Christian Hymn te’ tangthu: Thumaan Ning

Christian Hymn te’ tangthu: Thumaan Ning

• I Would Be True (Late 119:30)
• Howard A. Walter (1883-1918)
• Joseph Yates Peek (1843-1911)

Khangnote’ a diak dingin hih la zah-a hoih la dang tam lo ding hi, ci-a kiciamteh la khat ahi hi. Hih la a phuah laitakin la phuakpa Howard A. Walter kum 20 val deuh pha pan hi. Tangvalno khat’ phuah ahih hangin tuni donga kiphuaksa khangnote’ la khempeuh lakah a hoihpen khat ahi hi.

1906 kumin Howard A. Walter Japan gamah Manglai hilh dingin pai hi. Waseda University ah Manglai hilh dinga a pai laitakin inn a tunkik cianga a nu a lah theih ding a nuntakna-a a bulphuh thu (philosophy of life) gelhkhiat ding lunggulhna khat nei hi. Poem-in gelhi-a, a masa taang thumteng “My Creed” ci-in thulu pia hi. A nu Mrs. Henry Walter in a tapa’ lungsim taktak a muh ciangin lungdam lua mahmah a, Harper’s Magazine ah khaka, 1907 kum May kha-in tua magazine sungah kisuaksak hi.

1909 kum khuakhal sungin Howard Walter in a gelhsa “My Creed” Methodist lay-preacher Joseph Yates Peek lak hi. Peek bel music sinna kician nei hi lo hi. Ahi zongin tua lamalte enkawm-in a muktumin a la-aw ding singsiit hiauhiau pahmawk hi. Peek in a phuahsa la-aw a note-a a gelhkhiatsak dingin organist leh laphuak minthang a lawmpa Grant Colfax Tullar cial hi. Howard Walter in hih la a phuah cil-in taang thum bek hi a, a taang lina bel kum tampi khit cianga a behlap ahi hi.

Howard A. Walter bel America gam New Britain, Connecticut-ah August 19, 1883 ni-a suak ahi hi. 1905 kumin Princeton University pan a sang man hi. Tua khit phet-in Japan gam Waseda University ah laihilh dingin pai hi. America gamah a ciahkik ciangin Pasian’ nasem dingin Hartford Seminary ah sangkah hi. Congregational Church pawlpi in ordination pia a, Hartford, Connecticut a Asylum Hill Congregational Church ah kum thum sung assistant minister sem hi. 1913 kumin YMCA executive staff ah lut-a India gam Lahore-a Muslim sangnaupangte’ laka nasem dingin pai hi. 1918 kumin cisa natna (influenza epidemic) nasia tak tunga Howard Walter zong ban kha ahih manin nang zo lo-in a nuntakna bei vat mawk hi.

Howard A. Walter’ nuntakna bel kum 20 vel deuh a phak lai-a “My Creed” ci-a a gelhkhiat mahbangin a etteh huai taktak nuntakna hi, ci-in kiciamteh hi. Hartford Seminary in a sangnaupang ngeite’ laka a pahtawi huai mi thupite’ min kigelhna “honor roll” ah guanga, tuni dongin kimu thei lai hi. New Britain, Connecticut-a om a neutunga kipana a omna pawlpi, the First Congregational Church of Christ in zong pahtawina pia uh a, hih la a taang masa tegel a kigelhna phawkna suangpek khat February 16, 1926 ni-in tua biakiin-ah kisuang hi.

Hih la aw a phuakpa Joseph Yates Peek bel America gam Schenectady, New York ah February 27, 1843 ni-a suak ahi hi. Methodist pawlpi sungah lay-preacher khat hi a, music sinna kician a neih loh hangin a nuntak sung tawntung music uk mahmah den hi. Violin, benjo leh piano-te tum den hi. March 17, 1911 ni-in si a, a sih ma kha nih pawl-in a nuntak sung bup-a a lunggulh mahmah ahi ordination kipia hi.

Joseph Yates Peek in hih la-aw a phuahna ah panpih-a notation & harmonizing a bawlpih Grant Colfax Tullar bel “Face to Face” (Topa Tawh Maitang Kimu Ding – Xtian La No. 365) la-aw phuakpa ahi hi. Amah August 5, 1869 ni-in America gam Bolton, Connecticut ah suak hi. Kum nih a phakin a nu in sihsan hi. A neu lai-in a nuntakna haksa mahmah hi. Kum 19 a phak laitakin zu khama a omna pan Methodist camp khat-ah piangthak hi. A sawt lo-in lasak a vak lam kiphawka, organ tumin lasa-a, la-aw zong tampi phuak hi.

Methodist pawlpi ah ordination kipia a, cialpi bawlna lamah a kipiak ma-in pawlpi khat-ah pastor sem ngei hi. Evangelist Sam Jones, Major George A. Hilton leh evangelist minthang dang tampi tawh kithuah hi. Isaac H. Meredith tawh kikopkhawmin Tullar-Meredith Publishing Company phuan uh a, tua lai-ah kum 30 val president sem hi. Pasian phatna labu tampitak khenkhia-in hawmkhia uh hi. Tua labute sungah ama’ phuah la tampi kihel-a, “Nailed to the Cross,” “Shall I Crucify my Savior?” a cih late minthang deuh hi. Rev. Zam Khat Kham (Christian Hymn te’ tangthu 2005)