Cidamna tawh kisai theihhuai pawlkhat ~ AS Thangbawk

Cidamna tawh kisai theihhuai pawlkhat ~ AS Thangbawk

1. A huntawh kituak gamtatna

Zingsang nai 5 hunpen gilpi in na a sep laitak a hihi. Tualaitak zingtho in, tuidawn in awngbuklam zuat den ding hoih hi. Zingsang nai 7-9 kikal pen an tawh kisai gilpi in na a seplaitak a hihmanin zing an (atawm, atam) nek den ding kisam hi. Zingsang nai 11 pan 1:00 pm dongpen lungtang nasep laitak a hihi. Tuahunlaitak tawmvei sung peuhmah tawlngakh ding kisam hi. Nektheih khat peuhpeuh nek ding hoih hi.

Nitak nai 1-3 kikal pen mihing aa dingin a gik, vangik lua domlo ding hi. Pumpi sung nasepna tam mahmah hi. Nitak nai 3-5 kikal pen pumpi sunga gu leh nin khempeuh zunlampi pan in a kipaih khiat hun a hihi. Tuahun in tui a tawmpen litre 1 peuhmah dawn den ding hoih hi. Nitak kisil kawm in zuntha lo ding hi. Kal (kideys) kisiathei hi. Nitak nai 7-9 kikal pen lungsim tawldamsak ding, nuihna tawh kisai videote leh lahoihte ngaih ding hun a hihi. Tua in lungsim nosuak sak hi.

Nitak nai 11 pan 1:00 am dongpen sin in na a sep hun a hihi. Tua ahihmanin nitak nai 11 a satnak leh lum limlim ding hi. Zingsang nai 3-5 kikal pen tuap nasep hun a hihi. Tua ahihmanin zingsang nai 5 dongbang lungnuamtak in lup hithiat ding a hihi.

2. Cidamna tawh kituak annek hun

Mihingte aa dingin annek pen naseplianpi khat leh cidam nadingin athupi penpen khat a hihi. Cidamna tawh kituak ante nekhun manin nektheih ding deihna bulpi a hihi. Zingan nek hun – Cidamnatawh kituak dingin zingan pen zingsang nai 7:00-8:00am sungin nek ding kisam hi. Tua hunsungin nekpah theihkeikhak zenzenleh zingsang nai 10:00am a satma limlim in zingan nek ding hoih penpen hi.

Zan i ihmut laitak a tawlnga hithiat i kisakha hi. Ahizongin i pumpi tung vante nasepna khawlpeuhmahlo hi. Gilpi nasepna zong khawltuanlo a hihmanin zingtawhphet in tuidawn ding, nektheihkhat peuhpeuh nekpak ding hoih hi. Zingan a ziakai lua in nek ding hoihlo hi.

Sun an nek hun – Sun an pen sun 12:00- 2:00pm kikal nek ding hoih penpen hi. A zenzen in nekpak theihlohna khat a om leh 4:00pm ma in nehamtang ding hi. A hihtheihleh sunsiah pen nekdenpian ding hoihzaw hi. Zingan nek leh leh sun an nekhun nai 5 val a kihalloh ding hoih hi.

Nitak an nekhun – Nitak an pen nitak nai 6:00-9:00pm kikal nek hamtang ding hoih pen hi. Nitak nai 10:00pm khit peuhmah an nekkik nawnloh ding thupi hi. Nitak an nekkhit phetin lumpahlo ding hi. An nekkhit nai 3 sungbang lum nailo ding hi. Tua hileh cidamna tawh kituak hi.

3. Kidek ding anpawlkhat

• Lungtang a cidam nadingin a al lua an tamnek kei in.
• Na naksung a cidam nadingin lenmui manman na nek zelzel ding thupi hi.
• Na kamsung a cidam nadingin sing (ginger) tui tawh na kam khuah in.
• Na tuap a cidam nadingin zatep ki dek pha mahmah in.
• Na gawngsung a cidam nadingin gazohkaung (ငရုပ္ေကာင္း) nezel in.
• Na gilpeng a cidam nadingin tanpaya tui nekzel ding thupi hi.
• Na kal a cidam nadingin nitak na lupma in na zun tha hamtang zel in. Nisim tui tampi dawn in.
• Na sin a cidam nadingin a thaulua, sathau a tamlua nate tampi nekkei in.
• Na gilpi a thahat nadingin a votlua nate (icy) tamnek kei in.
• Na mit a thahat nadingin nitak na lupma in na khete sathau nuh in mek in.
• Na khuakbu a thahat nadingin nikhat nai 8 sungpeuhmah ihmu in.
• Na zunpaina lampi na it leh lothangsan (onion) sialnek zel in.
• Nikhat in tui liter 4 bang dawnzo den leng pumpi sung siangthosak a natna beisak hi ci in kiciamteh hi.
• An bek hilo in tuisiang zong hanciamtak in dawn ding thupi mahmah hi.

4. Agingkhia a nuihna

Suakta tak leh a gingkhia a nuihna in: Cidamsak hi – Pumpi sungah natna a dal endorphins a kici om hi. Na nuih ciangin tuate na pumpi sungah ki khahkhia ziahziah hi. Na pumpi hong cidamsak hi.

Lungnopna hong pia hi – Nuihna in lungneuna, lunggimna pan in hong suaktasak thei hi. Na nuih ciangin na pumpi sungah T-cells te thahat hi. Lungkiat laitak nasem cortisol leh epinephrine hormones te susia hi. Na thanem laitak hong nuinuisak mi khat tawh omkhawm lecin na telcianpah ding hi.

Sikhang natna dal hi – Nuihna in sikhang kiamsak hi. Sikhang kiamsak bekhiloin lungtang thahatsak hi. Lungtangin sisante mantak a pump zawh nadingin nuihna deih mahmah hi.

Ihmut nuam hong pia thei hi – Nitak lupna tungah nuamtak na ihmut theihkei leh nuihsawm in. Ih muttheih nading zatui hoih penkhat ahihi. Na innkuanpihte, na lawmte khat peuhpeuh tawh nui ziahziah inla lum in. Na ihmu thei ding hi.

Hong nosuaksak hi – Ni khat tawm veita nuih sawm in. Na nuih ciangin maitang tunga sagui 15 valin thakhat in nasem hi. Na maitang tunga sisante kilaih pah ziahziah hi. Tua in hong nosuaksak, hong melhoih sak hi. Na kum sangin na moisuah zawk nopleh nuihsawm taktak in.

Lawpna hong pia hi – Na nuih ciangin na tuapsung, gilpi sung, ah huih lut hi. Tuap sungah huih siangtho a lutna in na pumpi sungkhempeuh ah nosuahna hong tungsak hi. Huih i dik ciangin i tuap sung dong a tungkimlo (tawm mahmah) hi. I nuih ciangin i sungtawng dongah huih lut hi. Tua in pumpi nasepna hong nosuaksak hi. Lawpna hong pia hi.

• A nui thei den mikhat pen natna ngah lezong dambaih zaw hi ci in siavuante in gen hi.
• A nui thei dente a nui ngeilote sangin kum 9 bang khansau zaw thei hi ci in muhkhiatna ki nei hi.
• NUIH ding haksa lua hiam? Haksa lua lo hi. Sanggam! nuih sawm ni. Tu mahmah in nui sin aw. Nikhat minute 15 bang nuih sawm ni. Nuih nading zong in bawl tawm ni.

5. Lungsim vangik na puakciangin

• 1. Na zaknop mahmah music te leh coffee lum hithit dawn kawm in tawlnga in.
• 2. Lungsim hong thakhauhsak laibu hoihte khatpeuh sim in.
• 3. Na upna tawh kizui in (Biak inn ah pai inla) Pasian kiangah thu ngen in.
• 4. Gamdiahna mun ah daitak tu inla na lungsim siangtho sak in.
• 5. Na thanemna leh na thahatnate khinkhai inla na kipuahphatna ding munte puahpha in.
• 6. Na lawmlegualte kiangah genkhia in. Thu dong inla hong thuhilhna ngaisiam in.
• 7. Ciamnuih laibu te leh cartoon video te en in nui zuahzuah lel in.

Hibangin gamta lecin na lungsim vangik huntomno sungin hong beikik pahlel ding hi.

6. Papak nekna ah theihhuai

• 1. Papak a kung lawng lecin a kitampah, a zanpah om ding hi. Tuate nekhuai nawnlo hi.
• 2. Papak tungah ci sawh lecin a vompah om ding hi. Tuate nekhuai nawnlo hi. A vompah lo te nekhuai hi.
• 3. Papak pen lawng leng a mel a ki khelpah omthei hi. Tua te nekhuai nawnlo hi. A nekhuai laite i lawnna tawh a mel kikhelpahlo hi.

4. Papak citui sungah diah lecin a vompah om hi. Tua te nekhuai nawnlo hi. A nekhuaite citui sungah a ki diah hangin vompahlo hi. Hih papak tawh nekkhoploh ding annam pawlkhat om hi.

• 1. Sa tuamtuam
• 2. Aktui
• 3. Banla
• 4. Nawi tuamtuam

Papak nekna hangin a hoihlo khat peuhpeuh a omleh ထန္းလ်က္ nesak ding hi. Tua hikeileh a manlangpen in Zato paipihpah ding hi.

7. Lungtang cidam nading athupi theihhuai

America gamah 90 millions bangin lungtang tawh kisai natna ngah hi ci in ki gen hi. Leitungbup ah lungtang tawh kisai natna a ngah mi tam mahmah hi.
Pumpi vante tungah a thupi penpen a hi hih lungtang natna a kiam nadingin:

1. A siangtho an ne in – Nekpaktheih ding a kibawl nate: gtn; moh, sweet, ice cihte tamnek kei in. Ci, sathau, a ki kangkeu nate tamnek lo ding hi.

2. Zatep ki dek mahmah in – Za tep kei in. Zatepna in lungtang sungah huih (oxygen) siangtho lutsak lo hi. Tua ahihmanin za tep kei in.

3. Na pumpi gamtangsak in – Hi theileh nikhat minute 30 sungbang lamsiau in. Zing na thawh ciangin minute 15 ahizong nitaklam ciang minute 15 cihbangin gamtang in.

4. Thauluatna a piangsak ante ki dawm in – Pasalte kawng kimkot pen 102cm leh numeite kawng kimkot 88cm sangin lianzaw keileh hoih hi.

5. Ki lungnuamsak in – Ki lungnopsakna pen lungtang aa dingbek hilo in pumpi tung vankhempeuh cidamna dingin hoih hi.

Lungtang damnading a nekhuai annampawlkhat

• 1. Lengmaw gah nekhuai mahmah hi. A pum in ahizongin a tui in ahizongin nek ding hoih mahmah hi.
• 2. Brocoli (kawpipak eng)
• 3. Ankambulnek (carrot)
• 4. Strawberry
• 5. Apple
• 6. Mangbuh
• 7. Papaya (nunun)
• 8. Kale (kaihlan)
• 9. Promegranate (သလဲ)
• 10. Avocado (thawhbat)
• 11. Greentea
• 12. Red wine
• 13. Olive oil
• 14. Ngasa
• 15. Milk cihte nekhuai hi. Zuihzawhzah zui ni ei.

8. Innkuan sungah cina khat peuh a om ciangin

Innkuan sungah ci na khatpeuh i om ciangin kikep dan ding theihhuai mahmah thute

1. Naptui, nakbingte neksakloh ding Banla, tuikhalmoh (ice cream), lengmaw, kelsate leh zatep, zu cihte zangsak lo ding hi.

2. Bukkhuh a omleh lengmaw, a em, sathau tawh a ki kangte, zu, mipee leh a khum tuamtuamte ne saklo ding hi.

3. Thakhat a gilna vat cihte a hihleh a kan tuamtuam, zu, zasan leh buhman cihte nesaklo ding hi.

4. Gilpinat a nei khinsate a hihleh a thuk a kibawl nektheih (ready made) te, buhman leh a toh (အသုတ္) tuamtuamte tamneklo ding hi.

5. Sin natna a neite in vatawt vun, ak vunte nelo ding, vokthau, zu cihte tamzat lo dinga, nitak ihmut cimtak ihmu ding hi.

6. Lungtang natna a nei te’n keloli tampi a kihel nate leh a allua ante tam nelo ding hi.

7. Kal natna a nei te’n beer, cold drink (အခ်ိဳရည္), ngasa keu leh guatuai keute tamnek lo ding hi.

8. Zumkhum natna a nei te’n sathau tampi tawh a ki kangte, zu, a em cihte tam ne hetlo ding hi.

9. Sikhang natna a nei te’n a tui cik (aktui cik, vatawt tuicik), a sungkua leh a allua ante tam nelo ding hi.

10. အာရံုေၾကာ thahat lo te’n lothangsan, lothangkang, zu, coffee, zasan cihte tam nek lo ding hi.

9. Nang le nang na ki it taktak mah hiam?

• 1. Na tuap na it taktakleh zatep ki dawm in.
• 2. Na zunpaina lampi na it taktakleh lothangsan (onion) sialnek zel in.
• 3. Na kaal na it taktakleh sun in tuisiang tampi dawn inla nitaklam tuidam dawnlua kei in.
• 4. Na nak na it taktakleh lo namsia (pucinan) a sial in ne zel in.
• 5. Na sin na it taktakleh hong thaulua sak ding ante tawmbek ne in.
• 6. Na kamsung na it taktakleh nansi na nek ding thupi hi.
• 7. Na ngawng sung na it taktakleh ငရုပ္ေကာင္း ne zelzel in.
• 8. Na gilpi na it taktakleh a votlua kibawl nate (icy) tampi ne kei in.
• 9. Na gilpeng na it taktakleh tampaya tui dawn zel in.
• 10. Na lungtang na it taktakleh a allua (ci) tam nek kei in.
• 11. Na mit a cidam ding na deih taktakleh nitak na lupma in na khe sil inla sathautawh mek in.
• 12. Na khuakbu na it taktakleh nikhat nai 8 sung ihmu in. Na lawm ngaihte na it taktakleh hih lai na hawmsawm in.

10. Inn ah a ciinhuai mahmah meikangza

Meikangza pen innkim ah ciinhuai mahmah hi. A kizattheihna tam a thupitak in mihingte phattuamna hong piathei a hihman a hihi. A kizattheihnate:

1. Meikangza pen letmat 2 (2”) a lian in at tan ding hi. Tuate mei ah em (hang hilhial) ding hi. Ek sungah sisan ki hel cihte aa dingin tua a ki em te 5 bang ne ding hi. Natna a nasiatleh nisim ne kik zel ding hi.

2. Lungtangnat a neite thakhat thu in tawllua in a omvatleh hih meikangza a tak leh cikhum helkhawm in nesak ding hi. Lungtangnatna hangin a piangthei siatnate pan hong honkhiathei hi.

3. Hih meikangza pen meikat, tuisa kat, cycle khulawngkat cihte aa dingin kizangthei hi. Meikatna mun ah meikangza belh ding hi. Hoihmahmah a, meima pawn omlo zah dongin damsiangsak thei hi.

4. Sam a lomlom in a pulh thei mite in zong hih meikangza a luvun tungah nuh zelzel leh a samkhang hi. A sam pokik a, a sam thahat ahihmanin a pulh ding tampi dal hi.

5. A melhoih nuamte in zingsang maiphiatkhit sim in a maitang tungah meikangza nuhzel ding hi. Maivun zolsak, tangsiatte beisak, civom omlosak a hong melhoihsak hi. A hoihnuam te’n zingsangsim nuhzel ding a hihi.

Meikangza sungah Vitamins tuamtuamte, Amino acid, minerals leh a dang gu a suaksakthei nate a beisak dat tampi om hi. Tuate in gilpi um sung siangthosak mahmah hi. Zunsipna, sungkhakna leh gilpi um lampi ah lungnote beisakthei hi. Gilpi an gawina zong thahatsak mahmah hi ci in muhkhiatna ki nei hi.

Computer en zelte, laisim hatte bekhilo mittang a thahatlo khempeuh aa dingin zong hoih hi. Meikangza balkham in silsiang sitset ding hi. Nitak lup ciangin tua meikangza mittang tungah minute 15 belh ding hi. Mittang cidamsak, thahatsak bek hilo mittang sunga hoihlo khempeuh siangthosak hi.

Meikangza sungah Vitamin E leh tuidat tampi kihel ahihmanin vunhoihsak mahmah hi. Muk a keu dente aa dingin zong hoih mahmah hi. Hih meikangza a tui (a dat) leh khuaizu helkhawm in vun tungah zong ki nuhthei hi. Vunzolsak, vun cidamsak, hong moisuahsak thei hi.

11. A nekhuai thawhbat

Thawhbat sungah vitamin nam 20 val bang om a hihmanin mangte’n super food ci liang uh hi. Vitamin K 26%, folate 20%, vitamin C 17%, potassium 14%, vitamin B5 14%, vitamin B6 13%, vitamin E 10% om hi.

Magnesium, manganese, copper, zinc, iron, phosphorous, vitamin A, vitamin B1, vitamin B2 a kipan pumpi sunga kisam vitamin namkim kicingtakin om ahihmanin thawhbat nek zawh nading hanciam ngaihsut mahmah ding kisam hi.

Sisan hong thahatsak potassium dat pen banla sung sangin thawhbat sungah tam zawtham hi. Pumpi gihna a kisamsak fiber dat zong tampi om a hihmanin thauluatna hong hepkhiatsak hi. Antioxidants ngah nadingin coffee dawnna sangin thawhbat nekna hoihzaw tham hi. Siatna (side effect) omlo hi. Ankamlimna bek hilo cidam nading ngaihsutna tawh thawhbat nek ding hanciamhuai mahmah hi.

12. Nisim lungdamtheih nading

• 1. Nisim man (photo) ki zaih in. Na lawmte tawh a hizongin selfie ahizongin ki zaih in.
• 2. Cartoon video leh nuihzakna ding video te en in.
• 3. Zumkhakni, nasep off ni a hihleh zingsang thohak mahmah lel in.
• 4. Na lawmte phone hopih in. Message khak in.
• 5. Lampi lian gei, tui luang gei, paakhuan gei, cihte ah
  lamsiau in.
• 6. An lim, mehlim bawl inla ne in. Sai ah zong tu zel lel in.
• 7. Pumpi cidam nading exercise minute 5 sung peuhmah bawl in.
• 8. Na mawtaw hawl khawm, cycle hawl kawm in lasa hiauhiau in.
• 9. Coffee na dawn kawm in laibu hoih sim in.
• 10. Phone na ki ho kawm in khut vik, lai kui cihte hih in.
• 11. Na kisil kawm in lasa, huihut tum in.
• 12. Na seplam nangawn na theihmanloh a nai a cingpahpah nasepte sem in.

13. Na tangek banghun in an pia na hiam?

Naungekte in a gil a kial uh hangin hong gentheilo uh hi. A nu (a cing) te in a gilkial dinghi ci in i up ciangin an ki pia hi. A taktak in naungekte in a kamtawh hong gentheihloh uh hangin a gamtatna uh tawh a gilkial lam uh honglak hi. Tua hun ciangin a nute in an i piakpah theih ding kisam hi.

A gilkial naungekte gamtatna

• 1. A gilkial kipat ciangin:
• (a) Naungekte a gik a kialuh ciangin hong gamtang uh hi.
• (b) A kam uh hong ka ding hi.
• (c) A ziat a vei a mittawh hong en laplap ding hi.

2. Tua hun in an a kipiak naikei leh a gilkial zawsem hi. Tuaciangin:

• (a) A khut a khe, a guh a tangte hong dok (ki zia) ding hi.
• (b) A pumpi bup hong ki heksuk hong ki hekto ding hi.
• (c) A khutmete a kam sungah hong koih ta ding hi.

3. An a kipiak naikei leh a gil nakkial lua mahmah ta hi. Thuakzo nawnlo ahihmanin naungek in;

• (a) Hong kapkhia ding hi.
• (b) Hehsuak mahmah ta hi.
• (c) A maitang mahmah hong san ding hi. Hih naungek gamtatzia en in a gilkialluat ma (nambat 3 a tun ma) in a nute, a cing a kemte in naungekte an i piak ding kisam mahmah hi.

14. Zumkhum natna leh theihhuai

Zumkhum natna pen nampi 2 in kikhenthei hi. Khatpen kum 35 nuaisiahte tungah piangthei hi. Hih zunkhum nasia leh natna a neimi aa dingin lauhuai hi. A dangkhatpen kum 40 tungsiah mite tungah piangthei phadeuh hi.

Zunkhum natna pen sisan sungah cikhum dat a tamluat ciangin hong piang a hihi. Zumkhum natna a neite a zunsuakpahpah, tui duh zel, gawng semsem a natna dang ngahleh thuakzolo phadeuh uh hi.

A sisan sungah cikhum dat hong tamsemsem leh sivui sazangte kisia, mit khuamuhna kisia, kal kisia a lungtang mahmah hong susiathei hi. Zunkhum pen a tehna tawh kitehthei hi. Sisan sungah cikhum dat a tawmzawk nadingin kibawl thei hi.

Zatui nekna Zumkhum a tamsemsem leh siavuan te tawh kikum in zatui ki ne thei hi. Nidanglai in Sulfonylureas leh Biguanides hih zatui nihte kine hi. Nekledawn tawh kibawlna Zunkhum neite in cikhum nelo dinghi cih ngaihsutna pen maankhinlo hi.

Cikhum tawmtawm a nekhangin lauhuai tuanlo hi. Thauluatna a piangsak ante ki dek ding hi. Ganhingpan a piang a thaupeuhmah hithei leh nekhetloh ding kisam hi. Gilsungah antha omlo pi in zu dawnlo ding hi. Lenggah sungah zong cikhumdat tampi a omlam phawkding thupi hi.

A siangtho mehtehmehgahte, mangbuh, pongmoh, besan, khauhsuai, a tang tuamtuam leh a hawngkhauh singgah namte tampi nekding thupi mahmah hi. Zunkhum neite in zingan thupitak in neding hi. Nekhun manman in nekzawh ding hanciam ding hi. Bawngnawi zong dawnhuai mahmah hi.

15. Cisa natna tawh kisai

Cisa natna cihpen pumpi a lumna 37C bang a phak ciangin cisa hi ki ci hi. Cisa hong kipat ciangin pumpi sungah natna khat peuhpeuh hong piang nuam hi ci in ki thei hi. Pumpi sunga si kangte leh natna lungno te a ki do ciang in cisa hong piang hi a, pumpi in a zawhleh damkikpah hi. Lungno in hongzawhleh natna dangtawh ki zomthei hi. Tuabang cisat hun sungpen ni 2-4 leh ni 8-21 sungbang ziakai thei hi.

Cisa natna hong pianna Cisa natna pen sinnatna, tuap in khuavot a thuakkhakna, khaksawh sungah sisan kihel natnate leh thopehna, nattunnatnate pan in zong hong piangthei hi.

Natna a ngahte Cisa natna a ngahte a cisa, a khuadam in lingliang, khua ul kai, lutangna leh thagui leh guhletangte na thei hi. Kibawlna Cisa natna a ngahmi a omleh tuivot a ki nuh puansia tawh a khua ul nul sak ding, maizap tawh damtak zapsak ding, tawldamtak in lum sak ding hi.

Naupang kum 12 nuai a hihleh Asprin zatui pialo ding hi. Paracetamol a hihleh a neu a lian aa dingin ki zangthei hi. Tuaciangin a natna a hang kan in zatui siamte kiangah kilak ding hi. Nek le dawn tawh ki bawlna Cisa natna a ngahmi in an duhlo hi. Tua ahihmanin tui tampi dawnsak ding hi. An tawn a nethei ding hong kipat nakleh damta ding hi ki ci thei hi.

A diakdiak in Vitamin A, C, E kihel singgah leh mehtehmehgahte nesak ding hi. တရုတ္ဆီးသီး, မုန္လာဥဝါ, kaithum, ပန္းေကာ္ဖီ, hai, zasan, tui kaithum, သံပုရာ, ၾကက္သြန္နီ, ၾကက္သြန္ျဖဴ cihte neksak huai mahmah hi. Sathau tawh a ki kang leh ankhauh namte ki dek ding hi. Coffee, niangtui leh a khum namte ki dek ding hi. Tuisiang tampi dawn ding thupi hi.

16. Natgual natna

Khuasik, nakbing, naptui, leh natgual tuamtuamte pen huihlakpan a piang virus te hangin pumpi tungah hong tungthei hi. A diakdiak in naupangte in a liankhinsate zahin thuakzawhna neilo a hihmanin naupangte tungah tuabang natnate piangthei phadeuh hi. Hih natgualte pen tawlsung na, ci sa, thagui na leh tawlgawpna cihbangte tawh hong kipanthei hi. Tuabang hong natkhit ni 3-4 khit ciangin naptui hong kipan hi. Hong nasia semsem leh na kisemzolo a ni 10 dongbang ki buailawhthei hi.

Tuabang natna hong kipat phet in tui tampi dawn ding, tui lum (a sa pian) dawn ding, tawl damsak ding, Asprin leh paracetamol cih zatuite ne pak ding hi. Natna a dampak kei leh zato zuat ding a hihi. Nekledawn tawh kidalna – Hih natgual dalna dingin Vitamin A leh Vitamin C tampi a kihel mehtehmehgahte nekhuai hi.

Gtn: Tuikaithum teh, hai min, gamsuaklu, kaihlan, mai, carrot, strawberry, kawpi, lothangkang, a sanmel nei, a eng mel nei mehteh mehgahte nekden ding thupi mahmah hi. Hih mehtehmehgahte in pumpi sungah natna a pianloh nading leh natgual tuamtuam a pianloh nadingin hong dalsak mahmah hi. Theih ding: Hih bukkhuh, naptui leh natgual a ngah mikhat bawngnawi leh nawi tuamtuam pia lo ding hi. Tua in natna hong behlapthei ahihman a hihi.

17. Gout natna

Gout natna cihpen sisan sungah ယူရစ္အစ္စစ္ a tamluat ciangin hongpiang ahihi. Pumpi sung guhletang kizopna teng na gawp hi. Pumpi sunga protein a piakhia dingteng paikhia lo in sisan sungah a khawl ciangin tua natna hong piang a hihi. Pasalte tungah piangthei phadiak a numeite tungah pianglo phial hi.

A natkipat in khuksung, kiu leh liangbul teng nat cihtak na hi. Kumsawtpi kibawl lo in omleh kaal natna kingahthei hi. Gout natna a ngah limlim ding hi. Protein dat tam akihello anlemehte ne ding hi. Siavuan omlohna munah Allopurinol zatui ne ding hi. Hih zatui in zunpan in ယူရစ္အက္စစ္ te paikhiasak hi.

Nekledawn tawh kibawlna Zu dawnna hangin gout pianghi ci in a um mi om a, ahizongin mankhinlo hi. Natna behlapthei cihciangbek a hihi. Gout natna a tuak mi in ဟင္းနုႏြယ္, kawpilum, leh a engmel nei mehtehmehgahte leh Vitamin C kihel annamte nek huai hi. တရတ္နံနံ. ေရကန္စြန္းရြက္. မုန္လာဥ. နာနတ္သီး. ခ်ယ္ရီ. စပ်စ္သီး cihte nekding kilawm hi.

Gout natna a nasiatleh tui tampipi dawn ding kisam hi. Niangtui, Coffee cihte leh a khumnam tamnek nawnlo ding hi. Natna a nasiat semsemleh sa leh nagsate tawmvei nelo phot ding hi.

18. Khebawk, khena cihte

Khetungah meima omthei hi. Vuntungah meima om miamua thei hi. Tuapen khe tungah sisan a kicing tungzolo hi. Oxygen a kicing tung zolo a hihmanin vuntung meima (Ulcer) hong piang a hihi. Khetung meima pen khenpi nih in ki khenthei hi.

Lungtang lamah sisan a puakkik sivui a kikhakna hangin a piang leh lungtangpan sisan a khahkhia sivui a kikhakna hangin a piang natnate a hihi. Lungtanglam ah a ciahkiksak sivui kikhakna hangin a piang khetung natna pen khe gawng teng leh khe a niamlam tengah kimuthei hi. Liamnate in limlemel kician neilo hi. Sithu luangthei hi.

Lungtangpan a khahkhia sivui kikhakna hangin a piang natna pen khepek tung, a diakdiak in ke peknuai tengah lim om nuam mahmah hi. Khepeknuai a hihmanin gu lut baih a, a dampak keileh siavuante kiangah lahtheih ding kisam hi.

Sisan puakkik hatloh man a piang natna a thuak mi in hun awng a ngahsim in a khe a sangna munah lamto ding hi. Mawza leh pattii te tawh tuamding zong thupi mahmah hi. Hih natnate pen sikhum, zunkhum a nei mileh a thaulua mite tungah piangthei phadeuh hi.

Bang ante nekhuai hiam? – Hibang natnate a dam nadingin annekzia thupi hi. Sisan a puakkhia leh a ciahkikna sivuite nasep manpeuhleh a damkik ding hilel hi. Tua sivuite nasep a maan nadingin a nekhuai annam pawlkhat gen ding hihang.

Vitamin C tampi a kihel ding – tampaya, suaklu, leh a thuksinggah nam, pankawpi (cauliflower) maidawn ngek, kawpi lum, kaihlan, Vitamin E kihel ding- mangbuh, a hawngkhauh singgah namte leh tuipi ngasate nekhuai hi. Buhtang, pawngmoh leh khauhsuaite zong hoih hi. Sikhang natna nei mi na hihleh ci tamnek kei in.

19. Sikhang natna

Sikhangnatna cihpen sitehna tawh i tehciang a tunglam 140mmHg leh a nuailam 90mmHg sangin a tamzawte sikhang natna kici hi. Sikhangnatna 90% pen koipan hong kipan in banghangin hongpianghiam cih kitheizolo hi. 10% a hihleh gentheih ding ahang kician om hi. Sikhum neite, naupaiite, kal natna neite leh zatui tamzatluatna hangin piangthei hi.

A hang ki theilo 90% te pen mipilte in nekzia dawnzia leh omdan khawldan siamloh hangin hong piang hi ding hi ci pen uh hi. Sikhang natna pen a lauhuailua hilo hi. Ahizongin bawlloh in kumsawtpi kikoih leh lungtang sivuite kisiasak a nuntakna zong lauhuaithei hi. Tua ahihmanin zatui tawmkhat gen ding hihang.

Zatui tawh bawlna – ဆီးရႊင္ေဆး Hih zatui in kal sunga tuite hemkhia in sivuite nasepna thahatsak a lungtang cidamak hi. Beta-blokers, Vasodilators, ACE inhibitors cih zatuite dot ding siavuan omlohna mun ah zatpak ding hoih hi.

Nekledawn tawh bawlna – Vitamin C leh Vitamin E om mehtehmehgahte tampi nekhuai hi. A hawng khauh singgah namte leh a muu (seed) te sungah Vitamin E tampi kihel hi. A siangtho mehtehmehgah tuamtuamte nekden ding kisam hi. Neihzawh kei leh tuipi ngasa nek ding hoih mahmah hi.

Kidop ding – Sikhang nei mi in ci nelo (tawmcik bek ne) ding hi. Sai pan a kilei aluu moh, ngasa moh leh a al tampi a kihelte nelo ding hi. Hi theileh annek khitphet in banla (banana) gapkhat tabang nekding thupi mahmah hi. Tua in i nek an sunga a kisam lo cidat leh hoihlo tuamtuamte siangthosak thei hi.

20. Lungtang kisai natna

Lungtang kisainatna cihpen i tawlmahmah ciang, thungaihsut a tamluat ciangleh exercise bawl laitak cihhun ciangin piangthei phadiak hi. Hong pianna a hangpen lungtang pan sisan a khahkhia sivuite sungah thau tamlua hi. Tua hangin lungtangsungah sisan a kicingin tungzolo hi. Lungtang sungah a kisam zah oxygen tung zolo a hihman zong a hihi.

Hih lungtang kisai (lungtang phu) natna hong pian ciangin lungtang a tunglam mun tengah hongpiang nuam deuh hi. Mi khatpeuh in a tunglampan hong hum in hong nenciptawh kibangthei hi. Tuapan hong kipanto in khutban dong hongbanto thei hi.

A dam nading a nekhuai ante Hih lungtang kisai natna a dam nadingin a siangtho mehtehmehgah tampi nekhuai hi. Mehtehmehgahte sungah Vitamin A, B, E om hi. Tua te in lungtang sivui sungah thaute hemkhia hi.

Tuate khit ciangin ngasa, aksa, vatawttui cik, mangbuh, banla, thawhbat leh a muu tuamtuamte nekhuai hi. Sathau lampan ahihleh tanluan thau, nipipaak thau leh mipee thau te nek ding thupi hi. Nisim in lothang san leh lothangkang tawmta nekhuai mahmah hi. Hih lungtang kisai natna pen lauhuai lua lo hi. Hih mehtehmehgahte manman in nepeuhleng damkikthei lel hi.

21. Sisan cancer a dam nading zatui

• 1. Lengthei min pum 5 a hawng met in a tuisuuk ding hi.
• 2. A ki ngah a tuiteng thawlvanglian sungah koih ding hi. A tawl sinlo in nisa ah ni 4 sung pho ding hi. (nisa tha tawh a huandan suak hi)
• 3. Tua lengthei tui ni khat 3 vei ta dawn ding hi. Dawn khat hai lang bangbek dawn ding hi.
• 4. Gil sung damlo, sungpai thei cih mite in tua lengthei tui sungah ci tawmnokhat khahthuah thei hi.
• 5. Ni 7 sungbang nek khit ciangin ni khat 2 vei bek ne ding hi. Ni 30 bangciangin Sisan Cancer damsiang sitset thei hi. (Online pan lakkik hi)

22. Cidamna tawh kisai theihhuai Annekkhit phet in

1. Zatep pah kei in. Zatepna pen tuap aa dingin hoihlo hi cih i thei tek hi. Annek khit phet a zaa zialkhat i tep pen a dang hun a zaa zial 10 i tepsangin siahuai zaw hi.

2. An na khampian ciangin leh na khamkhit ciangin khawng ngek kikolsak se kei in. Na gilpi in zongsatna hoihlo khat ngahkha thei hi.

3. An na nekkhit phetciangin coffee mix, niangtui, labettoh cihte dawn kei in. Tuate in pumpi sungah iron dat ngah nading hong khaktansak hi. Tuate sungah acid dat om ahihmanin ante sungpan in iron (သံဓာတ္) hong ngahlosak pah hi.

4. Annekkhit phet ciangin lampai lo ding hi. Gilpi sunga ante kilokgawp in a paina ding ah pailo in tha a piangding zah pianglo sak hi. Annek khit nai lang pan nai 1 khit ciangin lamsiau zaw ding hi.

5. Annek khit phet in lumpah kei in. Annekkhit phet in pumpibup kisil pah zong hoihlo hi. An na nek ciangin khamtek ne kei inla a khamphalo pian in khawlbawl in. Na gil a kialciangin ne kik zaw in.

23. Khuak hoih nading

Khuak nasepna a manlang theih nadingin a nekhuai an nampawlkhat:

1. Buhtang (wholegrain) – Hih buhtang in thungaihsutna thahatsak hi. Na khat peuhpeuh na ngaihsut tentan (concentration power) theihna thahatsak hi.

2. Ngasa – Ngasa nekna in khuak hoihsak hi. Ngasa sungah thau om a tuate khuakbu aa dingin hoih mahmah hi. Lungtangsung, guhletang kizopnate ah nasem hi. Singgah mu
tuamtuamte zong nekhuai hi.

3. Aktui – Aktui nekna pen khuakbu aa ding hoih mahmah hi. Aktui sungah khaukbu a thahatsak vitamin B namte tamkihel hi. Vitamin B6, B12 leh folic acid te tampi om hi. Pumpi sungah aktui nasepna tampi om hi. Ahizongin nisim nekden ding ahihleh ni khat tang 2 val nekhuai lo hi.

4. Coffee – Zingsang na thawh ciangin coffee haikhat dawn thei lecin hoih hi. Coffee na dawnkhit ciangin na lung hong pilpah ding hi. Na teisuah pah ding hi. Coffee sunga coffeeine leh antioxidants te in khuak nasepna thahatsak hi. Na ngaihsuna, phawktheihna leh lawpna hong piathei hi. Pumpi sungah natna pawlkhat hongdalsak thei lai hi.

5. Maimu – Maimu sungah magnesium, zinc, copper leh iron tampi om hi. Khuakbu aa ding a thupi mahmah nasepte sem hi. Tua ahihmanin maimu nek ding thupi hi. Tuate khit ciangin thawhbat (avocado), kawpipaak eng (brocoli), mehthuk, ankam sialnek (salad) tua te nek ding thupi hi. An i huanciangin hih annamte a kihel dingin helhuai hi. Ansai ah an a ne i hihleh hih annamte a kihel in nektheih ding thupi hi. Tuapen khuakpil nading, khuak nasepna a thahat nading leh pumpi cidam nading a hihi.

24. Meikangza tawh melhoihna

Meikangza in na mai hong zolsak thei, hong nosuaksak thei hi. A zatdan theilecin sumtampi bei in kizepnate na lei nawnkei dinga, beauty salon ah zong na pai nawnkei ding hi. Meihoih nadingin a zatdan –

• 1. A sah, a lian meikangza tehkhat la in.
• 2. Tui tawh silsiang sitset inla tuaciangin puantawh nulkeu in. A bul lam pan letmat 2-3 ta in tumtan in.

3. Na mai phiatsiang inla nulkeu sitset in. Tua meikangza tumtawngte a pualam pan a hawng khokkhia in. A hawng tunga a bang a mandidia gel te maitang tungah nuh ding a hihi. Ma maitangtungah minute 1 bang na zut ding kisam hi.

4. Tua meikangza paih ding khat zong omlo hi. Nitak na lup dingciangin na maitang tungah nuh, belh in. Zingsang na thawhciangin lakhia pan in. Tuaciangin tuisiang tawh na mai phiat in. Nitakkhat bekbek na sin lecin zingsang ciangin na maitang hong moisuah zawpah ahihlam na muthei ding hi.

Vallua cih omlo ahihmanin nitak na lup ding sim in meikangza nuhzel in. Sai pan na lei kizepnate hong piaktheihloh nosuahna leh ngaihbanna na ngah ding hi.

25. Siklik phiatna

Siklik pen khe tung, khut tung ah piangnuam mahmah hi. Kilawh baih mahmah a, zong na simsimthei hi. Siklikpen mangte’n cron ci uh hi. Siklik phiat nadingin;

• 1. Leikang (ထံုး) tawm,
• 2. Kunti (ကြမ္းသီး ) pumkhat
• 3. Lotangkhang pi khat

Hiteng gawmkhawm in suzan dikdek ding hi. Tuapen siklik, ngamit tungah minute 10 sung belh in puantawh hen ding hi. Minute 10 khitciangin a puan phel lecin siklik a sa tungah a bawkto na mu ding hi. Tuapen na khuttawh dok lecin siklikleh ngamit te a zung dongin hong paikhia ding hi.

26. Khukna a damna na thei nuamhiam?

Na khuk nasa den in na khasia kha hiam? Kawlza, mangza hitaleh zato tuamtuam ah pai zelnapi damsiang theilo hiam? Lungkham kei in! Sum zong tambeilo, haksatluatna zong om tuanlo in khukna a damna i gen ding hi. Kum 8 bang a khuk a na den ka pi pen hih bawlzia tawh nitak 5 a kibawl ciangin nakpitak nuamtuamta hi.

• Khukna a dam nading A ki sam van te: 1. Niangteh 2. Suangthuk
• Abawldan: hih niangteh leh suangthukte a kikimtuak hel in suzan khawm ding hi.

A zatdan: Tua a ki suzan khawm suangthuk leh niangtehte nitak lup ding ciangin a na khuk tungah puantawh tuamin zanthapai luppihkhawm ding hi. Zingsang ciangin phelkhia kik ding hi. Khukna a dam ma dong nitaksim hih zel ding hi. Theihding: mi khatlekhat a khuk a natna a hang leh a natdan kibanglo ding ahihmanin a dam hun leh a damdan ki banglo thei hi.

27. An na huan ciangin

• 1. Puan siangtho silh in.
• 2. Na sam hoihtak hen sitset in.
• 3. Na khutcin sausak kei.
• 4. Cin tuh leh cinsanza te zangkei in.
• 5. Khutbulh tuamtuamte tamzang kei in.
• 6. Zimuii ki kap pempam sa in anhuan kei in.
• 7. Na puanban zialto hamtang in.
• 8. Tuaciangin na khut silsiang in.
• 9. Na vanzat ding (kuang, temta) khempeuh silsiangin.
• 10. Na huan ding an leh mehte silsiang in.
• 11. Nidang vanzat, tang vanzatte tamzat kei in.
• 12. A limna leh a hun ngaihsun in.
• 13. Tha omsak ding, a lim ding leh a duhhuai dingin huan in.
• 14. Lungkim mahmahna tawh huan lecin a ne te in limsa hi.

28. Luvai lungam

Na tut hithiat laitak, tutna pan na dinkhiat laitak thakhatthu in luvai vat, lungam vat cihdan na tuaktheihleh: A thuklualo Tampaya tui sungah ci leh cikhum a kituakkhom hel in, nisim in dawnden lecin tuabang luvai, lungam natna hong bei ding hi.

29. Na anneksim in sing phelkhat neden theilecin

• Lutangnatna, lutang phallangnatna cihte kiamsak hi.
• Na kaal sung siangthosak hi.
• Cancer a pianloh nadingin hong dalsak hi.
• Lawlsungna, gawngsungna leh bukkhuh, natgual cihte hong dalsak hi.
• Guhletang natna hong dalsak hi.
• Ankamlimsak hi.
• Sisan thahatsak hi.
• Pumpi thuakzawhna thahatsak hi.
• Gilpi thahatsak a, annek lemlo cihte beisak hi.
• Thauna kiamsak hi.
• Numeite in a ngeina neihlaitak a natloh nadingin dal a,
• Pumpi hong nosuaksak hi.

30. Nupi naupaai khatin banghangin lamsiauh huai hiam?

• 1. Nupi naupaai khat na hihleh lamsiauhna pen a hoihpen exercise bawlna a hihi.
• 2. Zingsangsim in lam a siau den na hihleh naupaai hunciang a tamzaw lamsiauhkul tuanlo hi.
• 3. Ahizongin lam a siau ngei mello mi na hihleh nausuah haksatna pan noptuamna tampi hong pia a hihmanin thobaih inla lamsiau in.
• 4. Nisa nuai ah lamsiau kei in. Na tawl ciangleh ni satna hangin pumpi a lumna khangpah a, na gil sung a naungek in thuaklah thei hi. Zingsang leh nitak hoihpen hi.
• 5. Lam na siauh ciangin na tawlluat dong siau kei in. Na dangtakluat dong siau kei in.
• 6. Lungkimtak in na hih a hihkei a seploh phamawh cihdanin utlopipi in zong lamsiau kei in. Naungek aa dingin hoihlo hi.
• 7. Lamsiauhna in pumpi cilesa khauhsak a, lungsim ki muanna hong pia ahihmanin nausuahna ah haksatna tawmsak mahmah hi.
• 8. Ta nei cil ding numeite bang hileh lamsiauhna in lungsim picinna pia a, maizumna pan suahtakna pia hi.
• 9. Nu i cilesa hatsak bek hilo in naupang zong a giklua, a lianlua a omloh nading lamsiauhna in bawlpha thei hi.
• 10. Ta nei ding nupi aa dingin lungkiatna leh lunglenna zong beisak tuam hi. A lawmte leh a pasal tawh lamsiauhkhopna in khamuanna piazo pen hi.
• 11. Lamsiauhna in naungek lutang a nuailam ah kiasak ahihmanin suahdan manphalo cihte dal hi.
• 12. Lamsiauhna in naungek a suahkhiat nading khawngguhte ki kaksak, ki hongsak hi.
• 13. Nikhat in minute 30-40 ciang lamsiauh ding hoihlel hi. Inn na tunciangin minute 5 peuhmah daitak in tawlnga in.
• 14. Lam na siauh ciangin awn pian in pai kei inla tangtak in pai setset in.
• 15. Puan a ki ngak leklak leh khedap tulsangte bulh kei in.
• 16. Naupaai sung peuhmah sungsimnopna ding hanciam in.

31. Lothangsan

Lothangsan in tuap sung a virus hoihlote leh huihdikna tawh kisai natnate minute 15 sungin hong nuamtuam sak zo a, a nasia khinte nangawn ni 3 sungin a damsak zo lothangsan a hihi.

Zatui a zatdan – 1. Lotangsan 2” kiim a pha khat a tunghawng khokkhia in tuitawh silsiang masa ding hi. Tuaciangin a baklian takin at ding hi. Tuapen kam sungah damdam in haizan ding hi. A khu hong khauhmahmah dinga, na khitui hong kaai sakzo ding hi.

Tua a khute pusuaksaklo ding, na tuapsung dong nakpitak dik ding hi. Minute 1-2 khitciangin damtak mahin na nakpan pusuaksak leuleu ding hi. Tuabangin a dangteng zong hihzel dinga, na haizan khitsate valhsuk ding hi.

Tuabangin lothangsan pum 1 a beihzawh ciangin minute 15 sung an a hi a tui ahizongin ne nailo ding hi. Lungnote a sih nading a hihi. Tuabangin hih lecin na tuapsung hong siangtho pah dinga, na nakbing in, huihdikna haksa khempeuh hong vengpahlam na mu ding hi.

Nop tuamna hong omleh nai 4 hal in khat vei hih kik leuleu in. Lothangsan khute na tuapsung a tun dong dik ding, minute 1-2 bang koih ding tuaciang na nak mahpan paikhiasak ding hi. Tuahileh tuapsung natna tawh na si nawnkei ding hi. A lauhuai mahmah te ni 2-3 hileh damsiang veve hi.

• 2. Na ci a satleh Biogesic (Para) ne in. Na nap a tui leh Barmiton ne in. A tui keileh nekei in.
• 3. Zingan nitak an na neksim in lothangsan a sial in phal khat phal nih ne hamtang zel in.
• 4. Tampaya tui zong ni khat nih vei bang ne in. Tampaya tui a om keileh C Vit ne in. Vitamin C dat in hih tuapsung natna tawh kisai te dal mahmah hi.

5. Nakbing, naptui, ngawng sungna, awmna, cisa, khaksawhtam cihte a kipan tuapsung virus lut natna peuhmah hih lothangsan in damsak thei a hihmanin a dam dong na zomsuak in. Na ci na mahmah in, a pauzolo, a pai zolo dong na hiphial zongin na anbuk sung dong na tun zawh

32. Nang mah siavuan hi teh

Na cidam nadingin nangmah tektek siavuan hoihpen na hihi. Na anhuanbuk in a hoihpen zato hi a, na nekledawn khempeuh na aa dingin zatui hoihpente a hihi. Hih thu na kitheihmawhbawl leh na cidamna kip ngeilo ding hi. Hiteng na thupi ngaihsutleh na cidam ding hi.

• 1. Zu leh za ki dawm mahmah in.
• 2. Khe tawh lampai hanciam in.
• 3. Ni thapaii tu cip kei in.
• 4. Nasep bekbek hanciam seplua kei in.
• 5. A allua, a khum lua, sathau tamlua ne kei in.

Jackma gen ngeikhat ah- zawng mai ah nahtang lakkhat leh dollar 100 koih lecin zawngin nahtang mah tel masa ding hi. Banghanghiamcihleh dollar 100 in nahtang gap tampi leizo hi cih theilo hi.

Mihingte zong i mai ah hauhna leh cidamna omleh hauhna a lamasa ding tampi om ding hi. Na cidam ding thupi ngaihsut masa lopi in na sepna khempeuh a mawkna a hihlam phawk in, na cidamna ding a hitheizah in hanciam in.

33. Banghangin bil sung thak den hiam?

1. Earwax bulhna hangin bil sung thak thei den a, kamsialeh bil khuazakna kisia thei hi.

2. Lungno lut lehzong bil sung thak thei hi. Vanzat siangtholo khat peuhpeuh na bilsungah koih, tua te tawh na bil sung na holh ciangin lungno lut thei hi. Na bil thak in hong san leh lungno hi thei hi.

3. Bil keu lezong thak thei hi. Sathau dat leh a nel dat a beiciangin na bil sung thak thei hi. Naupang bil zatui (sathau) nuh lecin dampah ding hi.

4. Cithak hangin zong bilsung thak thei hi. Vun tungah cithak a omleh manlang tak in zatui tawh bawlpah in. Na bil sungah a ki lawh ma in damsak ding thupi hi.

5. Bil siansaknate in bilsung thaksakthei hi. Pat, laidal, puansia, ciangthelte tawh na bil sung sianthosak ding na hanciam ciangin na bil thakthei hi. Bil pen a mahlemah in ki siangsak a, a vallua siansak den kul lo hi.

6. Na nek nate hangin bil sung thakthei hi. Strawberry, aktui, mipe, ngasa cihte tam na nekluatleh bil sung thak thei hi.

7. Earphone te hun sawt zatluatna hangin zong bil sung thakthei hi. Bil ngek kilokna thuaklah in thak thei hi. Earphone te tamzat loh ding hoih hi.

34. Nawizu hoihpen

Nute’ nawizu pen naungekte aa ding a hoih pen bang hi a, hun mana kingah, a sa a vot hoih bek, a khum a al hoihbek, mun khempeuh ah ki ngah, sum beilo, natna do zawhna om, nute it zawhna tamzaw, siangtho na om hi.

Tua ahihmanin numei khempeuh in naute nawi piak ding thadah lo-in, nasemte bek bawngnawi tui bawlsak a, naute i piaksak ding mailamah ganhing lungsim, hong neih ding lauhuai hi. Natna zong a tamzaw neibaih hi.

Na tangek kha guk nuaisiah peuhmah a nu nawizu bek pia in. Nadang pia kei in.
Zonute thadah kei ni, i omna tek siangsak in hun mawk beisak kei ni. Laisimin, khutsiamna khatpeuh peuh nei ni. I innsung siangsak ciat ni. Ei mahmah zong kisiangtho sak ni. (Sister E. Sian Kho Zam)

35. Tui dawndan

Tu hun laitak Japan gamah a kizang popular pen “Tui dawn dan”ahi hi. Mipilte in a sin khit uh ciangin phattuamna om hi, a cih uh thu khat ahi hi. Puteek piteek leh damlote aa dingin limtakin zui le uh natna tuamtuam panin damna ngahna lampi khat hi a, cidamna lam a zui, Japan mipilte in a muh khiat ahi hi.T ua ahihleh tui koici dawn ding cih thupi hi.

1. Zingsang lupna pan na thawh phetin ha nawt ma-in tui hai 4 (160 mililiter) dawn masa phot ding ahihi. Bangmah a om nailo gilpi sungah tui dawn masak ding kisam hi. Pawlkhatte aa dingin haksa kha ding hi.

Tui hai 2 bang dawn khit teh, sung nim, luak suak thei hi. Tua pen tui dawn dan a khialh man ahi hi. Tha khat thu-in tuihai 4 dawnmang pah ding na hilo hi. A hun minutes 45 bang lak kul hi. Gtn: 1) 6:00 AM (zingtho) tui hai khat 2) 6:15 AM, tui hai khat 3) 6:30 AM, tui hai khat 4) 6:45 AM a vekpi-a kigawm tui hai 4

• 2. Tui hai li na dawn khit ciang, ha nawt, kam khuah, maiphiat pan in.
• 3. Tua khit ciang zingsang an na neek nop peuh kine thei hi.
• 4. Zingsang an na nek khit ciang tui dawnpah kei in. Minute 15 khit ciang tui dawn pan in. Sun-an leh nitakan na nekkhit ciang, nai nih sung bangmah ne lo dawn loin om in. Na duh a om leh nai nih khit ciangin ne in pan, dawn pan in.

5. Putek pitekte leh cidamlote in tui hai li minute 45 sungin dawn zolo ding hi. Phamawh lo hi. Ama dawn zawh zah pan dam damin khanto to in. A nuai-a natna a neite tui dawnloh a phamawh, a nite zong hong gen lai ning.

• 1) Sikhang neite- ni 30 sung
• 2) Gilpi natnate- ni 10 sung
• 3) Zunkhum natna/Sikhum- ni 30 sung
• 4) Sungkhakte- ni 10 sung
• 5) Cancer natna- ni 180 sung
• 6) TB natna-ni 90 sung

A cidamte thamlo lutang na, ci leh sa na, guh leh taang na, bawk, lungtang kisat, sungkhak luatna, zunkhum sikhum, khuak sung hoih lohna, thau luatna, gawng na (gawlsung na), haihut, TB, thagui natna, kal leh zun natna, gilpi na-a luaksuahna, billehnak natna, mit natna, naubu cancer, nin pailohna, sung khak a dula neite zong a tunga bangin tui dawn ding kisam hi.

Guh leh taang nate ahihleh a masa kal khat sungah ni thum dawn ding a, tua khit ciang nisimin manman zingsang minute 45 sung tui hai 4 dawn ding kisam hi. Siatna bangmah piang sak het lo a, sum bei lo a, zatui hoih mahmah ahi hih tui dawn dan, na kisin dih ve.

36. Na zi nau a suakciangin

Sen te’n numei khat in ta a neihleh a nausuahzawh ni 30 sung peuhmah tawlnga sak uh hi. A hi zo te’n ni 90 sung nangawn tawlnga sak uh hi. Tawlnga cihpen zumnasep semlo, cihciangbek hilo in inn sung nasep, anhuan puansawp kuangsil te nangawn semsak lo hi ci hi. Tua hunsung teng a lim theithei nekledawn, tha om theithei dingtawh vak uh hi.

I beh Kachin te in zong a zi te un nau a suahnak leh ni khat ak luangkhat ta gawh uh a, atawmpen ak luang 30 dong gawh uh hi ci hi. Tuapen nau a nei numei te aading nakpi tak thupipi mahmah hi. A tha bei khempeuh dimkik sak hi. Cidamsak hi. Papi zi neikhinte in ngaihsut huai mahmah hi.

Ngaihsut dingbek hilo in zatpah zuihpah ding a hihi. Zomi pawlkhat te’n a zi te ak luang 1-2 ciangbang a gawh om tei hihang. Pawl khatkhat te’n a gawh ngahte ci in aklu leh a gilpi peuh pia ziau thei hihang. A tui hawp lecin na thaom ding ci in a tui hawpsak zaw thei hihang. Innkuanpih dangteng in a tak teng negawp lel thei hihang.

A taktak in a tui sung a vitamin sangin a tak sung ah vitamin tam omzaw hi. Tuahiaa nupi nausuak peuhmah tupan ki pan itbawl in nekngaih ngiat ding a hihi. Nau a paii ni 180 sungin i sum thalawhna pan, i sum zonna pan ni 30 ai ding a tuam vilvel in tuamkoihsak pah ciatciat ding a hihi. Nau a suah ciangin ni 30 sungpeuhmah tawldamtak in neklim pen tawh a thadim kik sak ni.

37. Citui leh cidamna

Ci tawilang leh tuilum helkhawmin tua sungah khe diah ding hi. Minute 30 dongbang diah in, tuaciang khenuai ah ci nuh, zut ding hi. Nailang bangkhit ciangin khuk nuaisiah tuilum tawh sil in, nulkeu ding hi. Hih gamtatna in na khua- ul hong kaisak ding hi. Na sunga kikhol hoihlo tampi hong lakkhiatsak ding hi. Na om hong nuam in, na thazang ding a nuamtak na ihmu thei ding hi.

A namdangkhat leuleu ah – Nitak na lup ding ciangin na pheibul pan kipan na khe silsiang masa in. Nul keu in. Tuaciangin ci tawi 1-2 bang a tatna kuangdailian khatsungah ci te koih in. Tua sungah na khe minute 30-40 bang koih gige in. Sik cip gige in. Tuabangin om lecin na khe te pan khua- ul nel hong kai na mu ding hi.

Na lungkimzah na diahkhit ciangin puansiangtho tawh na khe nul sitset in. Theihdingah: na khe tuitawh sil kik kei in. Tuaciangin lumpah in. Hihbangin hih lecin na om nuam in, na tha hong zang mahmah ding hi. Na cidamna hong hoih ding hi.

Kawngnuai siah- phei pan tansa, khetul dong ah na a sa mi ki om thei hi. Tua natna pen om hithiat kawm mahin na ahihmanin a thuakte aa ding thuakhaksa mahmah thei hi. Ahizongin tuabang satak natna hong kipat phet in ki bawlpah leng a dam ding haksalo hi. A ki bawldan ding zong a haksa lua hilo hi.

A masa pen in kuanglian khat sungah tuisa (khe ki diah ngam khop dingin a sa) litre 10
koih masa ding hi. Tua khitciangin tua tuilum sungah Apple cide vinegar litre 1 helbeh ding hi. Azom ah ci sikkeu 2-3 hel ding hi. Ci te a tuisuah dong hoihtak zau hel ding hi.
Tuabang na mankhit ciangin tua tuisungah na khe a nih in diah ding hiteh. Tui a vot kik dongbang diah hithiat ding a hihi. Tua ciangin na khe nul keu inla lum in. Nitak lupma in tuabang khediah hihpen hoih penpen hi.

Zingsang na thawhciangin khe guak tawh lampai kei in. Khedap a hihkeileh khe tuam (mawza) bulh hamtang in. Hibangin na sin lecin khat vei na hihna bektawh zong kumtampi na thuak natna hong kiam tuam pah ding hi.

38. Naupang leh phone

Naupang phone a tamzatlua te a hoihlohna

• 1. A khuak nasepna leh thungaihsutnate in nasem nawnlo.
• 2. Kamtam pau nuam nawnlo uh.
• 3. A thuciapteh theihna kiamsak hi. (Japan mipil te’n phone a tamzatlua naupangte a liatciangin a nungsangthu leh a piangsa thukhempeuh theinawnlo ding hi ci uh hi.)
• 4. Vaidang peuhmah kin in neilo uh a, an nekding tui dawnding nangawn zolzol in omta uh hi.
• 5. A lungsim ngaihsutna uh ukzolo uh hi.
• 6. A pumpi gamtatna uk zolo hi.
• 7. A deih thei nawnlo uh a, phone bek thei uh hi.
• 8. Ihmut cimtak in ihmu thei nawnlo uh hi.
• 9. A mittha kiam in a khuamuhna thahat nawnlo hi.
• 10. Lim hoihlo leh game hoihlote hangin a lungsim sungah tuabang thute hangin dipkua gige uh hi. Posted on 14 November 2019

39. Na kal (kidney) a cidam nadingin

• 1. Tui tampipi dawn in
• 2. Zingsang an ne hamtang in
• 3. Sa tampipi ne kei in
• 4. Ci a allua in ne kei in
• 5. Za tamtep lua kei in
• 6. Zu tampipi dawn kei in
• 7. Tawldam tak a tawlngak hun kipia in
• 8. Zatui leh za tampi zangkei in
• 9. Zingsang na thawh ciangin na zun ip selo in zun thapahpah in
• 10. An nekkhat in tampilua ne kei in
• Hih gamtathoihna tengin tuni na kal hong cidamsak lai a hihi. Na gamtathoihna na zomsuak in.

40. Nuntak khansauzawk nading thu 21

• 1. Pumpi gamtat denna, exercise bawlna, ki mawlna cihte in na pumpi hong thahatsak in hong cidamsak ding hi.
• 2. Nikhat in zu a hiaa, wine ahizongin hai 3 val dawnkei in.
• 3. Lunggim singimna khempeuh a hitheizah in hemkhia in.
• 4. Nikhat in TV leh phone te nai 6 val a ente kum 4.8
• si baihzaw hi ci in muhkhiatna ki nei hi.
• 5. Sa sangin gahleteh te hanciam nek mahmah zaw in.
• 6. Zatep kei lecin leitungah na cidamzaw dinga, na khansau zaw ding hi.
• 7. Midangte leh lawmlegual tawh ki khawlkawm in. Hih in lungsim hong cidamsak a, pumpi hong nosuaksak hi ci in muhkhiatna ki nei hi.
• 8. Ahoihlam muhna nei in. A piangthu khempeuh a hoihlam pan muhtheih ding hanciam in.
• 9. Khatveivei coffee dawn in. Coffee sunga antioxidants in cidam nading phattuamna hong pia hi. (tamdawn ke in.)
• 10. An tawmbek ne in. Leitungah Japan te a khansau pente kici a, a mau an a nekuh ciangin 80% a khamciangin khawl uh hi.
• 11. Thu lungngai in daitak om hithiat hun la zelzel in.
• 12. Na pumpi gihna a hoihkhomkhat kemcing inla ki thausak lua ngeikei in.
• 13. Khat veivei nui zeuhzeuh in. Nuihna in hong cidamsak hi.
• 14. Nisa nuai ah na nakseplua kei in. Lukhu, puanbansau cihte silh hamtang in.
• 15. Na an ding, na dawnding tui a siangtho tak in nangtektek in bawlthei lecin a hoihpenpen a hihi.
• 16. Papak nekna in cancer natna dal ahihmanin papak nek ding thupi hi.
• 17. Nulepa omkhopna (sex zatna) in cidam nading phattuamna hong piathei hi.
• 18. Nikhat nai 7-8 sungpeuh mah ihmut ding hanciam in.
• 19. Nikhat in tuisiang tampipi dawn ding hanciam in.
• 20. A hunzui a piang singgahte na nek den zawh nading hanciam in.
• 21. Nanglenang ki it in. Hih bang gamtatna te in hong khansausak ding hi.

41. Zunkhum damna zatui

Zukhum nei in na lungkham hiam? Zukhum na neih manin na duh na ne ngam nawnkei hiam? Zunkhum natna hangin sumlepai tampi na beikhin hiam? Lungnuam in. Sumbei lo zumkhum damna zatui om hi.

Zunkhum natna a dam nadingin phuitong gah (cherry fruit) ne in. Phuitong kung nuai ah a kia a gahte tawm inla ni khat tang 4 tabang ne den in. Ni khat tang 6-7 val nekei in. Zunkhum hong beisiang ding hi.

Pumpi aa ding khauhpian ahihmanin a ne mi ki gawngtuam thei hi. Mipawlkhat te’n nikhat tang 10 ciang a ne zong om hi. A mi i natna leh thuakzawhna ngaihsun kawm a zatding a hihi. Up kei leh sin theih hi. Na sin manin na sumbeilo dinga damna na ngahding hi.

42. Umpawng nekna le cidamna

Tuni ေဂၚလ္ခါးသီး na mehlak ah a ki helhiam? Ciamnuih cihtakin gualkhati meh neksangin sasai maiah khat vei paileng thaom zaw ki ci hi. Tua in gualkhati meh nek ding hong thadahsak mahmah hi. Ahizongin tua pen zuau taktak a hihi. Gualkhati meh nekna i a manphatna a nuai ah na sim in.

• 1. Pumpi gihna hong kiamsak
• 2. Naupang a damlosa a suak ding dal
• 3. Sisan siangthosak, thahatsak
• 4. Hong thahatsak, hong na vaksak
• 5. Sikhang kiamsak
• 6. Lungtang natna dal
• 7. Sungpai natna damsak
• 8. Sisan sunga suangomte beisak
• 9. Sisan thahatsak
• 10. Hong nosuahsak kinken hi. Hih maang, umpawng pen nidang lai in Falam zato pi ah siavuan te’n cina te nesak hamtang hi cih zong kiza ngei hi.

43. Naungek khat aa ding a lauhuai natna pawlkhat

Naungek khat a ci a natleh zato puakpah ding kisam hi. Zato kipuakpah zoleh naupang nuntakna kihonkhia zo hi. Hih a nuai a bangin naupangte tungah hong pian leh a manlang thei penpen in zato puakpah ding kisam hi.

• 1. A pumpi giksa, tangzanglo, om melmal, khuaphawklo
• 2. A gamtat ngeibangin gamtanglo a hihkeileh a gamtat ngeina sangin a valzaw in gamtanggawp
• 3. A cisa gawp (a satna 38 C a hihkeileh 100.4 F a valleh)
• 4. A ci vot gawp (a votna 35 C a hikeileh 95 F nuai a a hihleh zato puak ding)
• 5. Tui dat a sungah a om nawnkei leh (keu mel a puakleh)
• 6. Nawi a tep nop kei leh, nawi a tep ngeizah a tepkei leh
• 7. Huihdik ding haksa a sak leh
• 8. A sipzang a puakluat, a komluat leh
• 9. A vun aisan bangin hong san leh (a maitang pan kipan in a awm, a gil leh a khut a khe te ah kizel suk hi)
• 10. A lai kikot ah a sanmel hong om sipsep leh (a sanmel tamleh natna lungno tam cihna hipah hi)
• 11. A vun tungah a san melte hong kidawk leh (a vun ah tangsiat bangin a bawk hong om leh natna a hihi. A bawk neucik khat a omhangin phamawhlo aa a bawk pen a liat pianleh natna cih kithei hi.)

Hih a tunga pianzia khatpeuhpeuh naungek tungah hong omleh a manlangtheipen in a naipen zato ah tua naungek paipih pah ding hi.

44. Nupi naupaaite zuih ding thupawlkhat

Nungakte, nupite khempeuh leh tangval, papite, mo nei khempeuh in hih lai nasim un.

• Nupi naupaai khat in a tawmpen 4 vei peuhmah siavuante kiang leh zato ah kilak ding kisam hi.
• A khatveina nau a paaizawh kha 4 sung, kha 6-7 ah a nih veina, kha 8 a cinciang a 3 veina leh kha 9 ah a 4 veina kilak hamtang ding hi.
• Naupaai sung a thahat theih nadingin thaom an tampi ne ding hi. An neknoploh cihbang omsaklo ding hi.
• Miikhai zatui nihvei ki sun ding hi. Siavuante hong piak zatui, zatangte ne ding hi.
• Pumpi gamtangsak in a haksalualo nasepte sem ding hi. Ihmut cimsak ding hi. Sunlam in tawlnga zel ding a, a giklua vante domsak lo ding hi.
• Sisan tehzel ding, pumpi gihna ki teh zel ding, zun zong sitsak ding, TB natna om leh omlo sit ding, hutzate zong hong kisawl bangin ne ding, vitamin B1 zatangte ne ding hi.
• Nausuah nading mun (zato a hi a, inn ahizongin) siangtho telkhol ding, laigui tan nading tem a hiaa kaihci ahizongin siangtho tak in koihkhol ding, naudap dingleh puan siangthote koihkhol ding hi.
• A tui a paizawh nai 6 sung a gil a natkei leh, a gil nat zawh nai 12 sung a nau a suahkhiat kei leh, naungek a suahkhit minute 5 val sisan a pai lai leh, a nu luvai lung am in a omleh,
• Khuaphawklo in a omleh, a thozolo dongin a gimluatleh, naungek a suahkhit naikhat sung a laigui a khiat kei leh, a suak naungek a neuluat leh, naungek in huihdik haksa a sakleh, a nu’ nawi hoihtak a teptheih kei leh a manlangtheipen in a nu tawh a naungek tawh zato tun ding hi.
• Nupi khat in ta a neihkhit a tawmpen kum 2-3 sung nau a paaikik lohnadingin nauhalna zatui tuamtuam te a zat ding kisam hi. Siavuan te hong genbang bangbang mang in.

45. Nawitui nam thum in kikhen

Nupi khat in ta a neihphet in a paicil a nawizu pen (1) bangin mel nei hi. A naipaak mel nei a tuapen naupangin a suahzawh nai 1 sung (a manlangtheithei) in a nek hamtang ding a hihi.

A (2) na pen naungek a suah zawh ni 2-4 pan ni 14 sunga a nu’ nawimel a hihi. Naungek in nikhat in 75 cc peuhmah ne hamtang ding hi.

A (3) napen a nausuah zawh ni 14 pan kipan hi. Tuapen a mel kikhel nawnlo hi. Naupang in a nekzahzah piangpiang a naungek in tam nesemsem leh hoihzaw hi. Naupang khangsak mahmah hi.

A manlang tak a piakpahna Nupi khat in ta neihciangin a pai masa pen a nawitui pen naungek aa dingin thupi mahmah hi. Tua nawitui pen a naipaakmel pian nei a naungek aa dingin natna namkim dalsak hi. Naungek in khangkhat khom hi. Tua foremilk pen naungek leh a nu vun le vun kisukha in a koihciangin naungek aa dingin tampiang sak phasem hi.

Naungek a suahzawh nai 1 a cinma (a manlang thei penpen) in a nu’ nawipiak pahna in a laiguimanlangtak in kiasak pah hi. A nu aa dingin a hihleh si tampi a luanna ding kiamsak hi. Naungek a suahkhitphet in a nu’ nawitui pailo thei hi. Tuabanghun ciangin a nu’ in a khut hoihtak silsiang sitset in nawitui a neihtheih nadingin damtak a mekding kisam hi. Tua in nawitui piangsak thei hi.

46. တုပ္ေကြး natna tawh kisai theihhuai pawlkhat

ဆင္တုပ္ေကြး natna lim

• Lutangna(namahmah), sagui, sazangtena, guhletang na cip, guhletangte a mel ki khel, thazawcip, pumpi tungah a san mel nei a bawk nonote hong om (thak thei) hi. Hibang pianzia hong omleh ဆင္တုပ္ေကြး ki ci hi.
• A lauhuai diakdiak ah- sikhum neite, zumkhum neite, sikhang neite, kum 60 a phakhinte leh nupi naupaiite nakpitak ki dophuai hi. Kidalna pen namkhat bek hi
  a, thokang ki petsak hetloh ding hiziau hi.

H1N1

• 1957-58 sung mi 2 million in sihlawh hi. 67-68 kum in H3N1 tawh Hongkong ah mi teng 7 bang si hi. 2009 ciang Kawlgam hong tung hi. H1N1 pen vok nangawn in sihlawh ta hi.
• Ki dalna dingin dalna zatui sut ding a hoihpen a hihi.
• Lutangna, bukkhuh, gawngsungna, guhletang nacip cihte hong omleh H1N1 natna pianzia a hihi.
• Damnuam den ding, khutsawp den ding, siangtho sitset ding, na mit, na nak, na kam lawngkei in. Nekledawnte siangthosak ding, silsiang masa ding hi.

ေသြးလြန္တုပ္ေကြး

• Lutang nagawp, cisa gawp, cisa kiamkik nawnlo, a mittang sung na na, a guhletang na sa, a sanmel nei cithakdante hong om ding, a hani pan si luang thei hi.
• Hibang pianzia hong omleh a manlangtak in naupang siavuante kiangah puakpah ding hi. Zatang na mawkpiakleh silawhziau thei hi.
• Kidalna – Zatui om nailo ahihmanin ki si thei hi. A cisa ding, lua ding, a ek vom ding, a nakpan si pai, a ci vot gawp, bangmah phawk lo, kapkapkapkap hibang hong pianleh a nuntakna a bei dektak hita hi.
• Kidalna ah thokang ki petsak hetkei in. Puan bansaute silhsak ding, thopuan tawh lum hamtang ding hi. Tho in hong pet keileh tua natna ki ngahlo hi ziau hi.

47. Gilpuak, i annekte gilpi in gawi zolo

Banghangin hong piang???

• 1. Lungkhamlua, ngaihsuttamlua
• 2. Hun sawtpitak tutna khat ah tutu
• 3. Zatui, zatang tam nekluatna
• 4. Alkali tamnekluatna
• 5. An nawhnekluatna
• 6. An tampi nek luatna
• 7. Coffee leh niangtui te tam nekluatna
• 8. An nek kik zelzul na, nekkik pahpahna
• 9. An nekkhawm a, a vot khat peuhpeuh tawh mehna
• 10. Cikhum tawh a ki bawl nektheihte tam nekluatna
• 11. Sathau, a thau tampi nekluatna
• 12. Zu tam dawn luatna
• 13. Zatepna
• 14. P.K haihaina
• 15. Awngbuk pai nuam napi pailo a ipcipna
• 16. Sungpai sak zatuite zat pahpahna leh
• 17. Para cih dan thuakzawhna zatuite tamzat luatna hang a hihi.

Hibangte in gilpi um thazawmsak ahihmanin ki dawmciat ni. Khangkhat khom dingin Pasian in hong piak ahihmanin puahsiam kemsiam leng cih deihna a hihi.

48. A ihmutheilote aa ding

Ihmut hun a ihmu theilote aa dingin keizat zatui hong hawmsawn ing! Ihmut suahzaa nekpen saupi a dingin hoih hetlo hi. Nidang kalup ma nailang sapin bawngnawi lumlitlit kadawn zel a lem mawhlo hi. Ahizongin duh lualo ka hihmanin dawn ding haksa kasa hi. Hih bang haksatna katuak ciangin kasanggamte khat ka hopih leh zatui hoih mahmah khat hong gen hi.

Zan nalupma in (lonamsia) teh 5/6 tuisa lakah diah inla akidawn theih alumlitlit in dawn in! Nadawn khit ciang lumpah lecin na ihmu thei ding hi hong ci hi. Umlo pi-in kasin leh ka ihmu thei takpi a, sinkei leng akhial mahmah ding ka hihi. A hoihna pawlkhat Lonamsia tui i dawn manin ihmut a nopsak banah i thau kiamsak lai hi.

• 1. Ki uaisak – Ansak i nek atamluat ciang gilpi’n zolo ahihmanin gilsung kitok gawp hi. Tuabanghun ciangin lonamsia ne leeng annek ki uaisak pah hi.
• 2. Sihui hatsak, lutang damsak – Lonamsia nisim neden zoleng sihui hatsak hi. Lutang hong nat ciangin zong lonamsia ne leng damsak hi.
• 3. Buuk damsak, khaksawh beisak – Buukzaa sungah lonamsia kihel ahihmanin buuk veite leh khaksawh hau te’n lonamsia ne leh hoih hi.
• 4. Awmbing damsak – Awmbing theite in lonamsia ne le uh damna zatui hoih mahmah khat ahi hi.
• 5. Nawi gausak – Nau nei nupite aa dingin lonamsia ne le uh nawizuu tamsak hi.
• 6. Thauluat na’ng daal – Ih pumpi sunga i thau’ te lonamsia in tuisuak sak zo ahihmanin thauluat na’ng daal hi.
• 7. Nosuak sak – Lonamsia i nek manin i pumpi hong nosuaksak a i vunte hoih mahmah hi. Vun natnate zong hong dal sak lai hi.
• 8. Mangngilh hatlo sak – Kumtam man leh tawm man hilo in na mangngilh phadeuh ki om hi. Tuabangte aadingin lonamsia ne leh hoih mahmah hi.
• 9. Weight khanglo – Pumpi gihna apiangsak thau luatnate lonamsia in beisak hi. Ni simin tawmta ne den zo lècin hong fashion sak ding hi.
• 10. Cancer daal – 100% cancer daalzo ahihlohhangin lonamsia nekna hangin cancer apiangsak lungnote hong dalsak zo hi.

49. Kumtam khit ciang thakiamphaloh nading

Gamdang mite a tamzaw kum 90 khit nangawn ah hat mahmah lai uh hi. Kawlgam mite kum 60 khit ciangin ki thakiam mahmahta hi. Hih gamdangmite tungpan kumtamkhit thakiampahloh nadingin a gamtatzia uh pawlkhat etteh ding hihanng.

• 1. Sathau neldiadua kihta mahmah uh hi. Sathau nel a nei te tamneklo uh hi.
• 2. A khum leh a al ki dawm mahmah uh hi. A khum nam tamnek lo uh hi.
• 3. Khuahun zui a piang gahletehte limnek hi. Gahleteh nam hanciam nek mahmah uh hi.
• 4. A mahlemah a a kinetheipahte limnek uh hi. Aluu, kawkai, bal, ankam, kawpi cihte limnek hi.
• 5. Tuipi sungpan a piangte a namkim in hanciamnek hi. Ngasa, aisa, kaikuang leh toktol cihte ne hi.
• 6. A huan khempeuh a minlua lo in ne hi. A min mahmah dong huan dikdek lo uhaa, a minphang in ne zaw hi.
• 7. A guh tawh a ki thuahte tamnek zaw hi. Bawng khe guh, bawngmei, kaikuang cihdante limnek uh hi.
• 8. Pumpi gamtang a kimawlna hatkat hi. Hun gah sim in kimawl a hihkeileh lamsiau in pumpi gamtangsak uh hi.
• 9. Lamsiauh thupi sak mahmah uh hi. Zingsang a hizong, nitak a hizongin khetawh lampai ngiat uh hi.

10. Huih siangtho dik thupi sak uh hi. Mualtung, munsiangtho ah huih siangtho dik dingin pai uhaa, tawldamna la zel uh hi. Hih bang gamtatna in kumtamkhit ciangin tha kiampahloh nadingin hong dal a, kumsawtpi hong thahatsak thei hi.

50. Tampaya zatui a kizatdan

• 1. Nitak lupkuan ciang a an nekna in gilpi cancer a pian nadingin tha pia hi.
• 2. Ni sagih sungin ak tui tang 4 val nekdenden ding hoihlo hi.
• 3. Aknel (ak phulip) nekna in gilpi cancer a pian nading thapia hi.
• 4. Numeite in numei ngeina a neihlaitak niangtui, coffee cihte tamdawnhetlo ding hi.
• 5. Na gilsungah an a omloh laitak mehthuk ne kei in.
• 6. Nitak na lupma nai thum sung peuhmah bangmah ne nawnkei lecin hoihpen hi.
• 7. Annek ma nailang kisap in tui hai khat bang dawnzo denleng hoih hi.
• 8. Annek khitleh annekma in singah khat peuhpeuh nek ding hoih hi.
• 9. Nek ding a kibawl sa pongmohte a hang khatpeuhpeuh tawh nisah ah pho loh ding hoih hi.
• 10. Zan na lup laitak na gei phone a hizongin, electronic van khat peuhpeuh thadimsak (power charge in) in koih kei in.
• 11. Nikhat sungin tui hai 10 peuhmah dawm sawm inla zingsanglam in tam dawm zaw in.
• 12. Nikhat in niangtui leh coffee te hai 2 val dawnhuailo hi.
• 13. Nikhat nai 8 sangin a tawmzaw na ihmutleh na khuakbu nasepna thazawngkhalsak mahmah hi.
• 14. Tampaya tui lum tawh hel in dawmna in hong khansausak tuam thei hi.
• 15. Mehthuk phelkham in i huan sangin pum huan leng cidamna ding hoihzaw hi.
• 16. Tampaya bek hilo kawkai a naipak melneite leh a manta mel neite sungah zong cancer natna a dal dat tampi om hi.
• 17. Tampaya leh tuilum hel in dawmkhawm theileng pumpi sungah cancer natna a pianloh nadingin hong dalsak hi.

Gul bangin i lipkhek in i nungta kik theikei hi. Muvanlai bangin a mul botkhia in multhak i posak thei kei hi. Tua ahihmanin i nuntakna a nuam dingin tuni in i cidamna thupi ngaihsut ni. Topa’n hong damsak ta hen. Amen

Cidamna tawh kisai i theihnopkhempeuh a naipen a om siavuante kiangah dot ding a hihi. Hih lai te pen siavuan omlohna leh siavuan tawh vai a ki hawmtheihlohna munte ah phattuamna hong piading deihna hibek hi. Hi lai khempeuh sin masa lo in, ki umgai khin theilo hi. A manlo a kituaklo a omleh zong ki maisakni ci in gen kawm in. Lai sim mikhempeuh tungah lungdam mahmah! AS Thangbawk – Zomi Daily