Child Prodigy

Child Prodigy

Mihingte i pian khiat tungin mihing ngeina hi ding maw hi lo ding cih kigenkhawl thei lo hi.Kum 4/5 khawng ciang pumpi lungsim a khantoh dan tawh kizui in ki ngaihsun thei pan hi.Mihing a tuam dang deuh om se uh hi.A pianzia uh mi tawh kibanglo, mi sangin sang deuh aihkeh niam deuh cih khawng.A lungsim uh mi sangin hat diak cih khawng om thei hi.Naupang a lamdang diak te ‘Child Prodigy’ kici hi.Hih dan naupangten midangte sangin na khat peuh siam baihzaw uh hi.

Child Prodigy pen letsong Gift nam khatin ki ngaihsun thei hi.Hihdan naupangte a kum uh a cinma in lamdanna khatpeuh nei hamtang uh hi.Leitungah hih dan naupang piang gen ding bangzah hiam khat om hi.Pawlkhat bang power nei mah bang liang uh hi.Music lama mi minthang Wolfgang Amadeus Mozart bangin kum 4 bek a phak lai in hilh kuul lo in harpsichord tum siam hi.Kum 6 a phak ciangin a opera masa pen ‘Bastein and Bastienne’ zosiang ta hi. Italian Painter minthang Primo Conti in kum 11 a phak in ama’ lim a gelh pen leitunga a man tam pen pawl ahi hi.Kimawlna lamah zong Russian Gymnast Nadia Comaneci in kum 14 a phak in 1976 Montreal Olympic ah perfect score 10 points nihvei score hi.Leitunga perfect score a bawl lakah a naupang pen a hih banah a kizawma bawl thei omsun ahi hi.

Christian Heinecken, kum zalom 18 na hun laia German Child Prodigy, The infant of Lubeck’ kici zong kaal 6(six weeks) bek pha pan in German pau siam cihtakin siam ta hi.Kum khat a phak ciangin ‘Pentetauch’ hoih takin sim thei ta hi.Kum thum a cinma in Laisiangtho bup sim zo hi. History , geography, leh mathematics siam mah mah hi.Tua banah Law leh Anatomy lam zong siam peuh mah hi.Kum lip ha pan in si hiau mawk hi.

Daniella Ferguson- pen Dt 17th June 1914 in Sweeden ah piang hi.A pian tungin zawngkhal peuhmah ahihmanin a nu leh pa ten a hin ding zong lam-en ngamlo phial uh hi.Ahizongin kaal nih khawng hong phak ciang hong hoihto in nawi khawng hong tep thei hi.Tuaciangin ma hong sawnto zel in muhtheih zah phial in khangto hi.Kaal li a phak ciangin pau thei in lam pai thei hi.Amau singtanga teeng ahihman un a nu leh pa ten dawi nasep hi dingin um mawh uh a, siampi kiang paipih deep uh hi.Kha nih a phak in naupang kum 10 te hih theih khempeuh hih thei kim ta hi.Pau tuam tuam nam nga in pau thei hi.Tua pau te pen kuaman sinsak het lo in ama’ thu in siam ziau mawk hi.

A nu leh pa patau in siavuan te kiangah paipih uh hi.Siavuan kiangah a paipih un kha li mi bek himahleh naupang golpi khat hi ta hi.Tua sia vuan pa tua naupang nu in leh hilh zawsop mawk hi.Siavuan pa’n zong a cih nang thei lo in,”na tanu un kei sang thei zaw e” cihsan ziau hi.Kum khat a phak ciangin pau nam 15 siam takin pau thei ta hi.Piano siam takin tum thei banah lim gelh siam mah mah hi.A meel zong naupang kum 10 mi mah bangta hi.

Daniella-in midangte lungsim ngaihsutna thei thei mikmek mawk hi.Tua banah mai lam hun thei khawl thei hi.Sik lam lim lim pen en leh kawi zo liang hi.Sikkeu leh iron rod khawng a ngaihsutna bek tawh kawisakzo hi.A sangkahna laisin thupi salo lua a hihmanin tawp hi.A sang sia ten misiam te etdiksak dingin ngen uh a, a nu leh pa ten phallo uh hi.Kum nih a phak ciang a lungsim leh pumpi khang mah mah ta hi.A lamdang khatah a lu ah sam po vet lo hi.Mi lamdang khat ahihmanin a nu leh pa lungnuam thei lo uh hi.A khuapih te un zong a tate utawh kithuah ding phallo uh hi.Kum thum a phak ciang a nu leh pa ngaihsutna control thei ta hi.Zan ciangin amah bek in a om laitak nangawn in phun phun niloh hi.A ihmu ngeilo ding tawh kibang liang hi.

Kum 5 a phak ciangin khangno kum 14/15 kiim pawl mah bang ta hi.Mi lakah a om ciang miten lamdangsa in en thapaai uh ahihmanin nuamsa lo hi.Tua ahihmanin amau in ah kikhum den mai hi.A nu leh pa in a cihna ding uh thei lo in Hostel ah koih sawm uh hi.Tua hostel ah a koih sawmna thu uh thei khol mawk hi.A utlohna thu gen in hostel ah ni nih val a om loh ding lam hilh hi.Ahizongin a nu leh pa ten koih veve uh hi.Ni nih khitciang Hostel Warden in naupang dangte laka om ding hi kei ci in a inn ah kha uh hi.Tuaciang inn ah om in piano khawng peuh tum zel hi.Kum 6 a phakna ding kha nih khawng bekin a sap laitak khatvei inntuala om pen inn sungah lut nawn lo hi.

A nu leh pa ten sawtpi zongin a muh loh ciangun a vengte uh dong kawi kawi in amau lah a mu om lo hi.Thunei te kiang zasak in khawtangin zong ngeingai uh hi.Sawtpi a zon hang un mu zo tuan lo uh hi.Tuaciangin Sweeden naupang lamdang ‘The Swedish Wonder Girl’ a mang suak ving veng hi mai hi.Daniella-in a man ding thu a nu leh pa kiang genkhol ngei hi.A thu gen kholh bangin tangtung petmah hi.A man dan pen mi pawlkhat in kumpi lam thunei ten amah sincian nuam in gu uh hinteh ci uh hi.Pawlkhat in bel amah pen leitung danga mite aihkeh dawite bawl hi dinga amau kiangah ciahpih kik ta uh hi ding in ummawh uh hi.

Pau Tun Thang