Georgia Cik-Nawngpi (Swamp)
Hih US gamhuam Georgia gamke-a a thang mahmah Nawngpi (Swamp) pen tuma kum 6500 laipan themthem hong ki behlap toto-a tu-in North America ah a lianpen Blackwater Swamp in ki ciamteh hi.
Hi mun pen tanglai in Atlantic tuipi nawl hi-a tua hunlai aa tuipi pangto teng tui in a neknek na-in bawltawm bangin phung saupi (Coastal terrace) hongpiang hi.
Khuahun ki hei-in tua munteng tuipi tawh tai za bangin hong ki gamlat ciang tua phungsau pi in guahtui te khakcip in a taw ah singmuat lomuat pan-a hong piang leiman (peat) ten tui khak a hih man in a lian mahmah tuikuang-daipi (shallow basin) bang-in hong piang hi. A sawtna ciang a lian mahmah nawngpi(swamp) in hongpiang a hihi.
Hih nawngpi pan-in Gunpi (river) nih St. Marys River leh Suwanee River hong ki pan khia-in Suwanee gunpi in hih cik pan-a phul tui-i 90% pen Gulf of Mexico tuipi sung-ah luansuk in 10% pen St. Marys Gunpi in Atlantic tuipi sung-ah luansuk hi.
Okefenokee cih minpen Native American te pau hi-in A Linglawng Leitang (Land of the Trembling Earth) a cihna hi. Lian mahmah in 438000 acre in zai-a a kawm ah Vompi, Sakhi, Saham, Vasingdangtu cihbang ganhing namkim 400 val om ci hi.
Hih cikpi lianlua a hih man-in a sungah khangkhat bang i om hang i muh khit zawhloh ding na tampi omlai dinghi ci-uh hi. Mitkha tawh a mu nuamta dingin a nuai ah tom-kim-cing in ki en thei hi. Andrew Khai
Comment piaknop aomleh...