Christian Hymn te’ tangthu: Lam tawntung a hong paipih hi

Christian Hymn te’ tangthu: Lam tawntung a hong paipih hi

All the Way My Savior Leads Me (Late 37:23)
Fanny J. Crosby (1820-1915)
Robert Lowry (1826-1899)

Christian hymn-te laka a kideihpen den hih la bel a phuaknu’ thungetna Pasian in a dawnna hanga lungdam kohna la ahi hi. A kigenna ah ni khat, Fanny Crosby dollar nga kinak sap lua mahmah hi, ci hi. Tua sum koipan ngah ding cih lah thei mahmah lo hi. A hih ngei mahbangin thungen hi. A thunget zawh a sawt lo-in a kongkhak-ah cikmah-a a muh ngei loh mi khat hong dak hi.

Tawmvei sung a kiho khit uh ciangin a leenglapa ciahkhia dingin kithawi hi. A khut uh kilen uh-a, tua pa in Fanny’ khut sungah banghiamkhat nusiat hi. Fanny in ama’ kisap bangbang a sepsak nu kiangah, “Hong pai sin aw, i leenglapa in ka khut sungah banghiamkhat hong nusiat veh aw, hong etsak sin” ci-in sam hi. A et uh leh $ 5 dal khat na hi lian hi.

A thungetna Pasian in dawng hi, cih Fanny in thei lian hi. Tua mipa’ lungsim sungah $ 5 lian mah piaknopna lungsim guan hi, cih thei hi. Lungdam lua mahmah hi. Tul sawm tul za a kipiak sangin lungdamzaw hi. Banghang hiam cih leh ama’n $ 5 lian a nget hi a, a Topa in tua a kisap sum pia dingin a hunlap-in mi khat sawl lian hi.

Lam tawntunga a makaih zia, a paipih zia ngaihsunin lamdangsa hi, lungdam lua hi. Tua lai mah ah tua lamalte phuak pah hi. Dr. Robert Lowry in a la-aw phuaka leitung bupah kizel-in mite’ deihpen la khat hi den hi. William H. Doane leh Robert Lowry-te’ kaihkhop Brightest and the Best kici labu sungah kihel a, a kikhet masaknapen ahi hi.

Hih la phuaknu Fanny Crosby’ tangthu i gensa tampi om khin hi. Ahi zongin hih laibu lem kawikawi-a i zonzon ding buai huai ahih manin a tomin i genkik veve ding hi. America gam Southeast, New York ah March 24, 1820 ni-in suak hi. Kha khat leh a lang (nipi kal 6) a phak ciangin a mitna-a zatui kinuh khial a hih manin a mit taw-a, a khan tawntung mit khua mu lo-in om hi.

A sih dongin New York City a St. John’s Methodist Episcopal Church ah pawlpi mi citak mahmah khat-in om den hi. A neutunga kipan in a pi in thu le la kici khempeuh ah pantah hi. New York School for the Blind kici mit khua mu lote’ sangah pilna sin hi. 1847 kum panin 1858 kum dong tua sang mah ah sangsia sem hi. 1958 kumin tua sanga mite’ zahtak mahmah music sia Alexander Van Alstyne tawh kiteng uh hi.

A neu tunga kipan in laphuah lam a vak hi a, ahi zongin leitung la pian vive hizaw hi. Church music lam-a minthang mahmah William B. Bradbury’ thuzawhna tungtawnin kum 40 a phaka kipanin gospel lamal bek phuaka, ama’ genna ah “tua gam sunga a lungnuampen mi” hong suak hi. Fanny Crosby in la a phuah ciangin khukdinin thungen-a Pasian’ makaihna zong masa lo peuhmah-in phuak ngei lo hi. A Laisiangtho sungah American lan (flag) khat tep liklek den se hi.

Ama’ hun-a gospel laphuak minthang mahmah Ira D. Sankey, William H. Doane, John R. Sweney, George C. Stebbins, George F. Root, William J. Kirkpatrick, leh adang tuamtuamte tawh kithuah-in la tampi phuak hi. A khan sunga a laphuah pongpong dawng 8,000 val hi, ci-in kiciamteh hi. February 12, 1915 ni, ama’ kum 95 a phak laitakin i Topa’ kiang hong zuatsan hi.

Fanny Crosby’ phuah late lakah hih la “Lam Tawntung A Hong Paipih Hi” (All the Way My Savior Leads Me) banah, “Lungmuanna Thupha” (Blessed Assurance), “Amah Thei Ning” (My Savior First of All/I Shall Know Him), “A Sia Ding Honkhia In” (Rescue the Perishing), “Pasian Min Pha Ta Hen” (To God Be the Glory) cih la ngaihte kihel hi.

A la-aw phuakpa Robert Lowry bel March 12, 1826 ni-in America gam Philadelphia, Pennsylvania-a suak ahi hi. Thuhilhsiam-a minthang Baptist pastor khat ahi hi. America gam Nisuahna kuama Baptist pawlpi minthang tampi ah pastor sem ngei hi. Music leh hymn bel ama’ uk hi a, ahi zongin nuntak zonna a nei ngei bel hi lo hi. William Bradbury a sih ciangin Biglow Publishing Company in music editor sem dingin cial hi. Ama’ hawmkhiat laibu leh labute hangin America gam ah biakna la khang mahmah hi, ci-in kiciamteh hi.

La dawng tampi ading la-aw ngaih mahmah tampi phuak hi. Tuate lakah hih la “All the Way My Savior Leads Me’ (Lam Tawntung A Hong Paipih Hi) banah, “Savior, Thy Dying Love” (Hong Honpa Na Sih Dong), “We’ re Marching to Zion” (Zion Khua I Pai Hi) cihte kihel a, a lamal mahmah a phuahte’ lakah “Christ Arose” (Han Thuk Sungah Lum Hi), “Nothing But the Blood” (Bang Dang Hi lo, Zeisu Si Hi), “Shall We Gather at the River?” (Gunpi ah I Kikhawm Ding Hiam?) cih late kihel hi. Rev. Zam Khat Kham (Christian Hymn te’ tangthu 2005)