hanciam tak in kum 30 sung bang Cope topa mahmah in hong puah toto a tuni dong ih zat Zolai ahi hi.

4. Lai Siangtho leh Labu Zolai in Hong Teisakpa Hi:

Missionary sep kawm leh khuan ciah hun nangawn in tawlnga vetlo a Cope topa nasep thupi mahmah khat in laitei (Translation) nasep ahi hi. Khualzin hun, khuan ciah hun sungin zong annek leh ihmut kikal longal in Zo Lai Siangtho leh Labu tei ngelhngelh hi. Tua kawm mahin Sang Laibu, Khrisitan Biakna lai, Tedim Thukizakna Lai cihte tatsat lo-in bawllai tazen hi. Lai Siangtho I neihcil pen Matthew hi a 1915 kumin Cope topa’n hong teisak ahi hi.

Tuabangin tawlnga man lo in laitei nasep hong semsem in Thu Ciamthak (New Testament) 1932 kumin zo hi. Piancilna leh Paikhiatna zong teikhin zo a a laidal (manuscript) in om hi ci-in kiciamteh hi. 1914 kum in dawng 20 val a pha Labu bawl in, 1918 kum in la dawng 101 a pha labu khat teikhin hi. 1923 kum in dawng 283 a pha labu leh 1927 kum in kawng 300 a pha labu bawl hi ci-in kiciamteh hi. Zomite ading in Laibu nam 36 gelh hi ci-in a kiciaptehna tampi om hi.

5. Zogam Buppi Sang Ukpipa Hi:

Haka khua hong tunphet in Carson tonu tawh sangsia sem hi. Khualzin hat in thugen a siam banah lailam kivalua ahih manin Mangkang kumpi in 1925 kumin Khamtung gambup sang Ukpipa (Honrrary Inspector of Schools) tavuan / za pia hi. Khasum ngah lo hi. Tua kumpite sang a zat ding laibu khempeuh bawlsak hi. Tuabangin khamtung gambup sang ukpipa tavuan a let manin “Sangmangpa” cih min a ngah ahi hi. Cope topa in Pasian thugen, Lai tei/let nasepte a sepnate leh Sang laisimbu tampi hong bawlsaknate banah in leitung sangte khempeuh ah sangukpi a sepna hangin Mangkang missionary-te khempeuh in zong ‘sangmangpa’ cih min ngahlawh uhhi.

6. Sum le Pai tawh Zong Zogam Hong Vaan Hi:

Khamtung gambup sang ukpipa a sepna hangin Mangkang kumpi in Khualzin nading in a piak (T.A) Rs. 700/- ngah hi. Tua sung panin Tedim thu kizakna lai hawmkhia hi. Tua bek thamlo in I gam le i lei kepcing theih nading leh guahtui mantak in i ngah nadingin kumpi Singhalh (Cuvuai) hong bawlsak hi. Hi cuvuai hong bawlsakna hang in Yangon Governor-pa in pahtawina sum Rs.2000/- pia hi. Tua sumte tawh nitak sang hong phuan in lai hilhna leh sia cialna in zanglai zensam hi. Pilna siamna leh thagui thatang bek thamlo a sum leh a paai tawh Zomite adingin na hong sem hi.

7. Doctor Divinity Kipia:

Khamtungmite adingin pilna siamna, sum le paai, thagui thatang tawh mipil thum nasep (Translator, Missionary/Preacher, Educator) a sepzawhna hangin June 10, 1935 ni-in New York, Colgate University panin Cope topa Honorary Degree of Doctor of Divinity (D.D) kipia hi. Cope topa Doctor a kipiak laitak in tua University a Dean-pa in hibangin gen hi. “Kuhkal tak in nasepna leh lungkia ngei lo a hanciamna tawh khamtung mite kam nam 40 val pen nam 4 in gawmtuahsak hi. Laigelhzia ngina kip bawlsak a, Sang laisimbu bawlsak hi. Ham namtampi tawh labu bawl a, kam nam khat tawh Lai Siangtho thak (Tedim Lai Siangtho) letkhia hi. Pau nam tuamtuam tampi tawh Lai Siangtho thak sung mun tampi letkhia hi,” ci-in mipite mai-ah genkhia hi.

8. A Nuntakna Ni Hong Tumta:

1938 kum April kha pawlin Khanglam, Kawlgam gamgi neh tengah thuhilhsia phengvak pawlkhatte hangin thu nawngkaina tampi om ahih manin J.H.Cope leh Col. Burne-te tua thu vaan dingin va zinkhia uhhi. Hih a khualzin hunsung uh guahzu a, lampi haksa hi. Lampi ah guahthuak in kawt gawp uhhi. J.H.Cope in gilsan natna leh nattun natna hong ngah sawnsawn ahih manin sakol tung tuangin khualgamlapi panin hong ciah hi. Hakha myone Sulkhua a tun uh ciangin sakol tung tuangzo nawn lo aa, tua pan Rev. Sang Fen tai 50 val bang a gamla Haka khua ah thuko dingin a paisuak vingveng hi.

Haka khua panin a hithei bangbang in siavuante tawh kithuah in va dawn kik uhhi. Cope topa gimluata ahih manin taal in kizawng aa Haka hong tun uhhi.Hih hun in Cope topa gim mahmah ta hi. Haka panin Tedim a om Cope tonu sikkhau sat uh aa, Cope tonu in sikkhau a ngahphet in vuandokpa Thomson tawh a zing ciangin hong delhpah uhhi. Falam gun lei a tun ciangun J.H. Cope June 11, 1938 ni 5:00 a.m. hunin Cope topa nuntakna nite hong tumta cihna thu lai ngah uhhi. Tua lai Cope tonu in a sim khit phetin thum ding, mau ding, kap ning ci lo-in, “Mi thum nasep a sem a gim theilo tawh a kibang mi khat nuntakna beita hi.” a cih khit ciangin Haka a om tapidaw-te’n limtak na vui un ci –in vaikha aa, Tedim ah nasep mabante sem dingin hong kileh kikpah vingveng hi.

Haka biakinnpi gei Rev.A.E. Carson kivuina han kiangah June 12, 1938 ni-in kivui hi.Tua sihvuina mun ah Dr. Strait makai in tualai ah Strait in hibangin gen hi. “Pasian thuhilh sangmang khat hihna tawh Dr. Cope in Topa ading nasepna ah ama’ khangualte sangin kipia zozaw hi. Ahih hangin hih thupen ama thu a telmahmahte bek in phawk a, ama pumpi a kipiakna hangin bangmah kisuangtak ngeilo-in nungta hi. Ama ngaihsutna in a biak Pasian adingin zatkhiat ding leh ama pumpi mahmah kipumpiak ding ahi hi. Ama lawmte leh amah a theite in amah pen a tawntung in phawk a, mi pawlhuai mahmah, a migi mahmah leh a lungduai mahmah khat in ciamteh uh hi. A biak Topa’ nuntakna bangin amah in thuhoih sem dingin hong kipia hi” ci hi. Hibang in a missionary a seppihte in zong ama nasep zawhnate lamdangsa phialmawk uhhi.

9. Cope Topa Kivui Ni Kumpi Laan A Laizang ah Kikhai:

Cope topa sihvui ni-in Haka khua ah Naylor mangpa in Dr.Cope zahtakna in Haka a kumpi zumte khempeuh khaksak a kumpi laante khempeuh zong (Half mast) laankhuam lang bekah khaisak in supna, dahna lianpite kilangh sak hi. Pasian’ nasem khat a sih manin kumpi-in a laante a laizang ciangah khai-in kumpi zumte kikhak a, dahna a kilat sak pen khamtung gamah a masapen leh amah bek hiding hi.

10. Cope tonu’ Kam Vaikhakna Hun:

Cope tonu in a pasal tawh a sep mabante a sep khit ciangin a ciah ding hong kulta hi. Tonzang a Rev. Vial Nang vaikhak in July 18, 1938 ni-in Tedim Biakinnpi sungah hun nunungpen mangpha khakna biak kikhop bawl khawm uhhi. Sia Vial Nang thugen dingin kithawi a Cope tonu a ciah ding a ngaihsut ciangin dahin lunglen huailua mahmah ahih manin a khitui tak ngelhngel thapai in thu gen thei phalo hi. A nunung ciangin Cope tonu in thugen in a khitui luang ngelhngelh na pi’n a thugen themcik zong hoi lo-in hihbangin gen hi. “Kei a ciah dingin hong kisamta hi.

Banghang hiam cih leh kei ka ciah kei leh Sangmang a thak hong pai lo ding hi. Tua ahih manin a manlang theithei in ka ciah ding kisam hi. Lungkham kei un, Topa’n hong kem ding hi” ci hi. Tonu leh pawlpi mite hun nunung kamvaikhakna a man ciangun Cope tonu pusuak in khuangzang mual (U Suan Khan Kham’te inn mai) ciang thu-ummite’n kha-in khut kilen in kap kawmkawm mahun lunglen khuangaihna tampi tawh mangpha kikhak uhhi.

11. Cope Topa Hong Zat Ni le khate:

Cope topa khamtung gam hong tunzawh thum vei a khuan va ciah hi. Khamtung gam sung a om hun sung khempeuh Kum 25 leh kha 7 (Ni 9419) sawt hi. A khuan ciah hunteng ni 1345 sawt hi. America gam pan hong dinkhiat a kipan a sih dong kum 29 leh kha 7 sawt hi. Tua a khuanciah hun sungin zong tawlnga hithiat tuan lo in Lailet (Translator) nasepte semkawm veve hi.

12. Cope topa leh Tulai Zomite Dinmun:

Cope topa hong pailo hizen leh Zomite tulai khuahun luanzia in hong taisan in mite nungah a om denkeei dingte ihi hi. Khua hun paizia manlanna tawh kizui in Mipilte in min tuamtuam na vawh uh aa, The age of Knowledge ci-in pilna hun ci-hi. Tuabangin min a kivawh zah khat in Zomite zong pilna kihanciam in siingdang eng lo, tanbang kim in a ki-om hita hi.

Tua bek tham lo in leitung khantohna tawh kizui in mindang khat kivawhna omlai aa The age of Globalization ci-in tua hun sungah khantohna tampi om in siatna lam zong tampi mah khang hi. Khantohna manlang mahmah in na hoih tampi a khantoh mahbang in siatnate zong tampi khangto hi. Tuabangin siatna leh phatna tampi khangto in Leitung a kalsuan laitak in a hoihte zuithei in siatnate i pelh theihna zong Cope topa hong vawh khaici hang hitazen hi.

Zomite in khantohna delhtum in Kiim le paam ah siattheihna leh natna tuamtuamte in hong umcih ahihna thu kiphawk aa AIDS/HIV cihbangin a dam theilo natnate hong laang mahmah hangin Pasian thu in hong kem hi. Nupa sung, khualzinna, a tuamtuamte ah kikep siam ding kihanciam in Lai Siangtho tawh kituakin I nuntakna pen I ngah khak Cope topa khaici hang ahi hi.

Khantohna tawh kizui in mite khuaneu panin khuapi liante ah kizuan ngeingai ahih manin tuhun pen The age of Urbanization ci-in min vawhna zong na nei uhhi. Hitakpi hi. Khuano sung sangin khuapi sungah pilna, sumzonna, khantohna, thumuhnate omzaw ahih manin khuapi kizuan ngeingai himawk hi. Ahi thei zah in khuapi sung zuat ding kihanciam keei hi. Khuapi sung zuatna hangin midangte tawh pilna, neihna, khuamuhnate hong kikim theita ahih manin I hamphatna lianpi ahi hi.

Hih leitung pen Upna tuamtuam neite tenkhop ngeingaina leitung ahih manin mipilte in leitung min na vawh uh aa Pluralistic World na ci uhhi. Hilua hi. I kiim le paam ah Buddist-te, Hindu-te leh Pasian thu um lo mitampi tawh i teng khawm ngeingai hi. Amau upnate sung pan a hoihte laksak in ei Khristian-te upna I hawpsawn ding Cope topa hong nusiat khaici hoih khat ahi hi. Cope topa hong puak Pasian thu in ei Khristian-te bek lo in upna kibang lo midangte tawh zong hong kilem sak hi. Tua upna tuamtuam a neite tawh I tenkhopna hih leitungah Cope topa hong puak Pasian thu khahsuah lo-in ih nuntak pih ding leh tua thu manpha a san theih nading un eite tavuan lianpi khat hita leuleu hi.

Tuate banah I.T. (The age of Information & Technology) hun ci-in thu kizakna malang mahmah ahih manin leitung buppi nangawn khuatano khat (Global village) ciziau hi. Leimong khat a thupiang pen leimong khat pan a pianhun mah in kiza ziau hi. Ei Zomite zong muntuam gamtuam ah kithehthang in ih om hangin pianna Zogam sunga omkhawm mah tawh kibang lelmawk hi.

Sun le zan, ut hunhun in thu kizakna I nei thei lel hi. Nidang in internet, email, Gtalk ci-in mite gengen I zakzak pen tu-in eite’n nuamtak in I zangh zihziah theita hi. Tuabangin muntuam gamtuam ah I omna panin khuano khat sunga tengkhawm bangin ih omna leh pumpi kigamlat hangin lungsim hong gawmtuah in khuatano khat sungah tengkhawm bangin hong gawmtuah Cope topa hizen hi.

13. Cope Centennial Jubilee Leh Zomite:

Tedim mite bek hilo, Zogam bup adingin a nuntakna, a pilna hong kipiakna hangin Zomite hiciang dinmun a tung thei ih hihi. “Cope topate nupa hong pai lo hizenzen leh Zomite bangci dinmun ciang ah ih om lai zen tam?”

A beisa hunin Cope Jubilee tawh kisai Tuiphum Pawlpite in 1985 kum in Rev. J.H. Cope Diamond Jubilee bawl uhhi. 1999 kum ciangin Cope Diamond Jubilee mah kibawl kik khin hi. Tua hi-in Cope Centennial Jubilee zong Tuiphumte bek in bawl ding maw? Bawl zenzen lo ee, Cope topa pen Tuiphumte bek pia peuhmah loding hi hangh. Cope topa hong puak Lungdamna thu (Pasian thu), Cope topa hong phuat sak Zolai, Cope topa hong teisak Zolai Siangtho, Zo Labute pen Zomi buppi, Pasian thu a sang peuhmah leh Zolai a zangh khempeuh ii pawi ahih manin Zomi buppi ii khaam ding pawipi ahi hi.

Tua Cope Centennial Jubilee bawl nading tawh kisai in a hunte hong toi mahmah ahih manin kum thum sung tha thak lakna ding thu bulphuh 3 kinei hi. Tuate Zomi bupin ki-apna, thungetna leh thuhilhnate ah zangh tek le’ng ih Zogam hong cidam in Zomite khantoh nading leh Zomite thupha ngahna hong suak taktak ding hi cihna tawh 2008 a dingin “Pasian aw, Na nasepna adingin hong siansuah in” (Joel 2:16-17), 2009 adingin “Pasian aw, acitak nasem dingin hong bawl in” (Late 40:11) cih leh 2010 adingin “Pasian’ zat Minam: Pasian aw, na deihna a tun nadingin vaang hong guan in.” (Pai.19:5-6; I Pet.2:9) cihte ahi hi.

Hih thubulphuh thumte thungetna leh ih pawlpi tek ah thuhilhnate ah zang kiim tek le’ng ih Zogam leh Zomite adingin Pasian in a lamdang khat teitei hong pia takpi ding hi. Tua ahih manin 2010 ciang i khaam ding Cope Centennial pawipi pen Zomi bup Lungdamkoh Pawipi cihna zong himawk hi. Tua pawipi hangin Pasian in ih gam le lei, ih minam adingin damna leh thupha ngahna hong hisak pelmawh / hamtang ding hi.

Thu khupna:

Leitungah minam picing khat ih suak nadingin Lai kician neih ding kisam hi. Rev. Dr. Hre Kio genna ah “Leitung ah Kha thum hal in minam khatta manthang hi. Banghang hiam cih leh Lai a neihloh man uhhi” ci hi. Ih Kha a mangthang ding kimlai Cope topate nupa hangin Ih Kha bek tham lo-in ih minam mangthang lo hi. Kamdang khat in gen le’ng Zomite a mangthang lodingin hong khoipa leh hong khansuahpa pen Cope topa ahi hi. Tuabang Sangmang ih ngahkhak manin zong ih hamphatna lianpi khat ahi hi.

Zogam ah Cope topa nasepnate ih ngaihsut ciangin lamdang liang hi. Pasian in Zomite adingin a tuam vilvel a hong piak Sangmangpa ahi hi. Tua ahih manin Cope Centennial Jubilee bawl dingin ih kithawi laitak in Pawlpi lungsim, beh lungsim, nam lungsimte panin minam lungsim ah kalsuan to-in 2010 November 4 -7 ni sungteng sim le maal, sak le khang, gam sung gam pua leh tui lu tuitaw pan kikaikhawm henhan in Kum 100 pawipi Tedim khuapi ah a muak khawmtek dingin hanciam ni. Gin Hau Pum (Cope 98 Celebration, Tedim, November 2008)