Congress ah Coronavius Stimulus bill ding thukimna neithei uh

Breaking news: Congress ah Coronavius Stimulus bill ding thukimna neithei uh

US Congress leh White House kikal kha tampi kikum aa thu kimna angah zawh loh uh Coronvirus Stimulus bill ding tuni Sunday, December 20 ni in Congress ah Republican leh Democrat makai kikal thukimna kingah ta hi ci in D leh R makai ten pulaak khia uh hi. Hih Stimulus Bill pen Congress – Senate & House ah vote hong la phot dinguh aa, tua zawh ciang Pu Trump in letmat (sign) hong thu ding in kizang khia ding ahi hi. Tua bill sungah sum $900 billion kihel aa, Mipi ten i lametna dan in huhna sum direct payment $ 1200 tangin $600 bek kihel ahih manin Pu Trump leh Congress makai tampi ten tawm sa lua uh in thu kim pha lo uh hi.

Congress ah akithukim $900 billion stimulus bill sungah:

1. Mipi te piak tung ding direct payments ah mi khat ciang $600, kum 17 nuai siah naupang khat ciang $600 ta ngah dinguh hi ci in makai lam ten taangko khia uh hi. Single khat in $600 ngah dingaa, Nupa Kop ten $1200, Ta khat nei innkuan ten $1200+600 = 1800; Ta nih nei ten $1200+600+600=$2400; Ta thum nei ten $1200+600+600+600=$3000 ngah dinguh hi.

Congress makai ten belh mipi te aading Christmas letsong hi ci uh hi. Makai atamzaw in belh abeisa dan in mikhat ciang $1200 ta pia lo uh ahih manin tawm sa lua uh aa, lungkim khol lo uh hi. Ahi zongin mipi te aading belh i ngah zah zah tawh lungkim phot ding dan ahi hi.

2. Small Business te huh nang paycheck protection program aading $284 billion zong kihel ding hi.

3. Federal Unemployment supplement dingin $300 ta kibehlap ding hi. State pan akipia unemployment benefit pen Federal pan $300 behlap ding cihna ahi hi. Gentehna State pen unemployment benefit $300 angah te in Federal $300 ngah beh dinguh aa, avekpi $600 ngah ding cihna ahi hi.

4. FDA pan approve sa Covid-19 vaccine mipi tung sutna ding huhna $30 billion zong kihel ahih manin mipi te aading lungdam huai mahmah hi.

5. Hih rescue package sungah Covid-19 cina te ahuh leh abawl Zato te huhna zong kihel dingaa, Sang (Schools & Colleges) te huh nang education bill ding $82 billion zong kihel hi ci uh hi.

More: Coronavirus Stimulus Relief pan huhna sum $2000 i ngah laidiam

6. Tua bek tham loin hih bill sungah inn sap te huhna – rental assistance and extends a federal eviction moratorium ding $25 billion, Food stamp huhna – Supplemental Nutrition Assistance Program benefits ding $13 billion, Transportation ding $45 billion leh Airline te huh nading $15billion cih te zong kihel dinghi ci uh hi.

Bang bang hi ta leh tulai tak Covid-19 pandemic i hamsat sung i gam leh mipi te huhna lompi hi dan in hong kiho thei, hong geel khia thei uh ahih manin lungdam huai mahmah hi. Update bawl to to zel ni. Ref: CNBC news Thomas On Sian Mung (Thomas Mung Guite) Washington D.C, December 20, 2020 MOMNO Media & Museum