Tuhun tawh kisai ka ngaihsutna ~ Dr. Ngul Khan Pau

Tuhun tawh kisai ka ngaihsutna ~ Dr. Ngul Khan Pau

Arab mite paunak in, “Na domkhiat zawhloh suang pen zahtak (nam) in,” (The stone which cannot be lifted should be kissed) a cih bangun, ei deih ei gup in hong zawhloh ciangin kiko, kigim neihna in i zat loh ding thupi hi. Tua mah bangin ei gup ei deih in hong zawh ciangin zong uang lua-in i om loh hoih kasa hi. Ei deih hong deihpihte zong i lawm hoih pen na hi khin tuan lo hi. Vai khat ah i kituah hangin vai dang khawngah i kituahpih pen dingte kituan lo thei hi.

Winston Churchill in “Galte na neih hiam? Hoih ei, bang hiam khat dinpih nuntakpih cihna hi,” (You have enemies? Good, that means you’ve stood up for something, sometime in your life) ci hi. Galte i et dan kibang lo ding a, hong langpan (oppose) om kei leh thudik thuman kimu lo ding hi. Tua hong langpan manin kipum muhdah cih pen picinna hi lo a, ei tawh kipawl lo mi peuhmah mudah ding hi leng i muhdah ding leitungah tamlua ding hi.

Tua hangin Arab mite paunak mah in, “Nang tungah thusia buaina hong kibawl khempeuh sehnel tungah gelh inla, ahi zongin hoihna phatna hong tung khempeuh suang tungah gelh in,” (Write the bad things that are done to you in sand, but write the good things that happen to you on a piece of marble) ci uh hi. Maisak loh ding mi na neih leh na maisak lohte’n lah na phawk se lo dingin nang a maisak lo mi a gimzaw na hi hi. Paunak khat in, “Maisak lohna pen gutui (poison) dawn tawh kibang a, i maisak lohte a si ding i sak leh ei a guitui dawn pen in kisihpih ding hi,” ci hi.

Jodahte paunak in, “Khuaimeivak (candle) khat lei nadingin tungsun ni (sun) zuak ken,” (Don’t sell the sun to buy a candle) ci uh hi. Khuaimeivak le ni manphatna kikhinkhai ding hi leh gen ding hi vet lo hi. Na lungkim loh manin na manpha suplawh ken, a manpha het lo khat neih nadingin a manpha mahmah khat zuak khak ding lauhhuai hi. Beh le phung khawng, i Khristian hihna khawng khuaimei lei nadingin i zuakkhak loh ding deihhuai hi. Nagaland ah ciamnuih a kigen khat, “Vote (mee) khiat ni in misite zong hong nungta kik uh hi,” ci uh hi. Topa’ hong paikik manin thohkikna hi loin zuau bulom tawh gualzawh ding ngaihsut manin misite zong vote piasak uh hi. Tua hangin i gamsungah Pasian sunni hong tang nawn loin khuaimei vak kiaukiau bek hi.

Kenyate paunak khat in, “Thagum zanga mi a nawkgawp mipa in ngaihsutna kizat ding lau hi,” (A man who uses force is afraid of reasoning) ci uh hi. Ngaihsutna zat ding nei i hih leh lungdamhuai in, ngaihsutna nei i hih hangin zat theih loh ngaihsutna ahih ding zong kidawphuai a, tua ciangin ngaihsutna kikupkupna panin hong piangkhia thu pen thu manpha zuihtak thu hi nuam mahmah hi.

Tua hangin Democracy gamte ah “Parliament system of governance” ngaihsut sunkhop-kupkhop ki-ukna ahi hi. Tuni dong i paizia pen kikupkhop i kam tawh i cih hangin i ngaihsutna a kituah loh ciangin kikhen kibalna in i nei uh hi. “Debate” thu khat a hoizaw ding muh nadingin kinialna kitung thei nai lo hi. Lailam ah sangpipi i zawh hangin i lungsim ngaihsutna na kawcik mahmah lai cih bang om thei hi. Kei ngaihsutna nong sansak kei ding uh leh ci a kitaisan cih pen picin lohna namkhat hi.

Tua kong gente kei ngaihsutna ahih manin na thukim kei leh zong i muhzia kibang lo hi lel hi. Judahte mi nih a om leh ngaihsutna nam thum om cih kitung hak mahmah lai ding hi. Ei mite mi nga i om leh zong ngaihsutna khat kia paipih kisawm lai hi. A hoih pen zui thei a, amau ngaihsutna khek theite mipil hi. Topa in mimal a sim khempeuh pilna cimna thupha hong pia hen. Rev. Dr. Ngul Khan Pau