Ciimna in, Hauhna leh Pilna puaklah salo

Ciimna in, Hauhna leh Pilna puaklah salo

Leitung mihing te’ Ciimna ih neihloh man-in Pilna, Hauhna leh Zaliatna te kipualah pahpah hi. Tunung lamdeuh-in eimi khat in, “Thu ih ngetciang’ Pilna leh Hauhna bek ngenlo in Ciimna zong hel hamtang ding kisam,” ci-in lai na-at hi.

Ciimna(Wisdom) pen ih biak Pasian khiang pan hong pai a hihi. Sanglai-in mihingte’ pilna, hauhna leh ciimna hong theisak khamah ding hi. A hizong pianpih Ciimna ih neih keileh bangzah pil-in, lian-in, ih hau phialzong a bucing nuntaakna tawh ih kigamla semsem thei hi.

Khanglui ih pu ih pa te’n sangkahna laitan a neihloh-uh, laitawh a ciapteh loh-uh hang, leitung nuntaakna ah zuihding pelhdingte ngeina leh thukhunte’ lungsim-ciimna tawh ciamteh-in, ciing-in, a na zui uh hi. Christian ih suahciang pawlkhat in, tuathu telgailo pi dawivai-khangluivai cihsan ziau mawk uh hi. Khanglui te’n a hinglaite genvetloh misi nangawn it-in, nitawn khatawn in na ompih mai-uh hi ven.

Tulai pawlkhat te’n leitung minthanna leh liatna bek mitsuan in, munlehtual leh Pasian bawlsa mihingte’ thusimlo ngam lel uh hi. Christian nuntaakna tawh kituaklo in, gamta nungta napi’uh Chrisitian mah kici uh aa, a huangsung ommah in kingaihsun veve uh hi. A taktak in a thu ih zuihkei leh huangpua-ah a om kihi gige hi. Kipawlna thu-khun zuilo in, a gamtata te langpang- ciampeel hilel aa, thusim masak huailo hi.

Rome ah ih omciang Roman te bangin gamta ding kici hi.

Galkapte’n tudongciang Kawlgam a ukzawhna uh pen, a hoih/kei zong tungsiah thu leh galkap thukhun a zuihzawh man uh cileeng kikhial lualo ding a hihi. Sepna bawlna khat peuh ah rule&discipline (Siimian siikaan) a omkei leh sauvei kimanglo a hihi.

Guta migilo te zong sauvei a nuntaaknop-uh leh pawlkhat leh pawlkhat kizahtaak in, a mauhuang-sungtek ah a gamtat-uh kul kici hi. Tuabang hilo-in kigalbawl kidobawl le-uh khekhap kitheitek-uh a hih man-un sibaih mangbaih ding uh hi. “Deeklam tuktum zong galsuak thei” ki-ci aa, “A puallam galsang-in innsunggal lauhuai zaw” zong kici hi.

A picing minam-in ih nuntaaktheih nading-in, eima suaktakna bek enlo in, mihing khat leh khat kizahtaak ban-ah, kipawlna leh thukhun te zahtaak photphot leeng Ciimna tawh kalsuan minam kihi peelmawh ding hi. Tagah bang-in zahtaakbei, hong hilh ding, ih zuihding ngeina leh thukhun neilo minam ih hi kei hi.

“I am a freeman until my freedom of choice impacts the freedom and right of others in a negative way-Midangte’ ka nawkkhak mateng’ a suakta mi ka hihi”, cih phawkding leh nuntaakpih ding ih kisam phadiak hi.

Kawlte’n zong saibang-lungmawlna pen Ciimna a kici sektawh lamlak leh kepding kisam na ci uh hi. Mite’n mithupi migina a cih uhciang pilna leh hauhna hilo-in bangzah ciim cihtawh na ciangtan uh hi.

Zomite’n gawlkhau khih a kullehzong khihzaw phial in, Pasian CIIMNA ngahciat ta uh hen. Tua hileh, buailohding te tawh buailo-in ih biak Pasian zong lungtaisak zaw ding a hihi. Nantal’suan