Hell sungpan sumhau pa laikhak

Hell sungpan sumhau pa laikhak

Date: Tawntungni, Tawntung kha, A tawntung kum – Dear It pen Sanggamte, Na dam uh hiam? Kei ka hih leh dam cih bang a om ngei nawnlo ding ka hi ta hi. Na vek un a damkim lai dingin ong lam en ing. Naute aw, gennop le vaikhak nop thupi mahmah pawlkhat kong nei hi. Leitungah ka nuntak lai a, kei ma tungah sum ong ki baa te thu hilo hi. Tua te na ngaihsutna sung na ngawn uh ah na lut sakkha kei un. Sum bekbek ngaihsut na in, siatna sung ong tungsak dinga, lamtawpah hell sung ong puak ding hi (1Tim.6:10).

Ama sa in, tu laitak a, ka omna mun tawmkhat kong gen nuam hi… Ka omna mun pen, Hell, mei lipi sung kaci napi mei taang pempam cih bang omlo, mial bikbek a, bang mah ki mu theilo hi (Matt.22:13, Matt. 25:30). A tawntungin gamlum henhun den a, kaat gim nam lela in, mite kahna, thumna tauna aw vive ging ziazua den hi. Lipkhap, gimneih huai lua….

Hell sung ka tun ni a ki pan tuni dong, kum 20 valkhin ta meisa lah thuak hak semsem, ka dangtaak lua mahmah in, tui kici lah, khua ul na ngawn bei ta, tua banga, gilkial dangtaak a ka om zawh kum 20 valkhin ta, Hell sunga, mi pawlkhat in ka dangtaak lua, ka leiitungah tui takkhat bekbek ong tak vevua hehpihna tawh ci in a kap vangvang den mi zong tampi om…, “Hih khua mialsung ka tun ni a ki pan ka gei deuh pan a, a kap ziahziah kazak tuni dong mah kapkap tautau lai uh hi.

Kei zong ka dangtaak lua tui dawn ding lah om tuanlo, ka hehsuak lua ta in, “hih sungah kum 20 val tuingen a ka om hi, ngah kei ing, awng laklak nawndah o, ki lamdan na om nawn kei in teh, kisik hun ding mangngilh kha hi hang,” ka cihvial leh, “kei zong kul 6000 pha khin ta ing tuiduh lua ka hih cianga, a ngen ka hi ve, pheiphai cin,..”ci hehlua kisa a lawmte dawi hon, ai kam hon khat tawh ong that dinga, ong pai, ong that that mai uh, ka pumpi tung dima aikam in ong deh ngekngek, kei si thei nawn mahmahlo… Naute aw, tui a om ngiatloh pen zong thukhat sa ing, sihna a om nawnloh mahmah hi ka lungkiatna, lam et theih ding sihna om leh gimthuak dan a baihzaw deuh tam ci ing.

Naute aw, gimlua ta ing. Sa lua, lum lua,… ka dangtaak lua…. dawikungpu kiangah bangtan vei thuak lai ding ka hiam? Ka cih leh “Liakluak teh, nang hai na khawng miteng ban ngawhngawh kum then khat khit then khat…a tawntung thuak ni teh…,”ci lai lai…

Ni khat khit ni khat mite kahna aw ging ngaih tektek in, “mi ong ki beh lap maw,… nu aw gim lua veng aw, aw.. gim mah si ing maw lawmlawm liang ta zen aw, mite kahna aw ngaih semsem si ee” ka cih leh, “nikhat sungin, mi tul 200 bang ong kia suk ziahziah den hi..,” ci lai lai hi.

Naute aw, tua nisima ong kia suksa mite lak ah note khat zong ong ki hel nai lo buang dingin ong lam en ing. I nute I pate zong hih gimna tauna kahna le hagawina mun ah om ding cih ka thei a, ahih hangin, a mau kei ong it nawn hetlo ding uh cih ka theih mah bangin, ken zong amaute ka it nawn kei hi. Ka omna hell sungah, khat leh khat ki mudahna bek om a, ki itna cih bang a om ngei ding hi lo hi. Mi neihsa khat deihgawh man, a mi ki mai et cih zong om nawnlo hi.

Leitunga ka nuntak lai in kei bang ka hau mahmah a, lawm le gual ong ngai mi tam mahmah hi. Ahih hang Hell sungah, leitunga zawng pen te, le leitunga mihau te ka thuakna uh a ki bang a hi hi. Kei bang leitungah ka nuntak sung hau in, nisa zong thuak kha ngeilo ka hih manin hell sung a a saa thuak hak a sa vive mite lak ah kei thuak hak sak zia uang pha deuh ka sa lai hi. Leitungah mei tawh a ki hal lum mite thuak gimna zah sang tul tampi taka a haksa zaw mei sa, leitunga migilo teng, a khang a khanga, mi gilo mahmah teng a ki kholna na hi mawk a, a tawn tungin ong ki that den hi. A si theilo bek hi kei leng, tulza tamvei pi tak ong ki that khin ahi hi.

A tawntung a thuak ding ka hi a, hih bang haksatna liang, ka thuak hun ong sawt to leh, kisek lel, ki ngeina seh lel ning cihtheih ding namte lah hilo ahih manin, tu a ka thuak na sangin, thuak lah to tektek ding, kum 20 ka omna sa hih hell sungah, kul tul mak tampi tak ka om khit ciangin, tawntung gimna thuak ki patna mah ong hi tawntung ding ahih man in, haksatna, gimna, natna, satna, gilkial dangtakna, launa, linna te a si thei nawnlo pumpi tawh, (gimna thuakna ah a thuak lah pha deuh )hih pumpi tawh kum tul kum then a bei zongin, kum tul kum then dang teng khempeuh a thuak suaksuak ding ka hi ta hi.

Tua hi a, naute aw, hih Hell pen, a sung ka tun taktak ciang, ut nawn kei ing, ki leh kik ning ka cih hang, kong vang om nawnlo ahih manin, a tung nailo no ka nau it teng, nong tun khak loh nading uh, a hun omlai in, na kan khia meng un. Tuni mahmah in na kankhia un..

Biakna te ah na zong kei un, Laisiangtho a kici laibu sungah ki gelh hi ci in, dawite ki kupsim thu ka za hi. Tua laibu sungah na zong un, Romans bu sungah, kicing pen ding hi..ci lai uh hi. Ka nu le ka pa ka U te paina sa mah ah ut zaw ing ci mawkmawk kha het kei un…Kei kiangah ong pai hi le uh cin, kongvang na tun ma uh, hell meikhu gim, kaat le mei kuang gimnamte diik kha in, Leitungah a ngaihpen vangingte sangin tul tampi a a ngaihzaw misi te kahna aw,…ging zaizai te za le uh cin zong, kisik lua mahmah, lau lua mahmah in, na zun na ek uh na teh gawp ta ding uh hi.

Zan deuh a ong tungthak pastor khat in, “ka gengen hang, ken Topa pen ka mukbek ah Topa hi sak kha,” ci in, hotkhiatna thu tawh kisai tawmkhat khuamial lak ah, cih nading theilo a, a ot laklak za kha ing. Pasian’ Tapa in, hih hell sunga I thuak ding khempeuh ong thuaksak khin, Mawhnei eite tunga Pasian’ hehna khempeuh singlamteh tungah pua khin a, tua pen um ding, muang ding,mang ding,” ci in awng laklak hi. Na tua ci peuh le uh cin, hih gimna mun ah no te ong ki puak lo ding hi.

Biakna ma kaite, pawlpi sia le makai te na muang kha kei un. Tua bang mite zong hell sungah tampi tak om uh hi. Topa Pasian in mihingte bangzah takin it a, a Tapa neih sun Zeisu ong pia cih leh, mihingte hell samsiatna pan I suahtak theih nading le Pasian mai ah midik I suah theih nadingin, mawhna a nei hetlo Topa Zeisu pen Pasian in eite mawhna teng suan in mawhnei mi suaksak ci ta zen hi (2 Cor. 5:21). Tua zaha ong it Topa itna theilo in, Topa Zeisu ka uploh manin hih mun a tung ka hi hi.

Naute aw, upna le uploh na a cih pen na theih tel sawm un, upna I cih pen, amah I Topa a saanga, ama tungah ki apna le amah bek biakna ahi hi. Naute aw, Zeisu in Topa hi ci a, na kambek uh tawh gengen a, tua Zeisu pen, na hunte uh, na neihsa te uh, na sum bawm te uh leh, na hinna bup uh i Topa(a zeekpa,thunei penpa) na hihsak tuan kei uh leh…Honkhia zo pa cih a thei bek na hi uh a, a um taktak na hi kei uh hi. Zeisu pen na hinna bup uh i’ Topa na hi sak taktak un…

Mawhnei te tangdingin Pasian in Ama’ tungah thu khenin that a, tua Pasian’ Tapa a um mite zong, mawhna thaman ahi thukhenna, sihna a thuak khin bangin ong tuat sak hi. Tua eite tangdinga ong si pa a um mi khempeuh Pasian in dikna puanpi ahi Topa Zeisu ong silhsak in,(Gal.3:27). Pasian in Topa Zeisu pumpi sungah Amah tawh ong mukhawm ding a, hell tawh ong ki pelhsak ding hi (Eph.4:15,16; Rom. 12:5).

No gamtat hoihna suang kha kei un..Hotkhiatna ngah theih nading ci a, Gamtat hoihna pen mite mai bek ah ahoih ahi hi. Pasian’ mai ah, na zi te un a zatsa uh nindalna banga kih huai ahih na zong (Isa. 64:6) LST in gen ci in, dawite in, mite a khemzia uh a ki kupna vuah ka zasim kha hi…

Leitungah mizawng lokho mite dawite’n a khemzia uh zong lokho mite’n thei le uh ka deihsak mahmah hi. Dawikhat in a genna ah, “mizawng mahmah khat lo kho ding ong ki pan in, a pu pa ngeina banga a lolai ah dawi biakna ong nei ta, kei zong Pasian’ Khasiangtho anei lo tua mipa, tua kum a khuazaangah an haupenpa suaksak lian…..tua pa kiangah Zeisu hotkhiatna thu gente a pai ciang, za nuam dek lo, Zeisu sang kei ong muang zaw ci lian” ci zen…

Naute aw, dawite khemna peuh na um kha mahmah kei un, thupha ong pia bangkeek in ong bawlkhem ding uh a, hell sung ong tunpih nuam lua uh na hi gige hi. Topa Zeisu na Topa uh a hihtaktak a, Amah bek na biak taktak uh leh tua dawite in zong ong khemnuam mahmah ta leh, hell ong tunpih zo nawnlo ding uh hi.

Ka nau it mahmah te aw, leitungah biakna tuamtuam om a, pawlpi tuamtuam zong om in, thukhun zong a tuamtuam nei uh hi. Na zuih kei uh leh hell na tungding hi ong ci ding uh hi. Na um mahmah kei un, a zuau bu lomtang uh ahi hi. Bang hang hiam cih leh, hell a bawl pen Topa Pasian hi a, hell sung tunna ding leh, hell pan suahtakna ding zong Topa’ kammal in bang gen hiam cih bek a thupi ahi hi.

Tua kammal na sim uh ciangin zong, no upnop na lamlam ah deihkaih ding hilo in, ama’ kammal ong kaih bangbang a zuih ding ahi hi. Pasian’ Tapa Zeisu a um mite siatna tawh ki pelh dinga, nuntak tawntungna ngah ding uh hi (John 3:16;5:24) ci in Pasian’ kammal in ong gen khit nungsang biakna tuamtuam te in hotkhiatna ngah nading ci in a phuah tawm uh thute nong zuihkhak uh leh, kei omna munah nong tung ding uh a, nong tunkhit uh ciangin kisikkik a ki lehkik theih hi nawnlo ahih manin, a hunlap in, na mawhna uh kisik in, na honpa uh Zeisu khut nuai ah na ki ap mengmeng un maw bawi!!!!

Ka nuntak lai a, I annek sabuai nuai a, anneng kia te tawm a, I uite in a meiima naii a liahsaksak, i kih mahmah Lazarus kici pa, na thei lai uh hiam? Tua pa vantung gam ah tung hi, Abiahang angsungah ci dam mahmah in om hi. Leitungah mihaute sang tua bangmite en huaizaw hi. Naute aw….

More: Sumkuang in a Lii khuat, Numei in a Maa khuat ~ Thang Za Khen

Leitung pana, Pastor khat ong puak a ong pai vantung mite thusiamna tawh hih lai ong khak thei ka hihi..mai lam ah kong khak theih leh ong khak kik ning ei maw….. A tawntunga note ongveii le ong ngaihsun den, Sun le zan om nawnlohna tawntung hellsung pan, Na U uh, Sum Hau Pa (Topa thupha!)