China ah acitak naupang khatin sangkah nading pahtawina sum 10,000 ngah

China ah acitak naupang khatin sangkah nading pahtawina sum 10,000 ngah

Cihtakna pen hunkhatciang agah kimukik theihi. China, Henan Province sung Xinmi khuapan High School sangnaupang khatin acihtakluat manin pahtawina Yuan 10,000 (US$1450) ngahlawh hi. Tua sangnaupangpa minpen Chen Yifan hi a, tukha kipatlam nikhat a setbing (Electric Bicyle) tawh khuasung avaklaitak mawtaw akhawlkhat nawkkha citciat hi.

Tua mawtaw pen atamman mahmah BMW Luxury mawtaw khat hi a, anunglam etna Side Mirrors nawkkhaksak citciat hi. Mawtaw asungah kuamah omlo in, ama nawkkhak lamzong kuamah in mulo hi. Ahi zongin alung nuamhetlo a, laidal tungkhat ah mawhmaina ngetna lai gelhin, sum a ipsung ah aneihkhempeuh agawmtuah ciangin Yuan 311 pha a, tuateng tawh nutsiat hi.

Lai anutsiatna sungah “Uncle aw, na mawtaw nawkkha kahih manin khialkisa mahmah ing. Keipen sangnaupang khat hipan in, hun awngsung in nasep asemkawm khat hi ing. Na mawtaw maan kanawkkhak liausum dingin sum tawmcik na nusia ing. Hihsum pen kicing hetloding cih kathei hi. Ahi zongin kaneihteng khempeuh kanutsiat hi a, hongna maisak in” cih akhiatna anei laikhat leh China Yuan 311 nutsiat hi.

Mawtaw neipa in a mawtaw omna ah apai ciangin tua sumleh lai mu a, lamdangsa in alungsim lawngmahmah hi. Tua naupangno in a mawtaw anawkkhak pen hetlolualel ahih manin tua laidal zong nuaicip in paiziau hi.

Ahi zongin hih naupangno khat ii cihtakna a ngaihsut kikkik ciangin thupisa ahih manin, tua apaihsa laidalno tawmkik in, zonkhiatding leh pahtawina piakding hong ngaihsun hi.

Local Police te tungtawn in akansakleh kankhia theipah bilbel uhhi. Naupang ii anu leh apa te’n atapa in mawtaw tamman mahmahkhat nawkkha cih Police te tungtawn in atheih uhciangin lunghimawh in apuahkikna asumbei te ahithei bangbangin hongzaw nung ci uhhi.

Ahi zongin mawtaw neipa ii lunggulhpen liausum ngending hilozaw ahih manin, mawtaw bawlkikna pekkhatzong piasak vetlo hi. Tuabek thamlo mawtaw neipa in atanu sum China Yuan 10,000 apiading in sawl a, tua naupangno ii sangkah nading ci’n piasakmawk hi.

More: China ah mopawi bawlma akimawl, akidelhleh monu inntung pan kia in si

Sangnaupangpa leh a innkuanpih te’n sangnuampak hetlo uh a, ahi zongin palik te leh venghausa te’n agenpihpih uhciangin asumpiak sangngam pan uh cih South China Morning Post pan kiza hi. Cihtakna, migitna in hunkhat ciangin agah omveve hi. ZD Sawltak #zomidaily