Christian Hymn te’ tangthu: Zeisu’ Min Manpha Na La In

Take the Name of Jesus With You (Colossians 3:17)
Lydia Baxter (1809-1874)
William H. Doane (1832-1915)

A khan tawn phial lupna ngaka dam lo ahih hangin, Lydia Baxter pen Pasian nasepna ah a hahkat mahmah mi ahi hi. America gam Petersburg, New York ah September 8, 1809 ni-in suak hi. A khangno lai mah-in piangthaka, a sanggamnu tawh kopkhawmin a khua uh Petersburg, New York ah Baptist pawlpi khat a pian nadingin a pangpi-in na om uh hi. Pasal nei a, a lawmpa tawh New York ah kituah uh hi. Tua lai-ah Pasian’ading a nasepna mah hanciamin zomsuak hi. A inn uh Pasian’ nasem thuhilhsiate, evangelist-te, Christian worker-te’ kikaihkhopna mun suak hi. Tua bang mite in ama’ thukuppihna leh ngaihsut piakna thupisan mahmah den uh hi. A inn ah hawh a, a lupna ah i va hopih pen amah hehnep nading leh thapiak nading sangin ama’ tung pan tha thak lak nading hizaw hi, ci-in a lawmte in gen thei zel uh hi.

Laisiangtho a kan mahmah khat hi a, Laisiangtho sunga minte’ khiatna peuh a lawmte tawh kikum thei zel uh hi. “Jacob a suah ding ciangin amah a suah masak zawk theih nadingin a upa’ khe len geigai hi. Tua bangmahin a min mahmah zong Jacob kiphuaka, a khiatna pahphot pen ‘tuhkhiapa’ a cihna ahi hi. Abraham leh Sarah-te in a teek nung a guai nungun ta nei ding cih a theih uh ciangin a piang thei lo ding na khat hi ci-in nuikhia uh a, a tapu uh a min ‘Isaac’ kici pah hi. Jacob’ tapa 12 te bang amau’ pian lai-a thupiangte leh a nute mahmah uh a kidemnate uh leh a minte uh kipaiikaan luakeii hi” cihbangin gen pahpah thei hi.

Mrs. Baxter in a lawmte’ kiangah, “‘Samuel’a khiatna pen ‘Pasian’ tungah ngen’ a cihna hi” ci-in gen thei zel hi. “Hannah a cih teh ‘hehpihna,’ Sarah a cih teh ‘kumpinu,’ Naomi a cih teh ‘kilawmna’ a cihna hi” cih bangin gen thei zel hi. Ahih hangin ama’ ading “Zeisu” cih min bel na khempeuh hi mai hi. Dam het lo napi-a bang hangin lungdam thei veve hiam cih a kidot ciangin, “Ke’n galvan tuamdang khat nei hi ve’ng, Zeisu’ min ai ve. I galpa in i lungkiat theih nadinga hong ze-et ciang Zeisu’ min ka lawh ziau teh hong neh thei nawn lo hi. Zeisu’ min a khiatna ‘Honpa’ a cihna hi a, Hebrew min Joshua leh Joash-te tawh a kammal bul kibang ahi ve” ci-in gen thei zel hi.

Mrs. Baxter in hih la, “Zeisu’ Min Manpha Na La In” a sih ma kum 4 lai-a a lupna tung mah-a a phuah hi, kici hi. Amah New York City ah June 22, 1874 ni-in si hi. Gospel lamal dang tampi a phuah hangin tuni donga kisa lai bel hih la bek mah om mai hi. 1855 kumin zong Gems by the Wayside kici devotional poems kikaikhawm labu khat khenkhia ngei hi.

Mrs. Baxter in hih la a phuah zawh a sawt lo-in William H. Doane in a la-aw ding phuak pah-a, William Doane leh Robert Lowry-te’ bawl Pure Gold kici labu sungah 1871 kumin kihel pah hi. Moody-Sankey-te’ cialpite ah kinaksak mahmah a, tuni dongin evangelical pawlpite ah kisasa lai hi.

Hih la a aw a phuak Wiiliam Howard Doane bel February 3, 1832 ni-a suak ahi hi. High School a kah laitakin piangthaka, Baptist pawlpi sungah lawptakin lay-worker sem hi. A khangno lai-a kipanin singtawh nasepna tuamtuam a bawl J.A. Fay and Company tawh kizom dena, 1860 kumin Cincinnati, Ohio ah a nasep tuah a, tua lai ah president suak hi.

Tua banga company president a sep lai-in nidanga om nai lo vanzat nam 70 val phuahthak hi, ci-in kiciamteh hi. Cincinnati mah ah tengsuaka khuasung tuisung leh pawlpi sungah makaipi khat-in om hi. Kum 25 val sung Mount Auburn Baptist Church ah Sunday school superintendent sem hi. Music zong tampi phuaka, ahi zongin nuntak zonna-in nei ngei lo hi. La-aw dawng 2,200 val phuaka, labu 40 val kaikhawmin khenkhia hi. Christmas lasaupi catata zong tampi phuak hi.

Music lama a hanciamnate pahtawina in Denison University in 1875 kumin pahtawina Doctor of Music Degree pia hi. Tuni donga kisasa gospel la ngaih tampi phuaka, tuate lakah, “A Sia Ding Honkhia In” (Rescue the Perishing), “Hong Paisan Ke’n Migi Topa”(Pass Me Not, O Gentle Savior), “Nang A Hi’ng, Topa”(Draw Me Nearer), “Singlamteh Kiang”(Near the Cross), “Pasian’ Min Pha Ta Hen”(To God Be the Glory), “Zeisu Min Manpha Na La In” (Take the Name of Jesus), “Thungetna Hun Pha” (’Tis the Blessed Hour of Prayer), “I Ngak Laitak Hong tuak Diam?” (Will Jesus Find Us Watching?) cihte kihel a, a tamzaw-in Fanny Crosby’ laphuahte a aw phuahsak denzaw hi. Elizabeth Prentiss’ phuah la “Hong Itzaw Ning Topa” (More Love to Thee) zong a la-aw ding phuahsak hi.

Sum leh paii hau mahmah napi-in kiniamkhiat mahmah a, Pasian’ nasepna ah a hihzawh zah-in Christian lay-worker khat-a pang den mi ahi hi. Pasian’ nasepna adingin sum tampipi pia den hi. Cincinnati YMCA hall-a pipe organ zong ama’ piak mah hi a, Chicago-a Moody Bible Institute ah Doane Memorial Music Building a kilam nadinga a kisam sum khempeuh zong ama’ piak mah ahi hi. December 24, 1915 ni-in South Orange, New Jersey ah Topa’ kiang hong zuatsan ta hi. A nuntak sung tawntung Pasian in nakpi taka a zat mi ahi hi.

Rev. Zam Khat Kham
Christian Hymn te’ tangthu 2005