2020 kum ih Zogam MP ding kua ihteel tam? ~ Khup Khan Thang
2020 kum ih Zogam M.P. Ding kua ih tel tam? – 2020 kum Kawlgam bup kitel kik ding hong nai ta aa, Nainganyee Party teng zong, a candidate ding uh kua hoih ding cih lunggelgel ta uhhi. Tuipi gal ah na om phial zong in, ihZogam leh ihminam it khempeuh in, mai kum 5 sung ihgam ihlei, ihminam hong zuun hong lamsang ding, Member of Parliament (M.P.) kua a hoihtam cih ngaisut ih piak ngeingai ding thupi ka sa hi. Tua a hih ciangin, a beisa nih vei kitelna thu te enkik in mailam ih kalsuan ding ahihi.
2010 kum Tedim Gam kitelna
| Party | Pyituh Lotdaw | Amyota Lotdaw 1 | Amyota Lotdaw 2 | State Lotdaw 1 | State Lotdaw 2 |
| USDP | Pum Khan En, B.A 12247 | Kham Suan Mung, 5771 | Suan Do Cin, LL.B 6038 | Nang Za Mung B.A (Corr) 5779 | Hang Khan Khai, B.Sc (I) 5396 |
| NUP | Vum Lian Thang B.A, HGP 9074 | Khup Cin Pau, 5118 | Thawng Sawm Pau, M.A 3674 | Thang Go Khai, 4686 | Hau Za Dal, 2944 |
| CPP | P.S Kham Do Nang, LL.B (Corr) 2250 | Pa Gin Heh Lian, 1207 | S.B Khan Cin Zam Vung, 1763 | Thuam Go Thang, B.A, 728 | Gin Thang, LL.B (Corr) 2185 |
| CNP | Dr. Kam Cin Dal, M.B.B.S. 10257 | Khup Lian, B.Eco 4580 | Langh Za Mang, B.A. 5635 | Kam Lian Thang, B. Sc. 4756 | Pa. Zam Cin Pau, AGTI 6292 |
CPP = Chin Progress Party , CNP = Chin National Party
2010 kum Tonzang Gam kitelna
| Party | Pyituh Lotdaw | Amyota Lotdaw 1 | State Lotdaw 1 | State Lotdaw 2 |
| USDP | Hau Khan Mang B.A. LL.B | Neng Khan Pau | Cin Lian Pau | Hau Khen Kham |
2015 kum Tedim gam kitelna
| Party | Pyituh Lotdaw | Amyota Lotdaw 1 | Amyota Lotdaw 2 | State Lotdaw 1 | State Lotdaw 2 |
| ZCD | Cin Sian Thang B.A LLB 14967: 45.39% | Gin Kam Lian B.A 5880:35.30% | Ciin Do Niang B.Econ 4462: 26.57% | Thang Deih Khup 6278: 37.15% | Kam Khan Dim LLB 4650: 27.53% |
| USDP | Lt. Col. Dr. Vung Suan Thang M.B.B.S,M.Sc. 10239: 31.05% | Kham Suan Mung 5045: 30.28% 2nd Term | Cin Khan Pau B.A (Corr) 5474: 32.60% | U Nang Za Mung B.A 5395: 31.92% 2nd Term | U Suan Do Cin LL.B 4866: 28.81% 2nd Term |
| NUP | Do Suan Mung 824: 2.5% | Thang Sian Mung 413: 2.48% | Zen Dim Niang 275: 1.46% | Thang Go Khai 381: 2.25% 2nd Term | Zam Suan Lian 239: 1.42% |
| CNDP | Sian Za Nang 2058: 6.24% | Dam Khaw Nang B.A 567: 3.40% | Zam Cin Pau AGTI 1617: 9.63% 2nd Term | Thang Lun Khup 761: 4.50% | Neng Do Thang B.Sc 1424: 8.43% |
| CPP | Vung Suan Dim 860: 2.61% | El Do Khai 259: 1.54% | Khai Ngaih Lang 346: 2.05% | ||
| CDP | Vum Lian Thang B.A 4026: 12.21% 2nd Term, NUP | Kam Lian Thang B.Sc 1969: 11.82% 2nd Term,CNP | Tun Khen Pau 970: 5.74 % | Neng Khan Pau 692: 4.10% | |
| NLD | Nang Khan Suan 2785: 16.72% | Cing Za Dim 4705: 28.02% | Cin Khan Mang 2625: 15.53% | Thang Do Lian 4672: 27.66% | |
| ZRDP | Hang Lian Khai 489: 2.89% |
CNDP = Chin National Democratic Party, CDP = Chin Democratic Party, ZRDC = Zo Regional Development Party
Tonzang gam kitelna
| PParty | Pyituh Lotdaw | Amyota Lotdaw 1 | State Lotdaw 1 | State Lotdaw 2 |
| ZCD | Kham Khan Thang | Cing Ngaih Mang LL.B | Pau Lun Min Thang B.A. | |
| NLD | Thawng Kho Mang |
Note; Ih Candidate te Degree teng thei khinlo ka hih man in, a thei te’n hong behlap sak unla leh hong ngaidam un. Tonzang Myone kua teng in, bang Party pan kuanglui cih theilo (Dot pak ding zong theilo) ka hi man’ hong ngaidam un.
Mipi ngaihsut ding
Ei Zomi te in, hih kitelpi te ciamnuih na bangin ngaihsuh kha aa, (A diakdiak in 2015 Tedim Myone kitelna) kitelna a thupi dan ih theizo kei hi. Myone dangte in, na thupi ngaihsut uh aa, mi muanhuai mah tel pah in, tu in Chin State hong uk bek thamlo in, Vice President II na-ngawn hong ngah uh hi.
Kilemna le daihna (Peace and tranquility), ki-itna le lungnopna (Love and happiness), thutan’na le liangko kikimna (Justice and equality), Suahtakna le septheihna (Freedom and liberty) Bitna le kithutuahna (Security and harmony) hong piazo ding kumpi hoih leh apilvang leh a ciltat hong uk kumpi (Wise and frugal government) ih neih thei nading ngaihsun ni!.
1. Kawlgambup aa kumpi a phuan zoding (Government Form zoding) Nainganyee party a omleh, tua nainganyee party tawh kizom party te mah panpih zaw ding.
2. Kawlgam bup ah Government aa form zo ding party a omkei leh, a party enlo in, Chin State Government ah, panmun hoih a ngahzo ding, midang te’n zong hong zahtak sak ding kuangluii te ih pahpih zaw ding hi.
3. Tu laitak aa ih neih M.P. nu, hawmthawh nang omlo hi. A hizong in numei pen pasal te zah in mun khempeuh ah zattel zolo a hih ciang in, tulai khua hun policy lenkip lua in, numei te priority (Usapyin) piak luat kullo hi.
4. A gualzo M.P. a’ma kuangluii na’ mun (Constituency) mipi te kiangah atawm pen kum nga sung in 5 vei a paikik a vaan kik te hi ding hi. Khat vei zong apai kik a vaan kik ngeilo te’ napnit vetlo ding.
5. Khamtung khua te khat pepeuh ah a innkuan vua, a teng ngiat te hiding hi. (If possible)
6. Tualsuak Zomi hi ding hi. A neu lai a kipan, a khancing dong Khamtung khua khat pepeuh pan, a khang khia te hi ding hi. Nutakna zong in, a khancing khitteh leidang khua a om te Tualsuak mah aa san’theih hilel hi.
7. Kawlgam hita leh Chin State sung hita leh, pilna lam, pau le haam, za le ngal leh kuasak zia (Civic) lam ah ih Myone in ih maizum pih loh ding te hi ding hi.
8. Zopau siangtak, nalhtak a zangh thei te hiding hi. (Articulately, eloquently, fluently)
9. A tawpna leh a thupi pen (Last but not least) a biak Pasian a zahtak mi hi ding hi. (“A biak Pasian” ka cih na in Biakna ki deidan lo, mee kuangluii ding pa biak Pasian cih na hi. Tapidaw Pasian, Laipian Pasian, Buddah Pasian, Muslim Pasian, Hindu Pasian aa maa biak pepeuh hi.)
Nainganye Party te ngaihsut ding
1. 2020 kum kitel ciangin 10% ciang a ngahzolo ding party te hong kipan vet kei un. Na Party uh min daisak nahi uh hi. Mee ki thehthaang lel hi.
2. Party sung na sem te in, party candidatecy sum tawh nong zuakloh ding uh thupi pen hi.
3. Kam bek tawh a gensiam dangnal mi, mi a pumphat phat mi, zuau kamciam (Empty Promise) a pia pahpah mi, a kamciam (Promise) a zahtak (Respect) lo mi sehlo ding.
4. Sum leh paai hau (Wealthy), a’cithei mi seh ding. Tua hi leh ih gam khantoh na ding aa hong kipia budget sanction duhgawh lopah hi. Contract nasepte duhgawh loding hi.
5. Lawm leh gual, meltheih mihau mi (Fellowship); mi pawlbawl huaisiam mi (Charismatic), mipi phattuam nading asem mi (philanthropist) seh ding.
6. Thumaan mi. (Honesty)Thumaan a dinpih, lungkawi lo mi. (Straight Forward) Kuhkal mi (Integrity) seh ding.
7. Golhgul ne lo mi. Golhguk pia lo mi (Bribery); Nek le dawn kidawm mi (Temperence) Hamphat nading, maimuh nading letsong lah pialo lah asanglo mi seh ding.
8. A hangsan mi (Courageous), Veina a nei mi (Compansanate). Lainatna a nei mi (Passion) seh ding.
9. Maingal tak aa, a pau ngam mi (Out Spoken). Thu im lo mi (Transparency) seh ding. A lungduai ngeingaii pong mite sehlo ding.
10. Nidang khanglui lai mite bang aa, a thahlo a manlo pi a sialsial mite dan, a maa seplo pi misepsa teng asialsial mi, mi khut sung aa gul mannuam mi sehlo ding.
2020 Kuangluii nuam (Candidate) te ngaihsut ding
1. Party khat or adang party khat tawh, 2010, 2015 ah nihvei kuaungluii aa agualzo lo te in no leh no ki theih un laa, 2020 teh kuang hong lui sawm nawn kei un. Zum huai hi.
2. Party khat or adang party khat tawh, 2010, 2015 ah nihvei kuangluii aa, khatvei a gualzo te in, mi muanhuai dangte awn un laa, 2020 teh kuang hong lui sawm nawn kei un. Mi dang khat na T.A, D.A khaamdan uh hawh un.
3. Party khat or adang party khat tawh, 2010, 2015 ah nihvei a gualzo te in, huaiham toto nawn kei un laa, mi muanhuai dangte awn un. Term nih sung ih gam leh ih minam ading kasep bang om hiam/ cih lung ngai kik un la, kisuang thei un.
4. 2015 aa meetang 1000 ciang ngahzolo te ki pan nawn kei un. Zumhuai hi.
5. 2020 kum kuangluii nuam te in nang leh nang kisit tel in. Ka qualify hiam? College khat pepeuh or University khat ah sunsang (Day Student) kah ngiat in, Bachelar Degree khat ka ngah hiam? Master Degree e? Doctorate Degree tawh zong?
6. Distant learning or correspondent beek (Even) tawh Bachelar Degree, Master Degree, Doctorate Degree ka ngah hiam kisit pha un. Biakna lam pan degree ngah te bel tuam ngaihsut phot ni. Doctor tamlua uh.
7. Kumpi nasep sungah bang za ciang kasem ngei hiam? United Nations Branch khat pepeuh ah e, kasem ngei hiam? NGO, INGO, CSO, ICSO khat peuhpeuh ah e leh ka sem ngei hai? Zum ki ci khat ah Sabuai, tutphah tawh ka tu ngei hiam?
8. International experience bang teng ka nei aa?
9. Ei pau zangh lo te tungah, deihna pulak theih nading, Kawlpau, Mangpau, Senpau, Kalapau…etc bang teng ka thei aa?
Biakna sia te ngaihsut ding
1. 2010 leh 2015 kum kitel lai bangin, guptuam, paihtuam party neilo ding.
2. Ihgam ihlei hong zuun hong lamto ding maakai hoih Topa in hong piak nading Topa Pasian tung thungen ding.
3. Telcing M.P. khat pepeuh Pasian lamlah na bang aa a kalsuan theih nading Thupha pia in Thunget sak ding.
4. A hunhun in, ih M.P. te hangsantak in, kamsangpa Nathan in, kumpipa David a thuhilh bang in thuhilh ngam ding. Khupkhan Thang Taithul (Norman, Oklahoma, U.S.A)
Comment piaknop aomleh...