“Ci” Na Bang Un

“Ci” Na Bang Un

“Ci” a limna thu kigen ngeilo aa, ahizongin “Ci” hangin Meh in minthanlawh zazen hi.

Tualeh bang hangin “Ci” na bangun cih vaikhakna LS sungah om peuhmah hiam? Bang teng adeihna hiding hiam? Mihingte’ in ihdeihna teng genni cileng tampi om kha ding hi. Ngaihsutna tampi om kha ding hi. Kenzong kei mimal ngaihsutna kong gen nuam hi. Tampi takmah ih ngaihsutna te ki tukalh kha lai ding hi. Ahoih theipen ngaihsutna aneih kitam mahmah ta ihih manin a hoihtheih penin ei le ei in ih sepding ka deih man ahihi.

C = Ci om lo sa limlo cih Zolai sungah ih sinkha ngei hi. Man kasa mahmah hi. “Ci” omkei leh minthanna Meh in na ngahhetlo ding hi. Leitung keukhat panin Zomite’ ading, Pasian ading in nasep theih sunsun hun piatak in nasepna pen “Ci” namkhat na hi aa, tuabang na sep manin nang na minthanloh hangin na mipihten na minthanlawh na hibek hi. Tuapen “Ci” namkhat na hihna ahihi.

Zomite’ sungah Ph.D ngahtampi tezong amau leh amau ki tungding tampi om kha mah ni. Ahizongin a tamzaw te kipatna pen mihau leh milian sungpan na hilo ding uh hi. Ei le ei ki mitsuanna om masa ngeilo Zomite’ ih hihi. Upna tawh kalsuan cih kammal pen ih kam in zuih manggawpta hi. A taktak in Upna tawh kalsuan cihpen Lam-etna leh ngimna lianpi ihneihna thugil na hi gige hi. Tuabangteng a tangtungsak nuam vilvel Zomite ihihi.

Adah huai thukhat ah Zomite’ sungah aomsa thu puahding leh zuunding sang’ in a thakkhat ding khia ding cihpen tamsimsim ta hi. Tuabang ngaihsutna pen ei le ei ki mitsuana leh ih thupitzia, ih nasiatzia te mite in hong theihding, hong zahtaak pha mahmah ding cih ngaihsutna na hilel tak hi.

A taktak in ei hangin ih mipihten hamphatna angah takpi mah hiam? Phattuamna angah takpi mah hiam? Ki lemna kumpi ih hitakpi mah hiam? Puahto cihpen ih khankhiatna( puankek pi belhtuah cihbangte..,puah) ahih hangin tuhun ciangin puah( puan a kikhuina kekkhat zong) cih limlim pen ki zadah pianmawk hi. Ki pawlna leh ki thutuakna te puahtoh semsem ding cihsang’ ei le ei ding ziau ding, mi tamta kei leh ding pongpong ding cihna lungsimpen ih pianpih lungsim hilo ahih manin ngaihsun nawndah ni.

“Ci” pen amah leh amah ki pholak ngeilo hi. Ama hangin mite( Meh) in minthanlawh ding ngaihsutna lungsim tawh khangkhia ngiat hi. Ei hangin phattuamna mite in a ngahding lungtup pen hisak dihni. Tukum pan kisin dihni, bang ih suakpeuh mah hiam? Ih khanto, ih khangsuk zaw hiam? Ei le ei ki gengen na pen na thupi hetlo hi.

Tomkal sung ih nuntakna ah “Ci” namkhat ih hihzawh na ding mimal ngaihsutna ah Pasian lungsim siang hong piata hen.

Thawn Tuang
Zomi Angvaan