Colombia kumpi leh FARC ten kilemna taktak neita

Aug. 26, 2016: Colombia government leh Revolutionary Armed Forces of Colombia (FARC) guamnuaimi ten Pithai (Tuesday) in “final peace deal” kici kilemna taktak nei thei ta uh hi. Colombia kumpi leh FARC in tam veipi kilemna dingin kikup khawmna (negotiations) na nei uh a, a nunung pen ding kilemna ding kihup khawmna November 2012 in na nei uh a, June 23 in kikaptuah khawlna dingin thukimna (ceasefire deal) Havana khuapi ah suai kaihna na nei uh hi. “Havana ceasefire deal” ah FARC ten ni 180 sungin a thaute uh koih khiat dingin thukimna nei uh hi.

El Heraldo newspaper in hih a tawpna dingin kilemna suai kaihna pen Pithai (Tuesday) in na nei uh a, Nilai ni 19:00 local time (23:00 GMT) ciangin kilemna taktak kinei thei ta hi cih Colombian President Juan Manuel Santos in pulak khia ding hi ci hi.

Tua khit ciangin President Santos in kilemna taktak FARC tawh kinei ta hi cih suai kaihna lai laite Columbian Congress ah pia ding a, Congress in thukimna vote khiatna (referendum) neih ni ding pulak ding hi.

FARC pen leitung adingin Marxist thu sanzia thu bul let-a kumpi langdote (insurgencies) lakah a khangham pen pawl hi a, 1964 in kiphuankhia hi. FARC ten Columbia kumpi laih ding leh a kilaih gawp kumpi/ki-ukna, sum bawlna, gam vai khempeuh laih-a a thak ki-ukna/kumpi (revolutionary regime) bawl khiat ding hanciam uh hi.
-Sputnik

Thang Khan Lian